Iseda Lalokau Tauna ta be Iehova Ia Rakatania Neganai

MARK bona Louise be Iehova ena Witnes taudia.a Idia be mai edia lalokau bada ida Baibel ena hereva be edia natudia dekenai idia hadibaia, Baibel ese Keristani tama sina ia hagoadaia hegeregerena. (Aonega Herevadia 22:6; 2 Timoteo 3:​15) Madi, edia natudia idia bada vadaeni, to haida sibona be Iehova idia hesiai henia noho. Louise ia gwau: “Iehova idia rakatania natudia totona egu kudouna ia hisihisi. Dina iboudiai lau lalohisihisi. Ma haida ese edia natudia idia kikilaia neganai, egu hemami ia dika bona lau ura lau tai.”

Oibe, ta ese Baibel ia gwauraia mauri dalana bona Iehova ia rakatania neganai, vaia ena ruma bese taudia idia lalohisihisi. Irene ia gwau, “Egu kakana kekenina lau lalokau henia bada. Dala idauidau ai ia do lau durua Iehova dekenai ia giroa lou totona!” Maria ena tadina merona be Iehova ia rakatania bena matabodaga karadia ia karaia. Maria ia gwau: “Lau lalohisihisi badina ma gau haida dekenai ia be egu tadina namona. Emai ruma bese taudia edia hebou badadia dekenai ia lau reaia.”

Dahaka Dainai Ia Lalohisihisi?

Dahaka dainai Witnes varavara taudia idia lalohisihisi bema natuna ta eiava edia lalokau tauna ma ta be Iehova ia rakatania? Badina idia diba Baibel ese ia gwauhamatalaia tanobada paradaisona bona mauri hanaihanai be Iehova idia badinaia noho taudia sibona ese do idia abia. (Salamo 37:29; 2 Petero 3:​13; Apokalupo 21:​3-5) Idia ura unai hahenamo be edia adavadia, natudia, tama sina, kakadia, tadidia, bona tubudia ese idia abia danu. Idia lalohisihisi badina idia laloa edia lalokau taudia be Iehova idia rakatania dainai, unai hahenamo do idia reaia! Danu, hari inai negai, Keristani taudia idia laloparara, Iehova ena taravatu bona hakaua herevadia be mai edia namo. Unai dainai, edia lalokau taudia be edia kara dika ena metau idia huaia neganai, idia lalohisihisi bada.​​—⁠Isaia 48:​17, 18; Galatia 6:​7, 8.

Ruma bese haida be unai hisihisi ena mamina idia diba lasi, badina edia lalokau tauna ta be Iehova ia do rakatania lasi. To unai kara ese eda mauri ibounai ia haidaua diba. Louise ia gwau: “Bema Keristani heboudia dekenai lau helai bona tama sina haida lau itaia, edia natudia ida idia kiri bona idia herevahereva neganai, lau lalohisihisi. Ai lalokau henia taudia idia noho lasi dainai, moale negadia idauidau ai ai lalohisihisi.” Keristani elda tauna ta ia gwau lagani foa gunanai, ena adavana ena natuna kekeni be idia ia rakatania vaitani. Ia gwau: “Nega momo, moale negadiai ai moale lasi. Egu adavana dekenai harihari gauna ta lau henia o wikeni ta ai gabu namona ta dekenai ai lao neganai ia tai, badina ia gwau ena natuna be ai moalelaia gauna ia reaia.”

Unai Keristani taudia idia lalohisihisi be kerere, a? Lasi. Iehova ese taunimanima ia karaia iena laulau hegeregerena dainai, reana idia be Iehova ena kara idia hahedinaraia. (Genese 1:​26, 27) Unai ena anina be dahaka? Israela taudia ese Iehova idia gwau-edeede henia neganai, Iehova ena hemami be edena bamona? Salamo 78:​38-​41 dekenai ita dibaia gauna be, Iehova ia lalohisihisi. To, mai ena haheauka ida Israela taudia ia hadibaia bona matahakani henia, bona edia dika ia gwauatao loulou bema idia helalo-kerehai. Momokani, Iehova be ia ‘karaia taudia’ ia lalokau henia bona ia rakatanidia haraga lasi. (Iobu 14:15; Iona 4:​10, 11) Iehova ese unai lalokau be taunimanima edia lalona dekenai ia atoa dainai, ruma bese taudia huanai lalokau heheni karana be ia goada diba. Unai dainai, ita hoa lasi bema taunimanima idia lalohisihisi badina edia varavara ta be Iehova ia rakatania.

Oibe, ruma bese tauna ta ese Iehova ia rakatania neganai, unai be hahetoho badana ta Iehova tomadiho henia taudia dekenai. (Kara 14:22) Iesu ia gwau, ena sivarai namona idia abia dae ruma bese taudia haida be do idia parara. (Mataio 10:​34-​38) Unai ena anina be Baibel ese ruma bese do ia hapararaia, a? Lasi, to Witnes lasi o Witnes ruma bese taudia haida be Keristani dalana idia rakatania, dadaraia, eiava dagedage henia dainai, ruma bese idia hapararaia. To, ita moale diba badina Iehova be ena hesiai taudia namodia ia rakatania lasi, bona idia Ia durua idia vara hahetoho idauidau idia haheaukalaia totona. Bema hari oi lalohisihisi badina be emu lalokau tauna ta be Iehova ia rakatania, vadaeni edena Baibel ena hakaua herevana ese oi ia durua diba, emu lalohisihisi oi haheaukalaia bona moale oi davaria totona?

Haheauka Dalana

“Do umui . . . goada . . .  Dirava ena lalokau lalonai do umui noho.” (Iuda 20, 21) Emu noho dalana dainai, reana hari oi hegeregere lasi Iehova ia rakatania ruma bese tauna ta oi durua totona. To, oi bona emu abidadama ruma bese taudia oredia be umui goada diba o umui goada noho be namo. Veronica ena natuna memerodia toi be hereva momokani idia rakatania. Veronica ia gwau: “Haida be lau bona egu adavana dekenai sisiba namona idia henia idia gwau, bema orea lalonai ai goada noho, vadaeni emai natudia idia giroa lou neganai, idia do ai abia dae bona durua diba. Boio merona be edeseniai do ia lao bema ena tamana ia noho lasi?”

Kongrigeisen lalonai oi goada noho totona, tomadiho momokani ena gaukara ibounai oi karaia be namo. Hegeregere, sediual ta oi karaia Baibel oi stadilaia namonamo bona Keristani heboudia oi lao henia totona. Emu goada hegeregerena, oi hekwarahi kongrigeisen taudia ma haida oi durua totona. Momokani, nega haida unai bamona oi karaia totona be ia auka. Veronica ia gwau: “Lauegu lalohadai ginigunana be, lau ura taunimanima amo lau komu, ia bero animal ta ia komu bamona. To egu tau ia ura tomadiho momokani ena gaukara ibounai ai goadalaia noho. Ia ese lau ia hagoadaia hebou ai lao be namo. Hebouhebou badana ta dekenai ai lao neganai, egu lalona lau hagoadaia taunimanima lau hedavari henia totona. To, hebouhebou ena program ese ai ia durua Iehova kahirakahira ai lao totona. Bona unai hebouhebou ese emai abidadama natuna ta ia hagoadaia.”

Maria, ita kikilaia vadaeni taihuna, be haroro gaukara ia goadalaia karana ese ia durua, bona hari taunimanima foa ia durua noho Baibel idia dibaia totona. Danu, Laura ia gwau: “Ena be dina ta ta ai lau tai, to Iehova lau tanikiu henia badina herevana egu natudia naria karana dekenai lau kwalimu lasi, ma tama sina haida idia kwalimu bamona, to inai nega dokona lalonai idia noho ruma bese taudia ia durua diba Baibel ena hereva namodia lau diba.” Ken bona Eleanor edia natudia idia bada neganai, kongrigeisen idia rakatania. To, Ken bona Eleanor ese edia noho dalana idia haidaua, bona Basileia harorolaia taudia be momo lasi gabu daudauna ta dekenai idia lao, bona ful-taim hesiai gaukara idia karaia. Unai ese idia ia durua gau idauidau idia laloa namonamo bona lalohisihisi karana ese idia ia hamanokaia lasi totona.

Dirava ena gwauhamata naria noho. Lalokau be “nega ibounai Dirava ena gwauhamata ia naria noho mai moale danu.” (1 Korinto 13:⁠7) Ken, ataiai ita kikilaia tadikakana ia gwau: “Emai natudia be hereva momokani idia rakatania neganai, lau laloa idia mase vadaeni. To egu taihuna kekeni ia mase neganai, egu lalohadai ia idau. Lau moale badina egu natuna idia mase momokani lasi, bona Iehova ia naria noho egu natudia be Ia dekenai idia giroa lou totona.” Oibe, ekspiriens momo ese idia hahedinaraia, hereva momokani idia rakatania taudia momo be gabeai Iehova dekenai idia giroa lou.​​—⁠Luka 15:​11-​24.

Oi gwau lasi unai be oiemu kerere. Tama sina be nega gunadia idia laloa lou neganai, idia lalohisihisi badina idia laloa edia maduna idia huaia namonamo lasi. To, Esekiela 18:20 ese ia hahedinaraia lalohadai badana be inai: Iehova be kerere tauna ena tama sina do ia panisia lasi, to kerere tauna sibona do ia panisia. Danu, ena be Aonega Herevadia bukana ena hereva momo idia gwau tama sina ese natudia idia hadibaia namonamo be namo, to unai buka ese danu natudia ia hadibaia edia tama sina idia kamonai henia bona badinaia be gau badana. Oibe, natudia edia maduna be inai: Goevadae lasi tama sina be Baibel amo hadibaia hereva idia henia neganai, natudia ese idia abia dae be namo. Reana natudia idia maragi neganai, oi hekwarahi idia oi hadibaia namonamo totona. Unai dainai, herevana oi laloa gau haida oi karaia namonamo lasi dainai ia be emu kerere, to emu lalokau natuna ese hereva momokani ia rakatania be emu kerere lasi. Bema oi karaia gaudia eiava oi karaia lasi gaudia dainai oi lalometau momo, unai be oi do ia durua lasi. To oi karaia namonamo lasi gaudia amo diba oi abia be namo, emu kara oi haidaua, bona Iehova oi noia emu dika ia gwauatao totona. (Salamo 103:​8-​14; Isaia 55:⁠7) Bena nega gunadia oi laloa lasi, to vaira negana oi laloa be namo.

Ma haida edia kara oi haheaukalaia. Bema haida be oi abia hekwakwanai idia abia lasi, reana do idia daradara edena bamona oi idia hagoadaia o durua. Momokani, taunimanima haida be hagoadaia bona durua daladia idia laloa bada, to ma haida be lasi. Unai dainai, bema haida edia hereva dainai oi badu, namona be aposetolo Paulo ena sisiba Kolose 3:​13 ai oi badinaia, ia gwau: “Bema tau ta ese iena bamona tauna ia maumauraia, ia kara dika henia dainai, namona be unai dika do ia gwauatao.”

Iehova ena matahakani dalana matauraia. Bema oiemu varavara ta be kongrigeisen amo matahakani ia abia, laloaboio lasi, Iehova be unai matahakani ia henia bona Iehova be kongrigeisen​—⁠kerere tauna danu​—⁠ena namo ia laloa bada. (Heberu 12:11) Unai dainai, elda taudia ese abia hidi idia karaia o matahakani idia henia neganai, oi maumau lasi. Laloaboio lasi, bema Iehova ena dala ita badinaia, namo do ita davaria, to bema Iehova ena dala ita dadaraia, lalohisihisi sibona do ita davaria.

Israela taudia be Aigupito amo idia roho mauri murinai, Mose be diadi gaukarana ia karaia. (Esodo 18:​13-​16) Kota lalonai, Mose be ta ia hahemaoro henia bona ma ta ia hahemaoro henia lasi neganai, reana haida be Mose dekenai idia moale lasi. Reana Mose ena hahemaoro karana idia maumauraia dainai, nega haida Mose ena hakaua dalana idia matauraia lasi. To, Iehova be Mose ia gaukaralaia Iena taunimanima ia hakaua totona, bona Ia be Mose ia durua, to gwau-edeede taudia bona gwau-edeede taudia idia durua ruma bese taudia ia panisia. (Numera 16:​31-​35) Unai amo gau ta ita dibaia, bona ita hekwarahi hari Dirava ese ia gaukaralaia elda taudia edia abia hidi ita matauraia bona durua be namo.

Hegeregere, Delores ia laloatao, guna kongrigeisen ese ena natuna kekeni ia matahakani henia neganai, ia daradara bada. Ia gwau: “Lau ia durua gauna be, Iehova ena matahakani dalana idia herevalaia buka bona magasin lau duahia loulou. Tok o magasin amo lau duahia point namodia be noutbuk dekenai lau torea, bona unai ese lau idia durua lau haheauka bona Iehova lau hesiai henia noho totona.” Ita ia durua gauna ma ta ita laloa be namo.

Emu hemami oi gwauraia hedinarai. Bema turana namona ta o rua dekenai oiemu hemami oi herevalaia, unai ese oi do ia durua oi haheauka totona. Unai bamona oi karaia totona, oi do idia durua namonamo turadia oi abia hidi be namo. To dala hereadaena be inai: Iehova dekenai “emui kudouna edia ura gaudia” oi gurigurilaia be namo.b (Salamo 62:​7, 8) Dahaka dainai? Badina Iehova be emu hemami ia diba goevagoeva. Hegeregere, reana oi mamia oi lalohisihisi be anina lasi. Gau badana be, Iehova oi do rakatania lasi. Emu hemami be Iehova dekenai oi gwauraia hedinarai, bona oi noia oi ia durua emu hisihisi oi laloa momo lasi totona.​​—⁠Salamo 37:⁠5.

Gabeai, reana emu hemami do oi biagua namonamo diba. To hari, namona be oi hekwarahi emu guba Tamana oi hamoalea noho, bona oi gwau lasi unai hekwarahi be anina lasi. (Galatia 6:⁠9) Laloaboio lasi, herevana Iehova ita rakatania, to hekwakwanai be do ita davaria noho. Bona bema Iehova ita badinaia noho, Iehova be ita do ia durua hisihisi idauidau ita haheaukalaia totona. Vadaeni, namona be oi abia dae Iehova be emu hisihisi ia diba bona nega korikori ai oi do ia hagoadaia noho.​​—⁠2 Korinto 4:7; Filipo 4:​13; Heberu 4:​16.

[Footnotes]

[Box on page 25]

Haheauka Dalana

◆ “Do umui . . . goada . . . Dirava ena lalokau lalonai do umui noho.”​​—⁠Iuda 20, 21.

◆ Dirava ena gwauhamata naria noho.​​—⁠1 Korinto 13:⁠7.

◆ Oi gwau lasi unai be oiemu kerere.​​—⁠Esekiela 18:⁠20.

◆ Ma haida edia kara oi haheaukalaia.​​—⁠Kolose 3:​13.

◆ Iehova ena matahakani dalana matauraia.​​—⁠Heberu 12:⁠11.

◆ Emu hemami oi gwauraia hedinarai.​​—⁠Salamo 62:​7, 8.

[Box/Picture on page 27]

Iehova Oi Rakatania, A?

Herevana dahaka oi karaia, to emu hetura karana Iehova ida bona mauri hanaihanai oi haboioa be namo lasi. Reana oi ura Iehova dekenai oi giroa lou. Unai bamona oi karaia totona oi gaukara goada, a? Eiava “nega korikorina” ta oi naria noho, a? Laloaboio lasi, Aramagedono be ia mai haraga noho. Ma danu, inai tanobada dekenai mauri be kwadogi bona anina lasi. Oi diba lasi kerukeru do oi noho o do oi mase. (Salamo 102:3; Iamesi 4:​13, 14) Gorere dikana ia abia tauna ta ia gwau: “Ena be Iehova lau hesiai henia noho lalonai unai gorere lau abia, to unai lau hemarailaia lasi. Bona unai be namo badina hari egu hemami ia namo.” To, mani oi laloa, bema unai tadikaka be orea lalonai ia noho lasi bona unai gorere ia abia, reana do ia gwau, “Nega ta ai, Iehova dekenai do lau giroa lou!” Bema oi be Iehova oi rakatania vadaeni, hari be nega namona Iehova dekenai oi giroa lou be namo.

[Pictures on page 24]

Tomadiho momokani ena gaukara ibounai oi goadalaia neganai, unai ese oi idia durua oi laloa namonamo totona