Gau Ibounai Lalonai Kara Maoromaoro Oi Hahedinaraia, A?
“Gau maragina ia karaia maoro tauna ese gau badadia do ia karaia maoro.”—LUKA 16:10.
1. Dahaka dainai Iehova ita abidadama henia hanaihanai diba?
DINA ia daekau sisina neganai, au ena laulau be tano dekenai ia hedinarai, to dina ia daekau noho lalonai, dahaka ia vara unai laulau dekenai? Oibe, laulau ena bada bona ena toana ia haidaua loulou! Nega momo taunimanima edia gaukara bona gwauhamata momo be unai au ena laulau bamona, idia haidaua loulou. To, Iehova Dirava be unai bamona lasi, ena be nega bada ia hanaia vadaeni, to ena kara ia haidaua lasi. Hahediba tauna Iamesi ia gwau: “Dirava ese diari ibounai ia karaia, bona nega haida idia ese edia toana idia senisia, nega haida mai edia dibura nega. To Dirava ese iena kara ia senisia lasi, ia diari hanaihanai, bona ia be mai ena dibura sisina lasi.” (Iamesi 1:17) Iehova be ia idau diba lasi bona ia ita abidadama henia diba, gau maragidia dekenai danu. Ia be ‘abidadama Diravana.’—Deuteronomi 32:4.
2. (a) Dahaka dainai iseda kara ita tahua be namo, bema ita be abidadama taudia eiava lasi? (b) Kara maoromaoro karana dekenai, dahaka henanadai idia vara?
2 Dirava ese ia idia tomadiho henia taudia edia abidadama karana be edena bamona ia laloa? Ia ese Davida ena abidadama ia laloa hegeregerena edia abidadama ia laloa danu, idia dekenai ia gwau: “Dirava idia abidadama henia taudia, be mai laloa namo danu do lau abia dae. Idia be lau dekenai do idia noho. Kerere lasi taudia sibona, be lauegu hesiai gaukara do idia karaia.” (Salamo 101:6) Oibe, Iehova be ena hesiai taudia edia abidadama karana dekenai ia moale. Badina namona dainai, aposetolo Paulo ia gwau: “Hesiai tauna ena gaukara lalonai gau badana momokani be inai: Iena biaguna ena ura do ia karaia momokani.” (1 Korinto 4:2) Gau ibounai lalonai kara maoromaoro ita hahedinaraia ena anina be dahaka? Iseda mauri lalonai, edena dala idauidau ai kara maoromaoro ita hahedinaraia be namo? “Kerere lasi” dalanai ita raka ena hahenamo idauidau be dahaka?
Kara Maoromaoro Hahedinaraia Ena Anina
3. Dahaka ese ia hamomokania ita be kara maoromaoro ita hahedinaraia eiava lasi?
3 Heberu 3:5 ia gwau: “Mose ese gaukara namona ia karaia.” Dahaka dainai Mose ese kara maoromaoro ia hahedinaraia? Palai dubuna haginia gaukarana dekenai “Mose ese gau ibounai ia karaia namonamo, Lohiabada ese ia oda henia hegeregerena.” (Esodo 40:16) Ita be Iehova tomadiho henia taudia dainai, mai kamonai ida ia ita hesiai henia karana amo ita hahedinaraia ita be kara maoromaoro taudia. Unai ena anina be, bema hahetoho eiava hedibagani badadia ita davaria, namona be Iehova ita badinaia noho. To, hahetoho badadia hanaia karana sibona amo ita hahedinaraia lasi ita kara maoromaoro. Iesu ia gwau: “Gau maragina ia karaia maoro tauna ese gau badadia do ia karaia maoro, to gau maragina ia karaia kerere tauna ese gau badadia do ia karaia kerere danu.” (Luka 16:10) Namona be gau maragidia danu ita karaia maoro.
4, 5. ‘Gau maragidia’ ita karaia maoro karana ese dahaka ia hahedinaraia?
4 Badina badadia rua dainai, namona be dina ibounai lalonai ‘gau maragidia’ ita karaia maoro. Gau ginigunana be, unai ese Iehova ena lohia siahuna ita laloa dalana do ia hahedinaraia. Mani tau bona hahine ginigunana, Adamu bona Heva ita laloa, Dirava badinaia karana dekenai hahetoho idia davaria. Dirava amo idia abia hahegani be metau lasi. Eden umana lalonai idia noho aniani ibounai idia ania diba, to au tamona sibona—“kara namo bona kara dika hadibaia au”—ena huahua sibona do idia ania lasi. (Genese 2:16, 17) Bema tau bona hahine ginigunana ese unai taravatu maragina idia badinaia, do idia hahedinaraia idia ese Iehova ena lohia siahuna idia abia dae. Dina ta ta lalonai, Iehova ena hakaua herevadia ita badinaia neganai, ita hahedinaraia ita be Iehova ena lohia siahuna ita abia dae.
5 Gau iharuana be, bema iseda kara amo ita hahedinaraia ‘gau maragidia’ ita karaia maoro, anina be iseda mauri lalonai idia vara “gau badadia” eiava hekwakwanai badadia danu do ita karaia maoro. Mani Daniela bona ena Heberu turadia toi, Hananaia, Misaela, bona Asaraia dekenai idia vara sivaraina ita laloa. Lagani 617 B.C.E. ai, idia be Babulonia dekenai igui hesiai taudia bamona idia abia lao. Unai memero matamatadia foa be King Nebukanesa ena ruma dekenai idia hakaudia lao. “King ese unai uhau taudia do idia ania gaudia ia gwauraia. Ia gwau king ese ia ania gaudia be do idia ania, bona king ia inua uaina danu do idia inua. Lagani toi lalonai, gaukara dalana do idia hadibadia, unai murinai king ena gaukara do idia karaia.”—Daniela 1:3-5.
6. Babulonia ena king ena ruma dekenai, Daniela bona ena Heberu turadia toi ese dahaka hahetoho idia davaria?
6 To unai Heberu memero foa be Babulonia ena King ese ia henia aniani idia ania diba lasi. King ese ia henia aniani be Mose ena Taravatu ese ia taravatua. (Deuteronomi 14:3-20) Idia hamasea animal edia rara be dala maoronai idia bubua lasi bona unai bamona vamu ania karana ese Dirava ena Taravatu ia utua. (Deuteronomi 12:23-25) Bona Babulonia taudia edia kastom hegeregerena, unai aniani be reana kaivakuku dekenai idia henia guna, gabeai tomadiho aniani bamona idia ania.
7. Daniela bona ena turadia toi edia kamonai karana amo dahaka idia hahedinaraia?
7 King ena ruma bese taudia ese aniani taravatudia idia atoa lasi, badina idia dekenai unai be gau badana lasi. To, Daniela bona ena turadia ese edia lalona idia hadaia vadaeni, Dirava ese Israela taudia dekenai ia henia Taravatu ese ia gwauraia dika aniani do idia ania lasi. Unai kara dainai, Dirava dekenai edia abidadama idia hahedinaraia be gau badana. Unai dainai uma aniani bona ranu totona King idia noia, bona idia dekenai ia henia. (Daniela 1:9-14) Hari taunimanima haida dekenai, unai memero foa ese idia karaia karana be anina lasi. To, Dirava idia kamonai henia karana amo idia hahedinaraia, Iehova ena lohia siahuna ena hepapahuahu lalonai idia be edena kahanai idia gini.
8. (a) Heberu memero toi be Dirava badinaia karana dekenai, dahaka hahetoho badana idia davaria? (b) Unai hahetoho amo dahaka ia vara, bona unai ese dahaka ia hahedinaraia?
8 Toana be Daniela bona ena turadia toi dekenai ia vara gauna be gau badana lasi, to unai ese idia ia hahegaegaea gabeai ia vara hahetoho badana idia haheaukalaia totona. Baibel bukana Daniela karoa 3 oi kehoa, bona Heberu memero toi edia sivarai oi duahia. Unuseniai, King Nebukanesa ia gwau do idia mase badina ia haginia golo kaivakukuna idia tomadiho henia lasi. King vairanai idia hakaudia lao neganai, mai lalogoada ida idia gwau: “Bema unai bamona oi karaia neganai, aiemai Dirava ese inai lahi siahu herea dekena amo ia hamauria diba ai, bona king e, oiemu imana dekena amo do ia hamauria ai. To bema lasi, king e, inai do oi diba namo, oiemu dirava bona inai golo kaivakukuna oi haginia gauna, be do ai tomadiho henia lasi.” (Daniela 3:17, 18) Iehova ese ia hamauridia, a? Lahi lalonai Heberu memero toi idia negea taudia be idia mase, to unai memero be lahi amo idia raka-lasi—lahi ese idia ia gabua lasi! Abidadama idia hahedinaraia vadaeni dainai, unai ese idia ia hahegaegaea hahetoho badana ai kara maoromaoro idia hahedinaraia totona. Unai ese ia hahedinaraia ita danu be gau maragidia ita karaia maoro be gau badana, ani?
“Kohu Dikadia” be Dala Maoronai Gaukaralaia
9. Luka 16:10 ena badina siridia dekenai, Iesu ese dahaka hereva ia gwauraia?
9 Iesu ese inai hakaua herevana, gau maragina ia karaia maoro tauna ese gau badadia danu ia karaia maoro, ia do gwauraia lasi neganai, ena kamonai taudia dekenai, ia gwau: “Emui moni bona kohu dikadia dekena amo taunimanima do umui durua, bona idia danu do umui turana karaia, vadaeni emui kohu idia ore neganai, Dirava ena noho hanaihanai rumana dekenai umui do idia abia vareai.” Unai murinai, ia ese gau maragidia karaia maoro herevana ia gwauraia. Bena Iesu ma ia gwau: “Bema inai tanobada ena kohu umui naria namonamo lasi neganai, daika ese mauri ena kohu momokani do ia henia umui dekenai? . . . Hesiai tauna ta ese iena biaguna rua edia hesiai gaukara ia karaia diba lasi. Badina be ta dekenai do ia badu henia, ta dekenai be do ia lalokau henia, o ta dekenai do ia ura henia, ta dekenai be do ia ura henia lasi. Dirava bona kohu danu nega tamona, edia hesiai gaukara do umui karaia diba lasi.”—Luka 16:9-13.
10. “Kohu dikadia” gaukaralaia dalana dekenai, edena bamona ita hahedinaraia gau ibounai lalonai ita kara maoromaoro?
10 Badina siridia ese idia hahedinaraia bamona, Iesu ese Luka 16:10 dekenai ia noho herevana ia gwauraia neganai, ia ese “kohu dikadia” eiava ita dekenai idia noho kohu bona moni gaukaralaia dalana ia herevalaia. Baibel ese idia ia gwauraia “kohu dikadia,” badina kohu—hegeregere moni—be kara dika taudia ese idia biagua. Danu, kohu momo abia urana ese ta ia doria diba kara kereredia ia karaia totona. Iseda kohu ita gaukaralaia namonamo karana amo ita hahedinaraia, ita be gau ibounai ita karaia maoromaoro. Namo lasi iseda kohu ita gaukaralaia ita sibona iseda namo totona, to namona be Basileia ena gaukara habadaia bona ogogami taudia durua totona ita gaukaralaia. Bema unai dala amo ita kara maoromaoro, Iehova Dirava bona Iesu Keriso, “noho hanaihanai” gabuna idia biagua taudia unai, ita tura henidia diba. Unai gabu dekenai ita do idia abia vareai, bona mauri hanaihanai do idia henia, guba ai eiava tanobada ai ita noho totona.
11. Dahaka dainai ruma taudia dekenai ita gwauraia hedinarai, tanobada ibounai Iehova ena Witnes taudia edia gaukara durua totona idia henia kontribusen monina ita abia dae?
11 Danu inai ita laloa, taunimanima dekenai Basileia ena sivarai ita harorolaia bona idia dekenai Baibel eiava Baibel idia herevalaia bukadia ita henia, bona tanobada ibounai iseda gaukara durua totona taunimanima amo kontribusen monina ita abia dae dalana ita gwauraia neganai, idia dekenai dahaka dala ita kehoa? Dala ita kehoa idia ese edia kohu idia gaukaralaia namonamo totona, ani? Ena be Iesu ese guna Luka 16:10 ai ia gwauraia herevana be kohu gaukaralaia dalana ia herevalaia, to unuseniai ia noho hakaua herevana be iseda mauri ena kahana haida lalonai ita badinaia diba danu.
Kara Momokani be mai Anina Bada
12, 13. Iseda mauri lalonai, edena dala idauidau ai kara momokani ita hahedinaraia diba?
12 Aposetolo Paulo ia gwau: “Ai laloa aiemai kudouna ena laloa be maoromaoro, Dirava ena vairanai. Bona ai ura be nega ibounai kara maoromaoro [“kara momokani,” NW ] do ai karaia.” (Heberu 13:18) Gau ibounai dekenai ita kara momokani, anina be moni gaukaralaia dalana dekenai danu. Mai momokani ida iseda abiatorehai bona takisi moni ita henia haraga. Dahaka dainai? Unai ita karaia badina iseda lalomamina dainai, Dirava ita lalokau henia, bona ena hadibaia herevadia ita badinaia. (Roma 13:5, 6) Bema gau ta ita davaria bona unai gau be iseda lasi, dahaka ita karaia be namo? Namona be ena biaguna maorona dekenai ita henia lou. Bona unai bamona ita karaia ena badina ita gwauraia neganai, haroro namona ita henia!
13 Mai momokani ida gau ibounai ita karaia maoro ena anina be, gaukara gabuna dekenai ita kara maoro danu. Mai momokani ida iseda gaukara ita karaia neganai, ita hahedinaraia ita be edena bamona Diravana ita tomadiho henia. Lahedo karana amo nega ita “henaoa” lasi. To ita gaukara goada, hegeregere Iehova ena gaukara ita karaia bamona. (Efeso 4:28; Kolose 3:23) Idia gwau Europe ena tano ta dekenai, gaukara taudia toi toi amo ta ta be doketa idia noia idia totona gorere revareva ta ia torea, unai amo doketa ese gwaumaoro ia henia gaukara dekenai idia mai lasi totona, to nega momo idia koikoi. Dirava ena hesiai taudia momokanidia be ekskius idia karaia lasi edia gaukara idia reaia totona. Nega haida, Iehova ena Witnes taudia edia gaukara biagudia ese edia kara momokani bona edia gaukara goada karana idia itaia dainai, dagi namona idia henia.—Aonega Herevadia 10:4.
Mai Kamonai ida Keristani Hesiai Gaukara Karaia
14, 15. Edena dala haida amo ita hahedinaraia, mai kamonai ida iseda hesiai gaukara ita karaia diba?
14 Dirava ese ita dekenai ia henia hesiai gaukara be edena bamona mai kamonai ida ita karaia diba? Baibel ia gwau: “Namona be Dirava do ita hanamoa, Iesu ena ladana dainai. Bona inai hanamoa Dirava dekenai do ita henia nega ibounai, boubou gauna bamona. Oibe, ita ese iseda uduna bibina Iesu dekenai do ita henia, bona ia do ita gwauraia hedinarai, ia be Lohiabada.” (Heberu 13:15) Mai kamonai ida hesiai gaukara ita karaia dalana badana be, ita karaia hanaihanai. Badina ta dainai hua ta lalonai Iehova bona ena ura ita harorolaia lasi, a? Haroro hanaihanai karana ese ita ia durua iseda haroro daladia ita hanamoa bona anina ita havaraia totona.
15 Mai kamonai ida haroro gaukara ita karaia dalana ta be, Gima Kohorona bona Iseda Basileia Gaukarana lalonai idia noho heduru herevadia ita badinaia. Unai heduru herevadia eiava dala namodia ma haida ita hegaegaelaia bona gaukaralaia neganai, iseda hesiai gaukara lalonai anina namona do ita havaraia, ani? Basileia sivaraina ia kamonai tauna ta ita davaria neganai, unai kamonai tauna ita vadivadi henia haraga, a? Bona kamonai taudia ida Baibel stadi ita hamatamaia neganai, be edena bamona? Edia stadi ita karaia hanaihanai, a? Bema mai kamonai ida iseda hesiai gaukara ita karaia, anina be ita bona ita idia kamonai henia taudia ese mauri do idia davaria.—1 Timoteo 4:15, 16.
Tanobada amo Gini Siri Noho
16, 17. Edena dala idauidau amo ita hahedinaraia ita be tanobada amo ita gini siri?
16 Iesu ese guriguri ta lalonai ena murinai idia raka taudia ia herevalaia neganai, ia gwau: “Oiemu hereva lau henia vadaeni idia dekenai, bona tanobada ese ia badu henia vadaeni idia dekenai, badina idia be tanobada ena lasi, lau hegeregerena, lau be tanobada ena lasi. Lau noinoi lasi tanobada dekena amo idia oi kokia totona, to lau noinoi Tau Dikana dekena amo idia do oi hamauria. Idia be tanobada ena lasi, lau hegeregerena, lau be tanobada ena lasi.” (Ioane 17:14-16) Ena be iseda lalona ita hadaia vadaeni gau badadia, hegeregere tanobada amo ita gini siri, tomadiho holide, kastom karadia, bona matabodaga karana ita dadaraia momokani, to gau maragidia dekenai be edena bamona? Ena be reana ita diba lasi, to tanobada ena kara idauidau ese iseda lalona idia veria, a? Bema ita naria namonamo lasi, hemataurai lasi dalanai iseda dabua ita karaia matamaia diba! Namona be mai hemataurai bona laloa maoromaoro ida iseda tauanina ena toana bona dabua ita karaia, unai amo kamonai karana ita hahedinaraia. (1 Timoteo 2:9, 10) Oibe, ‘ita ura lasi taunimanima idia gwau iseda gaukara ia dika. Unai dainai ita ese taunimanima hadikaia kara ta ita karaia lasi, lasi momokani! To iseda kara ibounai dekena amo ita hahedinaraia ita be Dirava ena hesiai taudia.’—2 Korinto 6:3, 4.
17 Ita ura Iehova ita matauraia dainai, iseda kongrigeisen heboudia dekenai ita lao neganai, hemataurai dalanai iseda dabua ita karaia. Iseda hebouhebou badadia bona maragidia dekenai, unai bamona kara ita hahedinaraia danu. Gau badana be iseda dabua ena toana ia namo bona ia goeva. Unai amo ita idia itaia taudia dekenai haroro namona ita henia. Aneru ese iseda gaukara idia itaia danu, Paulo bona ena Keristani bamodia edia gaukara idia itaia bamona. (1 Korinto 4:9) Oibe, namona be nega ibounai mai hemataurai ida iseda dabua ita karaia. Ena be taunimanima haida idia laloa dabua abia hidi karana be gau badana lasi, to Dirava dekenai ia be gau badana, unai dainai hanaihanai iseda dabua ita abia hidi namonamo.
Gau Ibounai Lalonai Kara Maoromaoro Hahedinaraia Ena Hahenamo
18, 19. Bema iseda kara ibounai lalonai kara maoromaoro ita hahedinaraia, dahaka hahenamo do ita abia?
18 Baibel ia gwau Keristani taudia be ‘Dirava ena hesiai taudia namodia, bona iena hariharibada idauidau idia hahedinaraia noho.’ Unai dainai, idia be Dirava ena goada dekenai idia tabekau. (1 Petero 4:10, 11; NW ) Danu, ita be hesiai taudia dainai, ita abia gaudia haida be iseda lasi, gaudia be inai: Dirava ena hariharibada, bona Keristani hesiai gaukarana. Dirava ese ia henia siahu dekenai ita tabekau karana amo ita hamomokania ita be hesiai taudia namodia. (2 Korinto 4:7) Unai hadibaia karana namona ese ita ia durua, vaira negana ai hahetoho idauidau ita haheaukalaia totona!
19 Salamo torea tauna be ane amo, ia gwau: “Lohiabada dekenai umui abidadama henia taudia ibounai e, Lohiabada do umui lalokau henia. Lohiabada ese abidadama taudia ia gimaia noho.” (Salamo 31:23) Namona be iseda lalona ita hadaia iseda kara ibounai lalonai ita kara maoromaoro totona, ita diba momokani Iehova be “taunimanima ibounai edia Hamauria Tauna, to ia be abidadama taudia edia Hamauria Tauna momokani.”—1 Timoteo 4:10.
Oi Laloatao, A?
• Dahaka dainai ‘gau maragidia ita karaia maoro’ be namo?
• Edena dala ai kara maoromaoro ita hahedinaraia diba
kara momokani dekenai?
iseda hesiai gaukara dekenai?
tanobada amo gini siri karana dekenai?
[Pictures on page 12]
Gau maragidia ita karaia maoro; gau badadia danu do ita karaia maoro
[Picture on page 15]
Gau ibounai dekenai do oi kara momokani
[Picture on page 15]
Kamonai karana ita hahedinaraia dalana namona be, haroro gaukara totona ita hegaegae namonamo
[Picture on page 16]
Mai hemataurai ida emu tauanina ena toana bona dabua oi karaia