“Dirava Ena Hereva Hadibaia Taudia” Distrik Hebouhebou ai Oi Dibaia Gaudia Oi Badinaia Noho, A?
1 Lagani gunana ena distrik hebouhebou dekenai idia lao taudia ibounai idia itaia diba, Iehova ena taunimanima idia ura edia gaukara, Dirava ena Hereva hadibaia gaukarana unai, idia ura hagugurua. (Mat. 28:19, 20) Emu ruma dekenai oi giroa lou neganai, emu lalona oi hadaia, edena hadibaia herevadia be emu mauri bona haroro gaukara lalonai do oi badinaia?
2 Lauma Helaga amo Ia Vara Herevadia be mai Edia Namo Hadibaia Totona: Dina ginigunana ena sinado be 2 Timoteo 3:16 amo. Hebouhebou ena hereva badana ese ia hahedinaraia “Gau Ibounai Ita Abia Hegaegae Dirava Ena Hereva Hadibaia Totona,” namona be Dirava ena Hereva ita laloa bada, to taunimanima edia lalohadai eiava sene herevadia ita matauraia bada lasi, bona mai abidadama ida ita gaukaralaia. Namona be dina ta ta ai lauma helaga totona ita guriguri iseda haroro gaukara ai ita ia durua bona ena huahua badana—lalokau—ita habadaia totona. Bona Iehova ena tanobada oreana ese kongregesen hebou iboudiai amo ita ia hadibaia, hadibaia taudia ai ita lao totona be namo.
3 Friday ena hereva ta mai ena kahana toi be, “Ma Haida Ita Hadibaia Lalonai Sibona Ita Hadibaia.” Ia hahedinaraia ita ese (1) Keristani kara ibounai dekenai Dirava ena taravatu ita badinaia, (2) stadi namonamo daladia ita badinaia, bona (3) Diabolo ese ia gaukaralaia diba laloa daladia ita kokia, unai ibounai amo haheitalai namona ita hahedinaraia. Gabeai, iseda ruma bese taudia be matabodaga gaudia amo ita naria daladia ita dibaia. Unai hereva ese tama sina ia hagoadaia haheitalai namona idia hahedinaraia bona televisen ai matabodaga karadia idia itaia lasi bona edia natudia edia kompiuta Internet gaukaralaia karana bona televisen raraia karana idia naria. Friday ai oi kamonai herevadia amo edena hereva badana oi badinaia matamaia vadaeni?
4 Hereva dokona ese ita ia hagoadaia, Iehova ena diari ita laloa bada, Dirava ena abidadama horoa taudia kahirakahira ita noho, bona Iehova ena taunimanima edia maino ita habadaia. Bema English gado oi diba, idia halasia buka matamatana, Isaiah’s Prophecy—Light for All Mankind II, oi duahia vadaeni, a?
5 Ita Hegeregere Ma Haida Hadibaia Totona: Dina iharuana ena sinado be 2 Timoteo 2:2 amo. Saturday daba ena hereva ta mai ena kahana toi oi kamonai lalonai, (1) kara namo taudia tahua, (2) edia ura habadaia, bona (3) hadibadia Keriso ena hahegani ibounai idia badinaia totona heduru hereva haida oi torea, a? Oi dibaia gaudia—ruma taudia dekenai Baibel ena hereva ta oi hahedinaraia bona lou henia totona badina namona oi haginia karana—oi badinaia, a?
6 Adorahi ena program ese Hadibaia Tauna Badana, Iesu, ita tohotohoa ena namo ia herevalaia. Edena dala ai oi ura Iesu bamona oi kara? Unai dina ena hereva ta mai ena kahana toi amo oi dibaia gaudia amo, edena bamona “Tiokratik Edukeisen amo Namo Bada Oi Abia” diba? Edena heduru herevadia oi badinaia, kongregesen heboudia bona sibona emu stadi ai, emu kamonai bona laloa noho negana ena lata oi habadaia totona?
7 Ita diba momokani, do ita abia heduru bukana, Tiokratik Haroro Sikuli amo Heduru Oi Abia, ese ita do ia durua, hereva henia taudia bona Dirava ena Hereva hadibaia taudia bamona iseda diba ita habadaia. Emai ura be lagani 2002 dokonai Pidgin gado bona Hiri Motu gado ai unai buka ita abia. Danu, Daniela Ena Peroveta Herevana Oi Kamonai Namonamo! bukana ita abia neganai ita moale bada. Hereva ia henia tauna ese unai buka ia halasia neganai, ia gwau: “Inai buka matamatana ese Daniela ena peroveta herevadia ia herevalaia bona iseda laloa bada karana Dirava ena hereva dekenai do ia habadaia bona ita do ia durua Baibel ena peroveta herevadia, idia momo idia guguru vadaeni herevadia, ita lalo-pararalaia totona.” Unai ese inai nega ena dokona ia mai haraga ia hahedinaraia, a? Hari inai buka be iseda Kongregesen Buka Stadi lalonai ita stadilaia. Wiki ta ta ai, ita ese nega ita atoa unai buka matamatana ita hegaegaelaia namonamo neganai, namo bada do ita davaria.
8 Umui be Hadibaia Taudia Vadaeni be Namo: Heberu 5:12 ese hebou dekenai idia mai taudia edia lalona ia hegaegaelaia. Daba ena hereva ta mai ena kahana toi, “Malaki Ena Peroveta Herevana ese Ita Ia Hegaegaelaia Iehova Ena Dina Totona,” ese ita ia hagoadaia Dirava ita hesiai henia goadagoada totona bona koikoi karadia ibounai ita dadaraia, unai amo Iehova ena dina badana mai garina amo ita roho mauri diba. Bona drama, “Iehova Ena Siahu Matauraia,” ese ia hahedinaraia edena bamona idaunegai taudia Kora bona iena bamodia edia hekokoroku, dagi tahua karana, mama, bona abidadama lasi karana ese Iehova gwau-edeede henia karadia idia havaraia. Unai murinai idia henia hereva ese hari inai nega ai, ruma bese bona kongregesen lalonai Dirava ese ia atoa siahu taudia henunai ita noho ia hahedinaraia. Bona pablik tok, “Daidia ese Bese Ibounai Dekenai Hereva Momokani Idia Hadibaia?,” ese ia hamomokania Iehova ena Witnes taudia ese unai bamona idia karaia, to Kerisendom be uduna sibona amo idia gwau Baibel ena hereva momokani idia hadibaia.
9 Ia hedinarai goevagoeva, Iehova ese ita ia hadibaia noho iena Hereva hadibaia taudia namodia ai ita lao totona. Namona be ita dibaia gaudia ita badinaia, ‘ita sibona eda kara do ita naria namonamo, iseda hadibaia hereva danu. Unai amo, ita sibona ese mauri do ita davaria, bona ita idia kamonai taudia danu ese mauri do idia davaria.’—1 Tim. 4:16.