Iehova ese ‘Iena Vairana Ena Diari be Idia Dekenai Ia Henia’

ISEDA vairana ena masolo ibounai be 30 mai kahana. Oi kiri neganai, masolo ibounai 14 idia gaukara hebou! Mani oi laloa, bema unai masolo ibounai be lasi, emu hereva do ia hedinarai namonamo, a? Lasi, ani? To taia kudima taudia be edia lalohadai idia hahedinaraia namonamo totona, edia vairana ena masolo idia gaukaralaia sibona lasi. Idia be edia lalohadai idia hahedinaraia namonamo totona, vairana ena masolo bona imana idia gaukaralaia hebou be namo. Taia kudima taudia be sain gado amo edia lalohadai dobudia idia hahedinaraia dalana be taunimanima momo ese idia hoalaia.

Hari, taia kudima taudia be tau ta ena vairana, taunimanima edia vairana ia hereaia gauna, idia itaia diba. Laulau dalanai idia be “Lohiabada ena vairana” idia itaia. (Lal. 2:​19) Unai be mai ena badina. Idaunega amo ema bona hari, Iehova ese taia kudima taudia ia lalokau henia bada. Israela taudia dekenai unai bamona ia karaia danu. (Lev. 19:14) Hari inai negai, Iehova ese taia kudima taudia ia lalokau henia karana ita itaia diba. Baibel ia gwau: “Dirava ia ura taunimanima ibounai ese mauri do idia davaria, bona hereva momokani do idia diba.” (1 Tim. 2:⁠4) Taia kudima taudia momo be Dirava ena hereva momokani idia diba neganai, unai be hegeregere idia ese Iehova ena vairana idia itaia. To edena bamona unai ia vara bema idia be hereva ta idia kamonai diba lasi? Unai henanadai ita do haerelaia lasi neganai, namona be ita itaia dahaka dainai taia kudima taudia dekenai sain gado be mai anina bada.

Idia Itaia Gaudia amo Diba Idia Abia

Taia kudima taudia bona edia sain gado dekenai lalohadai kereredia idia vara. Mani taia kudima taudia ita herevalaia sisina. Taia kudima taudia be motuka idia taria diba. Taia kudima taudia ese ia hereva tauna ena udu bibina idia itaia bona ena hereva edia anina idia lalopararalaia be ia auka. Tanobada ena kahana ibounai dekenai, sain gado be idauidau. Danu, tano haida ai taia kudima taudia edia sain gado be tano ma haida ai idia noho taia kudima taudia edia sain gado amo ia idau.

Taia kudima taudia idia duahiduahi diba, a? Ena be haida idia duahiduahi namonamo diba, to momo be idia hekwarahi idia duahiduahi namonamo totona. Dahaka dainai? Badina idia printaia bukadia be idia hereva diba taudia ese idia torea. Ia kamonai diba natu maragina ta ese gado ia dibaia dalana mani oi laloa. Unai natuna ia vara neganai, ena noho gabuna ena gado idia herevalaia taudia huanai ia tubu. Daudau lasi murinai, ia be hereva ta ta ia haboua bona sentens ta ia gwauraia diba. Taunimanima be gado ai idia hereva karana ia kamonai amo unai gado ia diba. Unai dainai natu maragidia be duahiduahi karana idia dibaia matamaia neganai, do ia auka lasi badina pepa ai ia noho herevana gwauraia dalana idia diba.

Mani inai haheitalai oi laloa: Oi be tano ma ta dekenai oi lao, bona ruma ta lalonai oi be galasi amo idia karaia daiutu ta lalonai oi noho bona regerege ta oi kamonai diba lasi. Bona unai gabu taudia edia gado be nega ta oi kamonai lasi. Dina ta ta ai, unai gabu taudia be galasi ena murimurinai idia gini bona oi idia hereva henia. Idia herevalaia gaudia oi kamonai diba lasi. Edia uduna bibinadia idia hamarerea oi itaia sibona. Idia laloparara oi be idia gwauraia gaudia oi kamonai lasi dainai, pepa dekenai idia toredia bona galasi ena murimurina kahana amo oi dekenai idia hahedinaraia. Idia laloa unai dala amo idia gwauraia gaudia oi lalopararalaia diba. Oi laloa idia torea gaudia do oi lalopararalaia, a? Do ia auka idia torea herevadia ibounai oi lalopararalaia totona. Dahaka dainai? Badina pepa dekenai idia torea herevana be oi kamonai diba lasi gadona dekenai idia torea. Taia kudima taudia momo be unai bamona.

Sain gado be dala namona taia kudima taudia ida oi herevahereva totona. Unai gado ia gaukaralaia tauna be ena tauanina ena kahana idauidau ia gaukaralaia, lalohadai ta ia gwauraia totona. Iena imana, tauanina bona vairana ia gaukaralaia sain gado ena grama ena taravatu ia badinaia totona. Unai sain gado amo, taia kudima tauna be ena matana amo ia itaia bona unai gado ia lalopararalaia diba.

Taia kudima tauna be ena imana, tauanina bona vairana amo ia karaia saini be mai edia anina. Ta be ena vairana amo saini ia karaia neganai, unai ese ia hahedinaraia lasi ia ura taunimanima ia hamoalea. Lasi, to vairana gaukaralaia karana be sain gado ena grama ena taravatu badinaia dalana ta. Hegeregere: Taia kudima tauna ese henanadai ta ena saini ia karaia bona ena matana ena ibuni huina ia hadaea neganai, unai ese ia hahedinaraia unai henanadai ena haere be “oibe” eiava “lasi.” To bema matana ena ibuni ia hadihoa, unai ese ia hahedinaraia ia be inai bamona henanadai ia henia, daika, dahaka, edeseniai, edena negai, dahaka dainai, o edena dala ai. Nega haida edia uduna amo idia ese ia vara gauna eiava gau ta ena bada idia hahedinaraia. Taia kudima tauna ena kwarana ia hamarerea, pagana ia hadaea, vairana ia gaukaralaia, bona matana ia kehoa o koua anina be ia ura hereva ta o lalohadai ta ena anina ia hahedinaraia.

Taia kudima tauna ese ena vairana bona imana ia gaukaralaia amo, ia hereva diba tauna ia durua iena lalohadai ia lalopararalaia namonamo totona. Sain gado idia diba namonamo taia kudima taudia be unai bamona idia karaia dainai, sivarai ta eiava lalohadai ta, bona ita itaia lasi bona dibaia lasi gaudia be unai gado amo idia hahedinaraia namonamo diba.

Sain Gado Buka Bona Magasin Edia Namo

Iehova amo ia mai diba be sain gado amo taia kudima taudia dekenai ita hahedinaraia neganai, sivarai namona do idia abia dae bona Iehova do idia abidadama henia. Iehova ena Witnes taudia be idia gaukara goada tanobada hegegemadai taia kudima taudia dekenai sivarai namona idia harorolaia, bona idia halasia gaudia amo idia durudia totona. (Roma 10:14) Hari, tanobada hegegemadai sain gado hahanaia grup ibounai be 58, bona DVD dekenai sain gado idauidau 40 ai buka bona magasin idia halasia. Unai ese anina namona ia havaraia, a?

Jeremy, ena tama sina be taia kudima, ia gwau: “Lau laloatao, egu tamana be daiutu ai hora momo ia haorea Gima Kohorona ena paragraf haida sibona ia stadilaia, edia anina ia lalopararalaia totona. Unai murinai, ena daiutu amo ia raka-lasi bona mai moale ida saini ia karaia, ia gwau: ‘Inai lau lalopararalaia! Lau lalopararalaia!’ Bena ia duahia herevadia edia anina be lau dekenai ia gwauraia. Unai neganai egu mauri lagani be 12 sibona. Lau be paragraf lau duahidia lou bona imana dekenai saini lau karaia, lau gwau: ‘Tamagu e, lau laloa unai hereva edia anina be unai lasi. Iena anina be . . . ’ Saini ia karaia lau hereva lasi totona, bona ia giroa lou daiutu dekenai bena Gima Kohorona ai idia torea hereva edia anina ia tahua namonamo. Ia lalohisihisi bada bona unai lau laloaboio diba lasi, bona lau itaia ena daiutu dekenai ia giroa lou neganai, unai lau laloa bada. To, DVD ai idia halasia sain gado buka bona magasin ese ia idia durua, unai hereva edia anina ia lalopararalaia namonamo totona. Iehova ia laloa dalana be sain gado amo ia hahedinaraia neganai, ena vairana dekenai moale toana lau itaia bona unai lau laloa bada.”

Mani inai ekspiriens oi laloa danu, Witnes tadikaka ta mai ena adavana be Chile dekenai taia kudima hahine matamata, Jessenia idia hereva henia. Jessenia ena sinana ese gwaumaoro ia henia dainai, tadikaka bona ena adavana ese Chile gado ena Sain Gado ai Lauegu Baibel Sivarai Buka ena DVD be Jessenia dekenai idia hahedinaraia, unai murina idia gwau: “Jessenia ese DVD ai unai buka ena sivarai ia itaia neganai, ia kiri, bena ia tai. Bona sinana ese ia tai ena badina ia henanadailaia neganai, Jessenia ia gwau ia itaia laulauna ia ura henia dainai ia tai. Bena sinana ia diba, Jessenia be DVD ai ia itaia gaudia ibounai ia lalopararalaia namonamo.”

Venezuela ena gunika gabuna ai ia noho taia kudima hahine ta be mai ena natuna kekeni tamona, bona hahine be ia rogorogo. Ia bona ena adavana idia laloa idia hegeregere lasi natuna iharuana idia naria totona, badina moni davaria dalana ia auka, unai dainai natuna hamasea karana idia lalohadailaia. Iehova ena Witnes taudia be idia ruaosi idia vadivadi henia, bona idia diba lasi idia ruaosi be natuna hamasea karana idia lalohadailaia, bona idia dekenai Venezuela gado ena Sain Gado ai Dirava Ia Ura Dahaka Ita Karaia? buklet ena kahana 12 be DVD ai idia hahedinaraia. Unai kahana ese Dirava ena lalohadai bogana lalonai natuna hamasea karana bona ala-ala karana dekenai ia herevalaia. Unai murinai, hahine ese Witnes taudia ia hamaoroa unai kahana idia stadilaia dainai, ia moale bada. Ia gwau, unai stadi karana dainai, bogana lalonai natuna hamasea karana do idia karaia lasi. Sain gado buka bona magasin be DVD ai idia hahedinaraia dainai, unai ese idia ruaosi ia durua bogana lalonai ia noho beibi idia hamasea lasi totona!

Taia kudima taihu ta, Lorraine ia gwau: “Baibel lau dibaia karana be hegeregere, laulau ta ena kahana idauidau haboua karana bamona. Lau lalopararalaia lasi, unai be hegeregere laulau ena kahana haida be idia noho lasi. To, Baibel ena hereva momokani be sain gado ai idia halasia neganai, unai be hegeregere idia noho lasi laulau ena kahana be edia gabu korikori ai lau atoa.” George be taia kudima, bona lagani 38 lalonai ia be Witnes tauna, ia gwau: “Lau abia dae momokani gau ta oi lalopararalaia namonamo neganai, unai ese oi ia hamoalea bona oi ia hagoadaia. Lau mamia sain gado DVD idauidau ese lau ia durua bada, bona egu hetura karana Dirava ida ia habadaia.”

“Egu Gado ai Hebou ta Idia Karaia!”

Iehova ena Witnes taudia be sain gado buka bona magasin idia halasia sibona lasi, to sain gado heboudia idia karaia danu. Hari, tanobada hegegemadai sain gado kongrigeisen be 1,100 mai kahana idia noho. Taia kudima taudia be edia gado korikori dekenai idia hereva henidia, bona idia laloparara dalanai Baibel ena hereva momokanidia idia hadibaia. Tok idia karaia neganai, idia hahedinaraia taia kudima tauna ena gabu bona mauri dalana idia matauraia.

Sain gado kongrigeisen idia haginia be mai ena namo, a? Cyril ena ekspiriens oi laloa, ia be lagani 1955 ai ia bapatiso. Lagani momo lalodiai ia hekwarahi bada buka bona magasin ia stadilaia bona hanaihanai kongrigeisen heboudia dekenai ia lao. Nega haida sain gado hahanaia taudia idia noho bona nega haida idia noho lasi. Sain gado hahanaia taudia idia noho lasi negadiai, Witnes taudia be mai lalokau ida Cyril idia durua, hegeregere platfom amo idia henia tok be tadikaka ese pepa dekenai idia torea bona ia dekenai idia henia. Ia be lagani 34 lalonai hereva momokani dekenai ia noho, bona lagani 1989 ai, United States, New York dekenai sain gado kongrigeisen ginigunana idia haginia. Cyril be unai kongrigeisen dekenai ia noho dainai, ena hemami be edena bamona? Ia gwau: “Toana be uda badana ta amo eiava guri ta lalona amo lau raka-lasi bona diari lau itaia. Egu gado ai hebou ta idia karaia!”

Iehova ena Witnes taudia edia sain gado kongrigeisen be taia kudima taudia idia hebou hanaihanai gabuna, unai gabu ai Dirava idia dibaia bona Ia idia tomadiho henia. Unai bamona gabudia dekenai Dirava ena taunimanima idia hetura namonamo bona goada idia abia. Tanobada dekenai taia kudima taudia be taunimanima ida idia herevahereva diba lasi bona idia be sibodia idia noho, to sain gado kongrigeisen be herevahereva bona hebamo heheni namonamo gabuna. Bona unai kongrigeisen lalodiai, taia kudima taudia be diba idia abia, bona edia hesiai gaukara Iehova totona idia habadaia diba. Iehova ena Witnes taia kudima taudia momo be ful-taim hesiai gaukara idia karaia. Haida be tano ma ta dekenai idia lao, taia kudima taudia idia durua Iehova idia diba totona. Taia kudima Keristani tadikaka be hadibaia taudia namodia ai idia lao, gaukara idauidau idia gunalaia, mamoe naria gaukara idia karaia, bona momo be idia hegeregere kongrigeisen lalonai maduna idia huaia totona.

United States ai, sain gado kongrigeisen be 100 mai kahana bona sain gado grup be 80. Brazil ai, sain gado kongrigeisen be 300 bamona bona sain gado grup be 400 mai kahana. Mexico ai, sain gado kongrigeisen be kahirakahira 300. Russia ai, sain gado kongrigeisen be 30 mai kahana bona sain gado grup be 113. Unai be tanobada hegegemadai ai ia vara sivarai namodia haida sibona.

Iehova ena Witnes taudia be sain gado hebouhebou idia karaia danu. Lagani 2008 ai, tanobada hegegemadai distrik hebouhebou 120 mai kahana idia karaia. Unai hebouhebou ese taia kudima taudia ia hagoadaia, bona idia mamia idia danu be tanobada hegegemadai tadikaka oreana lalonai idia noho bona nega korikori ai lauma aniani idia abia.

Leonard be taia kudima bona lagani 25 mai kahana lalonai ia be Iehova ena Witnes tauna. Ia gwau: “Lau diba Iehova be Dirava momokanina. To, hisihisi ia koua lasi ena badina lau lalopararalaia lasi. Nega haida, unai lau laloa bona Iehova lau badu henia. To sain gado distrik hebouhebou ta dekenai idia henia tok ta amo, Iehova ese hisihisi ia koua lasi ena badina lau lalopararalaia. Unai tok ia ore murinai, egu adavana be lau ia nanadaia, ‘Oi moale, a?’ Lau be mai momokani ida lau gwau oibe! Lagani 25 murinai, lau moale badina lau be Iehova lau rakatania lasi. Lau be hanaihanai Ia lau lalokau henia, to Iena kara haida lau lalopararalaidia lasi. Hari lau laloparara diba!”

Kudouna Ia Moale

Taia kudima taudia ese Iehova idia dibaia karana amo, Iena vairana ai dahaka idia itaia diba? Lalokau, hebogahisi, kara maoromaoro, badinaia karana​​—⁠bona ma haida.

Tanobada hegegemadai idia noho Witnes taia kudima taudia be Iehova ena vairana idia itaia bamona, bona Iena vairana do idia itaia noho. Iehova be taia kudima taudia ia lalokau henia dainai, ‘iena vairana ena diari be idia dekenai ia henia.’ (Num. 6:​25) Taia kudima taudia be Iehova idia dibaia dainai idia moale bada!

[Pictures on page 24, 25]

Tanobada hegegemadai sain gado kongrigeisen ibounai be 1,100 mai kahana idia noho

[Pictures on page 26]

Iehova ese iena vairana ena diari be taia kudima taudia dekenai ia henia