Headava Maorona—Dirava Bona Taunimanima Vairanai
‘Headava aria ta idia karaia Kana dekenai bona Iesu, mai ena diba tahua taudia danu idia boiria.’—IOANE 2:1, 2.
1. Iesu ese Kana dekenai ia karaia sivaraina amo dahaka ita dibaia?
DIRAVA ena taunimanima huanai, headava namona ese moale ia havaraia, bona Iesu, iena sinana, bona hahediba taudia be unai idia diba. Headava aria ta dekenai Keriso ese ena hoa karana ginigunana ia karaia, bona unai amo unai aria ena moale ia habadaia. (Ioane 2:1-11) Idia ura headava bona mai moale ida Iehova idia hesiai henia Keristani taudia rua edia headava dekenai reana oi lao vadaeni bona oi moalelaia. Eiava reana oi be emu headava ena palani oi karaia eiava oi ura emu turana oi durua ena headava negana ia moalelaia totona. Edena dala ai, ta be ena headava negana ia moalelaia diba?
2. Baibel ese headava dinana be edena bamona ia gwauraia?
2 Keristani taudia idia diba Baibel ena sisiba herevadia ese idia ura headava taudia do ia durua bada. (2 Timoteo 3:16, 17) To, Baibel ese Keristani taudia idia headava dalana ibounai ia gwauraia hedinarai goevagoeva lasi. Unai ita lalopararalaia diba, badina nega bona gabu idauidau ai idia noho taudia edia kastom eiava taravatu be idauidau. Hegeregere, idaunegai Israela tauna ta ia headava neganai, gau momo idia karaia lasi. Headava dinana ai, tau ese iena ruma eiava iena tamana ena ruma dekenai ia adavaia gwauraia hahine ia hakaua lao. (Genese 24:67; Isaia 61:10; Mataio 1:24) Unai kara ese ia hamomokania idia ruaosi idia headava vadaeni. Unai headava dalana be hari tano momo ai idia karaia headava bamona lasi.
3. Iesu be edena aria dekenai ia lao bona heduru ia henia?
3 Israela taudia idia abia dae, unai dala ai tau bona hahine idia headava. Unai murinai, reana headava negana idia moalelaia totona aria ta idia karaia, Ioane 2:1 ese ia gwauraia bamona. (Mataio 22:2-10; 25:10; Luka 14:8) Baibel ese ia hahedinaraia goevagoeva, Iesu be Iuda taudia edia headava ariana dekenai ia noho bona heduru ia henia. To mai anina bada gauna be inai: Iesu ena negai idia karaia headava dalana be hari idia karaia headava dalana amo ia idau.
4. Keristani taudia haida idia ura edena dala ai edia headava idia karaia, bona dahaka dainai?
4 Hari tano momo dekenai, idia ura headava Keristani taudia ese gavamani ena taravatu haida idia badinaia be namo. Unai murinai, taravatu hegeregerena idia headava diba. Bona diadi ta, taoni naria tauna, eiava gavamani ese ia abia hidi dubu tauna ta ese unai headava ia karaia diba. Haida idia ura unai bamona dala ai idia headava, to danu reana varavara eiava Keristani turadia haida idia noia edia headava idia witnes, eiava unai mai anina bada negana idia moalelaia hebou totona. (Ieremia 33:11; Ioane 3:29) Unai hegeregerena, Keristani taudia ma haida be reana idia ura lasi headava aria badana idia karaia, badina palani momo do idia karaia bona moni bada do idia negea. To, aria maragina idia karaia bena edia turadia haida sibona idia boiria. Herevana ita ura edena dala ai iseda headava ita karaia, to namona be inai ita diba, lo Keristani taudia ma haida edia lalohadai be iseda amo do ia idau.—Roma 14:3, 4.
5. Dahaka dainai Keristani taudia momo idia ura edia headava dinana ai Baibel ena tok idia kamonai, bona unai tok lalonai dahaka idia herevalaia?
5 Keristani headava taudia momo idia ura edia headava dinana ai, Baibel ena tok idia kamonai.a Idia laloparara Iehova ese headava ia havaraia, bona Iena Hereva lalonai sisiba namodia ia henia, unai amo headava ia namo bona moale ia havaraia. (Genese 2:22-24; Mareko 10:6-9; Efeso 5:22-33) Headava taudia momo idia ura edia Keristani turadia bona varavara ida unai nega idia moalelaia hebou. To, gavamani ena taravatu, headava karaia daladia, bona kastom idauidau be edena bamona ita laloa? Inai stadi lalonai, ita ese tanobada ena gabu idauidau dekenai idia karaia headava daladia idauidau do ita herevalaia. Idia haida be emu gabu ai idia karaia headava daladia amo idia idau. To, Dirava ena hesiai taudia ese idia badinaia mai anina bada daladia, bona hakaua herevadia do oi itaia.
Headava Maorona be Taravatu Hegeregerena
6, 7. Dahaka dainai taravatu hegeregerena ita headava be namo, bona edena dala ai unai ita karaia diba?
6 Ena be Iehova ese headava ia havaraia, to gavamani danu be mai ena taravatu haida headava karaia dalana dekenai. Unai be maoro. Iesu ia gwau: “Kaisara ena gaudia umui henia Kaisara dekenai, Dirava ena gaudia umui henia Dirava dekenai.” (Mareko 12:17) Unai hegeregerena, aposetolo Paulo ia gwau: “Taunimanima ibounai ese gavamani do idia kamonai henia. Badina be gavamani ta ia noho diba lasi bema Dirava ia ura lasi neganai. Gavamani ena siahu be Dirava ese ia henia.”—Roma 13:1; Tito 3:1.
7 Tano momo ai, Kaisara eiava gavamani ese gwaumaoro ia henia daika be ia hegeregere ia headava totona. Unai dainai, bema Keristani taudia rua be Baibel ena taravatu idia badinaia bona idia ura idia headava, gavamani ena taravatu idia laloa be namo. Unai idia karaia totona headava ena laiseni ta do idia abia, eiava gavamani ese gwaumaoro ia henia tauna ese edia headava ia karaia, eiava headava idia rejista. Kaisara Augusto ese hereva ia siaia taunimanima ese edia ‘ladana do idia torea’ eiava rejista neganai, Maria bona Iosepa ese unai hereva idia badinaia bona Betelehema dekenai idia lao.—Luka 2:1-5.
8. Iehova ena Witnes taudia ese edena bamona kara idia dadaraia, bona dahaka dainai?
8 Keristani taudia rua be taravatu hegeregerena idia headava neganai, Dirava ena matanai unai be maoro. Unai dainai, idia headava vadaeni Iehova ena Witnes taudia ese edia headava idia karaia lou lasi, eiava edia headava ena lagani 25 o 50 idia moalelaia neganai, headava gwauhamatana idia gwauraia lou lasi. (Mataio 5:37) (Dubu haida idia gwau, headava pepa sainia karana be maoro lasi, to pris eiava dubu tauna ta ese headava ia karaia be maoro.) Tano momo dekenai, gavamani ese Iehova ena Witnes tauna ta ia abia hidi headava ia karaia totona. Unai ia karaia murinai, Kingdom Hall dekenai headava ena tok do ia henia danu. Unai be gabu maorona headava ena tok ia henia totona, badina Iehova Dirava ese headava ia havaraia.
9. (a) Keristani taudia rua be edia headava pepana idia sainia murinai, dahaka idia karaia diba? (b) Headava dinana ena palani idauidau lalonai, elda taudia edia gaukara be dahaka?
9 Tano ma haida dekenai, tau bona hahine be gavamani ena opesi ta dekenai idia headava, eiava gavamani ia abia hidi tauna ese edia headava ia karaia diba. Unai murinai bema Keristani taudia idia ura, dala idia karaia diba unai dina ai eiava murina dinanai Kingdom Hall dekenai headava ena tok idia kamonai totona. (Idia ura lasi dina momo ia ore bena Kingdom Hall dekenai Baibel ena tok idia kamonai, badina idia be Dirava bona taunimanima vairanai—Keristani kongrigeisen vairanai danu—idia headava.) Bema tau bona hahine be edia headava ena pepa idia sainia, bona idia ura Kingdom Hall dekenai headava ena tok idia kamonai, namona be nega bada ia do noho lalonai Kongrigeisen Hesiai Komiti amo gwaumaoro idia abia guna. Namona be elda taudia idia itaia unai taudia rua edia kara be namo, bona headava negana ese kongrigeisen hebou ena nega bona program ma haida ena nega ia hadikaia lasi. (1 Korinto 14:33, 40) Danu, elda taudia ese Kingdom Hall gaukaralaia dalana be tau bona hahine ida do idia herevalaia, bona do idia abia hidi, hadibaia hereva do idia gwauraia eiava lasi.
10. Bema Keristani tau bona hahine be headava pepana idia sainia vadaeni, headava ena tok edena bamona?
10 Headava ena tok ia henia elda tauna be mai hemataurai ida bona hagoadaia dalanai unai tok do ia henia. Bema Keristani tau bona hahine be gavamani ena taravatu hegeregerena headava pepana idia sainia vadaeni, namona be elda tauna ese idia hebou taudia do ia hadibaia, unai tau bona hahine be gavamani ena taravatu hegeregerena idia headava vadaeni. To bema headava pepana sainia negana ai gwauhamata idia gwauraia lasi, reana elda tauna ese headava ena tok ia henia neganai, gwauhamata herevana idia gwauraia.b Bema unai ibounai idia karaia vadaeni, to headava taudia idia ura Iehova bona kongrigeisen vairanai gwauhamata idia gwauraia lou, namona be idia gwauraia dalana amo idia hahedinaraia, unai gwauhamata be idia gwauraia vadaeni.—Mataio 19:6; 22:21.
11. Gabu haida dekenai tau bona hahine be edena bamona idia headava, bona unai ena anina be dahaka headava ena tok dekenai?
11 Gabu haida ai, tau bona hahine be headava gwauhamatana idia gwauraia lasi eiava gavamani ese ia abia hidi tauna ese edia headava ia karaia lasi. To idia sibona be headava ena rejista pepana ta idia sainia bona gavamani ena gaukara tauna dekenai unai pepa idia henia neganai, idia headava unai. Unai murinai, headava setifiket idia rejista. Unai ese ia hamomokania unai tau bona hahine idia headava vadaeni, bona setifiket dekenai ia noho deit be edia headava dinana. Ataiai ita herevalaia bamona, idia headava taudia matamatadia ese edia headava idia rejista murinai, reana do idia ura Kingdom Hall dekenai Baibel ena tok ta idia kamonai. Unai tok do ia henia lo tadikaka ese hebou taudia ibounai do ia hadibaia, unai headava taudia be edia headava idia rejista vadaeni. Bema gwauhamata herevadia do idia gwauraia, namona be paragraf 10 bona ena futnout dekenai idia noho gwauhamata herevana idia gwauraia diba. Kingdom Hall ai idia hebou taudia be idia headava taudia ida do idia moale hebou bona Baibel ena sisiba herevadia amo namo bada do idia abia.—Solomona ena Ane 3:11.
Headava Pepa Sainia Karana Bona Kastom Headava
12. Kastom dalanai headava ena anina be dahaka, bona unai bamona headava murinai dahaka idia karaia be namo?
12 Tano haida dekenai, tau bona hahine be kastom dalanai idia headava. To inai kastom headavana be headava lasi tau bona hahine idia noho hebou kava karana ai herevalaia lasi. Ena be gabu haida dekenai unai bamona noho hebou karana idia abia dae, to ia be taravatu hegeregerena lasi.c To ai be taunimanima ese idia abia dae kastom headavana ai herevalaia. Unai bamona headava dekenai, tau ese hahine ena davana ia karaia, bona Baibel bona gavamani ena taravatu dekenai unai headava karana be maoro. Gavamani ese unai bamona kastom headavana ia abia dae. Nega momo kastom headava murinai, tau bona hahine ese edia headava idia rejista, unai amo setifiket ta idia abia. Rejista karana be ia namo, badina unai ese headava taudia, natudia, eiava hahine (ia vabu neganai) do ia gimaia. Kongrigeisen ese kastom dalanai idia headava taudia idia hagoadaia, edia headava do idia rejista haraga totona. Mose ena taravatu henunai, headava negana bona vara dinana be buka dekenai idia torea.—Mataio 1:1-16.
13. Kastom headava murinai, headava ena tok do idia henia eiava?
13 Tau bona hahine be kastom dalanai idia headava neganai, idia be headava taudia ai idia lao. Ataiai ita herevalaia bamona, unai headava tau bona hahine be reana do idia ura elda tauna ta ese Kingdom Hall dekenai headava ena tok ta ia henia, bona idia ese gwauhamata herevana do idia gwauraia. Unai murinai, elda tauna ese Kingdom Hall ai idia noho taudia do ia hadibaia, unai Keristani tau bona hahine be Kaisara ena taravatu hegeregerena idia headava vadaeni. Tok tamona sibona do ia henia. Ita gwau diba, tau bona hahine be gavamani ese ia abia dae kastom dalanai idia headava, unai dainai Baibel amo tok danu be tamona. Bema namo, kastom dalanai idia headava murinai, unai dina tamona ai elda ta ese Kingdom Hall dekenai headava ena tok ia henia, unai amo Keristani headava dalana idia matauraia.
14. Gavamani bona kastom dalanai headava be maoro, unai dainai Keristani tauna be dahaka ia karaia be namo?
14 Tano haida ai, kastom dalanai idia karaia headava be maoro, to dala ia noho tau bona hahine ese headava pepana idia sainia totona. Anina be gavamani ese abia hidi tauna ena vairanai headava ena gwauhamata idia gwauraia bona rejista pepana idia sainia. Keristani taudia haida be kastom headava idia abia hidi lasi, to headava ena pepa sainia karana idia abia hidi. Gavamani ena vairanai unai dala rua be maoro. Paragraf 9 bona 10 ai ita herevalaia bamona, headava ena tok bona gwauhamata herevadia be iniseniai danu idia gwauraia diba. To gau badana be inai: tau bona hahine be Dirava bona taunimanima vairanai ia maoro dalanai idia headava be namo.—Luka 20:25; 1 Petero 2:13, 14.
Headava Matauraia
15, 16. Dahaka dainai headava lalonai, hemataurai karana be mai anina bada?
15 Parasa ena king ta ena headava ia dika neganai, sisiba henia tauna badana ena ladana Memucan ese sisiba namona ia henia ia gwau, “hahine ibounai ese edia tau do idia matauraia.” (Eseta 1:20) Tanobada ena king ta ese Keristani taudia dekenai unai sisiba idia henia be anina lasi; hahine idia ura edia adavadia idia matauraia. Unai hegeregerena, Keristani tatau ese edia hahine do idia matauraia bona hanamodia be namo. (Aonega Herevadia 31:11, 30; 1 Petero 3:7) Namo lasi ita headava bena lagani momo herea idia ore murinai, hemataurai ita hahedinaraia. Namona be headava dinana amo ta ta ita matauraia heheni matamaia.
16 Tau bona hahine be headava dinana ai hemataurai idia hahedinaraia be namo. To danu, bema Keristani elda ta be headava ena tok do ia henia, namona be hemataurai dalanai ia henia. Namona be idia headava taudia ruaosi dekenai unai tok ia gwauraia. Hereva henia tauna ese idia headava taudia ia matauraia dainai, hevaseha herevadia ia gwauraia lasi. Namo lasi headava taudia eiava kamonai taudia hahemaraia gaudia ia herevalaia. To, hagoadaia dalanai tok do ia henia, bona tok lalonai headava Havaraia Tauna bona Iena sisiba hereva namodia do ia herevalaia. Oibe, elda tauna be mai hemataurai ida ia henia headava ena tok ese Iehova Dirava ena ladana do ia hanamoa.
17. Dahaka dainai Keristani taudia ese gavamani ena taravatu idia badinaia be namo?
17 Inai stadi herevana lalonai, ita ese gavamani ena taravatu hegeregerena headava karaia daladia ita herevalaia. To unai dala haida be emu gabu ai idia karaia lasi. To gau badana be ita ibounai ita diba, Iehova ena Witnes taudia idia headava neganai, idia ese edia tano eiava Kaisara ena taravatu idia matauraia. (Luka 20:25) Paulo ia gwau: “Ibounai ta ta dekenai edia davana do umui henidia. Takisi gogoa tauna dekenai takisi do umui henia. Kastom moni gogoa tauna dekenai kastom moni do umui henia . . . bona idia mataurai henia tauna dekenai do umui matauraia.” (Roma 13:7) Oibe, Keristani taudia ese headava dinana amo Dirava ese ia karaia headava dalana idia matauraia be namo.
18. Headava karana dekenai, dahaka gau ma ta ita laloa be namo, bona unai hereva ma haida be edeseniai ita davaria diba?
18 Keristani headava momo murinai, headava ena aria ta idia karaia. Matamanai ita herevalaia bamona, Iesu be unai bamona aria ta dekenai ia lao. Bema unai bamona aria ta ia vara, edena dala ai Baibel ena sisiba ese ita ia durua Dirava do ita hanamoa, bona headava taudia matamatadia bona Keristani kongrigeisen dekenai ladana do ia hadikaia lasi? Stadi gabena ese unai do ia hahedinaraia.d
[Footnotes]
a Iehova ena Witnes taudia ese miniti 30 headava tok ena autlain ta ladana, “Headava Maorona Dirava Ena Matana Dekenai” idia gaukaralaia. Unai tok lalonai, Baibel ena sisiba hereva namodia be Ruma Bese Ena Moale Havaraia Dalana bukana, bona Iehova ena Witnes taudia edia buka ma haida amo do idia henia. Unai hereva ese headava matamata taudia bona headava dekenai idia lao taudia ibounai do ia durua.
b Bema emui gabu ai headava gwauhamata herevana be lasi, vadaeni henunai ia noho gwauhamata herevana umui gwauraia diba. Tau totona: “Lau [tau ena ladana] ese oi [hahine ena ladana] lau adavaia inai, oi do lau lalokau henia bona oi do lau naria, iseda mauri dinadia iboudiai lalodiai, bona unai bamona do lau karaia Baibel lalonai Dirava ese taravatu Keristani tatau dekenai ia henia hegeregerena.” Hahine totona: “Lau [hahine ena ladana] ese oi [tau ena ladana] lau adavaia inai, oi do lau lalokau henia bona oi do lau naria, iseda mauri dinadia iboudiai lalodiai, bona unai bamona do lau karaia Baibel lalonai Dirava ese taravatu Keristani hahine dekenai ia henia hegeregerena.”
c May 1, 1962, The Watchtower, rau 287, ese headava lasi tau bona hahine idia noho hebou kava karana ia herevalaia.
d October 15 Watchtower ena rau 28 dekenai ia noho herevana, “Increase the Joy and Dignity of Your Wedding Day,” itaia danu.
Oi Laloatao, A?
• Tau bona hahine idia headava neganai, dahaka dainai gavamani ena taravatu bona Baibel ena hereva ita laloa bada be namo?
• Keristani tau bona hahine be headava pepana idia sainia murinai, dahaka idia karaia be namo?
• Dahaka dainai headava ena tok be Kingdom Hall dekenai idia henia?
[Picture on page 12]
Idaunegai Israela tauna ta ia headava neganai, gau momo idia karaia lasi. Headava dinana ai, tau ese iena ruma eiava iena tamana ena ruma dekenai ia adavaia gwauraia hahine ia hakaua lao
[Picture on page 15]
Keristani taudia be kastom dalanai idia headava murinai, reana do idia ura Kingdom Hall dekenai headava ena tok do idia kamonai