Iehova, Hereva Momokani Diravana
“Lohiabada e, oi ese lau do oi hamauria, badina oi be kara momokani ena Dirava.”—SALAMO 31:5.
1. Koikoi karana ia noho lasi neganai, guba bona tanobada dekenai idia noho taudia edia noho dalana be edena bamona?
GUNAGUNA, koikoi karana be lasi. Guba idia noholaia taudia be goevadae lauma taudia, edia Havaraia Tauna, “kara momokani ena Dirava” idia hesiai henia. (Salamo 31:5) Koikoi herevana eiava karana be lasi. Iehova ese ena lauma natudia dekenai hereva momokani ia gwauraia. Unai bamona ia karaia badina idia ia lalokau henia bona edia namo ia laloa bada. Tanobada dekenai unai bamona ia karaia danu. Iehova ese tau bona hahine ginigunadia ia havaraia, bona ia gaukaralaia oreana amo, hanaihanai idia ia hereva henidia goevagoeva, maoromaoro, bona mai momokani ida. Unai be namo herea!
2. Daika ese koikoi karana ia hamatamaia, bona dahaka dainai?
2 To gabeai, Dirava ena lauma natuna ta ese Iehova ia inai henia bona hemataurai lasi dalanai ia sibona be dirava ta ai ia lao. Unai lauma tauna, gabeai idia gwauraia Satani Diabolo, ia ura ma haida ese ia do idia tomadiho henia. Iena tahua gauna abia totona, koikoi karana ia hamatamaia unai amo ma haida be iena siahu henunai do idia noho. Unai bamona ia karaia neganai, ia be “koikoi tauna, bona ia be koikoi ibounai edia tamana” ai ia lao.—Ioane 8:44.
3. Adamu bona Heva be Satani ena koikoi herevana dekenai edena bamona idia kara, bona dahaka anina idia havaraia?
3 Satani ese gaigai amo hahine ginigunana, Heva, ia hamaoroa, bema Dirava ena hahegani ia dadaraia bona ia taravatua auna ia ania, do ia mase lasi. Unai be koikoi. Ma ia hamaoroa bema ia ania Dirava hegeregerena do ia lao, kara namo bona kara dika do ia diba. Unai danu be koikoi. Ena be Heva be guna koikoi herevana ta ia kamonai lasi, to ia lalo-parara gaigai amo ia kamonai herevana be Dirava ese ena adavana, Adamu, dekenai ia gwauraia herevana amo ia idau. To, Satani ena hereva ia abia dae, Iehova ena lasi. Satani ese ia koia namo herea dainai, huahua ia abia bena ia ania. Gabeai, Adamu danu ia ania. (Genese 3:1-6) Heva bamona, Adamu be guna koikoi herevana ta ia kamonai lasi, to Satani ese ia koia lasi. (1 Timoteo 2:14) Iena kara amo, ia hahedinaraia iena Karaia Tauna ia dadaraia. Taunimanima dekenai dika bada idia havaraia. Adamu ena kamonai lasi karana dainai, kara dika bona mase—kara gagevagageva bona lalohisihisi bada danu—be ena natudia dekenai ia henia hanai.—Roma 5:12.
4. (a) Eden umana dekenai Satani ese dahaka hereva koikoi ia gwauraia? (b) Satani ese ita ia hakaua kerere lasi totona, dahaka ita karaia be namo?
4 Koikoi karana danu ia bada. Namona be ita diba Satani ese Eden umana dekenai ia gwauraia hereva koikoidia amo, Iehova ena kara momokanina ia gwauraia dika. Satani ia gwau Dirava be mai koikoi ida gau namona ta be tau bona hahine ginigunadia amo ia koua. Unai be momokani lasi. Adamu bona Heva edia kamonai lasi karana amo gau namona ta idia abia lasi. Iehova ia hereva bamona, idia mase. To, Satani be Iehova ena ladana ia hadikaia noho, bona unai kara ia habadaia momokani dainai, lagani handred momo murinai aposetolo Ioane be Dirava ena lauma amo inai hereva ia torea, ia gwau Satani “be tanobada taudia ibounai ia koia noho.” (Apokalupo 12:9) Satani Diabolo ese ita ia hakaua kerere lasi totona, namona be ita abia dae momokani Iehova be hereva momokani Diravana bona ena Hereva danu ia momokani. Edena dala ai emu abidadama Iehova dekenai oi hagoadaia bona ena Inai Tauna ena kara bona ena hereva koikoidia oi dadaraia diba?
Iehova be Hereva Momokani Ia Diba
5, 6. (a) Iehova ena diba ena bada be edena bamona? (b) Taunimanima edia diba ena bada be edena bamona Iehova ena amo?
5 Baibel be hanaihanai Iehova ia gwauraia “gau ibounai ia karaia” tauna. (Efeso 3:9) Ia ese “guba bona tanobada bona davara bona idia lalonai noho gaudia ibounai [ia] karaia.” (Kara 4:24) Iehova be Havaraia Tauna dainai, gau ibounai ia diba. Haheitalai ta be inai: Sibona ena ruma ia palanilaia bona gabeai ia haginia tauna mani oi laloa, timba ibounai ia atoa namonamo bona haginia gaukara be sibona ia karaia. Unai ruma ena gau ibounai ia diba namonamo bona ena diba ese ruma ia itaia tauna ena diba ia hanaia. Taunimanima be idia palanilaia bona karaia gaudia idia diba. Unai hegeregerena, Havaraia Tauna be ia karaia gaudia ta ta ibounai ia diba.
6 Peroveta tauna Isaia ese Iehova ena diba ena bada ia herevalaia namo herea. Ia gwau: “Daika ese iena imana dekenai ranu ia kadoa, vadaeni unai kara dekena amo, davara ranu ena bada do ia davaria? Bona daika ese iena imana kwakikwakina dekenai, guba ena ataiai ena lata do ia davaria diba? Daika ese tanobada ena kahu ibounai, be kapusi tamona lalonai do ia dogoatao diba? Daika ese ororo badadia bona maragidia edia metau, be sikele dekenai ia davaria diba? Daika ese Dirava ena Lauma ena dala ia diba? O daika ese ia dekenai ia hadibaia, o ia dekenai ia sisiba henia diba? Dirava ese daika dekenai ia nanadaia, laloa diari do ia abia totona? Daika ese Dirava dekenai dala maorona ia hadibaia? Daika ese Dirava dekenai diba ia henia, bona laloa kehoa dalana ia hedinarai henia?” (Isaia 40:12-14) Momokani, Iehova be “diba bada” Diravana. (1 Samuela 2:3; Iobu 36:4; 37:16) Iseda diba be Iehova ena diba ida ita hahegeregerea diba lasi! Ena be taunimanima ese edia diba idia habadaia momokani, to Dirava ia karaia gaudia dekenai iseda lalo-parara be ‘maragi sibona.’ Inai be hegeregere “sivarai ena kahana maragina” sibona ita diba, to ‘ena siahu ena bada’ ita diba lasi.—Iobu 26:14.
7. Iehova ena diba dainai Davida be dahaka ia diba, bona dahaka ita abia dae be namo?
7 Iehova ese ita ia havaraia dainai, ita gwau diba ita ia diba namonamo. King Davida be unai ia diba. Ia gwau: “Lohiabada e, oi ese egu lalona oi tahua vadaeni, lau oi diba momokani vadaeni. Egu kara ibounai oi diba vadaeni. Oi be daudau herea dekena amo egu laloa ibounai oi diba. Oi ese egu gaukara, bona egu laga-ani oi itaia namonamo noho. Lauegu kara ibounai oi diba. Do lau hereva lasi neganai, oi ese egu hereva be oi diba guna vadaeni.” (Salamo 139:1-4) Momokani, Davida ia lalo-parara taunimanima be mai edia ura kwalimu—Dirava ese ita dekenai ura kwalimu ia henia, ia do ita kamonai henia eiava ita kamonai henia lasi. (Deuteronomi 30:19, 20; Iosua 24:15) To, ita be sibona ita diba namonamo lasi, to Iehova be ita ia diba goevagoeva. Iseda namo ia tahua, bona dala maorona dekenai ita ia hakaua diba. (Ieremia 10:23) Momokani, tisa tauna, diba momo tauna, eiava sisiba henia tauna ta ia noho lasi ita dekenai hereva momokani ia hadibaia bona aonega bona moale ia henia totona.
Iehova be Hereva Momokani Ia Gwauraia
8. Edena bamona ita diba Iehova be hereva momokani gwauraia tauna?
8 Hereva momokani ita diba be gau ta, to hanaihanai hereva momokani ita gwauraia eiava ita kara momokani be ma gau ta. Hegeregere, Diabolo, be mai ena ura ida “hereva momokani . . . ia badinaia lasi.” (Ioane 8:44) To Iehova be idau, ia be “kara momokani ena Dirava.” (Salamo 31:5) Nega momo Baibel ia hahedinaraia Iehova be hereva momokani ia gwauraia tauna. Aposetolo Paulo ia gwau, “Dirava ia koikoi diba lasi.” (Heberu 6:18; Tito 1:2) Hereva momokani gwauraia karana be Dirava ena mai anina bada karana ta. Iehova dekenai ita tabekau bona ia ita abidadama henia diba badina ia be hereva momokani tauna; ia idia badinaia taudia be nega ta ia koidia lasi.
9. Iehova ena ladana be edena bamona hereva momokani ida idia hakapua?
9 Iehova ena ladana ese ia hahedinaraia ia be hereva momokani Tauna. Dirava ena ladana ena anina be “Ia ese Ia Halaoa.” Unai ese ia hahedinaraia Iehova be ia gwauhamatalaia gaudia ibounai edia Hagugurua Tauna. Ma ta be unai bamona ia karaia diba lasi. Iehova be Ataiai Momokani Tauna dainai, gau ta ese iena ura idia guguru karana ia koua diba lasi. Iehova be hereva momokani ia gwauraia Diravana, ma danu ia sibona be mai ena siahu bona aonega, ia herevalaia gaudia ibounai hagugurua totona.
10. (a) Iosua be edena dala amo ia hamomokania Iehova be hereva momokani tauna? (b) Iehova ia gwauhamatalaia gaudia be edena dala ai emu mauri lalonai ia vara momokani?
10 Iehova ena hoa karadia idia itaia taudia momo amo Iosua be ta, ia itaia gaudia amo ia hamomokania diba Iehova be hereva momokani tauna. Iehova ese hisihisi 10 ta ta ia perovetalaia bona Aigupito taudia dekenai idia vara neganai, Iosua be unuseni ia noho. Ia itaia gaudia haida amo, Iosua ese Iehova ena gwauhamata idia guguru ia itadia, Ia ese Aigupito amo Israela taudia ia hamauria, Gwauhamata Tanona dekenai idia ia hakaudia lao, bona Kanana ena tuari orea goadana ia halusia. Ena mauri ena dokona lalonai, Iosua ese Israela ena tau badadia ia hamaoroa: “Umui ibounai be emui lalona, bona emui laumana dekenai umui diba, Lohiabada, emui Dirava, ese iena gwauhamata namodia ibounai umui dekenai ia hamomokania vadaeni, idia ta ia reaia lasi. Ibounai idia vara momokani, ta ia moru lasi.” (Iosua 23:14) Ena be Iosua ia itaia hoa karadia oi itaia lasi, to emu mauri lalonai Iehova ia gwauhamatalaia gaudia idia vara momokani, a?
Iehova ese Hereva Momokani Ia Hahedinaraia
11. Dahaka ese ia hahedinaraia Iehova ia ura hereva momokani be taunimanima dekenai ia herevalaia?
11 Ena diba be bada to ena natudia dekenai ia herevahereva lasi tama eiava sina ta mani oi laloa. Iehova be unai bamona lasi dainai oi moale, ani? Iehova be mai lalokau ida taunimanima ida ia herevahereva, bona hariharibada dalanai ia karaia. Baibel ese Ia ia gwauraia “Hadibaia Tauna” Badana. (Isaia 30:20) Iena hebogahisi mai lalokauna dainai, idia ura lasi kamonai taudia ia hereva henia danu. Hegeregere, Iehova ia diba do idia kamonai lasi taudia dekenai Esekiela ia siaia, ia haroro totona. Iehova ia gwau: “Tanobada tauna e, Israela taudia dekenai do oi lao, bona oi dekenai lau hamaoroa hereva, be idia dekenai do oi gwauraia.” Bena ia gwau: “Oi do idia kamonai henia lasi. Idia ese lau dekenai idia kamonai henia lasi, badina idia ibounai be dagedage, bona edia lalona be auka momokani.” Unai be gaukara aukana, to mai kamonai ida Esekiela ese ia karaia, bona unai bamona ia karaia dainai, Iehova ena hebogahisi ia hahedinaraia. Bema haroro gaukara aukana ta oi abia bona Dirava dekenai oi tabekau, oi diba momokani oi do ia hagoadaia, iena peroveta tauna Esekiela dekenai ia karaia bamona.—Esekiela 3:4, 7-9.
12, 13. Dirava be edena dala ai taunimanima ia hereva henia?
12 Iehova ia ura “taunimanima ibounai ese mauri do idia davaria, bona hereva momokani do idia diba.” (1 Timoteo 2:4) Ia ese peroveta taudia, aneru, bona ena lalokau Natuna, Iesu Keriso dekena amo ia hereva vadaeni. (Heberu 1:1, 2; 2:2) Pilato dekenai, Iesu ia gwau: “Hereva momokani gwauraia hedinarai totona lau vara, bona lau mai inai tanobada dekenai. Hereva momokani idia badinaia taudia ibounai ese lauegu hereva idia kamonai henia.” Pilato dekenai dala hereadaena ia kehoa Dirava ena Natuna amo Iehova ia henia hahemauri dalana ena hereva momokani ia dibaia totona. To, Pilato ese hereva momokani ia badinaia lasi, bona ia ura lasi Iesu ese do ia hadibaia. To, mai hemataurai lasi ida ia haere, ia gwau: “Hereva momokani be dahaka?” (Ioane 18:37, 38) Madi, Pilato ia ura lasi hereva momokani ia dibaia! To, momo ese Iesu ia gwauraia hereva momokani idia kamonaia. Ena hahediba taudia dekenai ia gwau: “Umui be emui matana idia namo vadaeni, badina umui itaia diba. Umui emui taiana danu idia namo, badina be umui kamonai diba.”—Mataio 13:16.
13 Iehova ese Baibel amo hereva momokani ia naria namonamo bona taunimanima ibounai dekenai ia henia. Baibel ese mai momokani ida gau ibounai ia gwauraia. Ia ese Dirava ena kara, ena ura, ena hahegani, bona taunimanima edia noho dalana korikorina ia hahedinaraia danu. Iesu be guriguri amo Iehova dekenai ia gwau: “Oiemu hereva be hereva momokani.” (Ioane 17:17) Unai dainai, Baibel be buka idau hereana. Ia sibona be gau ibounai ia diba Diravana ena lauma amo idia torea. (2 Timoteo 3:16) Ia be harihari gauna namo hereana taunimanima dekenai dainai, Dirava ena hesiai taudia ese idia laloa bada. Aonega dalana be dina ibounai ita duahia.
Hereva Momokani Dogoatao Noho
14. Edena gaudia haida Iehova ia gwau do ia karaia, bona dahaka dainai ia ita abidadama henia be namo?
14 Iehova ese ena Hereva amo ita ia hamaoroa gaudia ita laloa bada be namo. Ia sibona totona ia gwauraia herevadia idia momokani, bona ia hereva gauna be do ia karaia. Badina momo dainai Dirava ita abidadama henia diba. Iehova ia gwau ia ese “ia idia ura lasi taudia, bona Lohiabada Iesu ena Sivarai Namona idia abia dae lasi taudia dekenai davana metau do ia henidia” neganai, iena hereva ita abia dae diba. (2 Tesalonika 1:8) Iehova ia gwau kara maoromaoro idia badinaia taudia ia lalokau henia, abidadama taudia dekenai mauri hanaihanai do ia henia, bona hisihisi, taitai bona mase do ia haorea neganai, unai ibounai ita abidadama henia diba. Iehova ia hahedinaraia unai gwauhamata hereva dokona ita abidadama henia diba, badina aposetolo Ioane dekenai ia gwauraia herevadia dainai, ia gwau: “Inai hereva do oi torea, badina ia be maoromaoro bona momokani.”—Apokalupo 21:4, 5; Aonega Herevadia 15:9; Ioane 3:36.
15. Satani ese ia gwauraia koikoi herevadia haida be dahaka?
15 Satani be Iehova amo ia idau. Taunimanima ia hadibaia lasi to ia koidia. Satani ia ura taunimanima be tomadiho momokani amo do ia veridia siri, unai ia karaia totona ia ese sivarai koikoidia momo ia gwauraia. Hegeregere, Satani ia ura ita abia dae Dirava be ita amo ia daudau bona tanobada dekenai ita mamia hisihisi ia laloa lasi. To, Baibel ia hahedinaraia Iehova ese ia karaia taudia ia lalodia bada bona dika bona hisihisi ia inai henia. (Kara 17:24-30) Satani ia ura taunimanima idia abia dae lauma gaudia tahua karana be nega halusia kava karana. To, Buka Helaga ese ita ia hadibaia, “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi.” Danu, idia hahedinaraia goevagoeva “Dirava idia tahua taudia ibounai, be davana namona Dirava ese do ia henidia.”—Heberu 6:10; 11:6.
16. Dahaka dainai Keristani taudia idia gima noho bona hereva momokani idia dogoatao auka be namo?
16 Aposetolo Paulo ese Satani be inai bamona ia herevalaia, ia gwau: “Inai tanobada ena dirava ese [abidadama lasi taudia] edia lalona ia koua, dibura dekena amo. Vadaeni Keriso ena hairaina bona iena Sivarai Namona ena diari idia itaia diba lasi. Keriso be Dirava ena toana momokani Tauna.” (2 Korinto 4:4) Heva bamona, haida be Satani Diabolo ese ia koia namo herea. Ma haida be Adamu ena dala idia badinaia, ena be Satani ese ia koia lasi to mai ena ura ida gwau-edeede dalana ia badinaia. (Iuda 5, 11) Unai dainai, gau badana be Keristani taudia idia gima noho bona hereva momokani idia dogoatao auka.
Iehova Ia Ura “Abidadama Korikori” Ita Hahedinaraia
17. Iehova ena lalo-namo ita abia totona dahaka ita karaia be namo?
17 Iehova ena kara ibounai be momokani dainai, ia ura ia idia tomadiho henia taudia idia kara momokani danu. Salamo torea tauna ia gwau: “Lohiabada e, daika be oiemu Dubu Helaga dekenai do ia noho? Edena tauna be Siona, oiemu ororo helagana dekenai, do ia tomadiho diba? Tauna be inai: Ia be nega ibounai Dirava ia kamonai henia. Ia ese kara maoromaoro sibona ia karaia, bona iena kudouna dekena amo, hereva momokani ia gwauraia noho, mai laloa maoromaoro danu.” (Salamo 15:1, 2) Iuda taudia ese unai hereva idia anelaia neganai idia ese Iehova ena ororo helagana idia laloa, unuseniai King Davida ese Taravatu Maua be Siona Ororona ai ia karaia palai rumana dekenai ia abia lao. (2 Samuela 6:12, 17) Ororo bona palai rumana ese Iehova ia noho gabuna ia laulaulaia, bona unai idia laloa lou. Unuseniai, taunimanima be Dirava idia guriguri henia diba iena lalo-namo idia abia totona.
18 Iehova ena hetura karana ia ura henia tauna be iena uduna sibona amo ia hereva lasi, to “iena kudouna dekena amo” hereva momokani ia gwauraia be namo. Dirava ena tura korikoridia edia kudouna idia maoro be namo bona idia hamomokania idia be mai edia “abidadama korikori,” badina kara momokani be kudouna amo ia mai. (1 Timoteo 1:5; Mataio 12:34, 35) Dirava ena turana be ia kara koikoi eiava hereva koikoi lasi, badina Iehova ese “koikoi taudia” ia inai henidia. (Salamo 5:6) Iehova ena Witnes taudia tanobada hegegemadai, idia hekwarahi edia Dirava idia tohotohoa hereva momokani idia gwauraia totona. Hereva gabena ese unai do ia herevalaia.
Edena Bamona Do Oi Haere?
• Dahaka dainai Iehova be gau ibounai ia diba?
• Dahaka ese ia hahedinaraia Iehova be hereva momokani ia gwauraia Diravana?
• Edena dala ai Iehova ese hereva momokani ia hahedinaraia?
• Hereva momokani dekenai, dahaka ita karaia be namo?
18. (a) Dirava ena turana ai ita lao totona dahaka ita karaia be namo? (b) Hereva gabena dekenai dahaka do ita herevalaia?
[Pictures on page 20]
Hereva momokani ia gwauraia Diravana be ia karaia gaudia ibounai ia diba
[Picture on page 23]
Iehova ena gwauhamata do idia vara momokani