Kara Koikoi Dainai Oi be Edena Bamona Oi Kara?

GETESEMANE umana lalonai, Iuda Iskariote be Iesu dekenai ia lao bona “ia kisi henia.” Unai be unai gabu taudia edia lalokau idia hahedinaraia dalana. To Iuda ena kara be koikoi karana sibona, ia ura hanuaboi lalonai Iesu do idia dogoatao taudia ia hadibadia daika be Iesu. (Mataio 26:​48, 49) Iuda be kara koikoi tauna ta​​—⁠ena koikoi karana amo ena kara korikorina ia hunia, bona ia be kara momokani toana amo ena ura dikana ia hunia tauna. Greek gado herevana idia hahanaia “kara koikoi tauna” ena anina be “haere henia tauna” bona danu drama haheitalaia tauna. Gabeai, unai hereva ena anina be ma haida koia totona koikoi karana ta ia karaia tauna.

Kara koikoi dainai oi be edena bamona oi kara? Hegeregere, ena be doketa ese idia hahedinaraia kuku be dika ia havaraia to kuku karaia taudia ese kuku ania karana idia habadaia neganai, oi badu, a? Naria taudia ese idia naria taudia idia hadikaia neganai, edia koikoi karana dainai oi badu, a? Bema oi laloa emu turana ta be turana korikorina to gabeai ia hedinarai ia koikoi, oi lalohisihisi, a? Tomadiho edia koikoi dainai edena bamona oi kara?

“Kara Koikoi Taudia, Dika Do Umui Davaria Momokani!”

Iesu be tanobada ai ia noho neganai, taunimanima ese idia karaia tomadiho karadia mani oi laloa. Taravatu torea taudia bona Farisea taudia idia gwau idia be Dirava ena Taravatu hadibaia momokani taudia, to edia kara korikorina be taunimanima edia hahediba herevadia amo taunimanima edia lalona idia hahonua, unai amo Dirava idia laloa lasi. Taravatu hadibaia taudia bona Farisea taudia ese taravatu idia herevalaia goadagoada, to idia ese lalokau bona hebogahisi hahedinaraia hereva badadia idia dadaraia. Taunimanima vairanai koikoi dalanai idia hahedinaraia idia be Dirava idia badinaia, to hehuni dekenai edia kara dika be bada. Edia kara be edia hereva ida ia hegeregere lasi. Gau idauidau idia karaia ena badina be “taunimanima ese do idia itaia totona.” Idia be “guria gabudia, peni dekena amo idia hakurokuroa bamona, edia murimuri kahana itaia neganai be idia namo, to edia lalonai be mase edia turiana bona miro ibounai idia honu momokani.” Iesu ese edia koikoi karana ia hahedinaraia, ia hamaorodia loulou, ia gwau: “Taravatu hadibaia taudia bona Farisea taudia, kara koikoi taudia, dika do umui davaria momokani!”​​—⁠Mataio 23:​5, 13-31.

Bema unai nega lalonai oi noho, kudou-maoro taudia ma haida hegeregerena reana oi be unai bamona tomadiho koikoi karadia dainai do oi badu momokani. (Roma 2:​21-24; 2 Petero 2:​1-3) To taravatu hadibaia taudia bona Farisea taudia edia koikoi karadia ese oi idia habadua dainai tomadiho ibounai, Iesu bona ena hahediba taudia ese idia hadibaia bona badinaia gauna danu, do oi dadaraia, a? Unai ese oi dekenai namo do ia havaraia lasi, ani?

Reana tomadiho idia badinaia taudia edia koikoi karadia dainai tomadiho amo ita raka siri mai badu ida. To, unai kara ese ita do idia koua danu, bena tomadiho momokani taudia edia kara korikori do ita itaia lasi. Momokani, kara koikoi dainai ita haginia koua gauna ese turadia namodia amo ita idia hakaua siri diba. Unai dainai, namona be iseda lalohadai kara koikoi dekenai ia maoromaoro bona ia namo.

“Emui Matana Umui Kehoa”

Gau ginigunana be, kara koikoi taudia do ita dibaia dalana ita diba be namo. Nega haida unai be auka. Ruma bese ta be moni bada herea idia haorea murinai, unai idia diba. Sinana be ia maserea. Unai hospital be heduru namona ia henia lasi dainai, unai ruma bese be loea ta idia abia bona hospital idia samania, unai loea be dubu ta ena haroro tauna ta danu. Ena be hospital ese US$3.4 milioni idia henia unai hekwakwanai idia hamaoromaoroa totona, to unai ruma bese ena hekwakwanai ia bada. Sinana be ia mase ogogami ta bamona, bona do idia guria gaukaradia totona moni be lasi. Dahaka dainai? Badina loea tauna ese unai moni ena kahana badana ia henaoa. Taravatu magasin ta ese unai loea tauna ia herevalaia, ia gwau: “Bema ia karaia karadia ia harorolaia . . . , iena hereva be inai: ita henaohenao be namo.” Unai bamona taudia amo edena bamona ita naria namonamo?

Iesu ese inai sisiba, “emui matana umui kehoa,” be iena negai idia noho taudia ia henidia badina tomadiho kara koikoidia idia vara dainai. (Mataio 16:6; Luka 12:⁠1) Oibe, namona be ita naria namonamo. Taunimanima be reana lalohadai namodia bona kara namodia do idia hahedinaraia, to namona be ita naria namonamo bona ita itaia gaudia dainai taunimanima ibounai ita abia dae kava lasi. Bema ita diba pepa moni koikoidia idia halasia, iseda moni do ita sekea namonamo, ani?

Kara koikoi taudia be Keristani kongregesen momokanina lalonai idia hedinarai danu. Hahediba tauna Iuda be unai taudia dainai sisiba ia henia, ia gwau: “Umui emui ekalesia aniani hebou umui abia neganai, inai dika taudia ese emui turana dalana idia hadikaia noho. . . . Mai mataurai lasi, edia bogana idia hahonua . . . Idia be ori koremakorema, lai ese ia hodaia bamona, to ia ese medu ia hadihoa lasi. Idia be au dikadia bamona, edia huahua ena nega korikori be huahua idia atoa lasi.”​​—⁠Iuda 12.

‘Iseda matana ita kehoa’ ena anina be ta ese ita ia koia garina ita naria namonamo, badina iena toana be mai ena lalokau to sibona ia laloa bada bona iena lalohadai be Dirava ena Hereva amo lasi. Ia be ranu ena kopina henunai ia noho nadi mai ena matana bamona, unai bamona tauna ese idia naria namonamo lasi taudia be lauma dalanai do ia hamorudia momokani diba. (1 Timoteo 1:19) Kara koikoi tauna be reana lauma heduru momo do ia gwauhamatalaia to ia be ranu lasi orina bamona ai ia lao​​—⁠“medu ia hadihoa lasi.” Koikoi tauna be Keristani huahua ia havaraia lasi, ia be huahua ia atoa lasi auna bamona. (Mataio 7:​15-20; Galatia 5:​19-21) Oibe, namona be unai bamona kara koikoi taudia amo ita naria namonamo. To, unai ita karaia neganai taunimanima ibounai edia lalohadai ita laloa kerere lasi be namo.

“Taunimanima Umui Gwauraia Kerere Lasi”

Taunimanima be idia goevadae lasi dainai haida edia kerere idia gwauraia haraga diba to idia sibona edia kerere idia laloa lasi! Inai bamona lalohadai ese ita be kara koikoi taudia ai ia halaoa diba. Iesu ia gwau: “Koikoi tauna e, au badana oiemu matana dekena amo do oi kokia guna, oi itaia namonamo totona. Unai murinai au ena momoru oiemu tadikakana ena matana dekena amo do oi kokia diba.” Iena sisiba ita kamonai be namo, ia gwau: “Badina be umui gwauraia kerere karana hegeregerena Dirava ese umui do ia gwauraia kerere . . . Badina be dahaka au ena momoru oiemu tadikakana ena matana lalonai oi itaia, to au badana oiemu matana lalonai ia noho be oi laloa lasi?”​​—⁠Mataio 7:​1-5.

Nega haida, bema haida edia kara toana be kara koikoi bamona, namona be ita naria namonamo, kara koikoi taudia do ita gwauraidia haraga lasi. Hegeregere, aposetolo Petero be Antioka Iuda lasi abidadama tamona taudia “dekena amo ia raka siri,” unai dala amo Ierusalema dekena amo idia vadivadi Iuda taudia ia hamoaledia. Banaba ‘danu be Petero bona ma haida edia koikoi ese ena lalona ia ania.’ Petero be unai kara ia karaia ena be ia abia hahenamo ta be Iuda lasi taudia edia dala ia kehoa Keristani kongregesen lalonai idia abia vareai totona. (Galatia 2:​11-14; Kara 10:​24-28, 34, 35) To, Petero bona Banaba edia kara kererena be taravatu hadibaia taudia bona Farisea taudia eiava Iuda Iskariote edia kara koikoi ida ia hegeregere lasi.

“Taunimanima Umui Lalokau Henia Koikoi Lasi”

Iesu ia gwau: “Unai dainai, harihari gaudia umui henia neganai emui vairana dekenai kibi umui hiriria lasi, koikoi taudia ese dubu ai bona ariara ai idia karaia bamona, badina idia ura taunimanima ese idia heagilaidia.” (Mataio 6:​2, Buka Helağa) Aposetolo Paulo ia gwau: “Taunimanima umui lalokau henia koikoi lasi.” (Roma 12:⁠9) Ia ese matamata tauna Timoteo ia hagoadaia, namona be iena “lalokau do ia vara, laloa goevagoeva . . . bona abidadama korikori dekena amo.” (1 Timoteo 1:⁠5) Bema mai momokani ida lalokau bona abidadama ita hahedinaraia​​—⁠sibona ena ura atoa guna karana bona koikoi karadia ese unai do idia hadikaia lasi​​—⁠ma haida ese ita do idia abidadama henia. Ita ese ita kahirakahira dekenai idia noho taudia do ita hagoadaia momokani. (Filipi 2:4; 1 Ioane 3:​17, 18; 4:​20, 21) Bona gau badana be Iehova ena lalo-namo do ita abia.

To, kara koikoi idia karaia taudia be mase do idia davaria. Kara koikoi taudia be dokonai do idia hedinarai momokani. Iesu Keriso ia gwau: “Koua gaudia ibounai do idia hedinarai, bona hunia gaudia ibounai be do idia diba.” (Mataio 10:26; Luka 12:⁠2) Aonega tauna King Solomona ia gwau: “Dirava ese iseda kara ibounai do ia kota henia, kara namodia bona kara dikadia, hunia dekenai ita karaia gaudia danu.”​—⁠Hadibaia Tauna 12:⁠14.

Inai nega lalonai, namo lasi haida edia kara koikoi karana ese ita ia veria turana korikoridia edia lalokau karana momokanina ita dadaraia totona, ani? Do ita naria namonamo to ita laloa kerere kava lasi. Oibe, namona be iseda lalokau bona abidadama be kara koikoidia lasi.​—⁠Iamesi 3:17; 1  Petero 1:⁠22.

[Pictures on page 22, 23]

Bema unai nega lalonai oi noho, taravatu torea taudia bona Farisea taudia edia koikoi karadia dainai Iesu Keriso bona ena hahediba taudia do oi dadaraia, a?