Iehova Ena Hadibaia Herevadia Oi Lalokau Henia Bada, A?
“Oiemu hadibaia hereva lau kamonai henia noho, badina mai egu kudouna ibounai idia lau lalokau henia bada noho.”—SALAMO 119:167.
1. Baibel lalonai, Iehova ena hadibaia herevadia idia gwauraia loulou gabuna be edeseniai?
IEHOVA ia ura iena taunimanima idia moale. To momokani, moale korikorina ita mamia totona, Dirava ena taravatu hegeregerena ita raka bona iena oda ita badinadia be gau badana. Unai bamona ita karaia totona, iena hadibaia herevadia be ita dekenai ia henia. Baibel ese ia gwauraidia loulou, bona Salamo 119, reana Iuda ena King ena natuna merona Hesekaia ese ia torea gauna, dekenai ia gwauraidia bada. Unai ane mai hairaina be inai hereva amo ia matamaia: “Mai edia kerere lasi dekenai idia noho taudia, bona Lohiabada ena taravatu hegeregerena idia noho taudia, be do idia moale noho. Dirava ena hadibaia hereva idia kamonai henia momokani taudia, bona mai edia kudouna ibounai Lohiabada idia tahua taudia, be do idia moale noho.”—Salamo 119:1, 2.
2. Dirava ena hadibaia herevadia be edena dala ai ita idia hamoalea diba?
2 Iena Hereva dekenai diba maorona ita abia bona iseda mauri lalonai unai diba ita gaukaralaia neganai, ‘Iehova ena taravatu hegeregerena ita raka noho.’ To ita goevadae lasi dainai, ita diba vadaeni gaudia ita kamonai lou be namo. Heberu herevana, idia hahanaia “hadibaia herevadia,” ia hahedinaraia Dirava ese ita ia durua iena taravatu, oda, kara biagua herevadia, bona hahegani ita laloa lou totona. (Mataio 10:18-20) Bema unai bamona hadibaia herevadia ita badinaia noho do ita moale noho diba, badina edia heduru amo dika bona lalo-hisihisi idia havaraia gaudia, lauma dalanai ita idia hamorua diba gaudia, be do ita reaia.
Iehova Ena Hadibaia Herevadia Badinaia Noho
3. Salamo 119:60, 61 dainai, dahaka ita diba momokani?
3 Salamo torea tauna be Dirava ena hadibaia herevadia ia laloa bada. Inai ane ia abia: “Lau naria kava lasi, to karaharaga oiemu oda hereva lau kamonai henia. Kara dika taudia [“edia varo ese lau idia hagegea,” NW ]. To lau ese oiemu taravatu lau laloaboio lasi.” (Salamo 119:60, 61) Iehova ena hadibaia herevadia edia heduru amo dagedage ita haheaukalaia diba, badina ita diba momokani iseda guba Tamana ese ita idia koua varodia, iseda inai taudia idia kwatua gaudia, ia utua diba. Nega korikorina ai, ia ese unai bamona koua gaudia amo ita ia ruhaia, Basileia harorolaia gaukarana ita karaia diba totona.—Mareko 13:10.
4. Dirava ena hadibaia herevadia ita kamonai murinai dahaka ita karaia be namo?
4 Nega haida, Iehova ena hadibaia herevadia amo sisiba ita abia. Namona be nega ibounai unai sisiba ita laloa bada, salamo torea tauna ese ia laloa bada hegeregerena. Guriguri lalonai Dirava dekenai ia gwau: “Oiemu hadibaia hereva ese lau idia hamoalea noho. . . . Oiemu hadibaia hereva lau ura henia noho.” (Salamo 119:24, 119) Ita dekenai Dirava ena hadibaia herevadia be momo herea, guna, salamo torea tauna dekenai idia be momo lasi. Heberu Revarevadia edia hereva idauidau be nega handred momo Greek Revarevadia lalonai idia torea hanai. Idia dainai Iehova ena hereva iena Taravatu henunai idia noho taudia dekenai sibona lasi, to iena ura Keristani kongregesen totona ita laloa lou diba danu. Dirava ia ura ita dekenai iena taravatu ia gwauraia lou neganai, unai hakaua karana dainai ia ita tanikiu henia. Bona ‘Iehova ena hadibaia herevadia badinaia noho’ karana amo, kara dika idia havaraia lalona veria gaudia, iseda moale idia henaoa bona iseda Havaraia Tauna idia habadua gaudia, do ita dadaraia.—Salamo 119:31.
5. Iehova ena hadibaia herevadia be edena bamona ita lalokau henia bada matamaia diba?
5 Iseda lalokau ena bada Iehova ena hadibaia herevadia dekenai be edena bamona be namo? Salamo torea tauna ese inai ane ia abia: “Oiemu hadibaia hereva lau kamonai henia noho, badina mai egu kudouna ibounai idia lau lalokau henia bada noho.” (Salamo 119:167) Iehova ena hadibaia herevadia do ita lalokau henia bada matamaia bema ita ia laloa bada Tamana ena sisiba bamona ita lalodia bona ita abidia dae. (1 Petero 5:6, 7) Iena hadibaia herevadia ita abia be namo, bona ita idia durua dalana ita itaia neganai, iseda lalokau idia dekenai do ia bada ia lao.
Dirava Ena Hadibaia Herevadia Ita Abia be Namo Ena Badina
6. Iehova ena hadibaia herevadia ita abia loulou be gau badana ena badina ta be dahaka, bona dahaka ese ita do ia durua idia ita laloatao totona?
6 Iehova ena hadibaia herevadia ita kamonai loulou be namo badina gau momo ita laloaboio. The World Book Encyclopedia ia gwau: “Nega ia hanaia lalonai, taunimanima momo edia kara be idia laloaboio gaudia be momo. . . . Reana nega ta oi laloa ladana ta o sivarai ta be kahirakahira do oi laloatao, to oi gwauraia diba lasi. . . . Unai bamona nega kwadogina ai laloaboio karana, nega momo ia vara gauna, be idia gwauraia abia lou diba lasi karana. Saiens taudia idia gwau unai kara be ia honu momokani daiutuna lalonai gau ta oi atoa bona ia oi davaria diba lasi bamona. . . . Gau ta laloatao dalana namona be inai: oi laloa ia oi diba goevagoeva murinai, nega daudau lalonai do oi stadilaia noho.” Stadi namonamo karana bona karaia loulou karana ese ita do ia durua Dirava ena hadibaia herevadia do ita laloatao bona do ita badinaia, namo do ita davaria totona.
7. Hari inai negai, badina be dahaka Dirava ena hadibaia herevadia ita abia loulou be gau badana?
7 Hari inai negai, kara dika ia bada daekau momokani bona taunimanima edia sivarai ibounai lalonai ia be unai bamona lasi dainai, Iehova ena hadibaia herevadia ita abia ena anina ia bada ia lao danu. Bema Dirava ena hadibaia herevadia ita kamonai henia, lalo-parara ita abia dainai tanobada ena kara dika daladia lalonai ita do idia veria lao diba lasi. Salamo torea tauna ia gwau: “Lauegu diba ese, egu hadibaia taudia ibounai edia diba ia hereaia noho, badina be lau ese Dirava ena hadibaia hereva lau laloa noho, ma lau laloa noho. Bona egu aonega ese tau buruka edia aonega ia hereaia noho, badina be oi Dirava, oiemu oda hereva lau badinaia noho. Lau ese kara dikadia dekena amo lau raka siri noho, badina be lau ura Dirava ena hereva do lau kamonai henia.” (Salamo 119:99-101) Dirava ena hadibaia herevadia badinaia karana amo, ‘kara dikadia dekena amo do ita raka siri noho,’ bona taunimanima hutuma, ‘edia laloa be dibura bona Dirava ena mauri be idia davaria diba lasi’ taudia, amo do ita idau noho diba.—Efeso 4:17-19.
8. Iseda abidadama idia tohoa gaudia idia vara neganai, edena gaudia ese ita do idia durua do ita kwalimu totona?
8 Dirava ena hadibaia herevadia ita abia be namo danu badina ita idia hagoadaia inai “dokona negana” ai ita davaria hahetoho momo ita haheaukalaia totona. (Daniela 12:4) Bema unai bamona hadibaia herevadia ita abia lasi, “kamonai kava” taudia ai do ita lao. (Iamesi 1:25) To “hesiai tauna mai ena kamonai, bona mai ena kara maoromaoro” ese idia printaia buka bona magasin edia heduru amo Baibel ita stadilaia namonamo, kongregesen heboudia ai bona siboda eda stadi negadia ai, bona unai kara amo heduru do ita abia abidadama tohoa gaudia be do ita haheaukalaia totona. (Mataio 24:45-47) Unai bamona lauma gaudia dainai, hahetoho ita davaridia neganai ita diba dahaka ita karaia be namo, Iehova do ita hamoalea totona.
Iseda Hebou be mai Edia Anina Bada
9. “Harihari gaudia taunimanima dekenai” be daidia, bona edena dala ai idia ese edia abidadama tamona taudia idia durua?
9 Dirava ena hadibaia herevadia ita kamonai henia be namo, bona dala ta be Keristani heboudia ai maduna idia abia taudia ese hadibaia gaukarana idia karaia. Aposetolo Paulo ia gwau, Iesu be “atai dekenai ia daekau lao neganai, abia mauri mai guia taudia momo ia danu ia abia lao. Bona harihari gaudia taunimanima dekenai ia henia.” Paulo be ma ia gwau: “Haida dekenai [Keriso] be aposetolo dagi ia henia, haida dekenai be peroveta dagi ia henia, haida be evanelia gaukara taudia, haida be haroro taudia, haida be hadibaia taudia. Inai bamona harihari gaudia ia henia, be Dirava ena taudia ibounai do ia durua totona. Inai be Dirava ena hesiai gaukara do idia karaia namonamo, bona Keriso ena tauanina do ia gini goada totona.” (Efeso 4:8, 11, 12) Ita tomadiho hebou neganai, ita moale bada badina unai “harihari gaudia taunimanima dekenai”—elda taudia unai—ese iseda lalona idia veria Iehova ena hadibaia herevadia ita laloa totona!
10. Heberu 10:24, 25 ena hereva badana be dahaka?
10 Dirava ese ia henia gaudia ita laloa bada dainai, pura ta ta ai ita karaia kongregesen heboudia ima do ita lao henidia. Paulo ia hahedinaraia ita hebou hanaihanai be gau badana. Ia gwau: “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi, haida ese idia hadokoa bamona. To umui ta ta emui Keristani varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.”—Heberu 10:24, 25.
11. Pura ta ta lalonai ita karaia heboudia ta ta be edena bamona ita idia durua?
11 Iseda hebou ese ita idia durua daladia be oi laloa bada, a? Pura ta ta ena Gima Kohorona Stadi ese iseda abidadama ia hagoadaia, ita ia durua Iehova ena hadibaia herevadia ita badinaia bona “inai tanobada ena lauma” ita dadaraia totona. (1 Korinto 2:12; Kara 15:31) Pablik Tok ai, hereva henia taudia be Dirava ena Hereva amo ia mai dibana idia gwauraia, hegeregere, Iesu ena ‘mauri hanaihanai herevadia’ mai hairaidia bona Iehova ena hadibaia herevadia. (Ioane 6:68; 7:46; Mataio 5:1–7:29) Tiokratik Haroro Sikuli ai iseda hadibaia daladia ita hanamoa. Hesiai Hebou ese ita ia durua ruma-ta-ruma-ta ai, lou henia ai, Baibel stadi lalodiai, bona iseda hesiai gaukara daladia ma haida dekenai iseda sivarai namona harorolaia karana ita hanamoa totona. Kongregesen Buka Stadi dekenai taunimanima be momo lasi dainai, dala ia kehoa ita haere bona nega momo Dirava ena hadibaia herevadia ita gwauraia lou totona.
12, 13. Asia tanona ta ai, Dirava ena taunimanima be edena bamona idia hahedinaraia Keristani heboudia idia laloa bada?
12 Kongregesen heboudia dekenai ita lao hanaihanai dainai, Dirava ena hahegani do ita lalodia lou, bona tuari, moni hekwakwanai, bona iseda abidadama idia tohoa gaudia ma haida ita davaria neganai, lauma dalanai do ita goada noho diba. Asia tanona ta ai idia noho Keristani taudia 70 bamona idia laloa hebou be mai edia anina bada. Idia be edia noho rumadia idia heautania bona gari dainai gunika kahanai, uda bada gabuna dekenai idia noho. Edia lalona idia hadaia do idia hebou hanaihanai dainai, edia hanua, tuari ese ia hadikaia gabuna, idia lou henia bona edia Kingdom Hall ena orena kahadia idia kokia bona uda lalonai idia haginia lou.
13 Unai tano ena kahana ma ta ai, lagani momo lalodiai tuari idia haheaukalaia vadaeni gabuna ai, Iehova ena taunimanima be mai edia goada ida ia idia do hesiai henia noho. Unai gabu ena elda tauna ta idia nanadaia: “Dahaka ese umui ia durua bada tadikaka idia do lalo-tamona totona?” Iena haere be dahaka? “Lagani 19 lalodiai, hebou iboudiai ai karaia. Nega haida, bomu idia moru eiava hekwakwanai ma haida dainai tadikaka haida be hebou gabuna dekenai idia mai diba lasi, to hebou iboudiai ai karaia.” Unai tadikaka bona taihu namodia idia diba momokani, ‘guriguri hebou karana idia hadokoa lasi’ be mai anina bada.
14. Hahine burukana, Ana, ena kara amo dahaka ita dibaia?
14 Ana, iena mauri lagani be 84 vabuna, be “Dubu Helaga ia rakatania lasi.” Unai dainai, beibi Iesu ena vara negana sisina murinai, dubu dekenai idia abia lao neganai, Ana ia noho. (Luka 2:36-38) Emu lalona oi hadaia hebou do oi readia lasi, a? Oi hekwarahi sekit bona distrik hebouhebou edia hereva iboudiai do oi kamonai totona, a? Unai hebou idauidau ai lauma dalanai ita idia durua hadibaia herevadia ita abia dainai, iseda guba Tamana ese iena taunimanima ia naria be ita itaia goevagoeva diba. (Isaia 40:11) Danu, unai hebou be moale habadaia negadia, bona hebou dekenai ita noho ese ia hahedinaraia Iehova ena hadibaia herevadia ita laloa bada.—Nehemia 8:5-8, 12.
Iehova Ena Hadibaia Herevadia Dainai Ita Idau
15, 16. Iehova ena hadibaia herevadia ita badinaia dainai iseda kara be edena bamona?
15 Inai tanobada dikana amo ita idau diba, badina Dirava ena hadibaia herevadia ita badinaia. Hegeregere, unai hereva ita kamonai henia dainai, matabodaga karana do ita karaia lasi. (Deuteronomi 5:18; Aonega Herevadia 6:29-35; Heberu 13:4) Koikoi urana, hereva momokani gwauraia lasi urana, eiava henaohenao urana idia noho neganai, Dirava ena hadibaia herevadia ita badinaia dainai unai ura ita koudia diba. (Esodo 20:15, 16; Levitiko 19:11; Aonega Herevadia 30:7-9; Efeso 4:25, 28; Heberu 13:18) Iehova ena hadibaia herevadia ita badinaia dainai, kara dika ena davana do ita haloua lasi, ta do ita badu henia noho lasi, bona ma ta ena ladana do ita hadikaia lasi.—Levitiko 19:16, 18; Salamo 15:1, 3.
16 Dirava ena hadibaia herevadia ita badinaia dainai ita helaga noho, anina be ita idau, iena hesiai gaukara ita karaia totona. Bona inai tanobada amo ita idau be gau badana! Iesu ena tanobada maurina ena hanuaboi ginigabena ai, Iehova ia guriguri henia, bona ia murinai idia raka taudia totona inai bamona noinoi ia henia: “Oiemu hereva lau henia vadaeni idia dekenai, bona tanobada ese ia badu henia vadaeni idia dekenai, badina idia be tanobada ena lasi, lau hegeregerena, lau be tanobada ena lasi. Lau noinoi lasi tanobada dekena amo idia oi kokia totona, to lau noinoi Tau Dikana dekena amo idia do oi hamauria. Idia be tanobada ena lasi, lau hegeregerena, lau be tanobada ena lasi. Hereva momokani dekena amo idia do oi hahelagaia, oiemu hereva be hereva momokani.” (Ioane 17:14-17) Namona be Dirava ena Hereva ita laloa bada noho, badina ia dainai iena hesiai gaukara helagana karaia totona ita idau.
17. Bema Dirava ena hadibaia herevadia ita kamonai henia lasi, dahaka do ia vara diba, bona unai dainai dahaka ita karaia be namo?
17 Ita Iehova ena hesiai taudia ita ura ita do hegeregere noho iena hesiai gaukara karaia totona. To, bema Dirava ena hadibaia herevadia ita laloa lasi, reana inai tanobada ena lauma, tanobada taudia edia hereva, buka, moale karadia, bona kara amo idia abia isi laumana, ese ita do ia hamorua diba. Bona ita ura lasi Dirava dekena amo idia noho daudau taudia edia kara ita karaia. Moni idia ura henia, idia hekokoroku, idia heagi, tanikiu henia karana bona badinaia karana idia diba lasi, idia dagedage, sibodia edia ura idia laloa, idia gwau idia be tau badadia, bona moale karadia idia ura henia bada to Dirava idia ura henia maragi—unai be idia hahedinaraia karadia haida sibona. (2 Timoteo 3:1-5) Inai tanobada ena oromana dikana ena dina gabedia lalonai ita noho dainai, namona be guriguri amo Dirava ena heduru ita tahua noho iena hadibaia herevadia ita badinaia totona, bona unai amo iena hereva hegeregerena do ita gima noho.—Salamo 119:9, NW.
18. Dirava ena hadibaia herevadia ita badinaia dainai, dahaka kara namodia do ita karaia?
18 Iehova ena hadibaia herevadia dainai ita diba dahaka ita karaia lasi be namo, to unai sibona lasi. Iena hadibaia herevadia ita badinaia dainai kara namodia do ita karaia, Iehova do ita abidadama henia momokani, bona ia do ita lalokau henia mai eda kudouna, lalona, bona goada ibounai ida. (Deuteronomi 6:5; Salamo 4:5; Aonega Herevadia 3:5, 6; Mataio 22:37; Mareko 12:30) Dirava ena hadibaia herevadia dainai iseda dekena taudia do ita lalokau henia danu. (Levitiko 19:18; Mataio 22:39) Dirava bona iseda dekena taudia lalokau henia karana hahedinaraia dalana badana be Dirava ena ura do ita badinaia bona mauri ia henia gauna, ‘Dirava ena diba,’ be ma haida dekenai do ita herevalaia.—Aonega Herevadia 2:1-5.
Iehova Ena Hadibaia Herevadia Ita Badinaia Dainai Do Ita Mauri!
19. Ita be ma haida dekenai edena bamona ita hahedinaraia diba Iehova ena hadibaia herevadia idia badinaia be namo bona idia do idia durua?
19 Bema Iehova ena hadibaia herevadia ita badinaia bona ma haida ita durua unai bamona idia karaia totona, ita bona ita idia kamonai henia taudia danu do ita hamauria. (1 Timoteo 4:16) Edena dala ai ita be ma haida dekenai ita hahedinaraia diba, Iehova ena hadibaia herevadia idia badinaia be namo bona idia do idia durua? Dala ta be iseda mauri lalonai Baibel ena hakaua herevadia ita badinaia. Unai amo, idia hegeregere “mauri hanaihanai abia totona taudia” be do idia itaia diba, Dirava ena Hereva lalonai ia hedinarai dalana idia badinaia be dala hereadaena. (Kara 13:48) Danu, do idia itaia ‘Dirava be momokani iseda huanai ia noho,’ bona do idia ura ita danu Siahu Ibounai Lohiabadana Iehova do idia tomadiho henia.—1 Korinto 14:24, 25.
20, 21. Dirava ena hadibaia herevadia bona iena lauma helaga ese ita idia durua dainai dahaka ita karaia diba?
20 Baibel ita stadilaia noho, ita dibaia gaudia ita badinaia, bona Iehova ese ia henia lauma gaudia iboudiai ita gaukaralaia noho neganai, iena hadibaia herevadia do ita lalokau henia bada matamaia. Bema unai hadibaia herevadia ita badinaia, edia heduru amo Dirava ese ia karaia ‘mauri matamatana do ita atoa,’ bona “ena kara be maoromaoro, helaga bona momokani.” (Efeso 4:20-24) Iehova ena hadibaia herevadia bona iena lauma helaga dainai, lalokau, moale, maino, haheauka, hebogahisi, kara maoromaoro, abidadama, manau, tauanina ena ura koua karana be do ita hahedinaraia diba—unai kara be Satani ese ia biagua tanobadana ena kara amo ia idau vaitani! (Galatia 5:22, 23; 1 Ioane 5:19) Unai dainai, siboda eda Baibel stadi, elda taudia edia hereva, iseda kongregesen ena hebou, sekit hebouhebou, bona distrik hebouhebou lalodiai Iehova ena taravatu ita laloa lou neganai, namona be tanikiu henia karana ita hahedinaraia.
21 Iehova ena hadibaia herevadia ita badinaia dainai do ita moale diba, kara maoromaoro dainai hisihisi ita abia negadia ai danu. (Luka 6:22, 23) Ita idia dagedage henia badabada negadiai Dirava amo hahemauri ita tahua. Hari unai be mai anina bada karana, badina bese iboudiai idia haboua noho “Siahu Ibounai Diravana ena Dina Badana” Aramagedono ai, do idia tuari totona.—Apokalupo 16:14-16.
22. Namona be Iehova ena hadibaia herevadia ita laloa neganai, iseda lalona ita hadaia dahaka do ita karaia totona?
22 Iehova ena hadibaia herevadia ita lalokau henia bada bona mai eda kudouna ibounai ida ita badinaia be mai anina bada, bema ita ura iena harihari gauna, mauri hanaihanai, do ita abia. Namona be salamo torea tauna ena lalohadai ita abia danu, ia ese inai ane ia abia: “Oiemu hadibaia hereva be nega ibounai idia maoromaoro. Mani emu kara . . . diba bona aonega lau dekenai do oi henia, vadaeni mauri do lau davaria.” (Salamo 119:144) Namona be iseda lalona ita hadaia salamo torea tauna ia karaia hegeregerena. Ia gwau: “Lohiabada e, oi dekenai lau boiboi noho, be mani lau do oi hamauria, vadaeni oiemu hadibaia hereva do lau badinaia.” (Salamo 119:146) Oibe, Iehova ena hadibaia herevadia ita lalokau henia bada be iseda hereva bona iseda kara amo do ita hamomokania be namo.
Edena Bamona Do Oi Haere?
• Salamo torea tauna ese Iehova ena hadibaia herevadia be edena bamona ia laloa?
• Badina be dahaka Dirava ena hadibaia herevadia ita abia be namo?
• Iseda hebou be edena bamona ita idia durua Dirava ena hadibaia herevadia ita laloa lou totona?
• Iehova ena hadibaia herevadia dainai, edena daladia ai ita be inai tanobada amo ita idau?
[Picture on page 15]
Salamo torea tauna be Iehova ena hadibaia herevadia ia lalokau henia bada
[Picture on page 16, 17]
Ana ena haheitalai oi tohotohoa bona hebou oi reaia lasi, a?
[Picture on page 18]
Iehova ena hadibaia herevadia ita badinaia dainai ita idau bona ita goeva iena hesiai gaukara totona