Iehova Ena Hadibaia Herevadia ese Ita Idia Hanogaia, A?
1 Salamo ia torea tauna ese Iehova ia hanamoa, ia gwau: “Dirava ena hadibaia hereva lau laloa noho, ma lau laloa noho.” (Sal. 119:99) Heberu herevana, idia hahanaia “hadibaia herevadia,” ese ia hahedinaraia gauna be Iehova ese ita ia durua iena taravatu, iena oda, bona iena hahegani ita laloa lou totona. Bema unai heduru ita abia dae, lauma dalanai ita do idia hanogaia bona hamoalea.—Sal. 119:2.
2 Ita be Iehova ena taunimanima dainai, hanaihanai sisiba ita abia. Unai sisiba momo ita kamonai vadaeni. Ena be guna mai moale ida unai sisiba ita kamonai, to nega haida ita laloaboio. (Iam. 1:25) Mai haheauka ida Iehova be ena lalokau idia hahedinaraia hadibaia herevadia ia henia noho. Aposetolo Petero be inai hadibaia herevadia haida ia torea iseda ‘lalona do ia hagoadaia, vadaeni, mai eda laloa maoromaoro danu, Lohiabada ena taravatu do ita laloatao.’—2 Pet. 3:1, 2.
3 Siboda eda stadi karana bona hebou lao henia karana be mai anina bada gaudia, unai sisiba ita kamonai lou lou. Idia be lauma dalanai iseda goada naria karadia badadia dainai idia karaia lou lou.—1 Tim. 4:15; Heb. 10:24, 25.
4 Keristani maduna ta, haroro gaukara, be taunimanima haida ia tohoa. Hagugurua totona, do ita gaukara goada, ita lalo-goada, bona ita haheauka be gau badana. Ena be unai gaukara ese iseda goada sisina bada ia haorea, to ita “gini goada” totona ita be iseda “aena dekenai maino ena Sivarai Namona” ita atoa “tamaka bamona.”—Ef. 6:14, 15.
5 Iehova ita hesiai henia ena badina be iena taravatu ita diba sibona dainai lasi. Aposetolo Paulo ese ita ia hamaoroa lou iseda kudou ese ita ia doria dainai “inai abidadama be iseda uduna dekenai ita gwauraia hedinarai, be mauri do ita davaria.” (Roma 10:10) Bema iseda abidadama ia goada bona Iehova ena hadibaia herevadia kamonaia urana be iseda kudouna lalonai, unai ese ita do ia hagoadaia bena iena ladana do ita hanamoa.—Sal. 119:36; Mat. 12:34.
6 Kara namodia ita goadalaia neganai, ita diba unai ese moale do ia mailaia. (Had. 2:10) Paulo ia gwau moale be Iehova ena lauma ena huahua ta, bona ita tahua goadagoada bena do ita hahedinaraia badabada. (Gal. 5:22) Petero danu ia gwau bema iseda goada ibounai ita henia, iseda hesiai gaukara lalonai huahua do ita abia, bona unai ese moale do ia havaraia.—2 Pet. 1:5-8.
7 Hekwakwanai ta ese ita ia tohoa neganai, namona be aposetolo taudia edia gini auka karana ita laloatao. Idia gwau: “Ai itaia bona ai kamonai gaudia ai hunia diba lasi, aiemai uduna ai koua diba lasi.” (Kara 4:20) Ita ese inai kara namodia do ita karaia noho, badina ita laloatao, ‘unai dekena amo, ita ese mauri do ita davaria, bona ita dekenai idia kamonai taudia danu ese mauri do idia davaria.’—1 Tim. 4:16.
8 Hadibaia herevadia ita kamonai lou lou dainai ita badu lasi. To, unai davana bada gaudia ita laloa bada. (Sal. 119:129) Iehova ita tanikiu henia badina nega dikana ai ita noho lalonai, iena hadibaia herevadia ia siaia lauma dalanai ita idia hanogaia totona bona kara namodia ita karaia noho totona ita ia hagoadaia!—2 Pet. 1:12, 13.