Iehova ese Koikoi Karana Ia Inai Henia
‘Ita ta ta iseda bamona taudia danu ita karaia gwauhamata ita makohia lasi.’—MALAKI 2:10.
1. Mauri hanaihanai ita abia totona, Dirava ia ura dahaka ita karaia?
OI URA mauri hanaihanai do oi abia, a? Bema Baibel ia gwauhamatalaia helarona oi abia dae, reana do oi gwau, ‘Oibe.’ To, bema oi ura Dirava ese oi ia lalo-namo henia bona mauri hanaihanai tanobada matamatana lalonai oi moalelaia, iena hahegani oi badinaia be gau badana. (Hadibaia Tauna 12:13; Ioane 17:3) Dirava ia laloa goevadae lasi taudia ese unai idia karaia diba be kara aukana, a? Lasi, badina Iehova be inai hagoadaia herevana ia henia: “Lau ura bada umui ese lau do umui lalokau henia nega ibounai, to lau ura lasi boromakau edia boubou do umui karaia. Lauegu ura bada gauna be inai: Lauegu bese be lau do idia diba momokani, to idia ese boubou gaudia idia gabua, be lau ura sisina sibona.” (Hosea 6:6) Unai dainai goevadae lasi taudia danu ese Dirava ena hahegani idia badinaia diba.
2. Israela taudia momo be Iehova dekenai edena kara koikoi idia karaia?
2 To, taunimanima momo idia ura lasi Iehova ena ura idia karaia. Hosea ia hahedinaraia Israela taudia momo danu idia ura lasi idia karaia. Unai bese be Dirava ida gwauhamata idia karaia, idia gwau Dirava ena taravatu do idia badinaia. (Esodo 24:1-8) To nega daudau lasi murinai, iena “gwauhamata taravatuna idia utua.” Unai dainai, Iehova ia gwau unai Israela taudia be ia dekenai “idia kara koikoi.” (Hosea 6:7) Bona ema bona hari, taunimanima momo ese unai kara idia karaia danu. To Iehova ese koikoi karana ia inai henia, herevana unai be ia dekenai eiava ia idia lalokau henia hesiai taudia dekenai ia vara.
3. Inai stadi dekenai dahaka do ita tahua?
3 Hosea sibona be Dirava ena lalohadai koikoi karana dekenai ia herevalaia peroveta tauna lasi, ita danu be unai lalohadai ita abia dae be namo bema ita ura iseda mauri ita moalelaia. Stadi hereva ginigunana lalonai, ita ese Malaki karoa 1 dekenai Malaki ena peroveta sivaraina ena anina ita tahua matamaia. Hari, namona be unai buka ena karoa iharuana dekenai ita lao, bona do ita itaia Dirava ena lalohadai koikoi karana dekenai ia herevalaia danu. Ena be Dirava ena taunimanima be Babulonia amo idia giroa bona lagani momo murinai Malaki ese edia noho ia herevalaia, to hari, ita dekenai karoa 2 be mai anina danu.
Hahelaga Taudia Edia Dika
4. Iehova ese hahelaga taudia dekenai edena sisiba ia henia?
4 Karoa 2 ena hamatamaia herevadia be Iehova ena sisiba Iuda hahelaga taudia dekenai, idia ese ena kara maoromaoro daladia idia rakatania dainai ia henia. Bema ena sisiba idia abia dae lasi bona edia dala idia hamaoromaoroa lasi, dika bada do ia vara. Siri 1 bona 2 mani oi laloa: “Siahu Ibounai Lohiabada ese hahelagaia taudia ma ia hereva henidia, ia gwau, ‘Sisiba goada umui dekenai lau henia inai: Umui ese emui kara ibounai dekena amo lauegu ladana do umui hanamoa. Bema egu hereva umui kamonai henia lasi neganai, dika bada herea momokani emui latanai do lau atoa.’ ” Bema hahelaga taudia ese Dirava ena taunimanima dekenai ena taravatu idia hadibaia bona idia ese idia badinaia, hahenamo idia abia diba. To Dirava ena ura idia laloa lasi dainai dika sibona do ia mai. Hahelaga taudia idia gwauraia hanamoa herevadia danu be hadikaia herevadia ai do idia lao.
5, 6. (a) Dahaka dainai hahelaga taudia edia dika ese ma haida edia ia hereaia? (b) Iehova be edena hereva amo ia hahedinaraia hahelaga taudia ia inai henia?
5 Dahaka dainai hahelaga taudia edia dika ese ma haida edia ia hereaia? Siri 7 ese badina ta ia hahedinaraia goevagoeva: “Taunimanima do idia hadibaia, Dirava do idia diba momokani totona. Bona taunimanima ese idia dekenai do idia lao be namo, lauegu ura do idia diba totona. Badina hahelagaia taudia be Siahu Ibounai Lohiabada ena hereva gwauraia taudia.” Lagani 1,000 bamona gunanai, Dirava ese Mose amo Israela taudia dekenai taravatu ia henidia, bona ia gwau hahelaga taudia edia maduna be Iehova ia henia ‘taravatu ibounai be Israela taudia dekenai do idia hadibaia.’ (Levitiko 10:11) Madi, 2 Sivarai 15:3 ia torea tauna be gabeai inai ripoti ia henia, ia gwau: “Nega daudau Israela taudia ese Dirava Momokani dekenai idia tomadiho henia lasi, bona edia hahelagaia tauna momokani, hadibaia tauna unai, be lasi. Idia dekenai danu taravatu be lasi.”
6 Lagani 400 B.C.E. murinai, Malaki ena nega lalonai, hahelaga taudia edia kara ia idau lasi. Dirava ena Taravatu be ena taunimanima dekenai idia hadibaia lasi. Unai dainai, unai hahelaga taudia ese edia davana idia abia be maoro. Iehova ese idia dekenai ia henia hereva aukadia mani oi laloa. Malaki 2:3 ia gwau: “Umui atoa boubou gaudia edia kukuri dekena amo emui vairana do lau dahua.” Sisiba aukana unai! Edia taravatu be boubou animal edia kukuri be kamepa murimurinai idia abia lao bona idia gabua. (Levitiko 16:27) To Iehova ese idia ia hamaoroa unai do ia vara lasi to edia vairana dekenai unai kukuri do ia dahua neganai, ia hahedinaraia goevagoeva unai taudia bona idia henia bouboudia ia inai henia bona ia dadaraia.
7. Dahaka dainai Iehova ese Taravatu hadibaia taudia ia badu henia?
7 Lagani 1,000 bamona idia do noho ela bona Malaki do ia vara neganai, Iehova ese Levi taudia dekenai palai dubu bona gabeai dubu badana ena hesiai gaukara helagana ia henidia. Idia be Israela besena ena hadibaia taudia. Edia gaukara idia hagugurua ena anina be idia bona Israela taudia ese mauri bona maino do idia abia. (Numera 3:5-8) Matamanai Levi taudia ese Dirava idia gari henia, to unai gari ia boio. Unai dainai Iehova ese idia ia hamaoroa: “To hari umui hahelagaia taudia ese dala maorona dekena amo umui raka siri vadaeni. Emui hadibaia hereva dekena amo taunimanima momo umui hakaua kerere. Umui ese Levi danu lau karaia gwauhamata umui makohia vadaeni . . . egu ura umui kamonai henia lasi.” (Malaki 2:8, 9) Hahelaga taudia ese hereva momokani idia hadibaia lasi bona edia haheitalai dikana amo Israela taudia momo idia hakaua kerere dainai, Iehova be mai maoro ida idia dekenai ia badu.
Dirava Ena Taravatu Badinaia
8. Taunimanima idia hegeregere lasi Dirava ena taravatu idia badinaia totona, a? Mani oi gwauraia.
8 Namo lasi ita laloa unai hahelaga taudia idia hebogahisi henia bona edia kerere idia gwauatao be namo, badina idia be taunimanima sibona dainai Dirava ena taravatu bona ena dala idia badinaia diba lasi. Hereva momokanina be, taunimanima ese Dirava ena hahegani idia badinaia diba, badina Iehova ese do idia karaia diba lasi taravatudia ia haginia lasi. Reana unai neganai hahelaga taudia haida ese Dirava ena taravatu idia badinaia, bona ita diba gabeai idia ta—“Hahelagaia Tauna Badana” Iesu—ese ia badinadia. (Heberu 3:1) Inai siri be momokani ia dekenai: ‘Ia ese taunimanima dekenai kara maoromaoro dalana ia hadibaia. Kerere dalana ia hadibaia lasi. Ia be lau danu ia noho hebou, mai maino bona mai kara maoromaoro danu. Bona ia ese taunimanima momo ia durua, vadaeni idia ese kara dika dekena amo idia siri.’—Malaki 2:6.
9. Iseda nega lalonai, daidia be hereva momokani idia halasia?
9 Unai hegeregerena, lagani 100 bona ma haida lalodiai, Keriso ena horoa tadikaka, guba helarona idia abia taudia, ese ‘hahelaga taudia edia gaukara idia karaia bona harihari gaudia helagadia, Dirava do ia abia dae gaudia, idia henia.’ (1 Petero 2:5) Baibel ena hereva momokani halasia gaukarana idia gunalaia. Idia hadibaia hereva momokanidia oi dibaia neganai, oi davaria idia ese kara maoromaoro dalana idia hadibaia, ani? Momo idia durua tomadiho dalana kererena idia rakatania totona, bona hari tanobada hegegemadai, milioni momo be Baibel herevadia momokanidia idia diba bona mauri hanaihanai helarona idia abia. Bena idia ese hahenamo idia abia, taunimanima milioni ma haida dekenai kara maoromaoro dalana idia hadibaia.—Ioane 10:16; Apokalupo 7:9.
Naria Namonamo Ena Badina
10. Dahaka dainai ita naria namonamo be mai badina?
10 To, ita naria namonamo be mai badina. Ita ese Malaki 2:1-9 ia hadibaia gaudia ita reaia diba. Iseda hereva ita naria namonamo, iseda uduna be kerere dalana ai ita gaukaralaia lasi totona, a? Hegeregere, iseda ruma bese taudia ese iseda hereva idia abidadama henia diba, a? Kongregesen lalonai iseda Keristani tadikaka bona taihu ese idia abidadama henia diba, a? Reana ita manadalaia haraga diba karana ta be, iseda hereva ita gwauraia dalana dainai edia toana be maoro, to ma haida ita hakaua kerere. Eiava bisinesi karana lalonai gau maragidia haida ita habadaia eiava ita hunia. Iehova ese unai do ia itaia lasi, a? Bona, bema unai bamona karadia ita karaia, iseda udu bibinadia amo ita henia bouboudia, iseda hanamoa herevadia, do ia abia dae, a?
11. Daidia idia naria namonamo be gau badana?
11 Malaki 2:7 ese kongregesen lalonai Dirava ena Hereva idia hadibaia taudia dekenai sisiba ia henia. Ia gwau namona be ‘taunimanima idia hadibaia, Dirava idia diba momokani totona. Bona taunimanima ese idia dekenai idia lao be namo, ena ura do idia diba totona.’ Unai hadibaia taudia ese maduna metauna idia abia, badina Iamesi 3:1 ia gwau, “Dirava ese do ia kota henia auka, haida bamona lasi.” Ena be mai goada bona mai moale ida idia hadibaia be namo, to gau badana be edia hahediba herevana ena badina aukana be Dirava ena Hereva bona Iehova ena orea amo idia abia hadibaia herevadia. Unai dala amo, do idia hegeregere momokani “ma taunimanima haida dekenai unai hereva do idia gwauraia lou.” Unai dainai inai sisiba idia abia: “Oi gaukara goada, bona gaukara namona momokani tauna do oi lao, Dirava ese oi dainai do ia moale bada totona. Vadaeni oi ese hereva momokani do oi hadibaia maoromaoro, bona Dirava ena vairanai do oi hemarai lasi.”—2 Timoteo 2:2, 15.
12. Hadibaia taudia be edena dala ai idia naria namonamo be namo?
12 Bema ita naria namonamo lasi, reana ita ia dibagania gauna be sibona eda ura gaudia o lalohadai be iseda hadibaia herevadia lalonai ita atoa kau. Bema tau ta be sibona ena diba ia abidadama henia bada, herevana Iehova ena orea ia hadibaia gaudia amo ia idau, reana unai dala ai ia moru diba. To Malaki karoa 2 ia hahedinaraia ia maoro bema ita laloa kongregesen ena hadibaia taudia ese Dirava amo ia mai dibana do idia badinaia bona mamoe taudia idia hamorua diba gaudia, sibodia edia lalohadai unai, idia hadibaia lasi. Iesu ia gwau: “To inai bamona mero ta, lau dekenai ia abidadama, do ia hakererea tauna be, nadi badana ta iena aiona dekenai bema idia kwatua bona davara dekenai bema idia negea diho, vadaeni ia mase be namo.”—Mataio 18:6.
Abidadama Lasi Tauna Adavaia Karana
13, 14. Malaki ese edena koikoi karana ta ia hahedinaraia?
13 Malaki karoa 2 ena siri 10 amo, unai koikoi karana ia hahedinaraia goevagoeva. Malaki ese dala rua ia herevalaia, bona idia ia herevalaia neganai inai hereva “koikoi” ia gaukaralaia loulou. Gau ginigunana be, Malaki be ena sisiba hamatamaia totona inai henanadai ia henia: “Ita ibounai iseda tamana be tamona, ani? Dirava tamona ese ita ia karaia vadaeni, ani? Unai be momokani dainai, badina dahaka ita ta ta iseda bamona taudia danu ita karaia gwauhamata ita makohia noho? Bona badina be dahaka Dirava ese iseda sene taudia danu ia karaia gwauhamata taravatuna be ita ese ita hadikaia noho?” Bena siri 11 lalonai ia hahedinaraia, Israela edia koikoi dalana amo Iehova ena kara helagana idia hadikaia bamona. Edena kara dika hereana idia karaia? Unai siri ese dala kererena ta ia hahedinaraia: “Idau hahine taudia, dirava koikoi idia tomadiho henia hahine taudia, idia adavaia.”
14 Anina be Israela taudia haida, Iehova dekenai edia mauri idia gwauhamatalaia bese taudia, ese ia idia tomadiho henia lasi hahinedia idia adavaia. Badina siridia ese ita idia durua unai kara dika ena bada ita lalo-pararalaia totona. Siri 10 ia gwau edia tamana be tamona. Unai be Iakobo (o Israela), Aberahamo, eiava Adamu danu ia herevalaia lasi. Malaki 1:6 ia hahedinaraia Iehova be edia ‘tamana tamona.’ Israela besena be mai edia maduna ia dekenai, bona Dirava ese edia sene taudia danu ia karaia gwauhamata taravatuna henunai idia noho. Unai gwauhamata ena taravatu ta be inai: “Unai bese taudia ta do umui adavaia lasi, umui emui natudia kekeni be edia uhau taudia dekenai do umui henidia lasi, bona edia natudia kekeni do umui abidia lasi emui uhau totona.”—Deuteronomi 7:3.
15. (a) Edena dala ai haida be abidadama lasi tauna adavaia karana ena maoro idia gwauraia toho? (b) Iehova be headava ia herevalaia neganai, dahaka ia gwau?
15 Hari, reana haida idia gwau: ‘To lau ura henia kekeni (o mero) ena kara be namo herea. Gabeai, ia ese tomadiho momokanina do ia abia dae.’ Unai bamona laloa dalana ese Dirava ia henia sisiba ia hamomokania: “Taunimanima edia kudouna be mai koikoi bada, bona mai dika rohoroho danu.” (Ieremia 17:9) Dirava ena lalohadai abidadama lasi taudia adavaia karana dekenai be Malaki 2:12 ai ia gwauraia: “Inai bamona ia karaia tauna be Lohiabada ese Israela ena orea dekena amo do ia atoa siri.” Unai dainai, Keristani taudia ia hagoadaia “Keristani tauna sibona” do idia adavaia. (1 Korinto 7:39) Keristani oreana lalonai, ta be abidadama lasi tauna ia adavaia neganai, idia atoa siri lasi. To daudau lasi murinai, Dirava ese inai tanobada dikana ia haorea neganai, bema unai tauna o hahine be abidadama ia do abia lasi, dahaka do ia vara ia dekenai?—Salamo 37:37, 38.
Ta ese Ena Adavana Ia Kara Dika Henia
16, 17. Haida be edena koikoi karana idia karaia?
16 Malaki ese koikoi karana ma ta ia herevalaia: ta ese ena adavana ia kara dika henia, badina maorona ia noho lasi to edia headava ia hadokoa. Karoa 2 ena siri 14 ai ia gwau: “Lohiabada be ia diba oiemu uhau dinadia lalonai oi headava neganai, oi ese oiemu hahine oi gwauhamata henia, ia do oi rakatania lasi momokani. Inai gwauhamata oiemu adavana dekenai be Lohiabada ena vairana dekenai oi karaia. To oi ese unai gwauhamata oi makohia, oi badinaia lasi.” Iuda tatau be mai koikoi ida edia adavadia idia badinaia lasi dainai, “matana ranu” ese Iehova ena boubou patana ia koua bamona. (Malaki 2:13) Unai tatau be badina maorodia lasi dainai edia headava idia hadokoa. Idia matamata neganai idia adavaia hahine be mai kerere ida idia rakatania, reana Dirava idia diba lasi hahine matamatadia adavaia totona. Bona kara gageva hahelaga taudia ese unai idia koua lasi! To Malaki 2:16 ia gwau: “Lohiabada, Israela ena Dirava, be inai bamona ia hereva, ia gwau, ‘Headava hamakohia kara lau ura henia lasi momokani.’ ” Gabeai, Iesu ia hahedinaraia matabodaga karana sibona dainai kerere lasi tauna o hahine be ena headava ia hadokoa bona ia headava lou diba.—Mataio 19:9.
17 Malaki ena hereva haida oi laloa, bona do oi itaia idia be ta ena kudouna idia hamarerea bona hebogahisi hemamina idia havaraia herevadia. Ia gwau “oiemu hahine oi gwauhamata henia, ia do oi rakatania lasi momokani.” Ia hereva henia tauna ta ta be abidadama tamona Israela hahinena ia adavaia, iena mauri ibounai lalonai do ia bamoa bona do ia lalokau henia turana ta ia abia hidi unai. Reana ia headava neganai idia ruaosi idia matamata, to lagani momo idia lao bona idia buruka matamaia neganai, unai be badina namona lasi unai headava gwauhamatana ia kokia totona, unai gwauhamata ia do noho.
18. Hari inai negai, Malaki ena sisiba koikoi karana dekenai be edena dala idauidau ai ia be mai anina?
18 Ia hedinarai goevagoeva, unai sisiba be mai anina hari danu. Dirava ena sisiba be Lohiabada idia abidadama henia taudia sibona ita adavaia, to haida ese unai sisiba idia laloa lasi. Bona madi, ma haida idia hekwarahi lasi edia headava do ia goada noho totona. Bena, ekskius idia gwauraia bona Dirava ia inai henia dalana idia tahua, Baibel ia gwauraia badina headava hadokoa totona be lasi, to idia karaia ma ta do idia adavaia totona. Unai bamona idia karaia neganai ‘Iehova ia hesiku.’ Malaki ena negai, Dirava ena sisiba idia dadaraia taudia idia laloa danu Iehova ena lalohadai be maoro lasi. Ia be hegeregere idia gwau: “Kara maoromaoro Diravana be edeseniai?” Edia laloa dalana be gageva momokani! Namona be unai tarapu lalonai ita moru lasi.—Malaki 2:17.
19. Edena dala ai tatau bona edia adavadia be Dirava ena lauma idia abia diba?
19 Gau namona ta be, Malaki ia hahedinaraia tatau haida ese edia adavadia dekenai kara koikoi idia karaia lasi. Tatau haida dekenai ‘Dirava ena lauma helaga orena ia noho.’ (Siri 15, NW ) Moale gauna be, hari Dirava ena orea lalonai unai bamona tatau be momo herea, edia adavana idia “matauraia.” (1 Petero 3:7) Idia ese hereva amo eiava imana amo edia adavana idia hahisia lasi, bona idia ura lasi edia adavana idia hahemaraia mahuta hebou karadia idia karaia, hahine ma haida idia tura henia, eiava matabodaga sivarai o laulau idia itaia. Iehova ena orea lalonai abidadama Keristani hahine momo, Dirava bona ena taravatu idia badinaia hahinedia unai, idia noho danu. Unai bamona tatau bona hahine ese Dirava ia inai henia gaudia idia diba, bona edia lalona idia hadaia unai hegeregerena do idia laloa bona do idia kara. Namona be oi be idia bamona, bona ‘Dirava oi kamonai henia’ bona ena lauma helaga oi abia.—Kara 5:29.
20. Daudau lasi murinai, taunimanima ibounai dekenai dahaka do ia vara?
20 Daudau lasi murinai, Iehova ese inai tanobada ibounai do ia kota henia. Ia dekenai taunimanima ta ta ese idia abia dae gaudia bona edia kara do idia gwauraia. “Ita ibounai ta ta ese, iseda kara ena badina, be Dirava ena vairana dekenai do ita gwauraia hedinarai.” (Roma 14:12) Unai dainai, hari henanadai namona be inai: Daika ese Iehova ena dina amo do ia roho mauri? Hereva ihatoina bona ia be hereva dokona, ese unai sinado do ia herevalaia.
Anina Oi Gwauraia Diba, A?
• Iehova ese edena badina badana dainai Israela hahelaga taudia ia sisiba henia?
• Dahaka dainai ita gwau diba taunimanima ese Dirava ena taravatu idia badinaia diba?
• Hari, dahaka dainai ta ita hadibaia neganai ita naria namonamo be gau badana?
• Iehova ese edena kara rua ia gwauraia dika?
[Picture on page 21]
Malaki ena negai, hahelaga taudia be Iehova ena dala idia badinaia lasi dainai sisiba idia abia
[Picture on page 22]
Ita naria namonamo Iehova ena dala, iseda ura gaudia lasi, ita hadibaia
[Pictures on page 24]
Israela taudia be anina lasi gaudia dainai edia headava idia hadokoa bona Dirava diba lasi hahine idia adavaia neganai, Iehova ese idia ia gwauraia dika
[Picture on page 24]
Hari, Keristani taudia ese edia headava gwauhamata idia matauraia