Ma Haida Laloa Bada—Hanamoa Herevana Amo
1 Mai momokani ida ma haida ita hanamoa neganai, unai ese idia ia hagoadaia kara ta idia karaia totona, bona idia ia hamoalea. Pablisa momo idia davaria, hanamoa hereva kwadogina ese taunimanima edia lalona ia veria iseda haroro herevana idia kamonai totona. Taunimanima dekenai sivarai namona ita harorolaia totona, edena dala ai hanamoa herevana ita gwauraia diba?
2 Itaia Namonamo: Hairai bada ia abia tauna, Iesu Keriso be Asia Minor dekenai idia noho kongrigeisen seven edia kara namodia ia itaia. (Apok. 2:2, 3, 13, 19; 3:8) Unai hegeregerena, bema haroro gaukara ai ita davaria taudia ita laloa bada, ita ura idia dekenai ita itaia gaudia dainai idia ita hanamoa. Hegeregere, ruma tauna ena ruma badina ia goeva, tama o sina ta be ena natuna ia kara namo henia, eiava ruma tauna ese ita ia kiri henia bona ita ia hanamoa dainai, idia ita hanamoa diba. Oi be unai bamona gaudia oi itaia neganai, ruma tauna oi hanamoa, a?
3 Kamonai Namonamo: Haroro gaukara ai ma haida ita hereva henia neganai, henanadai namodia ita henia diba, unai amo edia lalohadai do idia gwauraia hedinarai. Idia gwauraia gauna ita kamonai namonamo, unai amo ita hahedinaraia idia ita matauraia. (Roma 12:10) Bena idia herevalaia gauna dainai, mai momokani ida idia ita hanamoa, bena unai amo ita ura ita herevalaia gauna ita gwauraia.
4 Laloa Namonamo: Bema ruma tauna be hereva ta ia gwauraia, bona unai hereva be Baibel ena hereva momokani hegeregerena lasi, dahaka do ita karaia? Namo lasi maoromaoro oi hamaoroa ia gwauraia gauna be maoro lasi, to ena lalohadai ia gwauraia hedinarai dainai ia oi hanamoa, bena reana inai bamona oi gwau, “Lau diba oi herevalaia gauna be oi ese oi laloa bada gauna ta.” (Kol. 4:6) Ena be unai ruma tauna be ita herevalaia gauna ia abia dae lasi, to ena lalohadai ia gwauraia dainai, ia ita hanamoa be namo. Manau karana ita hahedinaraia noho neganai, unai ese sivarai namona idia abia dae lasi taudia edia lalona ia veria idia kamonai totona.—Aon. 25:15.
5 Bema ita ura ta ita hagoadaia, ita gwauraia hanamoa herevana be mai momokani ida ita gwauraia be namo. Unai bamona hagoadaia herevana ese Iehova ena ladana ia hanamoa bona ma haida edia lalona ia veria Basileia ena sivarai namona idia kamonai totona.