Dirava Gari Henia Karana Ita Habadaia
“Iehova garina oi gari, bona dika amo oi raka oho.”—HEREVA LADA-ISIDIA 3:7.
1. Hereva Lada-isidia buka be daidia totona idia torea?
BAIBEL ena Hereva Lada-isidia bukana lalonai, lauma dalanai sisiba namodia momo idia noho. Gunaguna, ena Israel besena ia hadibaia totona, Iehova ese unai heduru bukana ia henia. Hari inai negai, ena aonega herevadia be iena helaga Keristen besena idia durua, badina “tanobada ena dokona be kahirakahira negana [lalonai] ita noho inai.”—1 Korinto 10:11; Hereva Lada-isidia 1:1-5; 1 Petero 2:9.
2. Hari inai negai, dahaka dainai Hereva Lada-isidia 3:7 dekenai idia torea sisibana be mai anina bada?
2 Hereva Lada-isidia 3:7 ita kehoa neganai, ia gwau: “Sibomu emu aonega oi heagilaia lasi. Iehova garina oi gari, bona dika amo oi raka oho.” Iseda tamana bona sinana ginigunadia edia nega dekenai, Gaigai ese Heva ena lalona ia veria. Unai negai ia gwau “kara namona bona kara dikana do umui diba.” Unai nega amo tanobada ena aonega be hegeregere lasi taunimanima durudia totona. (Genese 3:4, 5; 1 Korinto 3:19, 20) Histori ena nega ibounai amo, hari inai nega lalonai unai be ia momokani—hari inai “nega dokonai,” taunimanima be Dirava ia noho lasi herevana idia gwauraia dainai, evolusen lalohadaina, bese idauna dadaraia karana, dagedage, bona kara bodaga idauidau momo dainai edia huahua idia davaria. (2 Timoteo 3:1-5, 13; 2 Petero 3:3, 4) Hari inai negai, ‘tanobada dalana matamatana be mai ena heiriheiri’ bona UN oreana bona tanobada ena lalo-tamona lasi tomadiho oreadia idia goada lasi unai heiriheiri idia kokia totona.
3. Hari inai nega totona, idia perovetalaia gaudia be dahaka?
3 Dirava ena peroveta Hereva ese ita ia hadibaia demoni edia siahu be “tanobada edia king ibounai dekenai idia lao. Vadaeni unai king ibounai do idia haboua, Siahu Ibounai Diravana ena Dina Badana neganai do idia tuari hebou totona. . . . Inai gabu ena ladana Heberu gado dekenai be Aramagedono.” (Apokalupo 16:14, 16) Daudau lasi Iehova ese unai pavapava, eiava lohia taudia dekenai hagaria gaudia do ia siaia. Do idia gari dikadika, gunaguna, Iosua bona Israel taudia ese idia hahemaoro henidia totona Kanana taudia dekenai idia mai bona idia hagaridia dikadika bamona. (Iosua 2:9-11) To, hari inai negai, Iosua ia laulaulaia tauna, Keriso Iesu—“king ibounai edia King, bona lohia ibounai edia Lohia”—ese ‘tanobada bese ibounai tuari dekenai do ia halusia bona idia do ia biagua auka herea, mai ena auri itotohina,’ unai amo ia ese “Siahu Ibounai Dirava ena badu” do ia hahedinaraia.—Apokalupo 19:15, 16.
4, 5. Daidia ese hahemauri do idia abia, bona dahaka dainai?
4 Unai nega lalonai daidia ese hahemauri do idia davaria? Hahemauri do idia abia taudia be idia gari dikadika taudia lasi, to mai hemataurai danu Iehova garina idia gari taudia iboudiai ese hahemauri do idia abia. Sibodia edia aonega idia heagilaia lasi, idia be ‘dika amo idia raka oho.’ Mai edia manau danu, namo gaudia amo edia lalona idia hahonua, unai neganai edia lalona dekena amo dika gaudia idia luludia. Siahu Ibounai Lohiabadana, Iehova, “tanobada ibounai ena kota naria tauna” idia matauraia bada; daudau lasi ia ese kara dika idia karaia taudia iboudiai do ia hamasedia, gunaguna kara bodaga idia karaia Sodoma taudia ia hamasedia hegeregerena. (Genese 18:25) Oibe, Dirava ena taunimanima dekenai “Iehova gari henia karana be mauri ena lohilohi ranu gurina bamona, unai amo mase ena idoa ai do ita vareai lasi.”—Hereva Lada-isidia 14:27.
5 Dirava ena hahemaoro dinana lalonai, Iehova idia ura lasi habadua taudia iboudiai ese ia idia tomadiho henia, bena Hereva Lada-isidia 3:8 ena haheitalai hereva ena momokani do idia diba, ia gwau: “[Iehova gari henia karana] be emu hidio hamauria gauna, bona emu turiana ia hagoadadia.”
Iehova Ladana Hanamoa
6 Mai moale danu Iehova ita gari henia, bona ita lalokau henia bada dainai, namona be unai ese ita ia hagoadaia Hereva Lada-isidia 3:9 ena hereva ita badinaia totona, ia gwau: “Oiemu gau namodia amo bona oiemu uma ena huahua ginigunana amo Iehova oi hanamoa.” Iseda kohu amo Iehova ita hanamoa totona ita idia doria lasi. Namona be mai iseda ura danu do ita henia, Esodo 35:29 ia lao Deuteronomi 23:23 ai, nega 12 bamona ia hahedinaraia idaunegai Israel lalonai, mai edia ura danu boubou gaudia idia henia. Iehova dekenai ita henia huahua ginigunadia be iseda gau hereadaedia be gau badana, badina ia ese namo bada bona lalokau mai hebogahisina ita ia henia dainai. (Salamo 23:6) Namona be ita henia gaudia amo ia hedinarai ‘Basileia bona iena kara maoromaoro do ita tahua guna.’ (Mataio 6:33) Iseda kohu namodia amo Iehova ita hanamoa neganai, dahaka do ia vara? “Oiemu aniani haboua rumadia be aniani momo amo do idia honu; bona emu vine ranu be edia uro idia hahonua momokani dainai tano dekenai idia moru diho.”—Hereva Lada-isidia 3:10.
7. Iehova dekenai ita henia huahua gaudia ginigunadia be dahaka, bona murinai dahaka do ia vara?
7 Iehova ese lauma dalanai ita ia hanamoa bada. (Malaki 3:10) Unai dainai, lauma dalanai ia ita henia huahua ginigunadia do idia momo be namo. Iena ura ita karaia totona, namona be iseda nega, goada, bona mauri ena goada ibounai ita henia. Unai kara ese ita do ia hagoadaia, gunaguna unai kara be “aniani” bamona Iesu ia hagoadaia hegeregerena. (Ioane 4:34) Lauma dalanai iseda aniani haboua rumadia do idia honu, bona iseda moale be vine ranu matamatana ese ia laulaulaia gauna bamona, do ia honu bona ia bubua diho. Ma danu, dina ta ta iboudiai, mauri durua gaudia ita abia totona, mai iseda abidadama danu ita guriguri, bona tanobada ibounai dekenai Basileia haroro gaukara durua totona, iseda kohu amo harihari gaudia momo ita henia noho be namo. (Mataio 6:11) Ita dekenai idia noho tanobada kohu iboudiai be iseda lalokau guba Tamana amo ita abia. Bema iena ladana hanamoa totona unai kohu ita gaukaralaia bada, ia ese ita dekenai hahenamo momo do ia bubua.—Hereva Lada-isidia 11:4; 1 Korinto 4:7.
Lalokau Ena Sisiba
8 Hereva Lada-isidia karoa 3, siri 11 bona 12 dekenai, Dirava idia abia dae ruma besena lalonai, mai edia moale tamana bona ena natuna huanai, bona tanobada dekenai Iehova bona ena lalokau lauma natudia huanai, ia noho hetura karana ia herevalaia. Ita duahia, ia gwau: “Natugu e, Iehova ena sisiba oi dadaraia lasi; oi ia sisiba henia neganai oi hesiku lasi; badina be Iehova ese ia lalokau henia tauna ia sisiba henia, tamana ese iena lalokau natuna ia sisiba henia bamona.” Tanobada taudia be sisiba idia ura henia lasi. To, Iehova ena taunimanima ese sisiba idia abia dainai idia moale be namo. Aposetolo Paulo be Hereva Lada-isidia amo inai hereva ia abia hanai, ia gwau: “Lauegu natuna e, Lohiabada [Iehova] ena matakani do oi negea lasi, Ia ese oi ia sisiba henia neganai, do oi manoka lasi. Badina be Lohiabada ese ia ura henia tauna ia matakani henia. . . . Tamana ese metau bona hisihisi ita dekenai ia henia neganai iseda lalona idia hisihisi, bona ita be moale lasi. To gabeai, inai matakani ese idia ia hamaoromaoroa vadaeni taudia ese kara maoromaoro ena davana namona mai maino danu do idia davaria.”—Heberu 12:5, 6, 11.
8, 9. Heduru hereva bona sisiba be edena bamona ita laloa be namo?
9 Oibe, ena be heduru hereva bona sisiba ita abia iseda tamana bona sinana amo, Keristen kongregesen amo, eiava sibona ita stadilaia herevadia ita lalodia namonamo amo, to ita ta ta iboudiai idia hadibaia neganai unai be namo. Sisiba hereva ita badinaia be gau badana, ita mase garina, badina Hereva Lada-isidia 4:1, 13 ia gwau: “Natudia e, tamana ena sisiba umui kamonai henia bona umui laloa namonamo, lalo-parara umui abia totona. Sisiba oi dogoatao; oi negea lasi. Oi naria namonamo, badina emu mauri ena badina be unai.”
Moale Hereadaena
10 Murinai, hereva namodia idia gwauraia, oibe, ‘hereva namodia bona hereva momokani ena hereva maorodia’! (Kohelete 12:10) Lauma helaga ena siahu amo Solomon ese moale momokani dalana ia gwauraia hedinarai. Namona be unai hereva be iseda lalona momokani dekenai idia diho. Ita duahia, idia gwau:
10, 11. Hereva Lada-isidia 3:13-18 ena hereva namodia haida be dahaka?
11 “Aonega ia davaria tauna be ia moale, bona lalo-parara ia abia tauna danu; badina be unai gau amo idia abia ahuna ese siliva amo idia abia ahuna ia hereaia, bona ena davana ese golo ia hereaia. Ena davana ese herahera nadidia edia davana ia hereaia, bona oi moalelaia gaudia ta be ia ida do idia hegeregere lasi. Mauri daudauna be iena imana idibana dekenai; taga bona hairai be iena imana laurina dekenai. Ena dala be moale daladia, iena dala iboudiai be maino daladia. Ia be mauri auna hegeregerena, idia dogoatao taudia dekenai; idia dogoatao namonamo taudia be moale taudia idia gwauraidia.”—Hereva Lada-isidia 3:13-18.
12. Aonega bona lalo-parara be edena bamona ita idia durua be namo?
12 Aonega—nega 46 unai hereva be Hereva Lada-isidia bukana dekenai idia gwauraia! “Iehova gari henia karana be aonega ena matamana.” Unai aonega be Dirava ena amo, bona iena taunimanima ese Dirava ena Hereva amo unai diba idia abia neganai, idia gaukaralaia diba Satana ena tanobada dekenai idia vara hekwakwanai dikadia idia hanaidia totona. (Hereva Lada-isidia 9:10) Nega 19 Hereva Lada-isidia dekenai idia gwauraia gauna, lalo-parara, be aonega ena turana bamona, bona ita ia durua Satana ena kara ita tuari henidia totona. Unai Inai Tauna badana be lagani tausen momo lalodiai ena kara dikadia havaraia daladia ia manadalaia momokani. To Dirava dekena amo ita abia lalo-parara karana be ita ia hadibaia gauna hereadaena, unai neganai dala maorona bona dala kererena edia idau ita lalo-pararalaia bona dala maorona ita abia hidi diba. Iehova ese iena Hereva dekena amo ita dekenai unai ia hadibaia.—Hereva Lada-isidia 2:10-13; Efeso 6:11.
13. Moni bada lasi negana lalonai, dahaka ese ita ia naria, bona edena dala amo ita ia durua?
13 Hari inai negai, tanobada dekenai heiriheiri ia noho badina taunimanima dekenai moni be bada lasi dainai, bona unai ese Esekiel 7:19 ena peroveta herevana ia hagugurua hamatamaia, ia gwau: “Edia siliva be dala dekenai do idia negea, bona sibodia edia golo be bodaga gauna ai do ia lao idia dekenai. Edia siliva bona edia golo ese idia hamauridia diba lasi Iehova ena badu dinana lalonai.” Tanobada ibounai ena taga ena namo ese mauri havaraia aonega bona lalo-parara karadia edia namo ia hanaia lasi. Ma nega ta dekenai, aonega Pavapava Solomon, ia gwau: “Aonega ese taunimanima ia naridia moni ese ia naridia bamona; to diba ena hahenamo be inai: Aonega idia abia taudia be ia ese ia hamauridia.” (Kohelete 7:12) Hari inai negai, Iehova ena dala namodia dekenai idia raka taudia iboudiai idia moale, bona Iesu ia henia boubou karana dekenai idia abidadama taudia be mai aonega danu “mauri daudauna,” Dirava ese ia henia mauri hanaihanai harihari gauna unai, ena dala idia abia hidi!—Hereva Lada-isidia 3:16; Ioane 3:16; 17:3.
Aonega Momokani Kara Habadaia
14 Ita taunimanima, be Dirava toana bamona ai idia karaia ita vara dainai, namona be ita goada karaia aonega bona lalo-parara karadia ita manadalaia totona, badina Iehova ese gau ibounai ia havaraia neganai, unai karadia ia hahedinaraidia. “Iehova sibona ena aonega amo tanobada ia karaia. Lalo-parara amo guba ia karaia.” (Hereva Lada-isidia 3:19, 20) Ia ese mauri gaudia ia havaradia, taunimanima idia daradaralaia evolusen dalana amo idia vara lasi, to ia ese “ta ta edia orea, edia orea hegeregerena” ai ia havaradia bona mai aonega badina ta totona. (Genese 1:25) Gabeai, taunimanima ia havaradia neganai, edia diba bona edia kara be animal edia diba bona kara ia hereaia momokani, unai neganai reana guba dekenai Dirava ena natudia, ena aneru unai, edia moale boiboina be bada herea momokani. (Iobu 38:1, 4, 7 itaia danu.) Tanobada dekenai ia havaraia gaudia dekena amo ita diba Iehova be mai ena lalo-parara, ia laloa namonamo, ia be mai ena aonega bona lalokau.—Salamo 104:24.
15. (a) Dahaka dainai aonega sibona ita habadaia be hegeregere lasi? (b) Hereva Lada-isidia 3:25, 26 ese ita edena bamona ia hagoadaia be namo?
15 Iehova ena aonega bona lalo-parara kara tohotohoa karana do ita habadaia be namo, to unai sibona lasi, namona be unai kara ita badinaia noho danu, iena Hereva stadilaia karana do ita hesikulaia lasi. Ita dekenai sisiba ia henia, ia gwau: “Lauegu natuna e, aonega namona bona lalo-parara oi dogoatao auka herea. Emu matana ena amo idia boio lasi; bona idia be oiemu tauanina ena mauri bona gau hairaina oiemu aiona dekenai.” (Hereva Lada-isidia 3:21, 22) Unai neganai, ena be Satana ena tanobada dekenai, henaohenao tauna bamona “karaharaga hisihisi dika momokani” dinana do ia mai, to ita noho-namo bona lalo-maino dekenai ita raka noho diba. (1 Tesalonika 5:2, 3) Hisihisi badana ena nega lalonai, “Hahegari gauna garina do oi gari lasi, eiava kara dika taudia latadiai do ia mai lai-gubana garina do oi gari lasi. Badina be Iehova sibona do oi abidadama henia. Ia ese oiemu aena do ia naria, idoa dekenai do oi atoa lasi totona.”—Hereva Lada-isidia 3:23-26.
Kara Namo Ura Henia
16 Hari be nega namona Basileia ena sivarai namona tanobada ena bese ibounai dekenai ita harorolaia goadagoada totona. To unai haroro gaukara karaia sibona lasi, namona be Keristen ena kara ma haida do ita karaia danu, Hereva Lada-isidia 3:27, 28 dekenai ia gwauraia bamona, ia gwau: “Ia maoro namo do idia abia taudia dekenai namo karana do oi koua lasi, bema mai emu dala neganai namo do oi henia. Emu dekena tauna dekenai oi gwau lasi, ‘Oi lao, kerukeru do oi giroa mai bena oi do lau henia,’ to oi dekenai unai gau ia noho.” (Iakobo 2:14-17 itaia danu.) Tanobada ena kahana badana dekenai ogogami bona doe idia noho, bona ita dekenai taunimanima idia boiboi iseda dekena taudia, lauma dalanai iseda tadikaka danu, ita durudia totona. Iehova ena Witness taudia ese dahaka idia karaia?
17-19. (a) Lagani 1993 ai, heduru kara badana be dahaka, bona dahaka ia vara? (b) Dahaka ese ia hahedinaraia iseda tadikaka ‘idia kwalimu’?
17 Haheitalai ta be inai: Hari lagani lalonai, guna idia gwauraia Yugoslavia tanona dekena amo idia boiboi, heduru idia abia haraga totona. Idau tanodia amo iseda orea taudia ese idia durudia bada. Lagani gunana ena keru bada negana lalonai, dala ia kehoa dainai, taraka haida mai edia heduru kohudia be tuari gabuna dekenai idia vareai diba, bena idia ese buka bona magasin matamatadia, keru ia koua dabuadia, aniani, bona muramura be idia dabu Witness taudia dekenai idia henia. Nega ta ai, tadikaka ese heduru kohu ena metau be 15 ton idia vareailaia gwauraia neganai, idia henanadai gwaumaoro pepana idia abia totona, to unai pepa idia abia neganai, ia gwau 30 ton idia vareailaia diba! Vadaeni, karaharaga Iehova ena Witness taudia Austria dekenai ese mai edia kohu taraka ma toi idia siaia. Unai kohu ena metau 25 ton be idia siaia gabuna korikori dekenai ia ginidae. Unuseniai tadikaka bona taihu ese unai tauanina bona lauma kohudia idia davaria dainai idia moale bada herea!
18 Unai heduru gaudia idia davaria taudia edia lalohadai be dahaka? Hari inai lagani lalonai, elda ta ia torea, ia gwau: “Sarajevo dekenai tadikaka bona taihu idia do mauri noho bona idia gorere lasi, bona mai anina bada gauna be inai, lauma dalanai ai goada noho dainai inai tuari kavakavana ai haheaukalaia diba. Aniani dekenai ai hekwarahi bada. Ai totona umui hekwarahi bada dainai, namona be Iehova ese umui do ia hanamoa bada. Gavamani ena siahu taudia ese Iehova ena Witness taudia dekenai idia hemataurai, badina edia mauri dalana ia namo bona idia ese gavamani taudia idia matauraidia dainai. Lauma aniani ai dekenai umui siaia dainai ai moale bada danu.”—Salamo 145:18 itaia danu.
19 Ena be unai tadikaka bona taihu ese dika idia davaria diba, to edia moale hahedinaraia dalana ta be mai goada danu haroro gaukara idia karaia noho. Edia dekena taudia momo be idia dekenai idia mai Baibel stadi idia ura abia dainai. Tuzla siti dekenai, heduru kohu ena metau 5 ton idia siaia, bona unai hua lalonai pablisa taudia 40 ese haroro gaukara dekenai idia ta ta idia negea hora ena averes be 25, idia ese kongregesen ena pioneer taudia 9 idia durudia bada. Iesu ena Memorial hebouna dekenai idia mai taudia be 243. Unai ita lalokau henidia tadikakadia bona taihudia dekenai inai hereva be ia momokani, ia gwau: “Keriso ese ita ia lalokau henia, bona ia dainai do ita kwalimu momokani.”—Roma 8:37.
20. Guna idia gwauraia Soviet Union dekenai, “ibounai ta ta be hegeregere do idia noho” dalana be dahaka?
20 Guna idia gwauraia Soviet Union dekenai, heduru aniani bona keru koua dabuadia momo herea be taraka dekena amo idia siaia, to unuseniai tadikaka idia haroro goadagoada danu. Inai bamona, Moscow dekenai, hari lagani lalonai, Memorial hebouna dekenai idia lao taudia iboudiai be 7,549, to lagani gunana 3,500 idia lao. Ia hanaia lagani tamona lalonai, unai siti dekenai kongregesen ena namba be 12 amo idia daekau 16 dekenai. Guna idia gwauraia Soviet Union (Baltic States idia duahia lasi) lalonai, kongregesen edia namba be 14 pesen amo ia bada, Basileia pablisa edia namba be 25 pesen amo ia bada, bona pioneer edia namba be 74 pesen amo ia bada. Unai be gaukara goadagoada bona sibona edia ura dadaraia karadia momokani! Unai be Keristen ginigunadia edia negai bamona, “ibounai ta ta be hegeregere do idia noho.” Tauanina bona lauma dalanai kohu idia abia Keristen taudia be mai edia ura danu harihari gaudia momo idia siaia idia dabu taudia dekenai, bona idia dabu taudia edia haroro goadagoada karana ese kohu siaia taudia ia hamoaledia bona ia hagoadadia.—2 Korinto 8:14.
Dika Karadia Inai Henia!
21 Hereva Lada-isidia ena karoa ihatoina lalonai, hahegeregerea hereva haida ia gwauraidia, bena ena hereva dokona be inai: “Dagedage tauna do oi mama henia lasi, ena dala do oi abia hidi lasi. Badina kara koikoi tauna be Iehova ese ia inai henia bada, to kara maoromaoro taudia Ia tura henidia. Iehova ese kara dika tauna ena ruma dekenai dika ia gwauraia; to kara maoromaoro tauna ena ruma dekenai hanamoa hereva ia gwauraia. Hevaseha taudia do ia kirikirilaidia; to manau taudia do ia lalo-namo henidia. Aonega taudia davadia be hahenamo, to kavakava taudia do ia hahemaraidia.”—Hereva Lada-isidia 3:29-35.
22. (a) Kavakava taudia do idia davaria davana dikana ita abia garina, dahaka do ita karaia? (b) Aonega taudia be dahaka idia inai henia, bona dahaka kara idia habadaia, bona dahaka davana namona do idia abia?
22 Kavakava taudia huanai ita noho garina dahaka do ita karaia diba? Dika ita inai henia be gau badana, oibe, Iehova ia inai henia gaudia ita inai henidia—unai be hari dagedage bona rara bubua tanobadana ena koikoi kara iboudiai. (Hereva Lada-isidia 6:16-19 itaia danu.) Namona be ita idau, kara namodia ita tahudia—kara goeva, kara maoromaoro, bona manau—unai neganai hemataurai bona Iehova gari henia karadia amo do ita davaria gaudia be “taga bona hairai bona mauri.” (Hereva Lada-isidia 22:4) Ita ibounai ese unai davana namona do ita davaria bema mai iseda abidadama danu inai sisiba ita badinaia: “Iehova oi abidadama henia mai emu lalona ibounai ida.”
Emu Hereva be Dahaka?
◻ Inai stadi ena siri badana ena anina hari inai negai be dahaka?
◻ Edena dala amo Iehova ena ladana ita hanamoa diba?
◻ Dahaka dainai sisiba hereva ita dadaraia be dika?
◻ Moale hereadaena be edeseniai do ita davaria diba?
◻ Namo karadia ita ura henidia bona dika karadia ita inai henidia dalana be dahaka?
6. Hereva Lada-isidia 3:9 ena hereva ita badinaia totona dahaka ese ita ia hasiahua be namo?
14. Iehova ese aonega hereadaena ia hahedinaraia daladia be dahaka?
16. Keristen taudia idia haroro goadagoada mo sibona lasi, to ma dahaka do idia karaia danu be namo?
21. Hereva Lada-isidia karoa 3 ena hereva ginigabedia dekenai, aonega bona kavakava taudia edia idau be edena bamona ia gwauraia?
[Picture on page 18]
Edia kohu amo Iehova dekenai boubou gaudia namodia idia henia taudia ese hahenamo bada do idia davaria