Kara Maoromaoro Badinaia Karana amo Ia Vara Moale
“Lohiabada ena hanamoa sibona ese, kohu momo oi dekenai ia henia noho, bona unai kohu danu, ese lalohisihisi sisina oi dekenai do ia henia lasi.”—AONEGA HEREVADIA 10:22.
1, 2. Dahaka dainai vaira negana sibona ita laloa momo be aonega karana lasi?
AMERICA ena diba bada tauna ta ia gwau: “Vaira negana ita laloa momo neganai, . . . hari ita moalelaia gaudia do ita laloa bada lasi.” Unai hegeregerena, natudia be taunimanima badadia idia karaia diba gaudia idia laloa bada dainai, idia maragi negana ai idia karaia diba gaudia idia laloa bada lasi.
2 Iehova ena hesiai taudia be unai lalohadai idia abia danu. Mani inai oi laloa. Ita ura Dirava ena gwauhamata, tanobada be paradaiso ai do ia halaoa gwauhamatana unai, do ia guguru. Ita be mai ura bada ida gorere, buruka, hisihisi do idia ore negana ita naria noho. Ena be unai gaudia ita naria be namo, to vaira negai do ita abia gaudia sibona ita laloa bada bona hari lauma dalanai ita abia hahenamo ita laloa bada lasi, be edena bamona? Madi! Bema ita laloa bada gaudia be iseda ura negana ai idia vara lasi, unai ese lalohisihisi ia havaraia diba. (Aonega Herevadia 13:12) Mauri lalonai ita davaria hekwakwanai ese ita dekenai lalohisihisi bada bona sibona eda hemami laloa bada karana ia havaraia diba. Reana ia vara hekwakwanai ita haheaukalaia lasi, to ita maumau. Unai bamona do ia vara lasi ita dekenai bema hari ita abia hahenamo ita laloa bada.
3. Inai stadi lalonai ita be dahaka do ita herevalaia?
3 Aonega Herevadia 10:22 ia gwau: “Lohiabada ena hanamoa sibona ese, kohu momo oi dekenai ia henia noho, bona unai kohu danu, ese lalohisihisi sisina oi dekenai do ia henia lasi.” Hari inai negai, Iehova ena hesiai taudia be lauma dalanai idia noho namo dainai, idia moale, ani? Mani lauma dalanai ita abia hahenamo haida bona edia anina iseda mauri lalonai ita itaia. Bema nega ita atoa Iehova ese kara maoromaoro ia badinaia tauna dekenai ia henia hahenamodia ita laloa totona, unai ese ita ia hagoadaia iseda guba Tamana be mai moale ida ita hesiai henia.—Aonega Herevadia 20:7.
Hari Ita Abia Hahenamo Idauidau
4, 5. Baibel lalonai edena hahediba herevana oi laloa bada, bona dahaka dainai?
4 Baibel ena hahediba hereva maoromaorodia ita diba. Kerisendom tomadiho taudia idia gwau Baibel idia abia dae. To, idia be Baibel ena hahediba herevadia idia abia dae lasi. Bona nega momo tomadiho tamona taudia edia lalohadai Baibel ia hadibaia gaudia dekenai be idauidau. Unai taudia be Iehova ena hesiai taudia amo idia idau momokani! Ena be iseda bese, kastom, eiava noho daladia be idauidau, to ita tomadiho henia Dirava ena ladana ita diba. Bona Ia be toi tamona Diravana lasi. (Deuteronomi 6:4; Salamo 83:18; Mareko 12:29) Danu ita diba, Dirava ena lohia siahuna ena maoro dainai ia vara hepapahuahu lalonai ita noho, bona unai hepapahuahu be kahirakahira Dirava ese do ia hamaoromaoroa. Unai dainai kara maoromaoro ita badinaia noho be gau badana. Mase taudia dekenai dahaka ia vara be ita diba bona Dirava ese taunimanima be lahi dekenai ia gabua eiava gabu ma ta dekenai idia lao lalohadaina ita garilaia lasi.—Hadibaia Tauna 9:5, 10.
5 To, ita moale badina ita be evolusen amo ita vara lasi! Ita be Dirava ese ia havaraia, bona Iena toana hegeregerena ita ia karaia. (Genese 1:26; Malaki 2:10) Salamo torea tauna ia gwau: “Oi lau tanikiu henia, badina mai hoa danu lau oi karaia. Oiemu kara ibounai be mai hoa bona gari danu. Lauegu kudouna dekenai, inai bamona lau diba momokani.”—Salamo 139:14.
6, 7. Oiemu mauri bona oi diba taudia ma haida edia mauri lalonai edena kara umui haidaua, bona unai ese namo ia havaraia?
6 Kara mirodia ita dadaraia. Reidio bona niuspepa ai kuku, inuinu kekero bona lebulebu karadia edia dika idia herevalaia momo. To unai hadibaia herevadia be taunimanima ese idia laloa bada lasi. To, bema kudou maoro tauna ia diba Dirava momokani ese unai bamona kara ia inai henia bona unai bamona kara idia karaia taudia ese Iena lalona idia hahisia, dahaka do ia karaia? Oibe, unai tauna ena mauri lalonai unai kara mirodia do ia dadaraia momokani! (Isaia 63:10; 1 Korinto 6:9, 10; 2 Korinto 7:1; Efeso 4:30) Unai ia karaia be Iehova Dirava ia hamoalea totona, bona hahenamo haida ia abia danu, hegeregere ia gorere lasi bona lalomaino ia abia.
7 Taunimanima momo be edia kara mirodia idia rakatania be auka. To, lagani ta ta ai taunimanima tausen momo be edia kara mirodia idia rakatania noho. Iehova dekenai edia mauri idia gwauhamatalaia bona bapatiso idia abia, unai amo taunimanima dekenai idia hahedinaraia Dirava ese ia inai henia karadia be idia rakatania vadaeni. Unai be hagoadaia gauna ita ibounai dekenai! Ita ia hagoadaia kara dika bona ma haida hadikaia karadia ena igui amo ita raka siri totona.
8. Baibel lalonai edena sisiba be ruma bese ena moale ia havaraia diba?
8 Ruma bese mauri namona ita moalelaia. Tano momo dekenai ruma bese ena mauri ia dika ia lao. Taunimanima momo ese edia headava idia hadokoa, bona nega momo unai ese natudia edia lalona ia hahisia bada. Europe tano haida ai, 20 pesen bamona be adavana lasi tama eiava sina ruma besedia. Edena dala ai Iehova ese ita ia durua ruma bese lalonai kara maoromaoro ita badinaia totona? Mani Efeso 5:22–6:4 duahia, bona Dirava ena Hereva ese tatau, hahine bona natudia dekenai ia henia hahegani namodia oi laloa. Unai siri bona siri ma haida ita badinaia neganai, headava do ia goada, tama sina ia durua natudia idia naria namonamo totona, bona ruma bese lalonai moale do ia noho. Unai be moale gauna, ani?
9, 10. Edena dala ai ita ese vaira negana ita laloa dalana be tanobada taudia ese idia laloa dalana amo ia idau?
9 Idia diba kahirakahira inai tanobada ena hekwakwanai ibounai do idia ore. Ena be saiens taudia edia diba idia habadaia, kampani idauidau ese masini matamata idia karaia bona gavamani taudia haida idia ura edia gaukara idia karaia namonamo, to hari idia vara hekwakwanai badadia idia hamaoromaoroa diba lasi. Orea ta (World Economic Forum) ia hamatamaia tauna, Klaus Schwab be vanegai ia gwau: “Tanobada ena hekwakwanai idauidau idia bada idia lao dainai, nega be lasi idia hamaoromaoroa totona.” Ma ia gwau: “Tano idauidau dekenai terorist karadia, tanobada hadikaia karadia bona moni ena hekwakwanai idia vara noho.” Schwab ena hereva dokonai ia gwau: “Hari, taunimanima idia gaukara hebou bona abia hidi badadia idia karaia be gau badana, unai amo tanobada lalonai idia vara hekwakwanai idia hamaoromaoroa diba.” Lagani 2000 murina laganidia lalonai, taunimanima edia vaira negana be ia dika ia lao.
10 Ita moale bada badina Iehova ese dala ia karaia Iena Mesia Basileiana amo, tanobada ena hekwakwanai ibounai do ia haorea! Unai Basileia amo, Dirava momokani ese ‘tuari do ia hadokoa’ bona maino do ia mailaia. (Salamo 46:9; 37:11) Horoa King, Iesu Keriso ese ogogami taudia bona manoka taudia be dagedage amo do ia hamauria. (Salamo 72:12-14) Basileia ena lohia henunai, aniani be do ia ore lasi. (Salamo 72:16) Iehova “ese matana ranu ibounai [iseda] matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apokalupo 21:4) Basileia be guba ai ia gini vadaeni bona daudau lasi tanobada do ia hagoevaia.—Daniela 2:44; Apokalupo 11:15.
11, 12. (a) Moale karadia tahua karana ese noho hanaihanai moale ia mailaia, a? Gwauraia hedinarai. (b) Dahaka ese moale korikori ia havaraia?
11 Moale korikori ia havaraia gauna ita diba. Dahaka ese moale korikori ia mailaia? Diba bada tauna ta ia gwau moale be mai ena kahana toi—moale karadia, gaukara hebou (hegeregere moni gaukara bona ruma bese lalonai), bona mauri mai ena anina (unai be ma haida durua karana). Ia gwau unai toi amo, moale karadia be anina bada gauna lasi, bona ma ia gwau: “Unai be hoa gauna badina taunimanima momo be edia mauri lalonai moale karadia idia laloa bada.” Baibel be dahaka ia gwau?
12 Idaunegai Israela ena King Solomona ia gwau: “Egu lalona dekenai lau gwau: ‘Lau ese moale ena dala do lau tohoa, moale ese egu mauri do ia hanamoa, o lasi. To lau davaria moale danu be anina lasi. Lau davaria danu kiri be kavakava, bona moale ese lau ia hanamoa lasi.’ ” (Hadibaia Tauna 2:1, 2) Unai siri hegeregerena, moale karadia amo ia mai moale be ia noho daudau lasi. Gaukara haida oi karaia neganai be edena bamona? Mai anina bada gaukara ta ita karaia diba—unai be Basileia harorolaia bona hahediba taudia halaoa gaukarana. (Mataio 24:14; 28:19, 20) Baibel ena hahemauri sivaraina be ma haida ida ita herevalaia neganai, ita bona iseda hereva idia kamonai taudia be mauri idia abia diba. (1 Timoteo 4:16) Dirava ena gaukara ita karaia dainai, ita mamia “henia kara ena moale be bada, abia kara ena moale be maragi.” (1 Korinto 3:9; Kara 20:35) Unai gaukara dainai iseda mauri be mai anina bona iseda Havaraia Tauna be Ia ia gwauraia dika tauna, Satani Diabolo ia haere henia diba. (Aonega Herevadia 27:11) Momokani, Iehova ese ita dekenai ia hahedinaraia, Dirava badinaia karana ese noho hanaihanai moalena ia havaraia.—1 Timoteo 4:8.
13. (a) Edena dala ai Tiokratik Haroro Sikuli be ita moalelaia hahenamo ta? (b) Edena dala ai Tiokratik Haroro Sikuli ese oi ia durua?
13 Anina namona ia havaraia sikulina. Gerhard be Iehova ena Witnes taudia edia kongrigeisen ta ena elda tauna ta. Iena matamata negana ia laloa neganai, ia gwau: “Lau matamata neganai, herevahereva karana be egu hekwakwanai badana. Taunimanima vairanai lau hereva neganai, hereva lau gwauraia namonamo lasi bona lau lanalana. Lau mamia lau be anina lasi bona lau lalometau. Lauegu tama sina ese sikuli ta dekenai lau idia atoa egu herevahereva karana hanamoa totona, to unai ese lau ia durua lasi. Unai ia vara be gorere dainai lasi, to lau gari dainai lau hereva namonamo lasi. To, Iehova ese heduru gauna namona ta ia henia—Tiokratik Haroro Sikuli. Unai sikuli dekenai lau vareai neganai, lau ia hagoadaia. Lau hekwarahi lau dibaia gaudia lau badinaia totona. Bona anina namona ia havaraia! Lau hereva namonamo diba, lau lalohisihisi lou lasi, bona mai gari lasi ida haroro gaukara lau karaia diba. Hari pablik tok lau henia danu. Iehova lau tanikiu henia, badina unai sikuli amo mauri matamata ia henia lau dekenai.” Iehova ese iena gaukara karaia totona ita ia hadibaia, unai be moale bada gauna, ani?
14, 15. Lalohisihisi negana ai, dahaka heduru ia noho? Haheitalai ta gwauraia.
14 Iehova ida hetura karana namona bona tanobada hegegemadai tadikaka oreana amo ia mai heduru. Katrin, Germany dekenai ia noho taihu ta, be sautist Asia dekenai ia vara tano marere bona sunami ena sivarai ia kamonai neganai, ia lalohisihisi bada. Badina iena natuna kekeni be Thailand ia vadivadi neganai, unai dika bada ia vara. Hora 32 lalonai unai taihu ia diba lasi ena natuna kekeni be ia mauri noho eiava ia mase vadaeni. To Katrin be telefon amo idia hadibaia iena natuna kekeni be ia namo, unai ia kamonai neganai ia moale bada!
15 Dahaka ese Katrin ia durua unai lalohisihisi bada negana lalonai ia haheauka totona? Ia gwau: “Unai nega ibounai lalonai lau be Iehova dekenai lau guriguri. Lau laloparara guriguri loulou karana ese lau dekenai goada bona lalomaino ia henia. Bona lalokau tadikaka ese lau idia vadivadi henia bona lau idia hagoadaia.” (Filipi 4:6, 7) Bema unai nega dikana lalonai Iehova ia guriguri henia lasi bona lalokau tadikaka oreana amo heduru ia abia lasi, do ia lalomanoka momokani! Iseda hetura karana Iehova bona iena Natuna ida, bona iseda Keristani tadikaka oreana ita bamoa karana be hahenamo hereadaena, namo lasi unai ita laloa maragi.
16. Haheitalai ta oi herevalaia, unai ese ia hahedinaraia toreisi lou helarona be mai anina bada.
16 Lalokau mase taudia do ita itaia lou ena helaro. (Ioane 5:28, 29) Tau matamata ta Matthias ia tubu daekau neganai, ia be Iehova ena Witnes tauna ta. To, unai hahenamo ia laloa bada lasi, ia do matamata neganai Keristani kongrigeisen ia rakatania. Ia gwau: “Lau be egu tamana ida lau herevahereva namonamo diba lasi. Idia hanaia lagani momo lalonai, ai hepapahuahu momo. To, egu tamana be egu namo ia laloa bada. Ia ese lau ia lalokau henia bada, to unai nega ai unai lau lalopararalaia lasi. Lagani 1996 ai, ena bedi badinai lau helai, iena imana lau dogoatao bona lau tai bada, ia lau hamaoroa lau karaia gaudia dainai lau sori bona ia lau lalokau henia bada. To unai negai egu hereva ia kamonai diba lasi. Nega sisina lalonai ia gorere murinai, ia mase. Bema lau roho mauri bona egu tamana ia toreisi lou neganai ai hedavari, guna ai ruaosi ai karaia hebou lasi gaudia do ai karaia lou. Bona do ia moale bema ia kamonai lau be elda tauna ta bona egu adavana ida painia gaukara ai karaia.” Toreisi lou helarona ese ita ia hagoadaia bada!
“Lalohisihisi Sisina Oi Dekenai Do Ia Henia Lasi”
17. Edena dala ai Iehova ena hahenamo ita laloa dobu karana ese ita ia durua?
17 Iesu Keriso ese ena guba Tamana be inai bamona ia herevalaia: “Ia ese kara dika taudia bona kara namo taudia edia latanai dina ena diari ia henia noho. Medu danu kara maoro taudia bona kara kerere taudia edia latanai ia siaia diho.” (Mataio 5:45) Bema Iehova Dirava ese kara dika taudia be unai dala amo ia hanamodia, ita diba Dirava idia badinaia taudia be Ia ese do ia hanamodia bada! Salamo 84:11 ia gwau: “Bema tau ta ese kara maoromaoro ia karaia neganai, Lohiabada ese gau namona ta unai tau dekena amo do ia koua lasi.” Iehova ese ia idia lalokau henia taudia ia naria bona ia laloa bada, unai ita laloa dobu neganai, ia ita tanikiu henia bona ita moale bada!
18. (a) Edena dala ai Iehova amo idia mai hahenamo ese ita idia hahisia lasi? (b) Dahaka dainai Dirava idia badinaia taudia momo be hisihisi idia davaria?
18 “Lohiabada ena hanamoa”—unai ese Iehova ena taunimanima dekenai noho namona ia henia. Bona ita diba do ita “lalohisihisi lasi.” (Aonega Herevadia 10:22) To dahaka dainai Dirava ena hesiai taudia momo be hahetoho idauidau idia davaria, bona unai ese hisihisi bada idia dekenai ia havaraia? Hekwakwanai bona hisihisi idia vara ena badina be toi. (1) Sibodia iseda ura dikadia dainai. (Genese 6:5; 8:21; Iamesi 1:14, 15) (2) Satani bona ena demoni. (Efeso 6:11, 12) (3) Inai tanobada dikana. (Ioane 15:19) Iehova ese idia vara gau dikadia ia koua lasi, to unai be ia ese ia havaraia lasi. Momokani, “gau namodia ibounai, bona harihari gaudia namodia momokani ibounai, be Dirava dekena amo idia diho mai. Dirava ese diari ibounai ia karaia.” (Iamesi 1:17) Iehova ena amo idia mai hahenamo ese ita idia hahisia lasi.
19. Kara maoromaoro dalana ai idia raka taudia dekenai dahaka do ia vara?
19 Lauma dalanai hanaihanai do ita noho namonamo bema Dirava kahirakahira ita lao. Iehova ida ita hetura namonamo neganai, vaira negai mauri korikorina, mauri hanaihanai do ita abia. (1 Timoteo 6:12, 17-19) Unai negai Dirava ese tanobada do ia hamatamataia, lauma bona tauanina dalanai hahenamo momo do ita abia. ‘Dirava ena hereva idia kamonai’ taudia ese unai mauri korikorina do idia abia. (Deuteronomi 28:2) Mai lalogoada ida, kara maoromaoro dalana ai ita raka noho mai moale ida.
Dahaka Oi Dibaia?
• Dahaka dainai vaira negana sibona ita laloa momo be aonega karana lasi?
• Hari inai negai, dahaka hahenamo ita moalelaia?
• Dahaka dainai Dirava ena hesiai taudia ese hisihisi idia abia?