Duahia Taudia Edia Henanadai
Edena dala ai gaigai ese Eden umana lalonai Heva dekenai kara namo bona kara dika hadibaia au dekenai Dirava ena taravatu hamakohia lalohadaina ia henia?
Genese 3:1 ia gwau: “Lohiabada Dirava ia karaia mauri gaudia ibounai edia aonega be gaigai ese ia hanaia. Ia ese hahine dekenai ia henanadaia, ia gwau, ‘Momokani, uma gabu ena au huahua ta ania lasi taravatu Dirava ese ia atoa o lasi?’ ” Gaigai ese Heva ia hereva henia dalana dekenai lalohadai idauidau idia vara. Lalohadai ta be gaigai be tauanina eiava vairana ena toana gaukaralaia dalana amo Heva ia hadibaia. Hegeregere, England haroro tauna Joseph Benson ia gwau: “Toana be toa haida amo ia karaia. Taunimanima haida idia gwau laloa dalana bona hereva karana be unai neganai gaigai edia kara danu, . . . to hamomokania gauna ta be lasi.”
To, bema tauanina toana ia gaukaralaia, edena dala ai gaigai be Heva dekenai Dirava ese ia taravatua au huahua do ia ania bena Dirava hegeregerena do ia lao, namo bona dika ia abia hidi diba lalohadaina do ia henia diba? Ma danu, Heva ia hereva, ia ese gaigai ia henia henanadai ia haerelaia. (Genese 3:2-5) Bema gaigai be toa eiava tauanina toana sibona amo Heva dekenai ena lalohadai ia henia, Heva danu be vairana ena toana do ia gaukaralaia gaigai ia haere henia totona, to Baibel ia gwau Heva ia hereva.
Unai kara ia herevalaia neganai, aposetolo Paulo be ena Keristani tadikaka ia sisiba henidia ia gwau: “Gaigai ese Heva ia koia hegeregerena, lau gari inai, namo lasi laloa idauidau ese umui do idia hakaua kerere.” Paulo ese ia herevalaia dika gauna be “aposetolo koikoidia, gaukara koikoi taudia” amo ia mai. Unai bamona “aposetolo taudia namo herea” edia hagaria karadia be tauanina bona vairana ena toana sibona amo lasi. Unai be edia hereva amo danu—edia aonega herevadia, ma haida idia hakaua kerere totona idia gwauraia.—2 Korinto 11:3-5, 13.
Ena be Eden umana lalonai Heva be hereva karana ese ia hakaua kerere, to ita hamomokania diba lasi gaigai korikorina ena gadona dekenai hereva halasia gauna ia noho. Gaigai dekenai unai gauna be anina lasi. Dirava ena aneru ese doniki amo Balama ia hereva henia neganai, unai animal be taunimanima edia gadona ai ia noho hereva halasia gauna ia abia be anina lasi. (Numera 22:26-31) Momokani, unai ‘hereva diba lasi gauna be taunimanima edia gadona bamona ia hereva’ neganai, unai kara ena siahu be lauma gabuna amo ia mai.—2 Petero 2:16.
Gaigai amo Heva ia hereva henia laumana be Baibel ese ia gwauraia “idaunegai gaigaina, bona iena ladana be Diabolo bona Satani.” (Apokalupo 12:9) Heva ese ia kamonai bona ia haerelaia herevadia be Satani amo idia mai, ia “sibona ese iena kara ia senisia diba, bona ia ese diari aneruna ena kopina ia atoa diba.”—2 Korinto 11:14.
[Picture on page 27]
“Dirava hegeregere do umui noho, kara namona bona kara dikana do umui diba”