Basileia Haroro Ripoti

Brazil Dekenai Basileia Ena Sivarai Idia “Kamonai Noho”

BASILEIA ena sivarai namona be Taia Kudima taudia idia noho gabudia dekenai idia harorolaia totona, Iehova ena Witnes taudia momo Brazil dekenai idia hekwarahi Brazil Taia Kudima Taudia Edia Gado idia dibaia totona. Edia hekwarahi ese anina namona ia havaraia, henunai idia noho ekspiriens ese unai ia hahedinaraia bamona.

São Paulo dekenai, taia kudima hahinena ta, Eva,a bona ena natudia toi be taia kudima tauna ta ena ruma dekenai idia noho matamaia murinai, taia kudima taudia edia gado ia dibaia matamaia. Eva bona ena turana merona be sitoa badana ta lalonai idia noho neganai, taia kudima Witnes taudia idia hedavari henia bona idia ese Eva bona ena turana merona idia boiria Kingdom Hall dekenai hebou totona idia lao. Idia ese unai boiboi herevana idia abia dae, idia laloa unai be moale hebou karana ta sibona.

Eva ena diba taia kudima taudia edia gado dekenai be bada lasi dainai, hebou dekenai idia herevalaia gaudia edia anina ibounai ia abia namonamo lasi. Unai murinai, Witnes taudia sisina momo ese Eva idia boiria edia ruma dekenai idia ida aniani sisina idia ania hebou totona. Idia ese Mauri Hanaihanai Tanobada Dekenai Oi Abia! buklet dekenai idia noho laulau idia gaukaralaidia Dirava ena gwauhamata, vaira negana ai tanobada be paradaiso ai do ia halaoa idia gwauraia hedinarai. Eva be ia dibaia gaudia ia ura henia bona hebou ia lao henia matamaia hanaihanai.

Daudau lasi murinai, Eva ese ena turana merona ia rakatania, Baibel ena taravatu hegeregeredia ia noho totona. Ena be Eva ese ena ruma bese taudia amo dagedage bada ia abia, to lauma dalanai ia goada ia lao bona lagani 1995 ai bapatiso ia abia. Hua 6 murinai, Eva be regula painia gaukara eiava ful-taim Basileia harorolaia hahinena ai ia lao. Unai nega amo ia ese taia kudima taudia 4 ia durua edia mauri idia gwauhamatalaia bona bapatiso idia abia totona.

Carlos be ia vara negana amo ia be taia kudima. Ia maragi neganai drag ia ania, matabodaga bona henaohenao karadia ia karaia matamaia. Ia idia inai henia raskol oreana ese ia idia hagaria dainai, São Paulo dekenai ia lao bona nega sisina lalonai João ida ia noho. João danu be Carlos bamona, ia be taia kudima bona mauri dalana dikana ia noholaia.

Lagani haida murinai, Carlos be Basileia ena sivarai ia dibaia, unai ese ia ia durua Baibel ena hereva hegeregerena iena mauri ia haidaua bona iena headava ia hamaoromaoroa. Baibel ena taravatu ia badinaia murinai, Carlos be Iehova dekenai ena mauri ia gwauhamatalaia karana ia hahedinaraia totona bapatiso ia abia. Unai nega lalonai, Carlos ia diba lasi João danu be sivarai namona ia dibaia, bona iena mauri dalana ia haidaua danu. Iehova ese kaivakuku gaukaralaia karana ia abia dae lasi ia dibaia neganai, João ese ia haboua kaivakuku ibounai ia negedia. Iena mauri gunana ia rakatania murinai, João danu be bapatiso ia abia.

Carlos bona João be Kingdom Hall dekenai idia hedavari bona ta ta edia mauri lalonai idia haidaua gaudia idia itaia neganai, idia moale bada herea! Hari idia ruaosi be ruma bese kwaradia bona Basileia idia harorolaia goadagoada taudia.

Hari Brazil dekenai, taia kudima gado kongregesen ibounai be 30 bona grup maragidia be 154, bona pablisa ibounai be 2,500 mai kahana, idia amo 1,500 be taia kudima taudia. Lagani 2001 ai, Brazil dekenai taia kudima taudia totona idia karaia “Dirava Ena Hereva Hadibaia Taudia” Distrik Hebouhebouna dekenai, taunimanima 3,000 mai kahana idia lao bona 36 ese bapatiso idia abia. Iehova ena heduru amo, iseda ura gauna be taia kudima taudia momo ese Basileia ena sivarai do idia abia dae.

[Footnote]