Duahia Taudia Edia Henanadai
Bema Keristani tauna ta be ipidi eiava kaia idia gaukaralaia gaukarana ta ia abia, ena lalomamina be edena bamona?
Iehova ena Witnes taudia tanobada hegegemadai be Dirava ese ia henia maduna, edia ruma bese do idia naria maduna unai, idia laloa bada. (1 Timoteo 5:8) To, moni gaukara haida be Baibel ena hakaua herevadia idia utua, unai dainai ita dadaraia be namo. Gaukara haida hegeregere, laki gadara idauidau idia karaia gabudia, rara idia abia bona henia gabudia, bona kuku hoihoilaia gabudia dekenai do ita gaukara lasi. (Isaia 65:11; Kara 15:29; 2 Korinto 7:1; Kolose 3:5) Ena be moni gaukara haida be Baibel ese ia taravutua lasi, to oiemu eiava ma haida edia lalomamina idia hadikaia diba.
Bema oi ura oi abia moni gaukarana lalonai ipidi eiava tuari gauna ta do oi gaukaralaia, unai abia hidi be sibona do oi karaia. To, bema oi be pulisi tauna bona nega ta tau ta oi pidia mase, unai mase tauna ena rara davana be oi dekenai. Unai dainai, bema Keristani tauna ta ia ura unai gaukara ia abia hidi, namona be mai guriguri ida inai ia laloa namonamo: Tau ta do ia hamasea eiava lasi abia hidina do ia karaia haraga diba, a? Bona inai oi laloa danu, bema oi be ipidi oi dogoatao bona tau ta oi haberoa eiava oi hamasea, unai tauna ena varavara ese oi idia botaia eiava hamasea diba.
Ta ena abia hidi karana ese ma haida do ia hahekwakwanaia diba. Hegeregere, Keristani tauna ena maduna ginigunana be Dirava ena Basileia ena sivarai namona do ia harorolaia. (Mataio 24:14) Vadaeni, ia hegeregere bema Keristani tauna ta be ma haida dekenai mai maino ida noho daladia ia harorolaia, to ena moni gaukara lalonai ipidi ia gaukaralaia, a? (Roma 12:18) Ena ruma bese lalonai ena natudia bona ma haida be edena bamona? Ruma lalonai ipidi ta ia noho dainai, ruma bese taudia edia mauri ia hadikaia diba, a? Bona danu, ena abia hidi karana ese ma haida do ia hahekwakwanaia diba, a?—Filipi 1:10.
Inai “nega ena dokona” lalonai, taunimanima momo be idia dagedage bona kara dikadia idia karaia. (2 Timoteo 3:1, 3) Keristani tauna ta be unai ia diba dainai, ena moni gaukara lalonai unai bamona taudia ta ia haberoa neganai, ‘ia be kerere lasi,’ a? (1 Timoteo 3:10) Lasi, ia be mai ena kerere. Unai dainai, idia sisiba henia murinai ia be ipidi ia gaukaralaia noho, kongrigeisen taudia edia matanai ia be mai ena kerere. (1 Timoteo 3:2; Tito 1:5, 6) Unai bamona tau ta eiava hahine ta be kongrigeisen lalonai maduna do idia henia lasi.
Iesu ese ena hahediba taudia ia hamaoroa bema idia ese Basileia gaudia idia tahua guna neganai, edia mauri durua gaudia do idia laloa momo lasi. (Mataio 6:25, 33) Bema Iehova ita abidadama henia, “ia ese [ita] do ia durua. Ia ese kara maoromaoro taudia ia durua noho. Idia be do idia moru lasi, lasi momokani.”—Salamo 55:22.