‘Nega Korikori ai Hereva Namona Ita Gwauraia, be Namo Bada!’
IEHOVA ENA WITNES taudia edia hebouhebou ta dekenai, Kim ia hekwarahi ena natuna kekeni ena mauri lagani rua mai kahana ia naria ia helai namonamo totona. Hebouhebou ia ore neganai, ia badinai ia helai Keristani taihu ta be Kim bona ena adavana ia hanamodia, badina hebouhebou ena program ibounai lalonai edia natuna idia hadibaia ia kamonai namonamo totona. Ena be lagani haida idia hanaia vadaeni, Kim dekenai unai hanamoa herevana be mai anina bada, bona hari ia gwau: “Bema hebou dekenai lau hesiku, lau be unai taihu ese ia gwauraia hanamoa herevana lau laloa. Unai taihu ena hanamoa hereva namona ese lau ia hagoadaia emai natuna kekeni ai hadibaia noho totona.” Nega korikorina ai ita gwauraia hereva namona ese ta ena lalona ia hagoadaia diba. Baibel ia gwau: “Nega korikori dekenai, hereva namona ta ia gwauraia, be namo bada!”—Aonega Herevadia 15:23.
Nega haida ita ese ma haida ita hanamoa be auka. Unai ia vara badina haida be ita sibona ese ita karaia diba lasi gaudia ita laloa momo. Keristani tadikaka ta ia gwau: “Lau be hegeregere tano manokana dekenai lau gini bamona. Ma haida lau hanamoa neganai, lau mamia lau be unai tano lalonai lau diho bamona.” Inai kara idauidau hegeregere hemarai, gari ena mamina, bona ta ia laloa ma haida ese ena kara do ia laloa kerere karana ese haida dekenai hanamoa hereva gwauraia karana ia hadikaia diba. Bona ita maragi neganai bema hanamoa hereva ita abia lasi, ia auka ma haida ita hanamoa totona.
To, hanamoa hereva ia henia bona ia abia tauna dekenai ia havaraia namo ita laloa neganai, unai ese ita do ia durua nega maorona ai hanamoa hereva ita gwauraia totona. (Aonega Herevadia 3:27) Hanamoa hereva ese dahaka namo ia havaraia? Mani ena namo haida ita itaia.
Ena Namo
Ma haida dekenai ita gwauraia hereva namona ese lalogoada ia havaraia. Keristani headava hahinena ta, Elaine ia gwau: “Bema taunimanima ese lau idia hanamoa neganai, lau mamia egu lalona ia goada bona idia ese lau idia abia dae.” Ia lalogoada lasi tauna dekenai hanamoa hereva ita gwauraia neganai, ena lalona ita hagoadaia hekwakwanai ia hanaia totona, bena unai amo moale ia davaria diba. Namona be matamata taudia dekenai hanamoa hereva ita gwauraia. Kekeni matamata ta be sibona ena lalohadai kereredia dainai ia lalomanoka bona ia gwau: “Nega ibounai lau hekwarahi Iehova lau hamoalea totona, to herevana dahaka lau karaia lau mamia lau karaia gaudia be anina lasi. Bema ta ese lau ia hanamoa egu lalona ia moale.” Momokani Baibel ena hereva ia gwau: “Hereva maorona gwauraia namonamo karana, be golo herahera siliva bosea latanai bamona.”—Aonega Herevadia 25:11.
Hanamoa herevana ese ta ia durua bona ia hagoadaia diba. Ful-taim hesiai tauna ta ia gwau: “Hanamoa herevadia ese lau idia durua lau gaukara goada bona egu haroro gaukara ia hanamoa.” Sina ta mai ena natuna rua ia itaia ena natudia idia haere bona tadikaka ese idia dekenai hanamoa herevadia idia gwauraia neganai, ena natudia idia ura haere momo idia henia. Oibe, unai ese matamata taudia idia durua diba lauma dalanai idia goada idia lao totona. Namona be ita laloatao ita be ma haida ese idia laloa bada. Inai lalohisihisi amo ia honu tanobadana lalonai ita noho dainai, nega haida ita lalomanoka. Keristani elda tauna ta ia gwau: “Bema lau lalometau neganai, hanamoa herevadia ese egu lalona idia hagoadaia bona idia be egu guriguri ena haere bamona.” Unai hegeregerena, Elaine ia gwau: “Nega haida lau laloa Iehova be haida edia hanamoa herevadia amo lau ia hanamoa.”
Haida ita hanamoa neganai idia mamia idia ita laloa bada. Ma ta dekenai hanamoa hereva ita gwauraia neganai, unai tauna ia mamia ia ita laloa bada bona ita lalokau henia. Unai ese ia hahedinaraia ita be iseda Keristani tadikaka bona taihu ita lalokau henidia bona lalodia bada. Sina ta, ena ladana be Josie, ia gwau: “Egu ruma bese lalonai ai be tomadiho dalanai ai parara dainai, lau gini goada be gau badana. Unai dainai, lauma dalanai idia lo tadikaka bona taihu edia hanamoa hereva ese lau idia hagoadaia bada.” Oibe, ita be “tauanina tamona ena kahana.”—Efeso 4:25.
Ma haida ita hanamoa karana ese ita ia durua edia kara namo ita laloa bada totona. Namona be ma haida edia kara namodia ita laloa bada, to edia kerere ita laloa lasi. Keristani elda tauna ta ia gwau: “Ma haida edia kara namodia ita laloa bada neganai, unai ese ita do ia durua nega ibounai idia dekenai hanamoa hereva ita gwauraia totona.” Ena be ita be mai eda kara dika, to Iehova bona ena Natuna ese ita dekenai hanamoa herevadia idia gwauraia. Unai ese ita ia hagoadaia edia kara ita tohotohoa totona.—Mataio 25:21-23; 1 Korinto 4:5.
Daidia Ita Hanamoa be Namo?
Iehova Dirava be iseda Havaraia Tauna dainai ia ita hanamoa be namo. (Apokalupo 4:11) Ena be Iehova be ita amo hagoadaia hereva ia abia be anina lasi, to iena siahu bada bona hebogahisi-mai-lalokauna dainai, ita hanamoa neganai, ia be ita kahirakahira ia mai bona ita tura henia diba. Iehova ita hanamoa neganai, ita laloparara iseda mauri lalonai ita karaia gaudia ibounai be Iehova ena siahu amo ita karaia bona ita sibona iseda goada amo ita karaia lasi. (Ieremia 9:23, 24) Iehova be dala ia kehoa taunimanima ibounai be mauri hanaihanai do idia abia totona, bona unai kara dainai ita ura ia ita hanamoa. (Apokalupo 21:3, 4) Idaunega King Davida be ‘ane dekena amo Dirava ia hanamoa’ bona ‘ena ladana do ia habadaia bona ia tanikiu henia.’ (Salamo 69:30) Namona be unai bamona ita karaia danu.
Namona be iseda tadikaka bona taihu dekenai hanamoa hereva maorodia ita gwauraia. Bema hanamoa hereva ita gwauraia neganai, ‘ta ta dekenai durua henia daladia do ita laloa noho bona lalokau dekena amo kara namodia do ita karaia.’ (Heberu 10:24) Aposetolo Paulo be unai bamona kara ia haheitalaia namonamo tauna. Roma kongrigeisen ia tore henia bona ia gwau: “Lauegu hereva ginigunana be inai, Iesu Keriso ena ladana dainai Dirava lau hanamoa henia, badina be umui emui abidadama ena sivarai idia gwauraia loaloa tanobada ibounai dekenai.” (Roma 1:8) Aposetolo Ioane ese iena Keristani tadikaka Gaio ia hanamoa, badina ‘ia be hereva momokani ena dala dekenai ia raka noho dainai.’—3 Ioane 1-4.
Hari inai negai, bema ta be Iesu ena kara ia tohotohoa, hebou ena kahana ta ia hegaegaelaia namonamo, eiava hebou ai mai kudouna ibounai ida haere ta ia henia neganai, unai be nega namona ia dekenai hanamoa herevana ita gwauraia be namo. Bema hebou lalonai natuna ta be ia hekwarahi siri ta ia tahua totona, reana ia dekenai hanamoa hereva ita gwauraia danu. Elaine ia gwau: “Iseda kara be idauidau. Dirava ena taunimanima edia kara be idauidau dainai, ta ese gau ta ia karaia neganai, ia dekenai hanamoa hereva ita gwauraia diba.”
Ruma Bese Lalonai
Iseda ruma bese lalonai ita ta ta dekenai hanamoa herevana ita gwauraia diba, a? Ruma bese lalonai tau bona hahine be edia nega, goada bona lalokau idia henia lauma, hemami, bona tauanina dalanai edia ruma bese taudia idia naria totona. Momokani tama sina bona natudia be idia ura idia ta ta huanai hanamoa herevadia idia kamonai. (Efeso 5:33) Hegeregere, Dirava ena Hereva ese hahine namona ena kara ia herevalaia neganai, ia gwau: “Iena natuna ese ia idia tanikiu henia noho, bona iena adavana ese, ia dekenai ia hanamoa henia noho.”—Aonega Herevadia 31:10, 28.
Namona be natudia dekenai hanamoa hereva ita gwauraia danu. Madi, tama sina haida be edia natudia ese idia karaia gaudia sibona idia hamaorodia, to natudia ese hemataurai bona kamonai karadia idia hahedinaraia neganai, hanamoa herevadia idia gwauraia lasi. (Luka 3:22) Tama sina ese natu maragina dekenai hanamoa herevana idia gwauraia neganai, do ia laloa ia idia lalokau henia.
Oibe, nega haida dekenai hanamoa herevana ita gwauraia totona be auka, to unai ita karaia neganai hahenamo momo do ita davaria. Momokani, bema mai iseda ura bada ida ma haida ita hanamoa neganai, moale bada do ita davaria.—Kara 20:35.
Dala Maorona ai Hanamoa Hereva Ita Abia Dae Bona Gwauraia
To, hanamoa herevana abia dae karana ese ma haida dekenai hekwakwanai ia havaraia diba. (Aonega Herevadia 27:21) Hegeregere, ta ia hekokoroku diba bona ia laloa ia ese ma haida ia hereaia. (Aonega Herevadia 16:18) Unai dainai, ita naria namonamo be namo. Namona be aposetolo Paulo ena sisiba ita badinaia: “Umui ta ta ibounai dekenai lau hamaoroa inai: Oi hekokoroku lasi. Oi ese oi sibona oiemu maka do oi diba, bona inai maka do oi hanaia lasi, do oi laloa lasi oi be bada momokani. Umui ibounai emui diba ena maka do umui laloa maoromaoro, Dirava ese umui ta ta dekenai abidadama ia henia hegeregerena.” (Roma 12:3) Unai bamona lalohadai idia abia lasi totona aonega karana be edia diba eiava hairai dainai ita hanamodia lasi. To, namona be edia kara namodia dainai ita hanamodia.
Bema nega korikori ai hanamoa hereva namodia be ma haida dekenai ita gwauraia bona haida edia amo ita abia dae, unai ese ita do ia hagoadaia bada. Ita karaia kara namodia ibounai be Iehova ena goada amo ita karaia, unai dainai ia dekenai hanamoa ibounai ita henia be namo. Hanamoa herevadia ese ita do ia hagoadaia kara namodia ita karaia totona.
Mai iseda lalona ibounai ida ma haida edia kara namodia dainai hanamoa hereva ita gwauraia karana, be ita ibounai ese ma haida dekenai ita henia diba harihari gauna hereadaena. Ita laloa namonamo bena tau ta dekenai hanamoa hereva ita gwauraia neganai, iseda hereva ese unai tauna do ia durua bada.
[Box/Picture on page 10]
Lalona Hagoadaia Revarevana Ta
Keru negana ta ai loaloa naria tauna bona ena adavana be, haroro gaukara murinai edia ruma dekenai idia giroa negana ta ia laloatao. Tadikaka ia gwau: “Egu adavana ia keru bona ia lalohisihisi dainai lau ia hamaoroa ia ura lasi unai gaukara ia karaia. Ia gwau, ia ura gabu tamona dekenai kongrigeisen ta ida ful-taim hesiai gaukara do ai karaia bona sibona emai Baibel stadi ai karaia danu. Unai neganai lau be abia hidi ta lau karaia lasi to egu adavana lau hamaoroa wiki ta murinai ena lalohadai do ai laloa lou. Bema ia ura sekit gaukara ai rakatania, vadaeni ena ura do lau matauraia. Unai dina ai, pos opesi dekenai ai lao neganai, egu adavana totona brens opesi amo revareva ta ai davaria. Ena be emai hesiai gaukara be mai ena hekwarahi, to unai revareva lalonai tadikaka ese egu adavana ena haroro gaukara dekenai ia hekwarahi bona ia haheauka dainai ia idia hanamoa bona idia hagoadaia. Egu adavana be unai hagoadaia hereva namona ese ena lalona ia hagoadaia dainai, hesiai gaukara rakatania lalohadaina ia abia lou lasi. Ena be nega haida hesiai gaukara rakatania lalohadaina lau abia, to egu adavana ese lau ia hagoadaia hesiai gaukara lau karaia noho totona.” Idia ruaosi be kahirakahira lagani 40 lalonai sekit gaukara idia karaia.
[Picture on page 9]
Kongrigeisen lalonai daidia ita hanamoa be namo?
[Picture on page 11]
Natudia be iseda lalokau bona hanamoa herevadia amo goada idia abia