Basileia Haroro Ripoti

Kara Momokani Taudia ese Iehova Idia Hanamoa

TANOBADA hegegemadai, taunimanima idia diba Iehova ena Witnes taudia​​—⁠matamata bona buruka taudia​​—⁠be kara momokani taudia. Mani tano toi dekenai idia vara ekspiriens ita laloa.

Olusola, ena mauri lagani be 17 kekenina, be Nigeria ai ia noho. Nega ta, sikuli amo ruma dekenai ia giroa lou lalonai, tano dekenai paosi ta ia davaria. Unai paosi be hedmasta dekenai ia henia, bona hedmasta ese moni ia duahia neganai, ibounai be naira 6,200 (K133.00 bamona). Hedmasta ese unai paosi ia henia moni ia haboioa tisa tauna dekenai. Tisa be unai kara ia moalelaia dainai, Olusola dekenai naira 1,000 (K21.00 bamona) ia henia, bona Olusola ia hamaoroa unai moni amo ena sikuli davana ia karaia diba. Stiuden ma haida be unai idia kamonai neganai, Olusola idia gwau henia. Pura haida murinai, stiuden ta be tisa ia hadibaia ena moni be ta ese ia henaoa, vadaeni tisa taudia ese stiuden taudia ibounai idia sekea. Tisa be Olusola dekenai ia gwau: “Oi be iniseniai oi gini. Lau diba oi be Iehova ena Witnes kekenina, bona oi henaohenao diba lasi.” Tisa taudia ese Olusola idia gwau henia memero rua dekenai unai moni idia davaria, bona panisi idia abia. Olusola ia gwau: “Lau moale bada badina taunimanima idia gwau lau be Iehova ena Witnes kekenina ta, bona lau henaohenao diba lasi, unai amo Iehova lau hanamoa.”

Marcelo, Argentina amo, be dina ta ruma ia rakatania neganai, ena ruma murina kahanai ia noho iduara kahirakahira ai baege ta ia davaria. Unai baege ia abia vareai ena ruma dekenai, bona ia bona ena adavana ese idia kehoa. Idia hoa bada, badina unai baege lalonai be moni momo, kredit kadi, bona idia sainia seke haida, unai seke ta be peso milioni ta (K885,000) gauna. Pepa ta dekenai, telefon namba idia davaria. Unai baege ena biaguna idia rini henia bona dala idia karaia Marcelo ena gaukara gabuna dekenai do ia mai, bona unai baege mai ena anina ida ia abia totona. Baege ena biaguna ia ginidae neganai, toana be ia lalohekwarahi bada. Marcelo ena gaukara biaguna be baege ena biaguna ia hamaoroa ia lalohekwarahi lasi be namo, badina Marcelo be Iehova ena Witnes tauna ta. Unai baege ia davaria dainai, baege ena biaguna ese peso 20 sibona (K18.00 bamona) be Marcelo dekenai ia henia. Unai harihari gauna maragina dainai, Marcelo ena gaukara biaguna ia badu, badina ia be Marcelo ena kara maoromaoro ia moalelaia bada. Unai ese dala ia kehoa, Marcelo ese ia hahedinaraia ia be Iehova ena Witnes tauna ta bona ia ura nega ibounai kara maoromaoro ia karaia.

Ekspiriens ta be Kyrgyzstan amo ia mai. Rinat, ena mauri lagani be 6, ese edia ruma kahirakahira ia noho hahinena ta ena paosi ia davaria. Unai paosi lalonai be som 1,100 (K74.00 bamona) ia noho. Rinat ese unai moni be paosi ena biaguna dekenai ia abia lao neganai, paosi ena biaguna be moni ia duahia, bena Rinat ena sinana ia hamaoroa som 200 (K15.00 bamona) ia noho lasi. Rinat ia gwau unai moni ia abia lasi. Vadaeni, ibounai idia lao unai moni idia tahua totona, bona paosi idia davaria gabuna dekenai idia davaria. Unai hahine ia hoa. Ia ese Rinat bona ena sinana ia tanikiu henia, badina be moni idia davaria, bona sinana ese Rinat dekenai Keristani dalana ia hadibaia dainai.