Sibona Eda Stadi Karana ese Ita Ia Hegaegaelaia Hadibaia Taudia ai Ita Lao Totona
“Inai gaudia oi laloa namonamo, idia dekenai oiemu lalona ibounai oi henia, bena taunimanima iboudiai do idia itaia oiemu goada ia bada ia lao. Oi sibona bona oiemu hadibaia hereva do oi naria namonamo.”—1 TIMOTEO 4:15, 16, NW.
1. Nega bona sibona eda stadi karana ita laloa neganai, dahaka be ia momokani?
BAIBEL be Hadibaia Tauna 3:1 dekenai ia gwau ‘gau ibounai be mai edia nega.’ Sibona eda stadi karana dekenai unai be ia momokani. Momo idia davaria bema nega kererena eiava gabu kererena ai idia noho, lauma gaudia idia laloa namonamo diba lasi. Hegeregere, dina lalonai oi gaukara goada bona adorahi ai aniani bada oi ania murinai, bona bema TV vairanai emu sea namona ai oi helai, stadi mamina do oi abia, a? Toana be lasi. Unai dainai, hanaia dalana be dahaka? Ia hedinarai goevagoeva, ita stadi ena nega bona gabu ita abia hidi be namo, unai amo iseda hekwarahi amo namo bada ita davaria diba.
2. Nega momo edena nega be nega namona sibona eda stadi ita karaia totona?
2 Momo idia davaria stadi idia karaia nega namona be daba kahana ai, unai nega ai idia hesiku lasi. Ma haida be dina tubua ena nega idia gaukaralaia stadi kwadogina idia karaia totona. Henunai idia noho haheitalaidia dekenai, mai anina bada lauma gaudia idia laloa negadia mani oi itaia. Idaunegai Israela ena King Davida ia gwau: “Lohiabada e, lau ese oi lau abidadama henia noho. Unai dainai daba ibounai lau do oi durua, vadaeni oiemu noho hanaihanai lalokauna do lau laloa noho. Guriguri dekena amo egu lauma oi dekenai lau abia isi noho. Unai dainai egu lao dala namona, mani lau dekenai do oi hedinaraia.” (Salamo 143:8) Peroveta tauna Isaia ese unai bamona lalohadai ia hahedinaraia danu, ia gwau: “Lohiabada Dirava ese, dahaka do lau hereva gauna ia hadibaia lau dekenai, vadaeni unai dainai lau ese manoka taudia lau hagoadaia diba. Daba ibounai ia ese laloa goada lau dekenai ia henia noho, vadaeni iena hadibaia hereva lau kamonaia namonamo.” Anina be dina lalonai edena nega ai iseda lalona ia noga momokani neganai, do ita stadi bona Iehova ida ita herevahereva be gau badana.—Isaia 50:4, 5; Salamo 5:3; 88:13.
3. Anina namona ia havaraia stadi ita karaia totona, edena bamona gabu ai ita karaia be namo?
3 Anina namona ia havaraia stadi karaia totona, ma gau ta be sea namona mai ena kusini manokana dekenai ita helai lasi. Unai kara be ita do ia durua lasi, ita noga noho totona. Ita stadi noho neganai, iseda lalona ia goada noho be namo, to sea manokana bona namona dekenai ita helai ese unai do ia havaraia lasi. Danu, ita stadi bona laloa dobu neganai, regerege bada lasi gabuna ai ita noho bona lalona veria gaudia idia noho lasi be namo. Reidio eiava televisen idia kehoa negana ai, eiava natudia idia ura idia oi kamonai henia negana ai oi stadi be anina namona do ia havaraia lasi. Iesu ia ura ia laloa dobu neganai, regerege lasi gabuna dekenai ia lao. Taunimanima idia noho lasi gabuna dekenai guriguri gwauraia ena namo ia herevalaia danu.—Mataio 6:6; 14:13; Mareko 6:30-32.
Haere Henia Totona Ita Ia Hegaegaelaia Stadi Karana
4, 5. Edena dala ai Dahaka Ita Karaia? buklet be heduru gauna namona?
4 Sibona eda stadi do ita moalelaia, bema hereva ta ena anina ita diba totona Baibel herevalaia bukadia idauidau ita gaukaralaia, bona unai ita karaia diba ta ena henanadai ita haerelaia totona. (1 Timoteo 1:4; 2 Timoteo 2:23) Unai idia karaia totona, kamonai matamata taudia momo be Dirava Ia Ura Dahaka Ita Karaia? a buklet dekenai idia stadi noho, ia be hari gado 261 dekenai ia noho. Unai buklet ena hereva be auka lasi to maoromaoro bona ibounai be Baibel amo. Duahia taudia ia durua Dirava ena taravatu, tomadiho momokani dekenai idia lalo-pararalaia haraga totona. To, unai buklet idia karaia dalana dainai, kahana ta ta dekenai hereva idauidau momo idia torea lasi. Bema emu Baibel stiuden ese umui herevalaia Baibel herevana ta dekenai henanadai aukadia haida ia henia, edena bamona Baibel ena hereva ma haida oi davaria diba, bena ia oi durua unai henanadai edia haere ia diba totona?
5 Edia gado dekenai Watchtower Library be CD-ROM dekenai idia noho taudia, ese kompiuta dekenai hereva idauidau momo idia tahua haraga diba. To unai gaudia idia abia lasi taudia be edena bamona? Namona be Dahaka Ita Karaia? buklet lalonai idia noho kahana rua ita itaia, unai amo iseda lalo-parara habadaia dalana do ita itaia bona haere do ita henia namonamo diba—hegeregere bema ta ese inai henanadai ia henia, Dirava be Daika, bona Iesu be edena bamona tauna?—Esodo 5:2; Luka 9:18-20; 1 Petero 3:15.
Dirava be Daika?
6, 7. (a) Dirava dainai dahaka henanadai ia vara? (b) Haroro tauna ta be hereva ta ia henia neganai, edena mai anina bada herevana ia gwauraia lasi?
6 Dahaka Ita Karaia? buklet ena kahana iharuana ese inai mai anina bada henanadai, Dirava be Daika? ia haerelaia. Unai be mai anina bada herevana, badina tau ta ese Dirava momokanina do ia tomadiho henia diba lasi, bema Dirava ia diba lasi eiava reana Ia noho momokani karana ia daradaralaia. (Roma 1:19, 20; Heberu 11:6) To tanobada hegegemadai, Dirava be daika herevana dekenai taunimanima ese lalohadai idauidau momo idia dogoatao. (1 Korinto 8:4-6) Unai henanadai dekenai, tomadiho ibounai be mai edia lalohadai idauidau. Kerisendom lalonai, tomadiho momo idia laloa Dirava be Toi Tamona. United States ena ladana bada haroro tauna ta ese hereva ta ladana “Dirava Oi Diba, A?” ia henia, to ena hereva lalonai Dirava ena ladana ia gwauraia lasi, ena be Heberu Revareva amo siri haida ia gwauraia. Momokani, ia gaukaralaia Baibel lalonai be inai ladana “Lohiabada” sibona ia noho, to Iehova eiava Yahweh be lasi.
7 Unai haroro tauna ese Ieremia 31:33, 34 ia duahia neganai, ia ese mai anina bada herevana ta ia gwauraia lasi, unai siri ia gwau: “Unai neganai idia ta ese iena bese tamona tauna be Lohiabada [Heberu, Iehova] diba dalana do ia hadibaia lou lasi, badina idia ibounai be lau do idia diba, ladana maragi taudia, bona ladana bada taudia danu. Lau, Lohiabada [Heberu, Iehova] ese lau hereva vadaeni.” Ia gaukaralaia Baibel lalonai Dirava ena ladana, Iehova ia noho lasi.—Isaia 12:2.
8. Dahaka ese Dirava ena ladana gaukaralaia ena anina bada ia hahedinaraia?
8 Salamo 8:9, New World Translation Baibel lalonai, ese ia hahedinaraia dahaka dainai Iehova ena ladana ita gaukaralaia be mai anina bada, ia gwau: “Aiemai Lohiabada Iehova e, tanobada ibounai lalonai oiemu ladana be hereadae.” To, Hiri Motu Buka Helaga bona English gado Baibel haida lalonai idia gwau: “Lohiabada e, aiemai Lohiabada, tanobada ena kahana ibounai lalonai, oiemu ladana be ia namo herea momokani.” To, stadi hereva gunana ese ia hahedinaraia bamona, ‘Dirava do ita diba’ bema dala ita kehoa iena Hereva ese iseda lalona ia hadiaria totona. To edena Baibel stadi bukana ese ita do ia durua bena Dirava ena ladana dainai idia gwauraia henanadai ita haerelaia diba?—Aonega Herevadia 2:1-6.
9. (a) Dirava ena ladana ita gaukaralaia be mai anina bada ita hahedinaraia totona, edena buka ese ita ia durua diba? (b) Edena dala ai gado hahanaia taudia momo ese Dirava ena ladana idia matauraia lasi?
9 Gado 154 dekenai idia hahanaia vadaeni buka ladana, Diba ese Mauri Dekenai Ita Ia Hakaua Lao, ita gaukaralaia diba.b Karoa ladana, “Daika be Dirava Momokanina” bona hereva kwarana maragina, “Dirava Momokanina be mai Ena Ladana” (rau 24) henunai, ia hahedinaraia goevagoeva unai Heberu Tetragramaton (Greek gado herevana amo, anina be “leta hani”) be idaunegai Heberu revarevadia lalonai kahirakahira nega 7,000 ia hedinarai. To, Iuda bona Kerisendom edia dubu gunalaia taudia bona hahanaia taudia ese mai edia ura ida unai ladana be edia Baibel momo amo idia kokia.c Edena bamona idia gwau diba Dirava idia diba bona ia idia tura henia bema ena ladana idia gaukaralaia lasi? Iena ladana korikorina ese dala ia kehoa iena ura be dahaka bona ia be daika ita lalo-pararalaia totona. Ma danu, Iesu ese ia gwauraia guriguri ena kahana, “Aiemai Tamana e, guba dekenai oi noho, oiemu ladana do ai hahelagaia” ena namo be dahaka bema Dirava ena ladana ita gaukaralaia lasi?—Mataio 6:9; Ioane 5:43; 17:6.
Iesu Keriso be Daika?
10. Edena dala idauidau ai Iesu ena mauri bona ena hesiai gaukara ena sivarai ibounai ita davaria diba?
10 Dahaka Ita Karaia? buklet ena kahana ihatoina ena hereva kwarana be, “Iesu Keriso be Daika?” Paragraf siks sibona lalonai Iesu, guna ia noho gabuna, bona tanobada dekenai ia mai ena badina be hereva kwadogina amo ia gwauraia hedinarai. To, bema ena mauri sivarai ibounai oi ura diba, unai sivarai namo hereana be gado 111 dekenai ia noho vadaeni bukana, Tau Hereadaena—bona Evanelia bukadia sibona—ai oi davaria diba.* Tau Hereadaena bukana ese Keriso ena mauri bona ena hahediba herevadia ia sivarailaia, idia vara negadia ta ta hegeregerena, idia be Evanelia Bukadia foa amo idia abia. Unai buka ena karoa 133 ese Iesu ena mauri bona ena hesiai gaukara ia sivarailaia. Dala idauna ma ta ai oi tahua namonamo totona, Insight buka, Volium 2, bona hereva kwarana “Jesus Christ” henunai oi itaia diba.
11. (a) Iehova ena Witnes taudia edia abidadama Iesu dekenai dainai, edena bamona idia idau? (b) Edena Baibel siri haida ese Toi Tamona hahediba herevana idia koua, bona edena buka be heduru bada ia henia diba?
11 Kerisendom ese idia hepapahuahulaia gauna be, Iesu be “Dirava ena Natuna” bona danu unai “Natuna be Dirava” eiava—anina be, buka ta (Catechism of the Catholic Church) ese ia gwauraia gauna, “Keristani abidadama bona mauri dalana ena hehuni hereva badana,” Toi Tamona unai, idia hepapahuahulaia. Iehova ena Witnes taudia be Kerisendom ena tomadiho amo idia idau, idia abia dae Iesu be Dirava ese ia havaraia, to ia be Dirava lasi. Unai ia herevalaia namonamo buklet be, Toi Tamona Oi Abia Dae be Namo, Eiava?, gado 95 dekenai idia hahanaia vadaeni.d Toi Tamona ena hahediba herevana ia hakoikoia totona ia gaukaralaia siri momo amo, haida be Mareko 13:32 bona 1 Korinto 15:24, 28.
12. Edena henanadai ita lalodia be namo?
12 Ataiai idia noho paragraf dekenai, Dirava bona Iesu Keriso edia sivarai dekenai ai herevalaia gaudia ese sibona eda stadi ita karaia ena dala idauidau ia hahedinaraia, edena bamona Baibel ena hereva momokani idia diba lasi taudia ita durua diba, diba maoromaoro idia abia totona. (Ioane 17:3) To, lagani momo Keristani kongregesen lalonai idia noho taudia be edena bamona? Baibel amo diba bada idia abia dainai, sibona edia stadi lalonai Iehova ena Hereva do idia stadilaia noho be namo, a?
Dahaka Dainai “Do Oi Naria Namonamo”?
13. Sibona eda stadi karana dekenai, reana haida ese edena lalohadai kererena idia abia?
13 Lagani momo kongregesen lalonai idia noho taudia haida be, Iehova ena Witnes taudia ai idia lao neganai, lagani ginigunadia haida sibona lalonai Baibel amo idia abia dibana sibona dekenai idia tabekau diba. Inai bamona oi laloa be auka lasi: “Matamata taudia bamona lau stadi goadagoada be anina lasi. Badina idia hanaia laganidia lalonai, Baibel bona Baibel bukadia be nega momo lau duahia vadaeni.” Unai be hegeregere oi gwau: “Hari lau ania aniani lau naria namonamo be gau badana lasi, badina aniani bada herea lau ania vadaeni.” Ita diba tauanina be hanaihanai idia hegaegaelaia namonamo aniani namodia ia abia be gau badana, unai amo tauanina ia goada bona ita gorere lasi. Vadaeni, lauma dalanai unai bamona ita laloa be gau badana momokani, ita gorere lasi bona ita goada noho totona!—Heberu 5:12-14.
14. Dahaka dainai ita sibona ita naria namonamo be namo?
14 Unai dainai, ita ibounai, herevana ita be idaunegai Baibel stiuden taudia eiava lasi, Paulo ese lauma gaudia dekenai ia lo bona ia gaukara namonamo tauna, Timoteo, dekenai ia henia sisibana ita badinaia be namo, ia gwau: “Oi sibona oiemu kara do oi naria namonamo, oiemu hadibaia hereva danu. Inai kara namodia do oi karaia noho, badina unai dekena amo, oi sibona ese mauri do oi davaria, bona oi dekenai idia kamonai taudia danu ese mauri do idia davaria.” (1 Timoteo 4:15, 16) Dahaka dainai Paulo ena sisiba ita laloa bada be namo? Laloaboio lasi, Paulo ia gwau iseda tuari be “Satani ena koikoi karadia” bona “lauma dikadia danu, guba dekenai idia noho.” Bona aposetolo Petero be sisiba ia henia, ia gwau Diabolo be “ia ania ore taudia ia tahua noho,” bona bema ita naria lasi, ita do ia ania. Satani ia tahua noho gauna be, ia ura ita laloa ita hegeregere vadaeni bona dika ta do ita davaria lasi.—Efeso 6:11, 12; 1 Petero 5:8.
15. Dahaka ese lauma dalanai ita ia gimaia, bona edena bamona unai gauna ita naria diba?
15 Unai dainai, dahaka ese ita ia gimaia diba? Aposetolo Paulo ese ita ia hadibaia ia gwau: “Dirava ese ia henia tuari dabua ibounai do umui kwatua. Vadaeni nega dikana ia ginidae neganai, do umui tuari mai goada danu. Do umui tuari noho ela bona tuari ena dokona, bona unai neganai do umui gini goada noho.” (Efeso 6:13) Unai lauma ena tuari dabua ese ita ia gimaia totona, ena toana ginigunana ia namo sibona be hegeregere lasi, to ita naria hanaihanai be namo. Unai dainai, Dirava ena Hereva amo ita dibaia gaudia matamatadia danu be Dirava amo ia mai tuari dabua ibounai ena kahana ta. Unai ese ia hahedinaraia, Iehova ese ena Hereva bona hesiai tauna mai ena kamonai, bona mai ena kara maoromaoro oreana amo ia halasia lalo-pararana hegeregerena hereva momokani ita lalo-pararalaia noho be gau badana. Baibel bona Baibel bukadia ita stadilaia hanaihanai be mai anina bada iseda lauma tuari dabua ita naria noho totona.—Mataio 24:45-47; Efeso 6:14, 15.
16. Dahaka ita karaia diba, iseda ‘abidadama ena kesi’ badana ia namo noho totona?
16 Paulo ese unai tuari dabua ena anina bada kahana ta, ‘abidadama ena kesi’ badana, ia herevalaia, unai gauna amo Satani ena koikoi herevadia, lahi bamona samania hereva koikoidia bona hereva momokani negea taudia edia hahediba herevadia ita koua diba. (Efeso 6:16) Unai dainai gau badana be iseda abidadama ena kesi ena goada ita sekea bona dala ita tahua ita naria bona hagoadaia totona. Hegeregere, reana oi henanadai: ‘Wiki ta ta ena Baibel stadi karana Gima Kohorona amo, be edena bamona lau hegaegaelaia? Lau stadilaia namonamo vadaeni dainai hebou dekenai haere namodia lau henia, unai amo ‘lalokau dekena amo kara namodia lau karaia,’ a? Egu Baibel lau kehoa bona idia gwauraia to idia torea hanai lasi siridia lau duahia, a? Mai egu ura bada ida hebou dekenai haere lau henia karana amo ma haida lau hagoadaia, a?’ Iseda lauma aniani be auka, bona namo bada ita abia totona, namona be ita ania namonamo be gau badana.—Heberu 5:14; 10:24.
17. (a) Satani be dahaka poisini gauna ia gaukaralaia noho iseda goada lauma dalanai ia hamanokaia totona? (b) Satani ena poisini koua gauna be dahaka?
17 Satani be goevadae lasi taudia edia manoka karadia ia diba, bona ena koikoi karadia be hehuni dalana ai ia gaukaralaia. Ena siahu dikana ia halasia dalana ta be matabodaga laulaudia be televisen, Internet, vidio, bona idia printaia bukadia dekenai ia hahedinaraia. Keristani taudia haida idia manoka dainai unai gaudia ese idia ia poisinia, unai dainai kongregesen lalonai idia abia gaukara namona idia haboioa eiava dika badadia haida idia davaria. (Efeso 4:17-19) Lauma dalanai Satani ena poisini ia koua gauna be dahaka? Namona be hanaihanai sibona eda Baibel stadi ita karaia, Keristani heboudia ita lao henia, bona Dirava amo ia mai tuari dabua ibounai ita hahedokilaia. Unai gaudia ibounai dainai ita ese maoro bona kerere edia idau ita itaia diba, bona Dirava ese ia inai henia gaudia do ita inai henia.—Salamo 97:10; Roma 12:9.
18. Iseda lauma tuarina lalonai, edena dala ai ‘lauma ena tuari kaia’ ese ita ia durua diba?
18 Bema Baibel stadilaia karana be hanaihanai ita karaia, Dirava ena Hereva amo ita abia diba maoromaoro amo dika do ita koua sibona lasi, to ‘lauma ena tuari kaia, Dirava ena hereva,’ amo do ita tuari namonamo danu. Dirava ena hereva be “mai ena matana momokani. Iena matana ese kaia mai ena kahana ruaosi ena matana ia hereaia momokani. Ia ese tau ta ia gwadaia neganai, unai tau ena lalona momokani dekenai ia vareai. Ia vareai ela bona lalona bona lauma ruaosi ia hapararaia. Bona ia ese iseda lalona bona iseda kudouna ena ura ibounai ia tahua diba.” (Efeso 6:17; Heberu 4:12) Bema unai “kaia” gaukaralaia namonamo dalana ita diba, bona bema hedibagani ita davaria, toana be idia dika lasi gaudia, eiava lalona idia veria gaudia do ita utua bamona, bena do ia hedinarai goevagoeva unai be tau dikana ena mase havaraia tarapu. Iseda diba bona lalo-parara bada Baibel amo ese ita do ia durua dika gaudia ita dadaraia bona kara namodia ita karaia totona. Unai dainai ita ibounai be sibona ita nanadaia: ‘Lauegu kaia be mai matana eiava ia dika vadaeni? Lau gini goada totona Baibel siridia lau laloatao be ia auka, a?’ Namona be sibona eda stadi karana ita karaia noho bona unai amo Diabolo do ita dadaraia.—Efeso 4:22-24.
19. Bema sibona eda stadi ita karaia, dahaka namo do ita davaria?
19 Paulo ia gwau: “Buka Helaga ibounai be Dirava ena lauma amo ia vara bona ia be mai ena namo hadibaia totona, sisiba henia totona, gau idauidau hamaoromaoroa totona, kara maoromaoro ai matahakani henia totona, vadaeni Dirava ena tau be do ia hegeregere momokani, gau ibounai ia abia hegaegae gaukara namodia ibounai karaia totona.” Bema ita ese Paulo ena hereva Timoteo dekenai ita laloa bada, lauma dalanai ita sibona do ita hagoadaia bona iseda hesiai gaukara do ita hanamoa diba. Lauma dalanai idia goada elda bona hesiai taudia ese kongregesen idia durua bada diba, bona ita ibounai be abidadama dekenai ita gini goada diba.—2 Timoteo 3:16, 17; Mataio 7:24-27.
[Footnotes]
a Nega momo, Dirava Ia Ura Dahaka Ita Karaia? buklet idia stadilaia kamonai matamata taudia be Diba ese Mauri Dekenai Ita Ia Hakaua Lao bukana dekenai do idia hanaia lao, inai buka rua be Iehova ena Witnes taudia ese idia halasia. Unuseniai idia henia heduru herevadia ese ta do ia durua, bena lauma dalanai ena tubu daekau dalana idia koua gaudia do ia hanaia.
b Iehova ena Witnes taudia ese idia halasia. Edia gado dekenai Insight on the Scriptures idia noho taudia ese Volium 2, hereva kwarana “Jehovah” henunai unai idia itaia diba.
c Spanish bona Catalonia gado ai idia hahanaia gaudia haida ese Heberu Tetragrammaton idia hahanaia, “Yavé,” “Yahveh,” “Jahvè,” bona “Jehová.”
d Iehova ena Witnes taudia ese idia halasia.
Oi Laloatao, A?
• Edena bamona gabu ai ita stadi karana ese anina namona ia havaraia diba?
• Baibel hahanaia taudia momo ese Dirava ena ladana dekenai dahaka kerere idia karaia?
• Toi Tamona ena hahediba herevana oi hakoikoia totona, edena Baibel siridia oi gaukaralaia diba?
• Herevana lagani momo lalonai ita be Keristani taudia, to dahaka ita karaia be namo Satani ena koikoi karadia amo ita sibona ita gimaia totona?
[Pictures on page 27]
Anina namona ia havaraia stadi ita karaia totona, regerege momo lasi gabuna maorona dekenai ita noho be gau badana
[Pictures on page 31]
Emu “kaia” be mai ena matana eiava ia dika vadaeni?