Iehova Ena Hereva be Ia Mauri Noho
Levitiko Bukana Ena Hereva Badadia
ISRAELA taudia be Aigupito ena igui amo idia ruhaia negana amo lagani ta ia do hanaia lasi. Hari idia be bese matamatana ta ai idia lao, bona Kanana tanona dekenai idia lao noho. Iehova ena ura be bese helagana ta ese unai gabu do ia noholaia. To, Kanana taudia edia mauri dalana bona tomadiho karadia be dika momokani. Unai dainai Dirava momokani ese Israela taudia dekenai taravatu ia henia, unai amo idia idau iena hesiai gaukara idia karaia totona. Unai be Baibel bukana Levitiko ai idia noho. Reana lagani 1512 B.C.E. ai, Sinai ena tano gagaena dekenai peroveta tauna Mose ese unai buka ia torea, unai buka be hua tamona lalonai idia vara gaudia ia herevalaia. (Esodo 40:17; Numera 1:1-3) Iehova be ia idia tomadiho henia taudia ia hadibadia loulou idia helaga totona.—Levitiko 11:44; 19:2; 20:7, 26.
Hari Iehova ena Witnes taudia be Dirava ese Mose dekenai ia henia Taravatu henunai idia noho lasi. Iesu Keriso ena mase ese unai Taravatu ia kokia. (Roma 6:14; Efeso 2:11-16) To, Levitiko bukana ai idia noho taravatudia amo namo ita davaria diba, ita dekenai iseda Dirava, Iehova tomadiho henia dalana dekenai gau momo ia hadibaia.
BOUBOU GAUDIA HELAGADIA—EDIA URA HEGEREGERENA BONA TARAVATU HEGEREGERENA IDIA HENIA
Taravatu ese ia gwauraia boubou gaudia haida be edia ura hegeregerena idia henia, to ma haida be Taravatu ese ia gwauraia hegeregerena idia henia. Hegeregere, gabua ore boubouna be edia ura hegeregerena idia henia. Idia bouboulaia animal ena kahana ibounai be Dirava dekenai idia henia, Iesu Keriso be mai ena ura ibounai ida iena mauri ia henia mauri davalaia boubouna bamona. Sibona edia ura hegeregerena idia henia maino karaia boubouna be idia haria. Animal ena kahana ta be Dirava totona boubou patana latanai idia gabua, ena kahana ta be hahelaga tauna ese ia ania bona kahana ma ta be animal ia henia tauna ese ia ania. Unai hegeregerena, horoa Keristani taudia dekenai, Keriso ena mase ena Memorial be anibou ta.—1 Korinto 10:16-22.
Kara dika kokia boubouna bona kerere ena davana karaia boubouna be Taravatu hegeregerena idia henia. Kerere ta idia karaia kava neganai, kara dika kokia boubouna idia henia. Kerere ena davana karaia boubouna amo ena maoro ia haboioa tauna ese ena maoro ia abia diba, eiava ena dika amo ia helalo-kerehai tauna ese ena maoro ia abia lou diba, bona unai ese Dirava ia hanamoa. Danu paraoa boubouna idia henia Iehova ena hariharibada idia laloa totona. Ita dekenai unai ibounai be mai anina bada, badina Taravatu gwauhamatana henunai idia karaia bouboudia ese Iesu Keriso ena boubou gauna amo do ita abia namo ia laulaulaia.—Heberu 8:3-6; 9:9-14; 10:5-10.
Baibel Henanadaidia Edia Haere:
2:11, 12—Dahaka dainai Iehova ese ‘boubou patana dekenai idia gabua’ hani ia abia dae lasi? Unai siri ese ia herevalaia hani be nanigo ese idia karaia gauna lasi. Ena be hani be ‘boubou patana dekenai idia gabua’ lasi, to ia be “vara guna anina gaudia . . . uma ena anina gaudia ibounai” ida idia henia. (2 Sivarai 31:5) Unai siri ese ia gwauraia hani be au huahua idauidau edia ranu. Hani be paraoa ia hatubua diba dainai boubou patana dekenai idia gabua karana ia abia dae lasi.
2:13—Dahaka dainai idia henia “boubou gaudia ibounai” dekenai damena idia atoa be namo? Unai be boubou gaudia edia mamina hanamoa totona idia karaia lasi. Tanobada hegegemadai, aniani ia bodaga lasi totona damena idia gaukaralaia. Boubou gaudia dekenai damena idia atoa badina damena ese dika bona bodaga ia koua gauna ia laulaulaia.
Ita Dibaia Gaudia:
3:17. Animal ena kahana namo hereana be ena digara, unai dainai digara ania lasi taravatuna ese Israela taudia dekenai ia hahedinaraia kahana namo hereana be Iehova ena. (Genese 45:18) Unai ese ita ia hadibaia namona be iseda gau namo hereadia be Iehova dekenai ita henia.—Aonega Herevadia 3:9, 10; Kolose 3:23, 24.
7:26, 27. Israela taudia be rara idia ania lasi be namo. Dirava ena matana ai, rara be mauri ia laulaulaia. Levitiko 17:11 ia gwau: “Mauri gaudia ibounai edia mauri be rara dainai.” Hari danu tomadiho momokani taudia be rara idia ania lasi.—Kara 15:28, 29.
HAHELAGA OREANA IA HAGINIA
Boubou gaudia naria gaukarana be daidia dekenai idia henia? Unai gaukara be hahelaga taudia dekenai idia henia. Dirava ese Mose ia hamaoroa Arona be hahelaga tauna badana bona ena natudia foa be helaga taudia ai do ia halaoa. Unai hahelagaia karana be dina 7 lalonai idia karaia, bona unai dina namba 7 murinai hahelaga taudia ese edia gaukara idia matamaia.
Baibel Henanadaidia Edia Haere:
9:9—Dahaka dainai rara be boubou patana ena badinai idia bubua bona ma gau haida dekenai idia atoa be mai anina bada? Badina unai ese ia hahedinaraia Dirava be kara dika gwauatao boubouna totona idia gaukaralaia rara ia abia dae. Kara dika gwauatao boubouna totona idia karaia gaudia ibounai lalonai rara idia gaukaralaia. Aposetolo Paulo ia gwau: “Taravatu ena hereva hegeregerena, gau momo herea be rara ese ia hagoevaia. Bona bema rara idia bubua lasi neganai, kara dika be idia gwauatao diba lasi.”—Heberu 9:22.
10:1, 2—Arona ena natuna memero, Nadaba bona Abihu ese dahaka kara dika idia karaia? Nadaba bona Abihu be dala kererena ai edia hahelaga gaukara idia karaia murinai, Iehova ese hahelaga taudia ia taravatua palai dubu dekenai idia gaukara neganai, uaina eiava kekero muramura do idia inua lasi. (Levitiko 10:9) Unai ese ia hahedinaraia unai nega dekenai reana Arona ena natuna rua be idia kekero. To, edia mase ena badina korikorina be idia henia “lahi be Lohiabada ena oda gauna hegeregerena lasi.”
Ita Dibaia Gaudia:
10:1, 2. Hari, Iehova ena hesiai taudia ese Dirava ena taravatu idia badinaia be gau badana. Bona danu, edia maduna idia huaia noho lalonai namona be idia hekokoroku lasi.
10:9. Kekero muramura ita inua ela bona ita kekero momokani neganai, Dirava ia henia gaukarana ita karaia lasi be namo.
TOMADIHO HELAGANA IA GOEVA BE NAMO
Goeva bona goeva lasi animal ania taravatuna ese dala rua ai Israela taudia ia durua. Unai taravatu ese gorere ia havaraia gaigai maragimaragi amo idia ia gimaia bona unai ese ia hahedinaraia idia be idia badinai idia noho besedia amo idia idau. Taravatu ma haida be mase tauanina dogoatao karana be miro, hahine ia mara murinai sibona ia hagoevaia be namo, lepera gorere taudia ese idia karaia gaudia, bona tau bona hahine edia kopina amo hura ia bubua diho neganai idia miro. Hahelaga taudia ese idia miro taudia ta ta idia kara henia.
Baibel Henanadaidia Edia Haere:
12:2, 5—Dahaka dainai hahine ta be beibi ia havaraia murinai ia “miro”? Dirava ese natuna havaraia siahuna Ia henia mauri goevadaena havaraia totona. To, ita abia hanai kara dika dainai, goevadae lasi bona kara dika mauri dalana be eda natudia dekenai ita henia hanai. Ia mara hahinena be taravatu ia gwauraia negana lalonai do ia “miro,” bona taravatu ma haida hegeregere, hua gorere bona vesi bubua taravatuna ese idia ia hadibaia taunimanima ginigunadia amo idia abia hanai kara dika idia laloatao totona. (Levitiko 15:16-24; Salamo 51:5; Roma 5:12) Sibona idia hagoevaia taravatuna ese Israela taudia ia durua bena idia abia dae mauri davalaia boubouna idia abia be namo taunimanima edia dika amo idia ia kokia bona hagoevaia totona. Unai dainai Taravatu be edia “naria tauna bamona, ia mai bona Keriso ia ginidae.”—Galatia 3:24.
15:16-18—Unai siri ese ia herevalaia “vesi ia bubua” karana be dahaka? Tau ta ena vesi be hanuaboi ai ia bubua kava karana bona tau ta be ena adavana ida ia mahuta hebou neganai ena vesi ia bubua karana danu ia gwauraia.
Ita Dibaia Gaudia:
11:45. Iehova Dirava be ia helaga bona ia ura hesiai gaukara helagana idia karaia taudia idia helaga danu. Namona be idia helaga bona tauanina bona lauma dalanai idia goeva noho.—2 Korinto 7:1; 1 Petero 1:15, 16.
12:8. Iehova be ogogami taudia ia hamaorodia manu do idia bouboulaia, to dava bada mamoe lasi. Ia ese ogogami taudia ia laloa.
NAMONA BE ITA HELAGA NOHO
Kara dika kokia totona idia karaia mai anina bada boubouna be Kara Dika Ena Davana Karaia Dinana ai idia karaia. Hahelaga taudia bona Levi iduhuna totona boromakau tau idia bouboulaia. Israela ena hahelaga lasi iduhu taudia totona nanigosi idia bouboulaia. Ma nanigosi ta ena kwarana latanai taunimanima edia kara dika idia gwauraia hedinarai murinai, taunimanima idia noho lasi gabuna dekenai idia siaia lao. Idia laloa unai nanigosi rua be kara dika boubouna tamona. Unai ibounai ese idia hamomokania Iesu Keriso do idia bouboulaia bona ia ese kara dika do ia kokia danu.
Vamu ania karana ena taravatu bona ma gau haida ese ita idia hadibaia Iehova ita tomadiho henia neganai, namona be ita helaga. Hahelaga taudia idia helaga noho be namo. Idia karaia aria badadia toi be moale bada bona Havaraia Tauna idia tanikiu henia negana. Danu, Iehova ese iena taunimanima dekenai ena ladana helagana hadikaia karana, Sabati bona Iubili laloa karana, ogogami bona hesiai taudia kara henia dalana dekenai taravatu ia henia. Dirava kamonai henia karana amo do idia abia hahenamodia bona kamonai lasi karana amo do idia abia dika ia gwauraia. Gwauhamata hegeregerena idia henia boubou gaudia be mai edia taravatu, vara guna animal bona karoa 10 amo kahana ta idia henia gaudia “be helaga, Lohiabada ena.”
Baibel Henanadaidia Edia Haere:
16:29—Dahaka dainai Israela taudia be “aniani do idia ania lasi”? Unai idia karaia Kara Dika Ena Davana Karaia Dinana murinai, edia kara dika kokia totona. Unai nega dekenai aniani do idia ania lasi karana be kara dika gwauraia hedinarai karana ida idia gwauraia hebou.
19:27—Inai hahegani “kwarana edia huina be emui taiana kahirakahira do umui utua lasi” eiava adena huina “umui utua lasi” ena anina be dahaka? Unai taravatu Ia henia unai amo Iuda taudia be edia adena huina eiava huina utua dalana amo kaivakuku tomadiho henia taudia edia kara haida do idia tohotohoa lasi. (Ieremia 9:25, 26; 25:23; 49:32) To, Dirava ena hahegani ese Iuda taudia ia koua lasi edia adena huina eiava edia huina idia utua totona.—2 Samuela 19:24.
25:35-37—Israela taudia be atoa kau monina totona idia noinoi be kerere, a? Bema ta be bisinesi karaia totona moni ia noia, moni ia henia tauna be atoa kau monina totona ia noinoi diba. To, ogogami hamaragia totona idia noia monina dekenai atoa kau monina be Taravatu ese ia taravatua. Ia ogogami dekena tauna amo atoa kau monina tahua karana be kerere.—Esodo 22:25.
26:19—Edena bamona “tano be do ia auka, auri bamona”? Medu ia diho lasi dainai, tano ena toana be do ia auka auri bamona.
26:26—‘Hahine 10 ese paraoa do idia gabua amu tamona lalonai’ ena anina be dahaka? Nega momo, hahine ta ta be sibodia edia amu idia gaukaralaia edia paraoa idia gabua totona. To unai hereva ena anina be aniani be bada lasi dainai hahine 10 be idia hegeregere paraoa be amu tamona lalonai idia gabua. Bema idia ese goeva noho taravatuna idia badinaia lasi, idia dekenai unai bamona do ia vara diba.
Ita Dibaia Gaudia:
20:9. Iehova ena matanai inai heheni bona dagedage karana be ta hamasea karana hegeregerena. Unai dainai ia gwau ta be ena tama sina ia hereva dika henia neganai, unai be hegeregere idia ia hamasea. Unai ese ita ia hagoadaia iseda tadikaka ita lalokau henidia totona, ani?—1 Ioane 3:14, 15.
22:32; 24:10-16, 23. Iehova ena ladana do ita hadikaia lasi. To, namona be ena ladana ita hanamoa bona ita guriguri ena ladana ita hahelagaia totona.—Salamo 7:17; Mataio 6:9.
Levitiko Bukana ese Iseda Tomadiho Karana Ia Hanamoa Dalana
Hari, Iehova ena Witnes taudia be Taravatu henunai idia noho lasi. (Galatia 3:23-25) To, Levitiko bukana ese Iehova ena lalohadai gau haida dekenai ia hahedinaraia, unai ese iseda tomadiho karana ia hanamoa diba.
Tiokratik Haroro Sikuli totona, pura ta ta ena Baibel duahiduahi oi karaia neganai, do oi abia dae momokani iseda Dirava ia ura ena hesiai taudia idia helaga. Inai Baibel bukana ese oi do ia hagoadaia Ataiai Momokani Diravana dekenai gau namodia oi henia bona hanaihanai oi helaga noho karana amo ia oi hanamoa totona.
[Picture on page 15]
Taravatu henunai idia henia boubou gaudia ese Iesu ena boubou gauna idia laulaulaia
[Picture on page 16]
Hatubua Lasi Paraoa Ariana be moale bada negana
[Picture on page 17]
Lagani ta ta lalonai idia karaia aria, hegeregere Au Raurau Maragidia Ariana be Iehova tanikiu henia negana