Duahia Taudia Edia Henanadai

Tomadiho oreana amo ruma ta ita hoia bona Kingdom Hall ta ai ita halaoa be tomadiho ma ta ida gaukara hebou karana, a?

Nega momo, Iehova ena Witnes taudia be tomadiho oreadia ma haida ida bisinesi karadia idia karaia lasi. To, reana unai bamona bisinesi karana be tomadiho orea idauna ida gaukara hebou karana lasi. Reana ita laloa diba ia be bisinesi karana tamona sibona. Iehova ena Witnes taudia edia kongregesen ta be tomadiho oreana ma ta ida ia gaukara hebou lasi, tomadiho gabuna ta idia haginia bena idia ruaosi ese idia gaukaralaia totona.

Iehova ena matana ai tomadiho ma ta ida gaukara hebou karana be dahaka? Aposetolo Paulo ena hakaua herevana oi laloa, ia gwau: “Dirava idia abidadama henia lasi taudia danu do umui hakapua tamona lasi. Badina be edena bamona kara maoromaoro bona kara kerere idia turana diba? Edena bamona diari bona dibura idia noho hebou diba? Keriso bona Satani be edena bamona idia laloa tamona diba? Abidadama tauna bona abidadama lasi tauna ruaosi be idia hegeregere diba, a? Dirava ena dubu helaga bona kaivakuku be edena bamona idia hakapua tamona diba? . . . Unai dainai Lohiabada ma ia hereva, ia gwau: ‘Umui ese idia do umui rakatania, bona idia dekena amo do umui parara. Miro gaudia ibounai dekena amo do umui raka siri, vadaeni umui do lau abia dae.’ ” (2 Korinto 6:​14-17) Unai siri lalonai, Paulo ese ia gaukaralaia herevadia “turana” bona “noho hebou” edia anina be dahaka?

Ia hedinarai goevagoeva Paulo ese ia gwauraia turana karana ena anina be kaivakuku tomadiho henia taudia bona abidadama lasi taudia ida tomadiho bona lauma dalanai hebamo karana. Korinto taudia ia sisiba henia ‘lauma dikadia edia pata dekenai do idia ania lasi.’ (1 Korinto 10:​20, 21) Unai dainai, tomadiho ma ta ida gaukara hebou karana be tomadiho oreadia ma haida ida idia tomadiho eiava lauma dalanai idia turana karaia. (Esodo 20:5; 23:13; 34:12) Tomadiho oreana ta ese ia gaukaralaia ruma ta idia hoia neganai, unai ena badina tamona be Kingdom Hall abia totona idia karaia. Kingdom Hall ai idia do halaoa lasi neganai, tomadiho koikoi gaudia idia kokia. Idia haidaua murinai, Iehova dekenai idia hahelagaia, ia sibona idia tomadiho henia totona. Tomadiho momokani bona tomadiho koikoi idia noho hebou lasi bona idia turana karaia lasi.

Unai bamona bisinesi karana lalonai, unai orea ma ta taudia ida idia noho hebou momo lasi bona bisinesi gaudia sibona idia herevalaia. Keristani kongregesen taudia ese Paulo ena sisiba herevana idia laloatao be namo, ia gwau: “Dirava idia abidadama henia lasi taudia danu do umui hakapua tamona lasi.” Ena be ita laloa lasi tomadiho ma haida taudia ita hereaia, to idia ida ita hebamo lasi bona edia tomadiho lalonai ita vareai lasi.a

Bema kongregesen ta ese tomadiho oreana ta ena ruma ia rentaia be edena bamona? Rentaia karana ese dala ia kehoa unai orea taudia ida idia hedavari loulou, bona unai ita dadaraia be namo. Ena be hebou tamona sibona totona unai bamona ruma idia gaukaralaia, to elda oreana ese inai gaudia ia laloa be namo: Ruma lalonai eiava murimuri ai kaivakuku bona tomadiho gaudia idia noho, a? Unai ruma ita gaukaralaia dainai, unai gabu taudia edia lalohadai be dahaka? Unai ruma ita gaukaralaia dainai, kongregesen tauna ta dekenai lalohadai kererena do ia havaraia, a? (Mataio 18:6; 1 Korinto 8:​7-13) Elda taudia ese unai gaudia idia laloa namonamo bena unai hegeregerena edia lalona do idia hadaia. Unai bamona ruma idia hoia bona Kingdom Hall ai idia halaoa eiava lasi idia laloa neganai, edia lalona ena mamina bona kongregesen taudia edia lalona ena mamina idia laloa namonamo be namo.

[Footnote]

[Picture on page 15]

Inai ruma, guna ia be dubu ta, idia hoia bena Kingdom Hall ai idia halaoa