Distrik Hebouhebou—Hereva Momokani Ia Hahedinaraia Dalana Hereadaena
1. Israela taudia ese idia karaia ariadia ai, dahaka mai anina bada hereva momokani idia laloa bona herevalaia?
1 Idaunegai Israela taudia be aria karaia totona lagani ta lalonai nega toi idia hebou. Ena be tatau sibona be unai aria idia lao, to nega momo edia ruma bese ida Ierusalema idia lao unai aria moalelaia totona. (Deu. 16:15, 16) Unai ese dala ia kehoa mai anina bada hereva momokanidia idia laloa bona herevalaia totona. Unai hereva momokani haida be dahaka? Ta be inai, Iehova be lalokau bona hariharibada Diravana. (Deu. 15:4, 5) Ma ta be, Dirava ese idia ia hakaua bona gimaia diba. (Deu. 32:9, 10) Danu, idia be Iehova ena ladana idia abia taudia dainai, iena kara maoromaoro idia hahedinaraia be gau badana. (Deu. 7:6, 11) Hari, iseda distrik hebouhebou amo unai bamona heduru do ita abia danu.
2. Edena dala ai distrik hebouhebou ena program ese hereva momokani ena diari do ia hahedinaraia?
2 Program ese Hereva Momokani Ena Diari Ia Hahedinaraia: Distrik hebouhebou ai, tok, drama, haheitalai bona intaviu ese ita idia durua, hereva momokani ita lalopararalaia bona badinaia totona. (Ioa. 17:17) Tadikaka be gaukara bada idia karaia inai lagani ena distrik hebouhebou idia hegaegaelaia totona. Iehova ena orea ese ia hegaegaelaia program be taunimanima ibounai do ia durua. (Mat. 24:45-47) Oi ura unai oi itaia bona kamonai, a?
3. Program ita kamonai namonamo totona dahaka ita karaia be namo?
3 Bema dina toi ena hebouhebou ita lao bona ita kamonai namonamo, heduru bada do ita abia. Bema emu bosi oi do hadibaia lasi, hari be nega namona ia oi noia unai dina toi ai oi gaukara lasi totona. Namona be hanuaboi ta ta ai oi mahuta haraga, unai amo program ibounai do oi kamonai namonamo. Haida idia davaria tok henia tadikaka idia itaia bona point badadia idia torea neganai, unai ese idia ia durua idia kamonai namonamo totona. Emu mobael fon oi koua, unai amo oi o ma haida emui kamonai karana ia hadikaia lasi. Program ia heau noho lalonai, namo lasi oi herevahereva, mobael amo teks mesiji oi siaia, oi aniani o oi inuinu.
4. Edena dala ai tama sina ese natudia idia durua hebouhebou ai idia kamonai namonamo totona?
4 Sabati laganidia ai, Israela ruma bese be Au Raurau Ruma Maragidia Aria negadiai idia hebou, unai amo hahelaga taudia ese idia duahia Taravatu idia kamonai diba. Unai hebou ai “memero bona kekeni” idia noho danu, unai amo ‘idia kamonai, bona edia lalona be do idia kehoa.’ (Deu. 31:12) Ita moale badina ita itaia hebouhebou negadiai, famili idia helai hebou bona natudia be tok idia kamonai namonamo bona idia mahuta lasi! Hanuaboi ai, nega umui atoa tok ai umui moalelaia point umui herevalaia hebou totona. “Natuna maragidia ibounai ese kavakava idia karaia noho,” unai dainai dina tubu ena aniani negadiai o hotel dekenai namona be tama sina ese edia natu maragidia bona badadia idia naria namonamo, namo lasi natuna be “sibona ena ura ia karaia.”—Aon. 22:15; 29:15.
5. Hotel ai ita noho neganai, edena dala ai eda kara namodia ese hereva momokani ia hahairaia?
5 Eda Kara Namodia ese Hereva Momokani Ia Hahairaia: Hebouhebou gabudiai, eda kara namodia ese hereva momokani ia hahairaia. (Tito 2:10) Hotel biagua taudia idia itaia eda tadikaka taihu haida be hotel ena taravatu idia badinaia, idia manau bona gaukara taudia idia matauraia. (Kol. 4:6) Vanegai lagani ai, brens ofesi ese tadikaka ta idia siaia hotel ena bosi ta ida ia herevahereva totona, unai bosi ia gwau: “Ai moale emui taunimanima be emai hotel dekenai idia noho, badina idia be taunimanima namodia. Idia be kara namodia idia hahedinaraia, nega ibounai emai gaukara taudia idia matauraia, bona hotel kohudia idia gaukaralaia namonamo.”
6. Edena dala ai eda dabua ena toana ese hereva momokani ia hahairaia diba?
6 Hebouhebou ena lapel kadi ita atoa neganai, unai ese eda hebouhebou ia gwauraia hedinarai, tadikaka taihu haida ese ita idia dibaia, bona dala ia kehoa ma haida ita haroro henia totona. Hebouhebou gabudiai, taunimanima do idia itaia lapel kadi idia atoa taudia be hemataurai dabua idia hahedokilaia. (1 Tim. 2:9, 10) Unai dainai, hebouhebou gabunai o hotel ai ita noho neganai, namona be iseda toana bona dabua idia namo. Bema hebouhebou lao totona T-siedi bona piripou kwadogina oi hahedokilaia, unai be hemataurai karana lasi. Ena be hebouhebou be steidiam ai ita abia, to hemataurai dabuadia ita hahedokilaia be namo. Program murinai bema ita ura eda dabua ita senisia, bona stoa o aniani gabuna ta ita lao, namona be hemataurai dabua ita hahedokilaia danu.
7. Hebouhebou ai, eda tadikaka taihu edia hebamo karana ita moalelaia dalana ta be dahaka?
7 Aria negadiai, Israela taudia be mai moale ida gabu idauidau amo idia mai abidadama tamona taudia ida idia hebou bona hagoadaia heheni, unai ese edia lalotamona karana ia hagoadaia. (Kara 2:1, 5) Distrik hebouhebou negadiai, ita itaia eda Keristani tadikaka oreana huanai lalotamona ia noho. Bona unai ese eda kara namodia idia itaia taudia ia hagoadaia. (Sal. 133:1) Namona be dina tubua ena aniani ita abia lao, unai amo hebouhebou gabuna ita rakatania lasi, to tadikaka taihu ida ita hedavari bona herevahereva diba!
8. Dahaka badina haida dainai volantia gaukara ita karaia?
8 Momo idia hoa badina idia itaia iseda hebouhebou ia heau namonamo bona gaukara momo be volantia taudia ese idia karaia. Oi danu oi ura hebouhebou gabunai gaukara haida dekenai heduru oi henia, a? (Sal. 110:3) Famili haida be volantia gaukara idia karaia, unai amo natudia be ma haida durua karana idia dibaia. Bema oi be hemarai tauna, emu tadikaka taihu oi dibaia namonamo dalana ta be hebouhebou negadiai volantia gaukara oi karaia diba. Taihu ta ia gwau: “Hebouhebou dekenai lau be egu famili bona tadikaka taihu haida sibona lau diba. To hagoevaia gaukara lau durua neganai, tadikaka taihu momo lau hedavari henidia! Unai nega lau moalelaia bada!” Hebouhebou ai ma haida ida ita gaukara neganai, iseda moale ia habadaia. (2 Kor. 6:12, 13) Bema volantia gaukara oi do karaia lasi, elda taudia oi noia oi idia durua totona.
9. Edena dala ai haida ita boiria hebouhebou idia mai totona?
9 Haida Boiria Hereva Momokani Kamonaia Totona: Guna bamona, hebouhebou do lasi neganai wiki toi lalonai, ita ese boiboi pepadia hariharilaia gaukarana amo haida do ita boiria. Namona be kongrigeisen ese palani idia karaia boiboi pepadia ibounai be edia teritori ai idia henia haorea totona. (Maua ladana “Edena Dala ai Boiboi Pepadia Do Ita Hariharilaia?” itaia.) Bema boiboi pepa oredia idia noho, namona be hebouhebou dekenai ita abia lao, unai amo nega bona gabu idauidau ai ita davaria taudia ita henia diba.
10. Boiboi pepadia hariharilaia gaukarana ai ia vara ekspiriens herevalaia.
10 Lagani ta ta ai boiboi pepadia amo taunimanima ita boiria neganai idia mai, a? Hebouhebou ta ai, atendan tadikaka ese headava tau bona hahine be helai gabuna dekenai ia hakaua lao. Idia ese tadikaka idia hadibaia idia be boiboi pepana ta idia abia bona ‘idia itaia gaudia idia ura henia.’ Bona hebouhebou lao totona motuka amo kilomita 320 idia heau! Gabu ma ta ai, taihu ta be ruma-ta-ruma-ta gaukara ai tau ta dekenai boiboi pepana ia henia, bona unai tauna be hebouhebou ena badina ia ura diba. Unai dainai taihu be ia dekenai boiboi pepana ia herevalaia namonamo. Dina haida murinai, unai taihu be hebouhebou gabunai unai tau bona ena turana ia itaia, bona idia be hebouhebou dekenai idia halasia buka ta idia dogoatao.
11. Dahaka dainai distrik hebouhebou ita lao be mai anina bada?
11 Iehova ese lagani ta ta ena aria amo Israela taudia ia durua iena hesiai gaukara be mai momokani bona laloa maoromaoro ida idia karaia totona. (Ios. 24:14) Unai hegeregerena, lagani ta ta ena distrik hebouhebou ese ita ia durua ‘hereva momokani ai ita raka noho’ totona, bona unai be iseda tomadiho ena kahana badana ta. (3 Ioa. 3) Iehova ese hereva momokani idia ura henia taudia edia hekwarahi do ia hanamoa bona hebouhebou dekenai heduru bada do idia abia!
[Blurb on page 4]
Hebouhebou gabudiai, eda kara namodia ese hereva momokani ia hahairaia
[Blurb on page 5]
Hebouhebou do lasi neganai wiki toi lalonai, ita ese boiboi pepadia amo haida do ita boiria
[Box on pages 3-6]
2012 Distrik Hebouhebou Hadibaia Herevadia
◼ Nega: Dina ta ta ena program be 9:20 a.m. ai do ia matamaia. Namona be miusiki ia matamaia neganai, ita ibounai be iseda helai gabunai ita helai vadaeni, unai amo program be mai hemataurai ida ita matamaia diba. Dina toi hebouheboudia dekenai Friday bona Saturday program be 4:55 p.m. ai do ia ore, bona Sunday be 3:40 p.m. ai do ia ore. Dina rua hebouheboudia dekenai, Saturday program be 5:10 p.m. ai do ia ore bona Sunday be 4:35 p.m. ai do ia ore.
◼ Motuka Atoa Gabuna: Hebouhebou gabudia dekenai motuka atoa gabudia idia noho, davana be lasi. Namona be motuka taria tadikaka ese hebouhebou ena lapel kadi idia atoa, motuka atoa gabuna idia abia totona. Motuka atoa gabudia haida be maragi dainai, mani emui kara atendan taudia edia hereva umui badinaia.
◼ Helai Gabudia: Ita ida motuka tamona ai ita guia taudia, o ruma tamona ai ita noho taudia, o eda stadi taudia edia namba hegeregerena, helai gabudia ita abia be namo.—1 Kor. 13:5.
◼ Dina Tubua Aniani: Mani emui kara, dina tubua aniani umui abia lao. Namo lasi hebouhebou gabuna oi rakatania bona stoa dekenai oi lao aniani hoia totona. Helai gauna henunai oi atoa diba eski maragina oi gaukaralaia. Hebouhebou gabuna dekenai, eski badadia bona galasi gaudia be taravatu.
◼ Kontribusen: Iseda tanikiu karana ita hahedinaraia diba bema hebouhebou gabuna ai, Tanobada Ibounai Gaukarana ena kontribusen ita henia. Idia henia seke be “International Bible Students Association” o “IBSA” ena ladana dekenai idia torea diba.
◼ Aksiden: Bema hebouhebou gabunai ta ia gorere dikadika eiava bero ta ia abia, mani atendan tauna ta oi hadibaia haraga. Ia ese Medikol Heduru Dipatmen do ia hadibaia bona idia ese gorere tauna idia sekea diba bona heduru do idia henia.
◼ Muramura: Bema doketa ese emu muramura ia henia, vadaeni hebouhebou oi lao neganai emu muramura oi abia lao danu, badina unai bamona muramura be Medikol Heduru Dipatmen ai do idia noho lasi. Bema emu gorere be diebetic bona kodoa gaudia oi gaukaralaia, namona be unai kodoa gaudia mirodia oi atoa namonamo bona gabu maorona dekenai oi negea, namo lasi hebouhebou gabuna o hotel ena rabesi ai oi negedia.
◼ Mani Lou Henia (S-43) Fom: Mani Lou Henia fom oi gaukaralaia, hebouhebou negana ai oi haroro henia tauna ena ladana bona adres oi torea totona. Pablisa ibounai ese unai fom ta o rua idia abia lao diba hebouhebou gabunai. Bema fom ta dekenai kamonai tauna ena ladana bona adres oi torea vadaeni, namona be Buka Gabuna naria tadikaka oi henia, o oi giroa lou neganai emu kongrigeisen seketere oi henia diba.—September 2011 Iseda Basileia Gaukara, rau 4 itaia.
◼ Restaurant: Restaurant o aniani gabudiai emu kara namodia amo Iehova ena ladana oi hanamoa.
◼ Noho Gabudia:
(1) Bema mahuta gabudia oi ura abia, emu kongrigeisen be Ruma Naria Dipatmen amo fom ia abia neganai, karaharaga seketere oi hadibaia.
(2) Daiutu momo oi noia kava lasi, to do idia noho taudia edia namba hegeregerena oi noia, bona oi gwauraia taudia sibona be emu daiutu dekenai idia noho be namo.
(3) Bema emu noho gabuna oi haidaua, Ruma Naria Dipatmen oi hadibaia haraga be namo.—Mat. 5:37.
(4) Daiutu lalonai aniani umui nadua lasi. To idia abia hidi gabudia dekenai umui nanadu.
(5) Bema tadikaka edia ruma ai oi noho, edia heabidae karana oi matauraia, bona oi abia hidi dinadia sibona oi noho be namo.—Aon. 25:17.
(6) Bema tadikaka edia ruma ai oi noho, aniani ena davana, nanadu bona ruma gaukara haida dekenai ruma taudia oi durua be namo.
(7) Emu noho gabuna idia henia bona oi noho ela bona oi rakatania neganai, namona be Keristani kara namodia oi hahedinaraia. Taunimanima ese iseda hebogahisi, haheauka, bona laloa maoromaoro karana do idia laloa bada.
(8) Bema oi noho gabuna dekenai hekwakwanai ta ia vara, vadaeni Ruma Naria Dipatmen oi hadibaia bona oi do idia durua.
◼ Volantia Gaukara: Bema ta ia ura heduru ia henia, namona be hebouhebou gabunai Volantia Gaukara Dipatmen ia hadibaia. Mauri lagani 16 idia do abia lasi natudia ese heduru namona idia henia diba, bema edia tama sina eiava tadikaka o taihu badana ma ta ida idia gaukara hebou.
[Box on page 6]
Edena Dala ai Boiboi Pepadia Do Ita Hariharilaia?
Iseda teritori ibounai ita karaia totona, namona be eda hereva ia kwadogi. Reana inai bamona ita hereva diba: “Namo. Tanobada hegegemadai taunimanima dekenai inai boiboi pepana ai henia. Inai be oiemu kopi. Hereva ma haida be inai boiboi pepana dekenai oi davaria diba.” Namona be mai ura bada ida unai oi karaia. Wikeni ai boiboi pepadia oi henia neganai, bema mai dalana magasin oi hariharilaia danu.