Hanamoa Herevadia ese Ita Ia Hagoadaia
1 Kekeni maragina ia mahuta gwauraia neganai ia tai bona ia gwau: “Hari dina ai, lau be kekeni namona, a?” Unai henanadai dainai ena sinana ia hoa bada. Ena be sinana ia itaia unai dina ai ena natuna kekenina ia hekwarahi kara namo ia hahedinaraia totona, to ia ese hanamoa herevana ta ia gwauraia lasi. Namona be unai kekeni maragina ena tai karana ese ita ia hadibaia, ita ibounai—matamata bona buruka taudia—ese hanamoa herevadia ita abia be mai anina bada. Ita kahirakahira dekenai idia noho taudia edia kara namodia dainai ita hanamodia neganai, idia ita hagoadaia, eiava?—Aon. 25:11.
2 Keristani tadikaka edia kara namodia momo dainai ita hanamodia be namo. Elda taudia, hesiai taudia, bona painia taudia idia gaukara goada edia maduna idia hagugurua totona. (1 Tim. 4:10; 5:17) Dirava idia gari henia tama sina idia hekwarahi bada edia natudia be Iehova ena dala dekenai idia tubu totona. (Efe. 6:4) Keristani matamata taudia idia hekwarahi bada “tanobada ena lauma” idia dadaraia totona. (1 Kor. 2:12; Efe. 2:1-3) Ma haida be mai abidadama ida Iehova idia hesiai henia, herevana idia buruka, idia gorere, eiava hahetoho ma haida idia davaria. (2 Kor. 12:7) Unai bamona taudia ibounai ese hanamoa hereva idia abia be namo. Edia gaukara namona ita laloa bada, eiava?
3 Hereva Maorodia Ta Ta Dekenai Bona Gwauraia Goevagoeva: Ita ibounai be platfom amo hanamoa hereva ita kamonai neganai ita moale. To, tau ta ese ita ta ta dekenai hanamoa hereva ia gwauraia neganai ita ia hagoadaia bada. Hegeregere, Roma taudia dekenai ia siaia revarevana ena karoa 16 lalonai, Paulo ese Fibi, Prisikila, Akwila, Trupena, Truposa, Peresi bona ma haida dekenai ia siaia hanamoa herevadia be ia gwauraia goevagoeva. (Roma 16:1-4, 12) Reana ena hereva ese unai abidadama taudia ia hagoadaia! Unai bamona hanamoa herevadia ese eda tadikaka bona taihu idia hadibaia idia ita ura henidia, bona unai ese ita bona idia ia hatamonaia. Vanegai, oi ese ta dekenai hanamoa herevadia oi gwauraia goevagoeva, eiava?—Efe. 4:29.
4 Kudouna amo: Ta ita hagoadaia momokani totona, mai momokani ida hanamoa herevadia ita gwauraia be namo. Taunimanima idia diba ita be kudouna amo ita hereva eiava ‘uduna dekenai ita hanamoa koikoi.’ (Aon. 28:23) Ma haida edia kara namodia ita itaia karana amo ita sibona ita hadibaia neganai, unai ese eda kudouna do ia hamarerea hanamoa herevadia ita gwauraia totona. Namona be hanamoa herevadia ita henia, badina ita diba ‘nega korikori dekenai, hereva namona ta ita gwauraia, be namo bada!’—Aon. 15:23.