Edena Negai Ita Badu Henia Tauna Dekenai Kara ta Ita Karaia?

HADIBAIA TAUNA 7:9 ia gwau: “Bema badu be emu lalona dekenai oi dogoatao noho, inai be kavakava taudia edia kara.” Unai siri ese ia hahedinaraia ta ese ita ia habadua neganai, namo lasi ita badu haraga, to dika ita gwauatao.

Vadaeni, Hadibaia Tauna 7:9 ena anina be dahaka? Bema ta ena hereva eiava kara dainai ita badu, herevana iena kerere be bada eiava hanaihanai ita ia habadua, to ena dika ita gwauatao sibona be namo, a? Bema iseda hereva eiava kara amo ma ta ita hahisia, namona be unai ita laloaboio, badina ita diba unai tauna be ia badu kava bona iseda dika ia gwauatao be namo, a? Lasi, Hadibaia Tauna 7:9 ena anina be unai lasi.

Iehova Dirava ena kara korikori be lalokau, hebogahisi, dika ia gwauatao, bona haheauka. To, Baibel ese ia hahedinaraia, nega momo Dirava be ta ena hereva eiava kara dekenai ia badu danu. Bema ta be kerere badana ta ia karaia, vadaeni Ia ese ia hahemaoro henia. Haheitalai haida mani ita laloa.

Iehova Idia Habadua

King Taudia Ginigunana 15:30 be Ieroboama ena kerere ia herevalaia. Ia ese “Dirava ia habadua. Ieroboama ese kara dika bada ia karaia, bona ia ese Israela taudia ia hakererea dainai, idia danu kara dika bada idia karaia.” Sivarai Iharuana 28:25 ese Iuda ena King Ahasa be inai bamona ia herevalaia: “Ataiai idia noho tomadiho gabudia ia karaia, unuseni muramura mai bonana do idia gabua, dirava idaudia do idia hanamoa totona. Inai kara dekena amo ia ese Lohiabada, iena sene taudia edia Dirava, ia habadua.” Haheitalai ma ta be Gunalaia Taudia 2:​11-14 dekenai: “Israela taudia ese Lohiabada ena vairanai kara dika idia karaia, bona . . .  Bala idia tomadiho henia. . . . Lohiabada idia habadua. . . . Unai dainai Lohiabada ese Israela taudia dekenai ia badu dikadika. Ia ese dadidadi taudia ia koua lasi, vadaeni idia ese Israela taudia idia heatu henia.”

Danu, Iehova be kara ma haida ia moalelaia lasi, bona unai kara idia karaia taudia edia davana be mase. Hegeregere, Esodo 22:​18-20 ia gwau: “Meamea hahine be do ia mauri lasi, do umui hamasea. Taunimanima lasi, to ubua gauna ta ia sihari henia tau o hahine be do umui alaia mase. Daika tauna ese boubou gauna ta ia karaia, Lohiabada totona lasi, to ma dirava ta dekenai, be do umui kota henia, ia mase totona.”

Israela taudia be edia kara amo Iehova idia habadua loulou bona idia helalo-kerehai momokani lasi neganai, Iehova ese edia kerere ia gwauatao lou lasi. Bema idia helalo-kerehai lasi bona idia kara dika loulou bona Iehova idia badinaia lasi, vadaeni Dirava ese idia ia panisia. Hegeregere, lagani 607 B.C.E. ai, Babulonia taudia be Israela taudia idia tuari henia, bona ma lagani 70 C.E. ai, Roma taudia ese Israela taudia idia tuari henia.

Momokani, Iehova be taunimanima edia hereva bona kara dikadia ia badulaia, bona idia helalo-kerehai lasi taudia ia hamasedia. To, anina be Hadibaia Tauna 7:9 ena hereva hegeregerena, Iehova be kavakava tauna badina ia badu, a? Lasi vaitani. Ia be mai ena maoro kara dika badadia idia karaia taudia dekenai ia badu, bona hanaihanai iena hahemaoro karana dekenai ia kerere lasi. Baibel ese Iehova be inai bamona ia herevalaia: “Iena gaukara be namo momokani. Iena dala ibounai be maoro, bona iena kota be momokani. Ia be abidadama ena Diravana, ia kara dika lasi. Ia be momokani bona maoromaoro.”​​—⁠Deuteronomi 32:⁠4.

Kerere Badadia

Dirava ese Israela taudia dekenai ia henia Taravatuna hegeregerena, kerere badadia idia karaia taudia be davana dikana idia abia. Hegeregere, bema henaoa tauna ta be hanuaboi ai ruma ta lalonai ia vareai bena ruma tauna ese ia alaia mase, ruma tauna be do ia kerere lasi. Bona davana dikana do ia abia lasi. Unai dainai, Taravatu ia gwau: “Bema henaoa tauna be ruma ia makohia noho hanuaboi nega lalonai umui davaria, vadaeni umui alaia mase, [ruma tauna] be kerere lasi.”​​—⁠Esodo 22:⁠2.

Bema tau ta ese hahine ta ia reipia, unai hahine be mai ena maoro kara ta ia karaia totona, badina Dirava vairanai reipi be kara dika rohorohona. Mose ena Taravatu ia gwau hahine ia reipia tauna be do ia mase, “tau ta ia toreisi, iena badibadinai tauna ia alaia mase bamona.” (Deuteronomi 22:​25, 26) Ena be unai Taravatu henunai ita noho lasi, to unai amo ita laloparara Iehova dekenai reipi be kara dika rohorohona.

Iseda nega ai, reipi be kerere badana danu, bona ta be unai kara dainai dibura rumana ia lao diba. Idia reipia hahine be mai ena maoro pulisi dekenai unai kara ia ripotilaia totona. Unai dala amo pulisi ese kerere tauna idia panisia diba. To, bema tau ta be kekeni maragina ta ia reipia, namona be kekeni ena tama sina ese pulisi dekenai unai kara idia ripotilaia.

Kerere Maragidia

To, kerere ma haida be maragi bona siahu taudia dekenai ita ripotilaia be anina lasi. Unai dainai, ita ura lasi ma haida edia kerere maragidia dainai ita lalohisihisi haraga, to edia dika ita gwauatao be namo. Vadaeni, nega hida? Petero ese Iesu ia nanadaia: “Lohiabada e, lauegu tadikakana do ia hadikaia lau dekenai, bona iena dika do lau gwauatao ela bona nega hida? Nega 7, o?” Iesu ia gwau: “Umui lau hamaoroa, nega 7 sibona lasi, to nega 70 x 7.”​​—⁠Mataio 18:​21, 22.

To, Keristani kara namodia ita hahedinaraia noho be namo, unai amo ma haida edia lalona do ita hahisia lasi. Hegeregere, nega haida oi ese ma haida oi kara auka henidia, a? Unai bamona kara ese idia ia hahisia diba. Namo lasi oi gwau unai tauna be ia badu kava bona emu dika ia gwauatao. Lasi, namona be oi diba, emu kerere dainai unai tauna ia lalohisihisi. Namona be oi hekwarahi emu kara bona hereva oi biagua namonamo guna, vadaeni ma haida do oi hahisia lasi. Bona oi hekwarahi dainai, unai kara do oi hamaragia. Baibel ese ita ia hadibaia: “Ia hereva haraga tauna ena hereva, be tuari kaia ia gwadaia noho bamona, to aonega tauna ena hereva ese, taunimanima idia hamauria diba.” (Aonega Herevadia 12:18) Bema iseda kara bona hereva ita naria namonamo lasi dainai ma haida ita hahisia, sori herevana ita gwauraia ese unai hekwakwanai ia hamaoromaoroa diba.

Baibel ese ia hahedinaraia ‘maino daladia ita tahua, bona ita ta ta ese iseda bamona ta ta edia abidadama do ita hagoadaia’ be namo. (Roma 14:19) Mai manau bona dala namona ai ita hereva neganai, ita be inai aonega hereva ita badinaia: “Hereva maorona gwauraia namonamo karana, be golo herahera siliva bosea latanai bamona.” (Aonega Herevadia 25:11) Unai ese hemami namona ia havaraia! Hereva manada karana ese ma haida edia kara eiava lalohadai ia haidaua diba: “Hereva manada ese, lohia tauna ena lalona ia veria diba.”​​—⁠Aonega Herevadia 25:⁠15.

Unai dainai, Baibel ese ita ia sisiba henia: “Nega ibounai mai laloa namona bona mai gado namo do umui hereva. Bona taunimanima ta ta dekenai do umui haere henia mai maoromaoro danu.” (Kolose 4:⁠6) “Mai gado namo” ida ma haida dekenai ita hereva neganai, idia do ita hahisia lasi. Keristani taudia be edia hereva bona kara idia naria namonamo, bona idia hekwarahi inai Baibel sisibana idia badinaia: “Maino do ia tahua, bona maino ena dala do ia badinaia noho.”​​—⁠1 Petero 3:⁠11.

Unai dainai, Hadibaia Tauna 7:9 ena anina be inai: Ma haida ese idia karaia kerere maragidia dainai ita badu be anina lasi. Unai bamona hekwakwanai do idia vara badina ita be goevadae lasi, eiava ta be mai ena ura ida lalohisihisi karana ta do ia karaia to reana ia be kerere badana lasi. To bema ta be kara dika badana ia karaia bena ma ta ia hahisia bada, vadaeni ia lalohisihisi tauna be dala maorona ai kara ta ia karaia diba.​​—⁠Mataio 18:​15-17.

[Picture on page 4]

Lagani 70 C.E. ai, Iehova ese idia helalo-kerehai lasi Israela taudia ia durua lasi dainai, Roma taudia ese idia tuari henidia

[Picture on page 5]

‘Hereva maorona gwauraia namonamo karana be golo herahera bamona’