Keristani Fineral Dirava Hamoalea Dalanai Karaia

GABU ibounai dekenai taitai regena oi kamonai diba. Daradoko taudia be dabua koremana idia karaia, tano dekenai idia moru bona idia tai dikadika. Haida edia vairana o tauanina ibounai be kopukopu dekenai idia dahua. Dahaka dainai unai bamona idia karaia? Unai kara idauidau be fineral dekenai idia karaia bona taunimanima handred momo idia hebou mase tauna idia bamahuta henia totona.

Iehova ena Witnes taudia momo idia noho gabudia dekenai edia varavara bona dekena taudia be mase taudia dekenai idia gari bona kastom karadia idia badinaia. Taunimanima milioni momo idia abia dae tau ta ia mase neganai, ia be ena tubuna taudia edia lauma gabuna dekenai ia lao, bona ia be mai ena siahu mauri taudia ia durua o hadikaia totona. Unai hereva idia abia dae dainai, fineral dekenai kastom karadia idauidau idia karaia. Oibe, tau ta ia mase dainai ita taitai be vaia taunimanima edia kara bona unai be kerere lasi. Nega ta ta ai, Iesu bona ena hahediba taudia be edia lalokau taudia idia mase dainai idia taitai danu. (Ioa. 11:​33-​35, 38; Kara 8:2; 9:​39) To, idia be hanua taudia ese mase ta ia vara neganai idia karaia kastom karadia idauidau idia karaia lasi. (Luka 23:​27, 28; 1 Tes. 4:​13) Dahaka dainai? Badina ta be, mase taudia dekenai ia vara gauna idia diba.

Baibel ia gwau: “Mauri taudia idia diba do idia mase, to mase taudia be gau ta idia diba lasi . . . mase taudia edia lalokau, edia badu, bona edia mama be idia ore momokani, . . . Badina be mase taudia edia gabu, oi lao gabuna [mase gurina], dekenai be kara ta lasi, laloa ta lasi, diba bona aonega ta lasi.” (Had. 9:​5, 6, 10) Unai Baibel siri ese idia hahedinaraia tau ta ia mase neganai, ia be gau ta ia diba lasi, ia herevahereva lasi, gau ta ia lalopararalaia lasi bona ia mamia lasi. Unai mai anina bada Baibel herevana oi lalopararalaia dainai, Keristani fineral be edena bamona do oi karaia?

“Miro Gaudia Ibounai Dekena amo Do Umui Raka Siri”

Ena be Iehova ena Witnes taudia be hanua idauidau amo idia mai, to hanua taudia ese mase tauna ena lauma ia mauri noho bona taunimanima ia hanamoa o hadikaia diba lalohadaina idia abia dae dainai idia karaia kastom karadia idia badinaia lasi. Hanua taudia idia karaia kastom karadia haida be: Mase tauna totona idia noga ela bona daba, lagani ta ta ai ena mase dinana laloatao ariana idia karaia, gara gabuna dekenai semensi (headstone) idia atoa bona aria idia karaia, gara gabuna dekenai aniani idia atoa, bona vabu o dogae dekenai taravatu haida idia atoa. Unai gaudia ibounai idia karaia badina idia laloa lauma be ia mase diba lasi. To, unai be Satani ese ia havaraia hahediba koikoi herevana bona Dirava be idia karaia gaudia ia moalelaia lasi. Keristani korikoridia be ‘Lohiabada ena pata dekenai noho aniani, bona lauma dikadia edia pata dekenai noho aniani ruaosi be nega tamona idia ania diba lasi,’ unai dainai idia be unai kastom karadia lalonai idia vareai lasi. (1 Kor. 10:21) Idia ese inai hahegani idia badinaia: “Miro gaudia ibounai dekena amo do umui raka siri.” (2 Kor. 6:​17) To, unai idia karaia totona be ia auka.

Taunimanima idia laloa bema kastom karadia idia badinaia lasi, edia mase tubudia edia lauma do idia badu. Bema kastom karana ta idia karaia lasi unai be kerere bada herea, bona mase tauna ese hanua taudia ibounai do ia badu henidia o dika ta do ia havaraia diba. Iehova ena Witnes taudia be mase tauna totona idia karaia kastom karadia idauidau lalonai idia vareai lasi dainai, edia varavara o hanua taudia ese idia maumauraidia, badu henia bona dadaraia. Haida idia gwau, Iehova ena Witnes taudia be idia ura lasi edia varavara ida idia gaukara hebou bona mase tauna idia matauraia lasi. Nega haida, varavara idia badu bona Iehova ena Witnes tauna ta ena fineral gaukarana idia biagua. Bema idia be mai goada ida Dirava ia moalelaia lasi kastom dalanai fineral idia karaia, bona ita ura lasi idia danu ita hepapahuahu, vadaeni dahaka ita karaia be namo? Iseda hetura karana Iehova ida ita hadikaia lasi totona, henanadai badana be inai: Dahaka do ita karaia kastom kara mirodia lalonai ita vareai lasi totona?

Oiemu Abia Hidi Oi Gwauraia Hedinarai

Kastom dalanai murimuri varavara bona iduhu lohia taudia be mase tauna guria totona abia hidi idia karaia. Unai dainai, namona be matamanai, Dirava ia abidadama henia Keristani tauna ese ena varavara do ia hamaorodia, Iehova ena Witnes taudia ese Baibel ena hakaua herevadia hegeregerena ai fineral do idia karaia. (2 Kor. 6:​14-​16) Kamonai taudia haida be Iehova ena Witnes taudia ese idia abia dae hahediba herevadia mase dekenai idia diba dainai, namona be Keristani fineral dekenai ita karaia gaudia ese tadikaka taihu edia lalomamina ia hadikaia lasi eiava kamonai taudia ia hahekwakwanaia lasi.

Bema Witnes ruma bese ese elda ta idia noia fineral gaukarana idia naria totona, kongrigeisen ese ia abia hidi elda taudia ese Baibel ena hakaua herevadia Keristani fineral totona be unai ruma bese ida do idia herevalaia. Unai amo gaukara ibounai be Baibel ena hereva hegeregerena ai do idia karaia. Bema Witnes lasi varavara idia ura “miro gaudia” haida be fineral dekenai idia karaia, namona be mai gari lasi bona hemataurai dalanai iseda Keristani fineral karaia dalana be idia dekenai ita gwauraia hedinarai. (1 Pet. 3:​15) To, dahaka do ia vara, bema varavara haida be mai edia maoro fineral karaia dalana idia biagua totona, hegeregere bema Keristani taihu ta ia mase bona ena Witnes lasi adavana ia ura fineral dekenai kastom kara mirodia haida do idia karaia? Aonega dalana be Witnes ruma bese be unai fineral bona ena gaukara ma haida dekenai do idia vareai lasi. (1 Kor. 10:20) Bema unai bamona ia vara, elda taudia ese Kingdom Hall o gabu namona ma ta ai fineral tok idia karaia diba, unai amo mase tauna dainai idia lalohisihisi varavara bona turadia be Baibel amo hahegoada idia abia diba. (Roma 15:⁠4) Ena be unai hebou ai mase tauanina ia noho lasi, to unai hebou be hemataurai dalanai idia karaia bona Dirava ese ia abia dae. (Deu. 34:​5, 6, 8) Witnes lasi varavara edia hemataurai lasi karadia dainai, lalohisihisi negana ai iseda metau idia habadaia diba, to ita diba “siahu badana” ia henia Diravana be dala maorona ita badinaia karana ia itaia dainai, unai ese ita ia hagoadaia.​​—⁠2 Kor. 4:⁠7.

Oiemu Ura Gauna Oi Torea

Bema tau ta ia ura ena fineral dekenai dahaka do idia karaia be pepa dekenai ia torea guna, Witnes lasi varavara ese ena ura do idia matauraia bona idia ida ita herevahereva be auka lasi. Unai pepa dekenai inai mai anina bada gaudia idia torea be namo: Fineral be edena bamona do idia karaia, edeseniai do idia karaia, bona daika dekenai gwaumaoro ia henia unai gaukara do ia gunalaia bona naria. (Gen. 50:⁠5) Unai pepa ia sainia bona ma haida ese idia hamomokania neganai, unai pepa be mai ena siahu. Aonega taudia be idia naria lasi ela bona idia buruka momokani eiava idia gorere dikadika, to Baibel ena hakaua herevadia idia badinaia bona vaira negana totona unai pepa idia hegaegaelaia guna.​​—⁠Aon. 22:3; Had. 9:​12.

Haida idia ura lasi unai gaudia be pepa dekenai idia torea hegaegae. To, unai bamona ia karaia tauna ia hahedinaraia iena ruma bese taudia ia lalokau henidia bada bona ia be Keristani lo tauna ta. (Fili. 2:⁠4) Aonega dalana be ta ia do mauri noho lalonai, unai pepa ia hegaegaelaia guna. Badina ena be ia ese unai kastom karadia ia abia dae lasi, to ia mase neganai varavara ese iena lalokau taudia do idia doria bena kastom kara mirodia idia karaia diba.

Hemataurai Dalanai Fineral Karaia

Momo idia laloa fineral negadia ai, aniani bada herea bona boroma momo do idia alaia, unai amo mase tauna ena lauma do ia badu lasi. Haida be fineral negadia ai idia ura edia moni bona kohu idia heagilaia. (1 Ioa. 2:​16) Taunimanima idia ura mase tauna totona fineral bona aria badana idia karaia, unai dainai aniani, moni bona nega bada idia haorea. Nega haida mase tauanina be dina o wiki haida lalonai mogi dekenai ia noho ela bona varavara taudia ese moni bada idia haboua fineral davana karaia totona. Bona nega momo moni idia haboua motuka o peleini davadia karaia totona, unai amo ruma bese bona varavara ese mase tauanina be ena hanua dekenai idia abia lao diba. Nega momo ta ia mase neganai, mase tauna ena noho gabuna be gara rumana ai idia halaoa bona palai idia atoa danu. Edia hebogahisi hahedinaraia totona, varavara bona turadia be gara rumana dekenai idia mai, unuseniai idia aniani bona idia mahuta danu. Mase tauna idia guria haraga lasi neganai, gara rumana ai idia noho taudia do idia ubua noho, unai dainai mase tauna ena ruma bese taudia edia moni ia ore diba. Mase tauanina idia do guria lasi neganai, ruma dekenai idia mailaia, nega ginigabena idia itaia totona. Nega haida, varavara be babalau karadia idia karaia, mase tauna ena lauma idia hereva henia bona daika ese iena mase dalana ia karaia ia gwauraia hedinarai totona. Dirava ena taunimanima be unai bamona kara lalonai idia vareai be maoro, a?

Lo Keristani taudia idia laloparara, Dirava ena hakaua herevadia idia diba lasi o idia abia dae lasi varavara ese idia karaia kastom karadia idia dadaraia be aonega karana. Ita diba mai hekokoroku ida idia karaia kastom karadia be ‘Dirava dekena amo idia mai lasi, to kahirakahira do ia ore tanobadana amo idia mai.’ (1 Ioa. 2:​15-​17) Namona be ita naria namonamo, varavara ese ita idia veria bena mai hekokoroku ida fineral ita karaia ma haida ita hanaia totona. (Gal. 5:​26) Idia vara gaudia haida ese idia hahedinaraia, nega momo bema hanua taudia be mase taudia edia lauma gari henia kastom karadia idia laloa bada, kastom kara mirodia be fineral dekenai idia karaia danu. Nega haida gara rumadia ai taunimanima idia tai badabada, idia lolo, tano ai idia moru, vairadia idia kakasia, mase tauanina idia rosia, ia do mauri noho bamona idia hereva henia, aniani, revareva bona ma gau haida be ena maua lalonai idia atoa. Bema unai bamona kara be Keristani tauna ta ena fineral dekenai idia karaia, unai ese Iehova ena ladana bona kongrigeisen ena ladana do ia hadikaia.​​—⁠1 Pet. 1:​14-​16.

Mase tauna dekenai ia vara gauna ita lalopararalaia dainai, unai ese ita ia durua Keristani fineral dekenai tanobada taudia edia kara ita dadaraia totona. (Efe. 4:​17-​19) Iesu be tau hereadaena, to iena fineral be hemataurai dalanai idia karaia bona idia heagilaia lasi. (Ioa. 19:​40-​42) “Keriso ena laloa” idia abia taudia idia diba unai bamona fineral be hemarai gauna lasi. (1 Kor. 2:​16) Momokani, Keristani taudia edia fineral be hemataurai bona heagi lasi dalanai idia karaia neganai, Baibel ese ia taravatua kara mirodia idia dadaraia diba. Unai amo fineral be mai goeva bona hemataurai dalanai idia karaia bona unai ese Dirava idia lalokau henia taudia edia toana ia hahedinaraia.

Fineral Murinai

Mase tauna idia guria murinai, heduru taudia totona aniani idia karaia bona nega momo aniani haida be gara gabuna ai idia atoa mase tauna ena lauma ese ia ania totona. Danu, hua haida murinai aniani bona moni idia haboua bona aria ta idia karaia mase tauna bona tubuna taudia edia lauma hamoaledia totona. Gabu haida dekenai, varavara be gara gabuna ai hua ta o haida idia mahuta, badina idia ura diba daika ese mase tauna ia alaia. Nega momo idia laloa tau ta ese vada amo edia lalokau tauna ia alaia. Bema mase tauna ena lauma ese tau ta ladana ia gwauraia, vadaeni ena varavara be vada amo unai tauna do idia alaia.

Keristani taudia momokanidia be mase taudia dekenai ia vara gaudia idia diba dainai, mase tauna ena lauma dekenai idia gari lasi. (Had. 9:​5, 10) Unai dainai, bema fineral dekenai kastom karana ta be mase tauna laumana idia hamoalea totona idia karaia, Keristani taudia momokanidia be unai kara lalonai idia vareai lasi. Fineral dekenai babalau, vada eiava Keristani lasi kastom karadia amo ita gini siri neganai, ita hahedinaraia ita be Dirava ita matauraia bona ita ura lasi iseda tadikaka taihu edia lalomamina ita hahekwakwanaia.

Ma Haida ese Iseda Kara Ena Idau Do Idia Itaia

Hereva momokani idia diba lasi taudia be mase tauna ena lauma dekenai idia gari, to ita moale bada badina ita gari lasi! (Ioa. 8:​32) Momokani, ena be ita taitai bona ita hebogahisi, to ita be “diari taudia” dainai, mai hemataurai bona manau ida fineral ita karaia, badina ita diba mase taudia totona toreisi lou helarona ia noho. (Efe. 5:8; Ioa. 5:​28, 29) Unai helaro ita diba dainai, ita be “Dirava idia abidadama henia lasi” taudia bamona ita lalohisihisi lasi. (1 Tes. 4:​13) Unai helaro ese ita do ia hagoadaia bena taunimanima dekenai do ita gari lasi, to tomadiho goevana ena dala do ita badinaia.​​—⁠1 Pet. 3:​13, 14.

Baibel ena hahediba herevadia ita badinaia dainai, taunimanima ese “Dirava ena gaukara idia karaia, bona iena gaukara idia karaia lasi taudia” edia idau do idia itaia. (Mal. 3:​18) Dina ta do ia mai, mase be do ia ore vaitani. (Apok. 21:⁠4) Unai gwauhamata ita naria noho lalonai, namona be Iehova vairanai ita be mai goeva bona kerere lasi ida ita noho bona inai tanobada dikana bona Dirava matauraia lasi karadia amo ita gini siri.​​—⁠2 Pet. 3:​14.

[Picture on page 30]

Ita do mase lasi neganai, aonega dalana be ita ura iseda fineral dekenai dahaka do idia karaia gaudia be pepa dekenai ita torea

[Picture on page 31]

Namona be Keristani taudia edia fineral be mai hemataurai bona heagi lasi dalanai idia karaia