Henanadai Mauana
◼ Bema kongregesen ena heduru idia noia mase herevana eiava guria dalana karaia totona, sedira inai bamona henanadai idia vara:
Daika ese mase herevana do ia henia? Famili taudia ese do idia abia hidi. Bapatiso vadaeni tadikakana ta mai ena kara namodia idia abia hidi diba. Bema elda taudia idia noia hereva henia tauna idia abia hidi, nega momo idia ese elda namona ta do idia abia hidi, Society ena autlain amo hereva do ia henia. Ena be mase tauna do ita hanamoa bada herea lasi, to reana ia haheitalaia kara namodia do ita gwauraia diba.
Kingdom Hall idia gaukaralaia diba, a? Idia gaukaralaia diba bema elda taudia ese gwaumaoro idia henia bona bema sediual hegeregerena idia karaia hebou idia hadikaia lasi. Kingdom Hall idia gaukaralaia diba bema ia mase tauna be mai ena ladana namona bona ia be kongregesen tauna ta eiava ena natuna ta. Bema ia mase tauna be Keristani kara namodia ia hahedinaraia lasi taunimanima vairanai, eiava bema iena gini kongregesen vairanai ia namo lasi neganai, vadaeni elda taudia ese gwaumaoro do idia henia lasi, Kingdom Hall do idia gaukaralaia totona.—Hesiai Gaukara bukana, rau 62-3 itaia.
Kingdom Hall be murimuri taudia edia mase herevana henia totona idia gaukaralaia lasi. To Kingdom Hall idia gaukaralaia diba bema ia mase tauna ena ruma bese taudia be lauma dalanai idia gaukara goada noho bapatiso taudia, bona kongregesen taudia sisina momo idia diba ia mase tauna be hereva momokani ia ura henia bona kara namodia ia karaia ma haida dekenai, bona tanobada ena kastom karadia be unai nega ai do idia karaia lasi.
Kingdom Hall gaukaralaia totona gwaumaoro idia henia neganai, elda taudia idia tahua bema Kingdom Hall dekenai mase mauana idia abia mai be vaia edia kastom eiava. Bema unai be vaia edia kara, reana gwaumaoro idia henia idia mailaia diba totona.
Mase herevana murimuri taudia totona be edena bamona? Bema mase tauna ena kara ia namo taunimanima vairanai, tadikaka ta ese Baibel amo hagoadaia herevana ta ia henia diba mase tauna ena ruma dekenai eiava guria gabuna dekenai. Kongregesen ese mase herevana do ia karaia lasi kara bodagadia eiava Baibel ena hakaua herevadia hegeregerena ia raka lasi tauna totona. Tadikaka ta be tomadiho koikoi haroro tauna danu mase herevana do idia karaia hebou lasi, eiava Babulonia Badana ena dubu ta dekenai mase herevana do ia henia lasi.
To bema mase tauna be murimuri ai idia atoa tauna be edena bamona? Kongregesen taudia momo be gau ta do idia karaia lasi bona Kingdom Hall danu do idia gaukaralaia lasi. Bema ia do mase lasi neganai kerere tauna ia hahedinaraia ia helalo-kerehai, bona kongregesen dekenai giroa lou toana ia hahedinaraia neganai, vadaeni reana tadikaka ta ia laloa hereva ta be mase tauna ena ruma dekenai eiava guria gabuna dekenai do ia henia be kerere lasi. To inai ia do vara lasi neganai, aonega dalana be ma elda haida ida unai idia kikilaia guna. Bema unai tadikaka be hereva ia henia be aonega karana lasi, namona be tadikaka ta, ia be mase tauna ena varavarana ta, ese hereva ta ia henia diba varavara edia lalona ia hagoadaia totona.
Hereva haida be inai Watchtower lalonai oi davaria diba, October 15, 1990, rau 30-1; June 1, 1978, rau 5-8; June 1, 1977, rau 347-8; March 15, 1970, rau 191-2; Awake! March 22, 1977, rau 12-15; Gima Kohorona February 1, 1982, rau 24; December 1, 1980, rau 3-6; bona Noga! Issue 2, 1991, rau 24-5.