Dirava Ena Kudouna Ia Hamoalea Kontribusen

INAI sivarai be dika momokani. Kwini Atalaia ia kara koikoi bona king ena bese taudia ibounai ia alaia, unai dala amo ia sibona be Iuda taudia edia kwini ai ia halaoa diba. Ia laloa idia ibounai be ia hamasea, to lasi. Iehova ia lalokau henia bona iena Taravatu ia badinaia hahinena ta, Iehoseba, ese beibi merona Ioasa ia hunia. Iehoseba bona Hahelaga Tauna Badana Iehoiada ese lagani siks lalonai Ioasa be dubu helaga lalonai idia naria.​​—⁠2 King Taudia 11:​1-3.

Ioasa be mauri lagani seven ia abia neganai, Hahelaga Tauna Badana Iehoiada be palani ia karaia kwini Atalaia be ena dagi amo ia kokia totona. Ia ese Ioasa be ena hunia gabuna amo murimuri dekenai ia abia lao bona king ai ia halaoa. Vadaeni gimaia taudia ese unai kwini dikana Atalaia, be dubu ena murimuri ai idia abia lao bona idia hamasea, unai kara dainai taunimanima ibounai idia moale. Unai kara amo Iehoiada bona Iehoseba be Iuda dekenai tomadiho momokanina haginia lou gaukarana idia durua. To mai anina bada gauna be, idia ese Davida ena iduhu amo Mesia do ia hedinarai dalana idia durua.​​—⁠2 King Taudia 11:​4-​21.

Idia abia hidi king matamatana ese kara ta ia karaia danu be namo, Dirava ena lalona ia hamoalea totona. Iehova ena ruma idia hanamoa be namo. Atalaia be ia ura bada Iuda ia lohiaia dainai, dubu helaga ia naria lasi, to unai sibona lasi, kohu danu ia henaoa. Unai dainai Ioasa be ia ura dubu helaga ia hanamoa lou. Hahelaga taudia ia hagania moni do idia haboua bona Iehova ena ruma do idia hanamoa lou. Ia gwau: “Harihari gaudia helagadia moni ibounai, Lohiabada ena Dubu Helaga dekenai taunimanima idia mailaia gaudia, boubou totona idia henia moni, bona ura namona dainai taunimanima idia henia moni, be do umui haboua. Hahelagaia taudia ta ta ese edia hesiai gaukara dainai taunimanima haida ese idia henidia moni, be do idia haboua namonamo, bona unai moni be Dubu ia dika gabudia hanamoa totona do idia gaukaralaia.”​​—⁠2 King Taudia 12:​4, 5.

Taunimanima be mai edia ura ida moni idia henia. To, hahelaga taudia be mai edia kudouna ibounai ida unai hanamoa lou gaukarana idia durua lasi. Unai dainai, king be hahegani ia henia, taunimanima ese idia henia moni ibounai be maua ta dekenai do idia atoa. Iehoiada dekenai unai gaukara ia henia, bona unai sivarai ia gwau: “Hahelagaia tauna Iehoiada ese maua ta ia abia, bona matu ta be maua ena koua gauna lalonai ia budua. Vadaeni Iehoiada ese boubou patana ena idiba kahana dekenai maua ia atoa, Dubu Helaga ena raka vareai gabuna dekenai. Vadaeni Dubu ena iduara idia naria hahelagaia taudia ese unai Dubu dekenai ia vareai moni ibounai be unai maua lalonai idia udaia, taunimanima idia henia moni be unai. Bema idia itaia, moni momo be maua lalonai ia noho neganai, king ena toretore tauna, bona Hahelagaia Tauna Badana idia mai, bona idia ruaosi ese Lohiabada ena Dubu Helaga dekenai idia atoa moni idia duahia, bona puse edia lalonai idia udaia. Moni ena bada idia diba namonamo neganai, idia ese Dubu Helaga hanamoa lou gaukara naria taudia dekenai idia henia. Inai moni dekenai, Lohiabada ena Dubu Helaga dekenai idia gaukara kamuta bona ruma haginia taudia edia gaukara davana idia henia, bona nadi gaukaralaia bona utua taudia edia davana danu. Ma idia ese au bona nadi namodia idia hoia, Dubu hanamoa totona. Bona Dubu Helaga hanamoa lou gaukara ma haida edia davana be unai moni dekena amo idia karaia.”​​—⁠2 King Taudia 12:​9-​12.

Taunimanima be mai moale ida moni idia henia. Iehova ena dubu helaga idia hanamoa lou, unai amo mai hemataurai ida Iehova do idia tomadiho henia. Idia abia moni ibounai be idia gaukaralaia namonamo. King Ioasa ese dala ia karaia!

Hari inai negai, Iehova ena orea taudia be taunimanima edia heduru monina idia gaukaralaia namonamo, Iehova tomadiho henia karana idia durua totona. Keristani taudia momokanidia, idaunegai Israela taudia bamona, be mai edia kudouna ibounai ida kontribusen idia henia. Reana oi be hesiai laganina gunana ai Basileia ena gaukara habadaia totona kontribusen idia henia taudia ta. Do ita itaia edena dala idauidau ai oi henia kontribusen idia gaukaralaia.

Baibel Hadibaia Gaukarana Durua

Iesu Keriso be ena hahediba taudia ia hagania ‘bese ibounai be diba tahua taudia do idia halaoa.’ (Mataio 28:19) Iehova ena Witnes taudia be unai hereva idia badinaia dainai, Baibel ena hereva be tano 235 ai idia harorolaia bona hahedibalaia. Idia ese Baibel idia herevalaia buka bona magasin be gado 413 ai idia karaia bona hariharilaia.

Keristani tauna ese do ia henia diba gauna hereadaena be ena nega, unai amo taunimanima momo do ia durua Dirava bona ena ura do idia dibaia totona. Iehova ena Witnes taudia be sibona edia nega bona goada idia henia edia dekena taudia idia durua totona. Idia be mai edia ura ida moni idia henia, bona heduru daladia idauidau ai Iehova ena ladana bona iena ura be tanobada hegegemadai ai idia harorolaia. Ma haida idia durua Iehova idia dibaia dainai, Ia ese edia hekwarahi do ia hanamoa. (Aonega Herevadia 19:17) Unai bamona henia karana be Iehova ena kudouna ia hamoalea!​​—⁠Heberu 13:​15, 16.

KARAIA GAUDIA

Tanobada hegegemadai, inai buka bona magasin be stadi bona harihari totona idia printaia:

• Buka: 47,490,247

• Buklet: 174,689,202

• Kalenda: 5,405,955

• Magasin: 1,179,266,348

• Pepapepa: 440,995,740

• Vidio: 3,168,611

Printaia gaukarana be Africa, North, Central bona South America, Asia, Europe, bona Pacific ena motumotu gabudiai ai idia karaia​—⁠tano iboudiai be 19.

“Lauegu ladana be Katelyn May. Egu mauri lagani be 8. Lau dekenai be 28 dola [K80.92] ia noho, bona lau ura inai moni umui abia printa masini ena davana karaia totona. Emui taihu maragina, Katelyn.”

“Emai ruma bese ena hebou dekenai printa masini matamatadia ai herevalaia. Emai natudia, edia mauri lagani be 11 bona 9, idia ura idia haboua monina amo unai idia durua. Mai moale ida emai natudia bona emai kontribusen be ai siaia inai.”

KONSTRAKSEN GAUKARA

Henunai be Iehova ena Witnes taudia edia gaukara durua totona idia haginia rumadia:

• Ogogami tanodia dekenai idia haginia Kingdom Hall: 2,180

• Assembly Hall: 15

• Brens opesi: 10

• Ful-taim hesiai gaukara idia karaia intenesenel volantia taudia: 2,342

“Hari wikeni be emai hebou ginigunana ai abia Kingdom Hall matamatana ai. Ai moale badina gabu maorona ai iseda Tamana, Iehova Dirava ai hanamoa. Iehova bona umui ai tanikiu henia badina ai umui laloa bada dainai Kingdom Hall momo umui haginia. Oibe, emai noho gabuna dekenai emai Kingdom Hall be heduru gauna badana.”​​—⁠Chile.

“Tadikaka bona taihu be Iehova ena orea amo ia mai heduruna idia laloa bada. Unai nega amo ema bona hari, konstraksen grup ida ai abia nega namona ai do herevalaia noho.”​​—⁠Moldova.

“Vanegai sibona lau bona egu adavana be emai headava laganina namba 35 ai laloatao. Ai ura sibona ta ta dekenai harihari gaudia ai henia toho neganai, ai laloa namona be Iehova bona iena orea dekenai gau ta ai henia, bema Iehova bona iena orea be lasi reana emai headava do ai moalelaia lasi. Unai dainai, ai ura inai moni ai siaia ogogami tanona ta dekenai Kingdom Hall haginia gaukarana ia durua totona.”

“Vanegai sibona lau be moni haida lau abia, bona egu ura gauda bona mauri dekenai mai anina bada gaudia be momo lasi dainai, inai heduru monina lau siaia, unai amo gabu ma haida dekenai Kingdom Hall umui haginia diba.”

DIKA IDIA VARA NEGANAI HEDURU HENIA

Inai nega dokona ai nega dikadia be idia vara kava. Iehova ena Witnes taudia momo ese kontribusen idia henia, unai amo dika idia vara gabudia ai idia noho tadikaka bona taihu idia durua diba. Namona be oi laloatao, dika idia vara neganai, oi henia kontribusen be tanobada ibounai gaukarana ia durua danu. Henunai idia noho gabudia haida be dika idia vara neganai, Iehova ena Witnes taudia ese idia durudia:

• Africa

• Asia

• Caribbean ena gabu

• Pacific Motumotudia

“Lau bona egu adavana ai ura umui ai tanikiu henia bada, badina be lai badana ese ia hadikaia gabudia dekenai emui heduru gaudia umui siaia. Bona emai ruma ena guhi matamatana ai atoa diba. Ai umui durua haraga dainai ai moale bada.”

“Lauegu ladana be Connor, bona egu mauri lagani be 11. Lau be sunami ese ia hadikaia gaudia lau itaia neganai, lau ura bada durua lau henia. Lau ura inai heduru monina ese egu tadikaka bona taihu do ia durua.”

SPESEL FUL-TAIM HESIAI TAUDIA

Keristani taudia momo be ful-taim haroro gaukara idia karaia eiava Betele dekenai idia gaukara. Ful-taim hesiai taudia haida be kontribusen monina amo heduru idia abia. Idia haida be:

• Misinari taudia: 2,635

• Loaloa naria taudia: 5,325

• Betele taudia: 20,092

“Hari Betele dekenai lau gaukara diba lasi dainai, [lagani faiv merona] mai ura bada ida inai kontribusen lau siaia. Lau bada neganai, Betele dekenai do lau lao bona do lau gaukara goada.”

[Box on page 16, 17]

Haida ese Henia Karana Idia Hahedinaraia Daladia

TANOBADA IBOUNAI GAUKARANA DURUA KONTRIBUSEN MONINA

Momo ese edia moni idia atoa hegaegae, maua ta ladana “Tanobada Ibounai Gaukarana Durua Monina​—⁠Mataio 24:14” lalonai do idia udaia totona.

Hua ta ta iboudiai, kongrigeisen ese unai moni be Iehova ena Witnes taudia edia hedikwota Brooklyn, New York dekenai, eiava ena brens opesi ta dekenai idia siaia. Taunimanima idia ura neganai kontribusen monina be International Bible Students Association of Papua New Guinea Inc., P.O. Box 636, Boroko, NCD 111 dekenai idia siaia diba. Mai dava bada herahera gaudia bona dava bada gaudia ma haida idia henia diba danu. Unai kontribusen gaudia ida revareva kwadogina idia siaia be namo, unai gaudia be harihari gaudia idia hahedinaraia totona.

KONTRIBUSEN MONINA MAI TARAVATUNA

Taunimanima ese moni idia henia diba, trust fund ai do ia noho totona, to bema nega ta henia tauna ia dabu bona ia ura ena moni ia abia lou, do idia henia lou. Bema oi ura ma hereva haida oi diba, namona be ai gwauraia vadaeni adres dekenai revareva oi torea.

PALANILAIA HENIA GAUDIA

Kontribusen monina bona kontribusen monina mai taravatuna sibona lasi, to dala ma haida idia noho tanobada hegegemadai Basileia ena gaukara oi durua totona. Idia haida be inai:

Insurens: Bema ta ese life insurance ia hoia o moni be retirement fund ta ai ia atoa, IBSA ena ladana ia torea diba, bena ia mase neganai eiava ia buruka neganai unai moni do idia abia.

Banika Akaun: Ta ena banika ena taravatu hegeregerena, dala ia karaia diba, ia do mauri lalonai IBSA ese ena moni ia gaukaralaia totona, eiava ia mase neganai IBSA ese do ia abia totona.

Share Monina: Ta ese ena share monina be IBSA dekenai harihari gauna bamona ia henia diba.

Tano Bona Ruma: Bema ta be mai ena ruma o tano, ia hoihoilaia diba gauna, IBSA dekenai ia henia diba harihari gauna bamona, eiava do ia noholaia diba ela bona ia mase bena IBSA ese do ia abia. Bema ta ia ura unai bamona ia karaia, namona be iena tano ena brens opesi ia hadibaia guna.

Will Bona Trust Gaudia: Bema ta ena ura be ia mase neganai IBSA ese ena tano, ruma, kohu, o moni do ia abia, loea dekenai ia lao be namo, will pepana, mase murinai kohu haria gwaumaoro pepana, dekenai ena ura do ia torea totona. Eiava bema ena moni be trust fund ai ia noho, ia ese IBSA ena ladana be trust agreement pepana ai ia torea diba, unai moni do idia abia totona. Tano haida ai, bema ta ese ena trust monina be tomadiho oreana ta dekenai ia henia, takisi moni haida do ia henia lasi.

Bema oi ura ataiai ia noho dala ta dekenai ma diba haida oi abia, namona be IBSA dekenai revareva oi siaia. Adres be International Bible Students Association of Papua New Guinea Inc., P.O. Box 636, Boroko, NCD 111. Telefon: 325 3011.

[Picture Credit Line on page 15]

Faithful vidio: Stalin: U.S. Army photo