Iehova Ena Hereva be Ia Mauri Noho

Aonega Herevadia Bukana Ena Hereva Badadia

IDAUNEGAI Israela ena King Solomona be “aonega hereva kwadogidia ibounai 3000 ia torea.” (1 King Taudia 4:32) Unai aonega herevadia ita duahia diba, a? Oibe. Aonega Herevadia bukana be lagani 717 B.C.E. ai idia torea haorea bona Solomona ena aonega herevadia momo be unai buka lalonai idia noho. Ena karoa ginigabedia rua be Aguru Iake bona King Lemuela ese idia torea. To, haida idia gwau Lemuela be Solomona ena ladana ma ta.

Aonega Herevadia idia torea ena badina be rua​​—⁠duahia tauna dekenai “aonega bona sisiba namona” do ia henia. (Aonega Herevadia 1:⁠2) Unai hereva ese ita dekenai aonega idia henia, unai amo idia vara gaudia ita lalopararalaia bona ita abia dibana ita gaukaralaia hekwakwanai ita hamaoromaoroa totona. Idia ese ita dekenai matahakani eiava kara maoromaoro daladia idia hadibaia. Inai aonega herevadia ita duahia bona edia sisiba ita badinaia neganai, iseda kudouna ia hamarerea diba, moale do ita davaria bona iseda mauri lalonai do ita kwalimu diba.​—⁠Heberu 4:⁠12.

‘AONEGA DO OI ABIA BONA HADIBAIA HEREVA DO OI DOGOATAO’

(Aonega Herevadia 1:1–​9:​18)

Solomona ia gwau: “Kamonai! Aonega be ia boiboi noho, hanua ena huanai.” (Aonega Herevadia 1:20) Dahaka dainai iena boiboi ita kamonai be namo? Karoa 2 ese aonega abia karana ena namo momo ia gwauraia. Karoa 3 lalonai Iehova ita tura henia dalana ia herevalaia. Solomona ma ia gwau: “Gau badana momokani be aonega. Sedira do oi abia totona oiemu kohu, oiemu moni bona gau ibounai do oi negea haorea, to laloa kehoa do oi tahua bona abia. Egu hadibaia hereva do oi dogoatao, do oi rakatania lasi.”​—⁠Aonega Herevadia 4:​7, 13.

Dahaka ese ita do ia durua tanobada ena matabodaga karadia ita dadaraia totona? Karoa 5 ese haere ia henia: Do ita laloa namonamo bona tanobada ena hegahusi o laloani karadia edia toana do ita diba. Bona, matabodaga karana ena dika do ita laloa danu. Karoa 6 ese iseda hetura karana Iehova ida do idia hadikaia karadia dekenai ita ia sisiba henia. Karoa 7 be matabodaga tauna ese ia karaia karadia ia herevalaia. Karoa 8 ia hahedinaraia aonega be dava bada gauna namona. Karoa 9 ese laulau herevadia amo ita ia hagoadaia aonega ita tahua totona.

Baibel Henanadaidia Edia Haere:

1:7; 9:​10​​—⁠Edena dala ai Dirava gari henia karana be “aonega ena hamatamaia dalana”? Bema Iehova ita gari henia lasi, diba do ita abia lasi, badina Ia be gau ibounai ia Havaraia Tauna bona Baibel ia Torea Tauna. (Roma 1:20; 2 Timoteo 3:​16, 17) Iehova be diba ibounai ena Badina. Bema diba ita abia lasi, do ita aonega lasi. Unai dainai, Dirava gari henia karana be aonega ena matamaia dalana. Danu, bema tau ta ese Iehova ia gari henia lasi, ena diba do ia gaukaralaia lasi Havaraia tauna ia hanamoa totona.

7:​1, 2​​—⁠“Lauegu hadibaia hereva” be dahaka? Unai be Baibel ena hadibaia herevadia bona tama sina ese ruma bese ena namo totona idia atoa taravatu. Natudia be tama sina edia taravatu bona idia dekenai idia hadibaia Baibel ena hahediba herevadia do idia badinaia be namo.

8:​30​​—⁠“Gaukara karaia tauna” be daika? Baibel lalonai aonega be sibona ia gwauraia gaukara karaia tauna namona. Dirava ena vara guna Natuna, Iesu Keriso be tanobada dekenai ia do mai lasi neganai, laulau dalanai Baibel ese unai bamona ia gwauraia. Iehova ese gau ibounai ia do havaraia lasi neganai, Ia ese Iesu “ia karaia guna.” (Aonega Herevadia 8:22) Ia be “gaukara karaia tauna” bamona iena Tamana ida gau ibounai idia havaraia.​—⁠Kolose 1:​15-17.

9:​17​​—⁠“Idia henaoa ranu” be dahaka bona dahaka dainai ena mamina be “gaiho”? Baibel ia gwau tau ta be ena adavana ida ia mahuta hebou karana amo idia abia moalena be kohua amo ranu namona inua karana bamona. Unai dainai “henaoa ranu” be hehuni ai idia karaia matabodaga karana ia laulaulaia. (Aonega Herevadia 5:​15-17, NW ) Matabodaga karana be hehuni dekenai idia karaia bona ta ese ia davaridia lasi dainai, Baibel ia gwau iena mamina be ia gaiho.

Ita Dibaia Gaudia:

1:​10-​14. Kara dika taudia idia ura ita be idia danu kara dika ita karaia totona, ita dekenai idia gwauhamata kohu momo do ita abia. Unai dainai, namona be ita naria namonamo unai tarapu lalonai ita moru garina.

3:⁠3. Hebogahisi-mai-lalokauna, bona kara momokani ita laloa bada be namo, dava bada ageva ta be iseda ‘aiona dekenai ita kwatua’ bona hahedinaraia bamona. Danu, unai kara be iseda kudouna dekenai do ita torea, unai dala amo idia be iseda kara korikori ai do idia lao.

4:​18. Iehova amo ia mai diba be ia bada ia lao. Diari lalonai ita noho totona, manau karana ita hahedinaraia noho be namo.

5:⁠8. Matabodaga karadia ibounai​—⁠miusiki, moale karadia, Internet eiava buka bona magasin ese idia hahedinaraia gaudia danu⁠​—⁠​ita dadaraia be namo.

5:​21. Iehova ia lalokau henia tauna ta be nega sisina lalonai ia moalelaia karadia dainai, iena hetura karana Dirava momokani ida do ia dadaraia, a? Lasi! Kara maoromaoro ita badinaia noho karana ena badina badana be: Iehova ese ita karaia gaudia ia itaia bona ita do ia hahemaoro henia.

6:​1-5. Unai siri ese sisiba namona ia henia ma haida edia abiatorehai davana ita karaia ‘gwauhamatana’ ita dadaraia totona! Bema ita ese gwauhamata ta ita karaia bena gabeai ita laloa namonamo neganai ita itaia ia be aonega karana lasi, namona be mai manau ida ‘unai tau dekenai do ita lao haraga, bona do ita noia’ goadagoada unai gwauhamata amo ita do ia ruhaia.

6:​16-​19. Kara dika ibounai lalonai inai kara 7 idia hedinarai. Namona be unai kara 7 ita inai henia.

6:​20-​24. Natudia idia maragi neganai, Baibel amo idia hadibaia karana ese idia do ia gimaia bona matabodaga karadia ena tarapu lalonai do idia moru lasi. Namona be tama sina ese edia natudia be Baibel amo idia hadibaia hanaihanai.

7:⁠4. Namona be aonega bona laloa kehoa karadia ita ura henia.

ITA IDIA HAKAUA AONEGA HEREVADIA TA TA

(Aonega Herevadia 10:1–​29:⁠27)

Solomona ese aonega herevadia ta ta ia torea bona idia be kwadogi sibona. Idia be gau rua idia hahegeregerea, edia idau bona edia hegeregere dalana idia hahedinaraia. Bona unai hereva ta ta amo mai anina bada gaudia ita dibaia, iseda kara, hereva bona lalohadai ita hanamoa totona.

Karoa 10 ia lao karoa 24 ese Iehova gari henia karana ena namo ia herevalaia momo. Karoa 25 ia lao 29 ena aonega herevadia be “Hesekaia, Iuda ena king, ena orea taudia ese idia torea hanai.” (Aonega Herevadia 25:⁠1) Inai aonega herevadia ese Iehova tabekau henia karana bona mai anina bada gaudia ma haida idia hadibaia.

Baibel Henanadaidia Edia Haere:

10:6​​—⁠Edena dala ai “kara dika tauna ena dagedage karadia ese, iena hereva gwauraia dalana idia koua noho”? Anina be kara dika tauna ia ura ma haida ia hadikaia, to hereva namodia ia gwauraia ena “dagedage karadia” ia hunia totona. Eiava, anina be kara dika tauna ena kara dainai taunimanima ese idia badu henia, idia dadaraia bona idia hereva henia lasi. Unai amo iena hereva dalana idia koua.

11:31​​—⁠Kara dika taudia bona kara maoromaoro taudia be dahaka davana idia abia? Kara maoromaoro tauna be kerere ta ia karaia neganai, iena kerere davana be matahakani ia abia. To, kara dika tauna be mai ena ura ida kerere ia karaia bona ia ura lasi ena kara ia haidaua bona kara namo ia karaia. Unai dainai ia ese ‘kerere davana bada herea’ ia abia be maoro.

12:23​​—⁠Edena dala ai taunimanima ese edia “diba idia hunia”? Namo lasi ita gwau, ta ese ena ‘diba ia hunia’ ena anina be ena diba ia hahedinaraia lasi. To, unai hereva ena anina be iseda diba be mai manau ida ita hahedinaraia bona ita heagilaia lasi.

Ita Dibaia Gaudia:

10:​11-​14. Iseda hereva amo ma haida ita hagoadaia totona, namona be iseda lalona be diba maoromaorona amo ia honu, iseda kudouna be lalokau ese ia hamarerea bona iseda uduna amo aonega herevadia ita gwauraia be namo.

10:19; 12:18; 13:3; 15:28; 17:28. Bema ita ura gau ta ita herevalaia neganai, namona be ita laloa namonamo guna bona hereva momo ita gwauraia lasi.

11:1; 16:11; 20:​10, 23. Iehova ia ura bisinesi karadia dekenai do ita koikoi lasi.

11:⁠4. Namo lasi iseda nega bada be kohu tahua momo karana dekenai ita haorea, bena nega be lasi sibona iseda Baibel stadi, hebou dekenai ita lao, ita guriguri, bona haroro gaukara ita karaia totona.

13:⁠4. Kongrigeisen lalonai maduna ta eiava nega matamata lalonai do ita noho ita “ura dikadika” sibona be hegeregere lasi. Namona be do ita hekwarahi bena do ita hegeregere unai gaudia ita abia totona.

13:24; 29:​15, 21. Natuna be kerere ta ia karaia neganai, ena natuna ia lalokau henia tama o sina be do ia itaia sibona lasi. To, natuna do ia hamaoromaoroa haraga, badina ia ura lasi natuna be unai kara kerere ia manadalaia.

14:10. Nega haida iseda lalona ena hemami ita gwauraia hedinarai namonamo lasi eiava haida ese ita idia lalopararalaia diba lasi. Unai dainai ma haida ese ita idia durua eiava hagoadaia momokani diba lasi. Hekwakwanai haida ita haheaukalaia totona, Iehova sibona dekenai do ita tabekau be gau badana.

15:15; 18:14. Lalohisihisi neganai lalohadai maorona ese ita do ia durua moale ita davaria totona.

17:24. “Kavakava tauna” ena matana be gau idauidau momo ia itaia bona ena lalona ai unai gaudia ia laloa noho dainai, mai anina bada gaudia ia laloa bada lasi. To, namona be ita laloa namonamo, unai amo aonega karadia do ita karaia.

23:​6-8. Ita ura lasi ma haida dekenai heabidae karana ita hahedinaraia, to iseda lalona dekenai idia ita ura henia momokani lasi. Unai bamona kara do ita dadaraia be namo.

27:21. Lahi ese golo bona siliva ena namo ia tohoa hegeregerena, haida ese ita dekenai hanamoa herevana idia gwauraia neganai, iseda kara amo ita hahedinaraia ita be edena bamona taudia. Bema unai hanamoa herevana dainai, ita laloparara Iehova be ita dekenai hahenamo momo ia henia, bona unai ese ita ia hagoadaia Iehova ita hesiai henia noho totona, ita be manau taudia. To, bema ita laloa ita be ma haida ita hereaia, unai be hekokoroku karana.

27:​23-​27. Inai aonega herevadia ese mamoe naria gaukarana idia herevalaia bona idia hahedinaraia bema ita gaukara goada bona kohu momo lasi maurina ita noholaia, do ita moale diba. Unai hereva ese ita idia hadibaia Dirava dekenai do ita tabekau be gau badana.a

28:⁠5. Dirava ena Hereva ita stadilaia bona ita guriguri henia karana amo ‘Lohiabada ita tahua.’ Unai amo ita ese ‘kota maoromaoro ena anina do ita diba’ bona dala maorona ai Iehova ita hesiai henia diba.

SISIBA NAMODIA

(Aonega Herevadia 30:1–​31:⁠31)

Aonega Herevadia ena dokona ai sisiba namodia rua ia gwauraia. (Aonega Herevadia 30:1; 31:⁠1) Aguru ese haheitalai herevadia amo mataganigani karana ena dika bona tau ta ese koikoi dalanai kekeni ia hakererea dalana ia hahedinaraia.b Danu, ita ia sisiba henia hekokoroku karana bona badu herevadia ita dadaraia totona.

Lemuela ena sinana ese Lemuela ia sisiba henia, uaina bona kekero muramura ma haida ia gaukaralaia namonamo totona bona hahemaoro maoromaoro do ia karaia. Hahine namona ia herevalaia siridia be inai hereva amo ia hadokoa: “Unai hahine do umui hanamoa, bona davana namona do umui henia. Taunimanima ibounai ese ia do idia matauraia be namo.”​—⁠Aonega Herevadia 31:⁠31.

Namona be oi aonega, matahakani oi abia dae, Dirava oi gari henia bona Iehova dekenai oi tabekau. Aonega Herevadia ese mai anina bada herevadia idia hadibaia! Namona be inai aonega herevadia ita badinaia bona “Lohiabada dekenai ia gari tauna” ena moale do ita davaria.​—⁠Salamo 112:⁠1.

[Footnotes]

[Pictures on page 14]

Iehova be diba ibounai ena Badina