Iehova Ena Hahenamo ese Kohu Momo Ita Dekenai Ia Henia
“Lohiabada ena hanamoa sibona ese, kohu momo oi dekenai ia henia noho, bona unai kohu danu, ese lalohisihisi sisina oi dekenai do ia henia lasi.”—AONEGA HEREVADIA 10:22.
1, 2. Dahaka dainai tauanina dalanai ita abia kohu ese moale ia havaraia lasi?
HARI kohu tahua karadia ese taunimanima milioni momo edia mauri idia biagua. To kohu amo moale idia abia, a? The Australian Women’s Weekly magasin ia gwau: “Taunimanima ese hari bamona edia mauri idia lalo-hekwarahilaia negana ma ta lau laloatao diba lasi. . . . Inai be gau idauna. Ita idia hadibaia moni dalanai Australia ia namo herea, hari eda mauri be namo herea, guna bamona lasi. . . . To, taunimanima ibounai idia laloa gau ibounai idia dika. Tatau bona hahine idia mamia edia mauri ai gau ta idia reaia noho to idia diba lasi unai gauna be dahaka.” Buka Helaga ia maoro momokani, badina ia hahedinaraia ita abia kohu ese moale eiava mauri ia havaraia lasi!—Hadibaia Tauna 5:10; Luka 12:15.
2 Baibel ese ia hadibaia moale bada herea be Dirava ena hahenamo amo ia vara. Aonega Herevadia 10:22 ia gwau: “Lohiabada ena hanamoa sibona ese, kohu momo oi dekenai ia henia noho, bona unai kohu danu, ese lalohisihisi sisina oi dekenai do ia henia lasi.” Nega momo mai mataganigani ida kohu tahua karana ese hisihisi ia havaraia. Unai dainai, aposetolo Paulo ia gwau: “To kohu momo idia ura henia taudia be dibagani dekenai idia moru diba. Bona . . . ura dikadia bona ura kavakava ese unai kohu ura henia taudia do idia koia, bona hadikaia. Badina be moni ura henia kara ese dika idauidau ibounai ia havaraia noho. Bona moni idia ura bada taudia haida ese Iesu abidadama henia kara idia rakatania vadaeni, bona mai lalohisihisi momo danu, edia mauri idia hadikaia ore vadaeni.”—1 Timoteo 6:9, 10.
3. Dahaka dainai Dirava ena hesiai taudia ese hahetoho idia davaridia?
3 To, ‘Dirava idia kamonai henia’ noho taudia ibounai ese hisihisi idia havaraia lasi hahenamo idia davaria. (Deuteronomi 28:2) To, reana haida idia henanadai, ‘Bema Iehova ena hahenamo ese hisihisi ia havaraia lasi, dahaka dainai Dirava ena hesiai taudia momo ese hisihisi idia abia?’ Baibel ese ia hahedinaraia bamona Dirava ese iseda hahetoho ia koua lasi, to idia be ia dainai lasi to Satani, iena tanobada dikana, bona iseda goevadae lasi maurina dainai idia vara. (Genese 6:5; Deuteronomi 32:4, 5; Ioane 15:19; Iamesi 1:14, 15) Iehova ese “gau namodia ibounai, bona harihari gaudia namodia momokani ibounai” ia henia tauna. (Iamesi 1:17) Unai dainai, iena hahenamo ese hisihisi idia havaraia lasi. Dirava ena harihari gaudia goevadaedia haida mani ita laloa.
Dirava Ena Hereva—Dava Bada Harihari Gauna Ta
4. Iehova ena taunimanima ese inai “dokona negana” ai dahaka hahenamo bona dava bada harihari gauna idia moalelaia?
4 Daniela ena peroveta herevana ese “dokona negana” ia herevalaia, ia gwau: “Aonega do ia bada herea.” To, unai hereva ena anina be mai ena hetoana, badina: “Dika taudia be . . . diba do idia davaria lasi. To mai edia aonega taudia be diba do idia davaria.” (Daniela 12:4, 10) Mani unai oi laloa! Dirava ena peroveta herevadia—bona ena Hereva ibounai—be iena aonega amo ia hahedinaraia dainai, kara dika taudia ese ena anina korikori do idia lalo-pararalaia diba lasi, to Iehova ena taunimanima ese idia lalo-pararalaia. Dirava ena Natuna ia guriguri: “Egu Tamana e, guba bona tanobada ena lohia, lau hanamoa oi dekenai, badina be inai gaudia aonega taudia bona diba taudia dekena amo oi hunia vadaeni, to memero maragidia dekenai oi hedinaraia vadaeni.” (Luka 10:21) Ita abia hahenamo badana be ita ese dava bada harihari gauna ta, idia torea Dirava ena Hereva, Baibel, ita abia, bona Iehova ese lauma dalanai lalo-parara ia henia taudia huanai ita noho!—1 Korinto 1:21, 27, 28; 2:14, 15.
5. Aonega ena anina be dahaka, bona edena dala ai ita abia diba?
5 Bema ‘Dirava amo aonega ita abia’ lasi, lauma gaudia ita lalo-pararalaia diba lasi. (Iamesi 3:17) Aonega ena anina be diba bona lalo-parara ita gaukaralaia hekwakwanai hanaia, dika idia havaraia gaudia koua, tahua gaudia hagugurua, bona sisiba maorona henia totona. Edena dala ai Dirava amo aonega ita abia? Aonega Herevadia 2:6 ia gwau: “Lohiabada ese aonega, be oi dekenai ia henia noho, bona iena uduna dekena amo, diba bona laloa kehoa idia mai noho.” Oibe, bema Iehova dekenai aonega totona ita noinoi noho, ita dekenai do ia henia, King Solomona dekenai “aonega bona diba bada” ia henia hegeregerena. (1 King Taudia 3:11, 12; Iamesi 1:5-8) Danu, aonega ita abia totona, namona be hanaihanai Iehova ena Hereva ita stadilaia bona badinaia karana amo, ia ita kamonai henia noho.
6. Dahaka dainai iseda mauri lalonai Dirava ena taravatu bona hakaua herevadia ita badinaia be aonega karana?
6 Baibel ena taravatu bona hakaua herevadia ese Dirava ena aonega idia hahedinaraia namo herea. Idia amo namo ita davaria dala iboudiai dekenai—tauanina, hemami, bona lauma dalanai bona iseda lalona idia hanamoa danu. Salamo tauna ena hereva ia maoro, ia gwau: “Lohiabada ena Taravatu be ia namo momokani. Ia ese taunimanima edia lauma ia hamauria lou. Lohiabada ena hadibaia hereva be momokani vadaeni. Idia ese aonega lasi taudia dekenai, aonega idia henia. Lohiabada ena Taravatu be idia maoromaoro vadaeni. Unai Taravatu idia badinaia taudia ese, moale idia davaria noho. Lohiabada ena oda be diari hegeregerena. Idia ese taunimanima edia laloa idia hadiaria. Lohiabada dekenai idia tomadiho taudia, ese kara namona idia karaia noho. Bona inai bamona kara, be nega hanaihanai do ia noho. Lohiabada ena kota henia karana be momokani, bona nega ibounai, Lohiabada ena kota davana be maoromaoro. Lohiabada ena hereva ese, golo ena namo idia hereaia. Golo namona momokani idia hereaia.”—Salamo 19:7-10; 119:72.
7. Dirava ena kara maoromaoro taravatudia idia dadaraia taudia dekenai dahaka ia vara?
7 To, Dirava ena kara maoromaoro taravatudia idia dadaraia taudia ese idia tahua moale bona ura kwalimu do idia davaria lasi. Gabeai, do idia itaia Dirava idia koia diba lasi, badina tau ta ese ia hadoa gauna hegeregerena do ia gogoa. (Galatia 6:7) Baibel ena hakaua herevadia idia rakatania taudia milioni momo ese unai dainai dika bada idia davaria, hegeregere idia rogorogo kava, gorere dikadia idia abia, bona idia hadokoa diba lasi karadia idia karaia noho. Bema mai helalo-kerehai ida edia mauri dalana idia haidaua lasi, edia dala ese mase dekenai idia do ia hakaua bona reana Dirava ese idia do ia hadikaia.—Mataio 7:13, 14.
8. Dahaka dainai Dirava ena Hereva idia ura henia taudia idia moale?
8 To, Dirava ena Hereva idia ura henia bona idia badinaia taudia ese hari bona vaira negana ai hahenamo badadia do idia davaria. Mai badina dainai idia mamia Dirava ena taravatu ese idia ia ruhaia, idia moale momokani, bona Dirava ese kara dika bona ia havaraia dika amo idia do ia ruhaia negana idia naria noho mai edia ura bada ida. (Roma 8:20, 21; Iamesi 1:25) Unai be helaro momokanina badina Dirava ese mai lalokau ida ia henia harihari gauna badana—ia sibona ia havaraia Natuna tamona, Iesu Keriso, ena mauri davalaia boubouna—amo unai do ia karaia. (Mataio 20:28; Ioane 3:16; Roma 6:23) Unai harihari gauna hereadaena ese ia hahedinaraia Dirava ena lalokau taunimanima dekenai be bada herea bona ia hamomokania Iehova idia kamonai henia noho taudia ibounai ese idia ore lasi hahenamo do idia davaridia.—Roma 8:32.
Harihari Gauna, Lauma Helaga, Ita Abia Dainai Ita Tanikiu Henia
9, 10. Edena dala ai Iehova ia henia harihari gauna lauma helaga amo namo ita abia? Haheitalai oi gwauraia.
9 Dirava ese mai lalokau ida ia henia harihari gauna ma ta be lauma helaga, bona unai dainai ia ita tanikiu henia be namo. Pentekoste 33 C.E. ai, aposetolo Petero ese Ierusalema dekenai idia noho hutuma ia hagoadaia, ia gwau: “Umui ibounai ese emui lalona umui giroa bona bapatiso umui abia, Iesu Keriso ena ladana dekenai, umui emui kara dika do idia gwauatao totona, bona Lauma Helaga do umui abia, Dirava ena harihari gauna.” (Kara 2:38) Hari, Iehova ese lauma helaga abia totona idia noinoi bona idia ura Iena ura idia karaia gwauhamata taudia ibounai dekenai lauma helaga ia henia. (Luka 11:9-13) Idaunegai, guba bona tanobada ai ia noho siahu badana—Dirava ena lauma helaga, eiava gaukara siahuna—ese abidadama tatau bona hahine, Keristani ginigunadia danu, ia hagoadaia. (Sekaraia 4:6; Kara 4:31) Ita ia hagoadaia diba danu, herevana ita be Iehova ena taunimanima dainai koua gaudia bona hekwakwanai badadia ita davaria.—Ioela 2:28, 29.
10 Mani Laurel oi laloa, ia ese polio gorerena ia abia bona lagani 37 ai, masini ta lalonai ia noho ia hahodi diba totona.a Ena be ena mauri ia auka momokani, to mai ena goada ida Dirava ia hesiai henia ela bona ia mase. Lagani idia hanaia lalonai, Laurel ese Iehova ena hahenamo bada ia davaria. Hegeregere, ia ese taunimanima 17 ia durua Baibel ena hereva momokani idia diba maoromaoro totona, herevana dina ta ta ai hora 24 unai masini lalonai ia noho! Ia dainai aposetolo Paulo ena hereva ita laloatao, ia gwau: “Lau manoka neganai, unai be Dirava ena goada lau abia.” (2 Korinto 12:10) Oibe, bema sivarai namona ita harorolaia lalonai ita kwalimu, unai be sibona eda diba eiava siahu amo lasi, to Dirava ese ia idia kamonai henia noho taudia dekenai ia henia lauma helaga ena heduru amo.—Isaia 40:29-31.
11. Dirava ena lauma ese “mauri matamata” idia atoa taudia dekenai edena bamona karadia ia havaraia?
11 Bema Dirava ita kamonai henia, iena lauma ese ita dekenai kara namodia do ia havaraia, hegeregere lalokau, moale, maino, haheauka, bogahisihisi, kara maoromaoro, abidadama momokani kara, manau, bona tauanina ena ura koua karana. (Galatia 5:22, 23) Unai ‘lauma helaga ese ia havaraia karadia’ be “mauri matamata” ena kahana ta, Keristani taudia ese reana guna idia hahedinaraia dagedage karadia, animal edia bamona, edia gabu ai idia atoa. (Efeso 4:20-24; Isaia 11:6-9) Unai karadia amo mai anina bada karana be lalokau, “hatamonaia gauna hereadaena.”—Kolose 3:14, NW.
Keristani Lalokauna—Ita Laloa Bada Harihari Gauna
12. Edena dala ai Tabita bona Keristani taudia ginigunadia ma haida ese lalokau idia hahedinaraia?
12 Keristani lalokauna be Iehova ia henia harihari gauna namo hereana ma ta—ita laloa bada be maoro. Hakaua herevana ese unai lalokau ia biagua, to ena hebogahisi be bada herea dainai abidadama taudia ia hatamonaia momokani, varavara ida be unai bamona lasi. (Ioane 15:12, 13; 1 Petero 1:22) Hegeregere, hahine ladana Tabita, Keristani ginigunadia ta, mani oi laloa. “Ia be kara namona bona bogahisihisi kara dekenai ia goada,” bona kongregesen lalonai vabu taudia ia durua bada. (Kara 9:36) Reana unai hahine be mai edia varavara taudia, to Tabita ia ura ia karaia diba gaudia ia karaia unai vabu taudia ia durua bona hagoadaia totona. (1 Ioane 3:18) Tabita ena kara be haheitalai namona! Prisikila bona Akwila ese tadikaka bamona lalokauna dainai Paulo “durua totona kahirakahira idia mase.” Bona lalokau ese Epafra, Luka, Onesiporo bona ma haida ia veria, Roma dekenai dibura ai ia noho aposetolo tauna idia durua totona. (Roma 16:3, 4; 2 Timoteo 1:16; 4:11; Filemona 23, 24) Oibe, hari unai bamona Keristani taudia ese ‘idia ta ta dekenai idia lalokau henia,’ unai lalokau be Dirava ia henia harihari gauna namona bona ia dainai ma haida idia diba idia be Iesu ena hahediba taudia momokanidia.—Ioane 13:34, 35.
13. Edena dala ai ita hahedinaraia diba iseda Keristani tadikaka oreana ita laloa bada?
13 Keristani kongregesen lalonai idia hahedinaraia lalokauna oi laloa bada, a? Oi ese tanobada hegegemadai tadikaka oreana dainai oi tanikiu bada, a? Unai gaudia danu be iseda mauri idia hanamoa bona lauma dalanai iseda kohu idia habadaia harihari gaudia Iehova amo. Edena dala ai ita hahedinaraia diba unai ita laloa bada? Dirava dekenai hesiai gaukara helagana ita henia, Keristani heboudia lalonai ita vareai, bona lalokau bona Dirava ena lauma ese ia havaraia huahua ma haida ita hahedinaraia dalana ai.—Filipi 1:9; Heberu 10:24, 25.
“Harihari Gaudia Taunimanima Dekenai”
14. Bema Keristani tauna ta ese elda eiava hesiai gaukarana ia tahua, dahaka ia karaia be namo?
14 Idia ura elda eiava hesiai gaukarana amo edia tadikaka idia durua Keristani tatau ese gaukara namona idia tahua. (1 Timoteo 3:1, 8) Tadikaka ta be unai gaukara do ia karaia diba totona, namona be lauma gaudia ia laloa bada, Baibel ia diba namonamo, bona haroro gaukara ia goadalaia. (Kara 18:24; 1 Timoteo 4:15; 2 Timoteo 4:5) Namona be ia manau bona haheauka, badina hekokoroku bona ladana bada tahua taudia ese Dirava ena hahenamo idia davaridia lasi. (Aonega Herevadia 11:2; Heberu 6:15; 3 Ioane 9, 10) Bema ia headava, namona be ia be lalokau ruma bese kwarana ta bona ena ruma bese ia hakaua namonamo diba. (1 Timoteo 3:4, 5, 12) Unai bamona tauna ese lauma dalanai ia abia kohu ia laloa bada dainai, Iehova ena hahenamo bada ia davaria.—Mataio 6:19-21.
15, 16. Daidia idia hahedinaraia idia be “harihari gaudia taunimanima dekenai”? Haheitalai oi gwauraia.
15 Kongregesen lalonai elda gaukarana idia karaia taudia ese haroro gaukara, mamoe naria gaukara, bona hadibaia gaukara idia karaia namonamo neganai, ita dekenai badina namona idia henia, unai bamona “harihari gaudia taunimanima dekenai” ita laloa bada totona. (Efeso 4:8, 11) Reana kamonai elda taudia edia lalokau hesiai gaukarana amo namo idia davaria taudia be nega momo idia tanikiu henidia lasi, to Iehova ese edia gaukara ibounai ia itaia. Bona iena taunimanima idia durua karadia amo ia dekenai idia hahedinaraia lalokauna ia laloaboio lasi.—1 Timoteo 5:17; Heberu 6:10.
16 Ia gaukara goada elda ta mani oi laloa, harana opereisen ia abia gwauraia Keristani kekenina ta ia vadivadi henia. Unai ruma bese ena turana ta ia gwau: “Ai ia hebogahisi henia bada, ia durua, bona ia naria. Gwaumaoro ia noia ai ida Iehova ia guriguri henia totona. Ia guriguri neganai, tamana [ia be Iehova ena Witnes tauna lasi] ia tai, bona unai hospital daiutuna dekenai idia noho taudia ibounai edia matana ranu idia diho. Unai elda tauna ena guriguri be mai hebogahisi bada, bona nega maorona ai Iehova ese ia siaia be lalokau bada karana!” Ia gorere Witnes ma ta ese ia idia vadivadi henia elda taudia ia herevalaia, ia gwau: “ICU wodi dekenai egu bedi kahirakahira idia mai neganai, lau diba herevana dahaka do ia vara, do lau haheauka diba. Goada bona maino mamina lau abia.” Ta ese unai bamona lalokau bona hebogahisi be moni amo ia hoia diba, a? Lasi momokani! Ia be Dirava ese Keristani kongregesen amo ia henia harihari gauna ta.—Isaia 32:1, 2.
Haroro Gaukara be Harihari Gauna Ta
17, 18. (a) Iehova ese ena taunimanima iboudiai dekenai dahaka gaukara ia henia harihari gauna bamona? (b) Dirava ese dahaka heduru ia henia iseda hesiai gaukara ita hagugurua totona?
17 Ita taunimanima ese ita abia hahenamo badana be Iehova, Ataiai Momokani Diravana, ita hesiai henia. (Isaia 43:10; 2 Korinto 4:7; 1 Petero 2:9) Mai momokani ida idia ura Dirava idia hesiai henia taudia ibounai—matamata bona buruka taudia, tatau bona hahine—ese haroro gaukara idia karaia diba. Unai harihari gauna namona oi abia dae, a? Haida idia haroro lasi badina idia laloa idia hegeregere lasi, to namona be oi laloatao Iehova ese ia idia hesiai henia taudia dekenai lauma helaga ia henia, bona ita hegeregere lasi gaudia dekenai ita ia durua.—Ieremia 1:6-8; 20:11.
18 Iehova ese Basileia harorolaia gaukarana be ena manau hesiai taudia dekenai ia henia, hekokoroku bona sibona edia diba dekenai idia tabekau taudia dekenai lasi. (1 Korinto 1:20, 26-29) Manau taudia idia abia dae, edia diba be mai hetoana bona haroro gaukara idia karaia neganai Dirava ena heduru dekenai idia tabekau. Danu, ia ese “kohu naria tauna mai ena kamonai” amo lauma dalanai ia henia heduru idia laloa bada.—Luka 12:42-44; Aonega Herevadia 22:4.
Ruma Bese Ena Moale—Harihari Gauna Namona
19. Dahaka gaudia dainai ta ese natudia hadibaia karana lalonai ia kwalimu diba?
19 Headava bona ruma bese ena moale be harihari gaudia Dirava amo. (Ruta 1:9; Efeso 3:14, 15) Natudia danu be “Dirava ena harihari gauna ita dekenai,” bona Dirava ese ia moalelaia karadia be edia natudia dekenai idia hadibaia goada tamadia bona sinadia ese natudia amo moale idia abia. (Salamo 127:3) Bema oi be tamana ta eiava sinana ta, Iehova ena Hereva hegeregerena emu natudia oi hadibaia noho karana amo, ia oi kamonai henia noho. Unai idia karaia taudia ese Iehova ena heduru bona hahenamo badana do idia abia.—Aonega Herevadia 3:5, 6; 22:6; Efeso 6:1-4.
20. Dahaka ese tama sina ia durua diba bema edia natudia ese tomadiho momokani idia rakatania?
20 Ena be Dirava idia badinaia tama sina idia gaukara goada, to reana edia natudia haida idia bada neganai, tomadiho momokanina idia rakatania. (Genese 26:34, 35) Unai ese tama sina dekenai lalohisihisi bada ia havaraia diba. (Aonega Herevadia 17:21, 25) To, namona be helaro idia negea lasi, to Iesu ia gwauraia ia boio merona ena parabole idia laloatao be namo. Ena be unai mero ese ruma ia rakatania bona gwau-edeede dalana ia badinaia, to gabeai ena tamana ena ruma dekenai ia giroa, bona tamana ese mai moale bona lalokau ida ia abia dae. (Luka 15:11-32) Herevana dahaka ia vara, to kamonai Keristani tama sina idia diba momokani, Iehova ese edia mauri ia lalo-pararalaia, mai lalokau ida idia ia laloa, bona idia ia durua hanaihanai.—Salamo 145:14.
21. Daika ita kamonai henia be namo, bona dahaka dainai?
21 Unai dainai, namona be ita ta ta ita laloa namonamo, iseda mauri lalonai dahaka be mai anina bada. Ita bona iseda ruma bese dekenai hisihisi ia havaraia diba kohu ita tahua goadagoada noho, a? Eiava ‘diari ibounai Diravana’ amo idia mai “gau namodia ibounai, bona harihari gaudia namodia momokani ibounai” ita tahua noho, a? (Iamesi 1:17) Satani, “koikoi ibounai edia tamana,” ia ura ita ese kohu haboua totona ita hekwarahi bada bona moale bona mauri do ita haboioa. (Ioane 8:44; Luka 12:15) To, Iehova ia ura namo do ita abia. (Isaia 48:17, 18) Unai dainai, namona be iseda lalokau guba Tamana ita kamonai henia noho bona hanaihanai ‘moale be ia amo ita tahua.’ (Salamo 37:4) Bema unai bamona ita karaia, Iehova ena dava bada harihari gaudia bona ena hahenamo badana amo lauma dalanai kohu bada ita abia—bona unai kohu ese hisihisi ia havaraia lasi.
[Footnote]
a Awake!, January 22, 1993, rau 18-21 itaia.
Oi Laloatao, A?
• Moale bada be edeseniai ita davaria diba?
• Iehova ese ena taunimanima dekenai ia henia harihari gaudia haida be dahaka?
• Dahaka dainai haroro gaukara be harihari gauna ta?
• Tama sina ese edia natudia idia hadibaia lalonai, dahaka idia karaia be namo Dirava ena hahenamo idia davaria totona?
[Picture on page 16]
Dirava ena Hereva, idia torea harihari gauna, oi laloa bada, a?
[Picture on page 17]
Ena be Laurel Nisbet ena mauri ia auka herea, to mai ena goada ida Dirava ia hesiai henia
[Pictures on page 18]
Taunimanima idia diba hari inai negai Keristani taudia ese lalokau karadia idia karaia, Tabita bamona
[Picture on page 19]
Keristani elda taudia ese mai lalokau ida edia tadikaka idia laloa