Oi Hegaegae Emu Teritori Dekenai Taia Kudima Taudia Oi Tahua Totona
1 Iehova be taunimanima ia boiria, ia gwau: “Umui mai. . . . Mauri ranuna do umui abia dae, ia be davana lasi.” (Apok. 22:17) Tanobada ibounai lalonai taia kudima taudia momo danu be inai boiboi idia abia dae noho. Unai dainai, lagani 13 lalodiai, taia kudima taudia edia kongregesen 27 bona grup 43 be United States dekenai idia karaia. Papua New Guinea dekenai taia kudima taudia edia grup maragina tamona be Port Moresby ena kongregesen ta ida idia hebou.
2 Iseda teritori dekenai taia kudima bona idia kamonai namonamo lasi taudia momo idia noho. Ita ura idia be Iehova bona ena Basileia idia dibaia be namo.
3 Edena Bamona Oi Durudia Diba? Taunimanima idia noho gabudia dekenai, taia kudima taudia edia gado idia gaukaralaia taudia oi itaia, a? Emu gaukara gabuna eiava sikuli gabuna dekenai ta oi diba, iena famili lalonai ta be taia kudima tauna, a? Dina ta ta lalodiai emu gaukara oi karaia lalonai taia kudima taudia oi tahua. To edena bamona oi hamomokania diba Basileia herevana do idia abia?
4 Oi Haroro Henidia: Taia kudima tauna oi durua Iehova ese taunimanima totona do ia karaia gaudia ia lalo-pararalaia totona, Mauri Hanaihanai Tanobada Dekenai Oi Abia! buklet ena laulau oi gaukaralaia. Danu, kongregesen heboudia dekenai oi boiridia mai. Ena be idia kamonai lasi, to idia ese Keristani tomadiho korikorina do idia itaia bona namo bada do idia abia. Taia kudima taudia momo be heduru do idia abia bema idia ia laloa bada taudia idia bamoa. Danu, emui kongregesen ena seketere ese emui teritori eiava kongregesen dekenai idia noho taia kudima taudia totona brens opesi ia hadibaia be namo.
5 Bema emu gabu dekenai taia kudima taudia edia gado ia diba tauna ta be lasi lauma dalanai idia do ia durua totona, unai be edena bamona? Dahaka do oi karaia? Oi lou henia bona unai ruma dekenai idia kamonai diba taudia ta oi hereva henia be namo, ani? Oi hamaoroa oi ura taia kudima taudia edia vidio ta do oi hahedinaraia taia kudima tauna ena lalona oi veria totona. Pablisa haida danu be Auslan (taia kudima taudia edia gado) idia dibaia, unai dala amo taia kudima taudia do idia haroro henidia namonamo diba. (Kara 16:9, 10) Taia kudima taudia edia Baibel stadi gaudia be vidio ai idia karaia bona oi abia diba. Baibel stadilaia totona inai gaudia idia gaukaralaia amo anina namodia momo idia havaraia vadaeni.
6 Oiemu gabu dekenai taia kudima taudia danu oi tahua dainai, dala oi kehoa mauri ranuna do idia abia dae, ia be davana lasi.—Mat. 10:11.