Dirava Ena Hahegani Badinaia Karana ese Iehova Ia Hanamoa
“Dirava ena ladana do lau habadaia, bona ia do lau tanikiu henia.”—SALAMO 69:30.
1. (a) Dahaka dainai Iehova ita hanamoa be maoro? (b) Edena dala ai mai tanikiu ida ia ita hanamoa?
IEHOVA be siahu ibounai Diravana, ia be Guba bona Tanobada edia Lohia Badana, bona Havaraia Tauna. Unai dainai, iena ladana bona iena ura ita hanamoa be maoro. Iehova hanamoa ena anina be iseda hereva bona kara amo iena ladana ita abia isi bona ia ita matauraia bada. Mai “tanikiu” ida ita karaia ena anina be hari ita totona ia karaia gaudia bona do ia karaia gaudia dainai hanaihanai ia ita tanikiu henia. Apokalupo 4:11 ese ita abia be namo lalohadai ia hahedinaraia, unuseniai abidadama lauma taudia guba dekenai idia gwau: “Aiemai Dirava e, oi be hegeregere momokani vadaeni, taunimanima ibounai ese hairai bona mataurai, be oi dekenai do idia henia, bona oiemu siahu henunai do idia noho. Badina gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.” Edena dala ai Iehova ita hanamoa? Iena kara ita dibaia, bona ia ura ita karaia gaudia ita karaia. Namona be salamo torea tauna ena hemami ita abia, ia gwau: “Oi be lauegu Dirava. Unai dainai oiemu ura ena kara, be lau dekenai mani do oi hadibaia.”—Salamo 143:10.
2. Iehova ese ia idia hanamoa taudia ia kara henia dalana bona ia idia hanamoa lasi taudia ia kara henia dalana edia idau be dahaka?
2 Iehova ese ia idia hanamoa taudia ia laloa bada. Unai dainai, “Dirava idia tahua taudia ibounai, be davana namona Dirava ese do ia henidia.” (Heberu 11:6) Unai davana be dahaka? Iesu be iena guba Tamana dekenai ia guriguri, ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:3) Oibe, Iehova idia hanamoa ‘bona ia idia tanikiu henia’ taudia ese tanobada “dekenai do idia noho ela bona hanaihanai.” (Salamo 37:29) To, “kara dika taudia, be do idia mauri noho daudau diba lasi.” (Aonega Herevadia 24:20) Bona hari inai nega dokona lalonai, Iehova hanamoa karana be karaharaga ita karaia matamaia be gau badana, badina kahirakahira kara dika taudia do ia hamasea bona kara maoromaoro taudia do ia hamauria. “Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”—1 Ioane 2:17; Aonega Herevadia 2:21, 22.
3. Dahaka dainai Malaki bukana ita laloa be namo?
3 Baibel lalonai Iehova ena ura ia noho, badina “Buka Helaga ena hereva ibounai be Dirava ena Lauma ese ia havaraia.” (2 Timoteo 3:16) Dirava ena Hereva lalonai, Iehova ese ena ladana idia abia isi taudia ia hanamoa daladia bona ia idia hanamoa lasi taudia dekenai idia vara gaudia edia sivarai momo idia noho. Unai sivarai ta ese peroveta tauna Malaki ena nega lalonai Israela dekenai idia vara gaudia ia kikilaia. Lagani 443 B.C.E. bamona ai, Nehemia be Iuda ena gavana neganai, Malaki ese iena ladana idia hatoa bukana, Malaki ia torea. Unai buka ena hereva be goada bona ita ia hamoalea bada, badina ia gwauraia gaudia bona ena peroveta herevadia “idia torea vadaeni, idia ese ita do idia sisiba henia totona. Badina be tanobada ena dokona be kahirakahira.” (1 Korinto 10:11) Malaki ena hereva ita laloa neganai, Iehova ena “dina badana” mai garina, inai tanobada ena oromana dikana Ia hadikaia negana unai, totona do ita hegaegae diba.—Malaki 4:5.
4. Malaki karoa 1 lalonai, edena hereva badadia 6 do ita laloa?
4 Malaki, lagani 2,400 gunanai idia torea bukana, be edena dala ai hari ita noho taudia ia durua Iehova ena dina badana mai garina totona ita hegaegae? Karoa 1 be hereva badadia 6 ia hahedinaraia ita dekenai, bona idia be mai anina bema ita ura mai tanikiu ida Iehova ita hanamoa bona unai amo iena lalo-namo bona mauri hanaihanai do ita abia: (1) Iehova ese ena taunimanima ia lalokau henia. (2) Namona be ita hahedinaraia helaga gaudia ita laloa bada. (3) Iehova ia ura iseda gau namodia ita henia ia dekenai. (4) Sibona eda namo tahua lasi lalokauna dainai tomadiho momokanina ita henia, mataganigani dainai lasi. (5) Dirava ese ia abia dae hesiai gaukarana be ita karaia kava maduna metauna ta lasi. (6) Ita ta ta be Dirava vairanai iseda kara ena badina do ita hahedinaraia. Unai dainai, inai stadi herevadia toi ena hereva ginigunana lalonai, Malaki karoa 1 ita itaia neganai, ita ese unai hereva badadia ta ta ita laloa be namo.
Iehova ese Ena Taunimanima Ia Lalokau Henia
5, 6. (a) Dahaka dainai Iehova be Iakabo ia lalokau henia? (b) Bema Iakobo ena abidadama ita tohotohoa, ita diba dahaka do ia vara?
5 Malaki ena siri ginigunadia lalonai, Iehova ena lalokau ita itaia goevagoeva. Unai buka ena hamatamaia herevadia idia gwau: “Lohiabada ese inai hereva Malaki dekenai ia henia, Malaki ese Israela taudia dekenai do ia hadibaia totona.” Danu, Dirava ia gwau: “Lau ese nega daudau umui lau lalokau henia vadaeni.” Iehova be unai siri lalonai haheitalai ta ia herevalaia, ia gwau: ‘Iakobo lau lalokau henia.’ Iakabo be Iehova ia abidadama henia tauna. Gabeai, Iehova ese Iakobo ena ladana ia haidaua Israela dekenai, bona ia amo Israela besena ia vara. Iakobo be abidadama tauna dainai, Iehova ese ia lalokau henia. Iehova ese Iakobo ena lalohadai namona idia hahedinaraia taudia ia lalokau henia danu.—Malaki 1:1, 2.
6 Bema Iehova ita lalokau henia bona ena taunimanima ita badinaia, 1 Samuela 12:22 ena hereva amo goada do ita abia, ia gwau: “Lohiabada ese . . . umui do ia rakatania lasi.” Iehova ese ena taunimanima ia lalokau henia bona ahuna namona, mauri hanaihanai, do ia henia. Unai dainai Baibel ia gwau: “Lohiabada dekenai do oi abidadama, bona kara namo do oi karaia, vadaeni tano dekenai do oi noho namo, mai maino danu. Oiemu moale be Lohiabada dekena amo do oi tahua, vadaeni ia ese, oi ura henia gaudia oi dekenai do ia henia.” (Salamo 37:3, 4) Iehova ita lalokau henia dainai, Malaki karoa 1 ena hereva badana iharuana ita laloa be namo.
Ita Hahedinaraia Helaga Gaudia Ita Laloa Bada
7. Dahaka dainai Iehova be Esau ia ura henia lasi?
7 Malaki 1:2, 3 ai, Iehova ia gwau ‘Iakobo lau lalokau henia’ murinai, ia gwau ‘Esau lau ura henia lasi.’ Dahaka dainai? Iakobo ese Iehova ia hanamoa, to iena hekapa kakana, Esau, ese ia hanamoa lasi. Esau ena ladana ma ta be Edoma. Malaki 1:4 ai, Edoma tanona idia gwauraia kara dika gabuna, bona idia noholaia taudia ia gwauraia dika. Esau ese Iakobo dekenai ena vara guna ahuna namona be vasiahu kakakakana abia totona ia hoihoilaia murinai, unai ladana Edoma (anina be “Kakakaka”) ia abia. Genese 25:34 ia gwau: “Esau ese iena vara guna ena hanamoa, be unai bamona dala dekenai ia negea.” Aposetolo Paulo ese abidadama tamona taudia ia hagoadaia do idia naria namonamo, “ta ese heudahanai o sihari kava karadia do ia karaia garina. O umui ta ese Dirava ia laloa lasi garina, Esau ia karaia bamona. Ia be lauma lasi tauna dainai, iena vara guna ahuna ia negea, aniani tamona do ia hoia totona.”—Heberu 12:14-16.
8. Dahaka dainai Paulo ia gwau Esau be sihari kava tauna bamona?
8 Dahaka dainai Paulo be sihari kava karana bona Esau ia herevalaia hebou? Badina bema ta be Esau bamona ia laloa, reana gabeai helaga gaudia do ia laloa bada lasi. Unai amo, kara dika badadia, hegeregere sihari kava, do idia vara diba. Unai dainai, ita ta ta ita nanadaia diba: ‘Nega haida lau ura egu Keristani ahuna—mauri hanaihanai—lau henia, do ia noho daudau lasi vasiahu bamona gauna abia totona, a? Reana lau diba lasi inai lau karaia, to lauma gaudia lau negea, a?’ Esau ia ura lasi ena tauanina urana ia haheaukalaia, ia ura ia hagugurua haraga. Iakabo dekenai ia gwau: ‘Karaharaga unai aniani kakakaka oi henia, lau ania totona.’ (Genese 25:30) Madi, Dirava ena hesiai taudia haida edia kara be hegeregere idia gwau: “Karaharaga! Dahaka dainai lau naria ela bona ai headava?” Herevana ena davana, to mahuta hebou urana idia hagugurua haraga, bona ia be edia vasiahu bamona gauna ai ia lao.
9. Edena dala ai Iehova gari henia mai hemataurai ida karana ita dogoatao diba?
9 Namona be kara goeva, kara maoromaoro badinaia karana, bona iseda lauma ahuna ita laloa maragi lasi, unai be helaga gaudia negea karana. Esau ita tohotohoa lasi, to abidadama tauna Iakobo bamona ita hahedinaraia helaga gaudia ita laloa bada bona unai amo Dirava gari henia noho mai hemataurai ida karana do ita dogoatao. Edena bamona unai ita karaia? Iehova ena taravatu ita badinaia namonamo karana amo. Unai ese Malaki karoa 1 ia herevalaia gauna ihatoina dekenai ita ia hakaua lao. Unai be dahaka?
Iehova Dekenai Iseda Gau Namodia Ita Henia
10. Edena dala ai hahelaga taudia idia hahedinaraia Iehova ena pata idia matauraia lasi?
10 Malaki ena negai, Ierusalema ena dubu ai, Iuda hahelaga taudia ese Iehova dekenai boubou namodia idia henia lasi. Malaki 1:6-8 ia gwau: “Mero ese iena tamana ia matauraia noho, bona hesiai tauna ese iena biaguna ia matauraia noho danu. Lau be emui tamana, badina dahaka lau dekenai umui matauraia lasi? Lau be emui biaguna, badina dahaka lau dekenai umui gari lasi? Umui ese lau umui ura henia lasi noho.” Hahelaga taudia ese idia nanadaia: “Edena bamona ai ese oi ai ura henia lasi?” Iehova ia gwau: “Lauegu boubou patana dekenai aniani mai miro danu sibona boubou totona umui atoa.” Hahelaga taudia idia nanadaia: “Ai be edena bamona oi dekenai ai matauraia lasi?” Unai dainai Iehova ese idia ia hamaoroa: “Umui ese lauegu boubou patana umui laloa ia be anina lasi gauna, unai kara dekena amo lau dekenai umui matauraia lasi.” Unai hahelaga taudia ese Iehova ena pata dekenai boubou dikana idia henia neganai, idia hahedinaraia ia idia matauraia lasi, to idia gwau: “Inai be kerere lasi.”
11. (a) Iehova be ia abia dae diba lasi boubou ia herevalaia neganai, dahaka ia gwau? (b) Bona hahelaga gaukara idia karaia lasi taudia edia kerere be dahaka?
11 Bena Iehova ese ia abia dae diba lasi boubou ia herevalaia, ia gwau: “Bema emui gavana dekenai inai gau dikadia umui henidia gwauraia neganai, ia be umui dekenai do ia moale, a? Ia ese gau namona ta umui dekenai do ia henia, a?” Lasi, edia gavana be unai bamona harihari gauna dekenai do ia moale lasi. Unai dainai Guba bona Tanobada edia Lohia Badana ese edia boubou gaudia mai edia dika do ia abia dae lasi be maoro! Bona hahelaga taudia sibona lasi be kerere idia karaia. Momokani, idia ese Iehova idia matauraia lasi badina boubou karana idia karaia. To taunimanima ma haida be mai edia kerere lasi, a? Lasi momokani! Idia ese unai mata-kepulu, aena dika, bona gorere animal idia abia hidi bona hahelaga taudia dekenai idia mailaia, do idia bouboulaia totona. Kara dika badana unai!
12. Iehova dekenai iseda gau namodia do ita henia totona, edena heduru ita abia?
12 Iehova dekenai iseda gau namodia ita henia neganai ita hahedinaraia ia ita lalokau henia momokani. (Mataio 22:37, 38) Iehova ena orea be Malaki ena negai idia noho kara dika hahelaga taudia hegeregerena lasi, ia ese Baibel ena hahediba herevadia ia henia ita dekenai, bena iena taravatu badinaia karana amo mai tanikiu ida Iehova ita hanamoa. Unai bamona herevana ma ta be Malaki karoa 1 ena hereva badana namba 4.
Mataganigani Dainai Lasi, to Lalokau Dainai Tomadiho Momokanina Ita Henia
13. Hahelaga taudia ese dahaka idia karaia bona ia hahedinaraia idia be mataganigani taudia?
13 Malaki ena negai hahelaga taudia be sibodia edia ura idia tahua, lalokau idia hahedinaraia lasi, bona moni idia ura henia bada. Edena bamona unai ita diba? Malaki 1:10 ia gwau: “Umui ta ese Dubu Helaga ena iduara do ia koua [be] namo! Unai neganai lauegu boubou patana dekenai lahi do umui gabua kava lasi! Lau be umui emui kara dekenai lau moale lasi. Bona lau dekenai umui mailaia boubou gaudia be do lau abia dae lasi.” Oibe, unai mataganigani hahelaga taudia ese dubu ena auka lasi gaukarana ta idia karaia neganai, gaukara davana idia tahua goadagoada, hegeregere iduara idia koua bona boubou patana ena lahi idia ha-araia sibona, to idia ura davana idia abia! Ita hoa lasi, Iehova ese idia mailaia boubou gaudia ia abia dae lasi!
14. Dahaka dainai ita gwau diba Iehova ena Witnes taudia edia kara ena badina be lalokau?
14 Idaunegai Ierusalema dekenai idia noho kara dika hahelaga taudia edia mataganigani bona sibona edia ura tahua karana ita laloa neganai, ita laloatao Dirava ena Hereva ia gwau, ‘mataganigani taudia be Dirava ena Basileia do idia davaria lasi.’ (1 Korinto 6:9, 10) Sibodia edia namo idia tahua hahelaga taudia edia kara ita laloa neganai, Iehova ena Witnes taudia idia karaia tanobada hegegemadai haroro gaukarana ita laloa bada. Ita be volantia taudia, bona iseda haroro gaukara ena kahana ibounai ita karaia mai davana lasi ida. Ita be ‘Dirava ena hereva ita hoihoilaia lasi.’ (2 Korinto 2:17) Paulo bamona, ita ta ta be mai momokani ida ita gwau diba: “Lau ese Sivarai Namona umui dekenai lau harorolaia, bona davana lau abia lasi.” (2 Korinto 11:7) Mani oi itaia, Paulo be mai moale ida ‘Sivarai Namona ia harorolaia.’ Unai ese Malaki karoa 1 ia herevalaia gauna namba 5 ia hahedinaraia.
Dirava Hesiai Henia be Maduna Metauna ta Lasi
15, 16. (a) Hahelaga taudia edia lalohadai boubou henia karana dekenai be dahaka? (b) Iehova ena Witnes taudia be edena dala ai boubou idia henia?
15 Idaunegai Ierusalema dekenai, abidadama lasi hahelaga taudia be boubou henia karana idia hesikulaia bona idia laloa ia be idia karaia kava karana ta sibona. Idia dekenai ia be maduna metauna. Malaki 1:13 dekenai, Dirava ese idia ia hamaoroa: “Umui gwau, ‘Ia, inai boubou henia kara dekenai ita hesiku vadaeni!’ ” Unai hahelaga taudia ese Dirava ena helaga gaudia idia laloa maragi bona idia matauraia lasi. Namona be ita guriguri ita be idia bamona do ita lao lasi. Namona be nega ibounai 1 Ioane 5:3 ia gwauraia lalohadaina ita hahedinaraia, ia gwau: “Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.”
16 Namona be Dirava dekenai lauma bouboudia ita henia mai moale ida, bona ita laloa lasi unai be maduna metauna. Namona be inai peroveta herevadia ita badinaia: “Inai guriguri [Iehova] dekenai do umui henia, boubou gauna bamona, gauna inai: ‘Lohiabada e, aiemai kara dika ibounai do oi gwauatao, bona aiemai guriguri do oi abia dae, vadaeni ai ese oi do ai hanamoa momokani, aiemai gwauhamata gunana hegeregerena.’ ” (Hosea 14:2) Unai hereva, “boubou gauna,” ena anina be lauma bouboudia, Iehova bona ena ura idia hanamoa herevadia. Heberu 13:15 ia gwau: “Unai dainai namona be Dirava do ita hanamoa, Iesu ena ladana dainai. Bona inai hanamoa Dirava dekenai do ita henia nega ibounai, boubou gauna bamona. Oibe, ita ese iseda uduna bibina Iesu dekenai do ita henia, bona ia do ita gwauraia hedinarai, ia be Lohiabada.” Ita moale badina iseda lauma bouboudia be mai anina herevadia, maduna ia noho dainai ita gwauraia herevadia lasi, to idia amo mai iseda kudouna ibounai ida iseda lalokau Dirava dekenai idia hahedinaraia! Unai ese ita ia hakaua lao Malaki karoa 1 ia hahedinaraia hereva badana namba 6 dekenai.
Ta Ta Ena Kara Ena Badina Do Ia Gwauraia Hedinarai
17, 18. (a) Dahaka dainai Iehova ese “koikoi tauna” ia gwauraia dika? (b) Unai koikoi taudia be dahaka idia laloa namonamo lasi?
17 Malaki ena negai idia noho taudia ta ta idia karaia karadia be sibodia edia maduna, bona ita danu ita karaia karadia be iseda maduna danu. (Roma 14:12; Galatia 6:5) Unai hegeregerena, Malaki 1:14 ia gwau: “Koikoi tauna ese dika do ia davaria momokani. Inai bamona tauna be iena mamoe orea edia huanai mai ena mamoe namona ta, bona lau dekenai henia totona ia gwauhamata vadaeni, to ia ese mamoe dikana ta lauegu boubou totona ia henia. Inai bamona kara be maoro lasi.” Unai tau ta be mai ena mamoe orea o animal momo, iena animal be tamona sibona lasi—hegeregere mamoe tamona—bena unai sibona do ia abia hidi diba. Boubou totona animal ta ia abia hidi neganai, mata-kepulu, aena dika, eiava gorere animal ta ia abia hidi be dika. Bema animal dikana ta ia abia hidi, do ia hahedinaraia Iehova ena boubou henia dalana ia matauraia lasi, badina mai ena animal momo tauna be ia dika lasi animal ta do ia davaria diba!
18 Mai badina namona ta ida, Iehova ese unai koikoi tauna ia gwauraia dika, badina animal maruane namona ta ia noho, to ia mata-kepulu, iena aena ia dika, eiava ia gorere animal ta ia mailaia—eiava ia veria lao—hahelaga tauna dekenai ia bouboulaia totona. To toana be hahelaga taudia ese Dirava ena taravatu, animal dikadia idia hegeregere lasi, be nega ta idia gwauraia lasi. (Levitiko 22:17-20) Laloa namonamo taudia idia diba, bema edia gavana dekenai unai bamona harihari gauna dikana idia henia toho, do ia badu. To momokani, idia be gavana iboudiai ia hereaia momokani tauna, Guba bona Tanobada edia Lohia Badana, Iehova, idia kara henia! Malaki 1:14 ia gwau: “Lau be King badana ta, bona bese idauidau ibounai ese lau dekenai idia gari henia. Lau, Siahu Ibounai Lohiabada lau hereva inai.”
19. Dahaka ita naria mai eda ura bada ida, bona hari dahaka ita karaia be namo?
19 Ita be Dirava ena abidadama hesiai taudia dainai, taunimanima ibounai ese King Badana, Iehova, do idia matauraia dinana be mai eda ura bada ida ita naria noho. Unai neganai, “tanobada ibounai, be Lohiabada ena diba maoro dekena amo do ia honu momokani.” (Isaia 11:9) Ela bona unai ia vara, Iehova ena taravatu ita badinaia totona, salamo torea tauna ita tohotohoa be namo, badina ia gwau: “Dirava ena ladana do lau habadaia, bona ia do lau tanikiu henia.” (Salamo 69:30) Unai ita karaia totona, Malaki lalonai ita do ia durua bada sisiba ma haida ia noho. Unai dainai, hereva gabedia rua lalodiai, Malaki ena kahana ma haida do ita laloa namonamo danu.
Oi Laloatao, A?
• Dahaka dainai Iehova ita hanamoa be namo?
• Dahaka dainai Iehova ese Malaki ena negai hahelaga taudia edia boubou ia abia dae lasi?
• Edena dala ai, iseda hereva amo, ita ese Iehova dekenai boubou ita henia bamona?
• Tomadiho momokanina karaia ena badina maorona be dahaka?
[Picture on page 15]
Malaki ena peroveta herevana ese iseda nega ia herevalaia
[Picture on page 16]
Esau ese helaga gaudia ia laloa bada lasi
[Picture on page 17]
Hahelaga taudia bona Iuda taudia be idia hegeregere lasi boubou idia henidia
[Picture on page 18]
Tanobada hegegemadai, Iehova ena Witnes taudia be mai edia ura ida hanamoa herevadia idia henia