Hisihisi Ibounai Kahirakahira Do Idia Ore!
Reana nega ta oi henanadai: ‘Dahaka dainai hisihisi idauidau idia vara?’ Lagani tausen momo lalodiai, taunimanima be tuari, hitolo, dika badadia, taravatu utua karadia, kara gageva, gorere, bona mase dainai hisihisi bada idia davaria. Idia hanaia lagani handred lalonai, hisihisi be momo herea, guna bamona lasi. Unai ibounai do idia ore, a?
Oibe, bona kahirakahira do idia ore! Dirava ena Hereva, Baibel, ia gwau: “Kara dika taudia do idia ore . . . To manau taudia ese noho gabuna tano do idia abia, do idia helai namonamo, mai moale bona mai maino danu.” Ela bona edena negai? “Kara maoromaoro taudia ese, Dirava ia henidia tano dekenai do idia noho ela bona hanaihanai.”—Salamo 37:10, 11, 29.
Dirava ese kara dika bona hisihisi ia kokia murinai, tanobada be paradaiso ai do ia lao. Bena taunimanima ese gorere lasi maurina do idia moalelaia ela bona hanaihanai. Dirava ena Hereva ia peroveta: “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani.”—Apokalupo 21:4.
Unai tanobada matamatana lalonai, mase taudia danu be do idia toreisi lou unai hahenamo idauidau idia moalelaia totona: “Mase taudia dohore idia toreisi lou, kara maoromaoro taudia, bona kara maoromaoro lasi taudia danu.” (Kara 24:15) Unai dainai, Iesu Keriso be ia dekenai abidadama ia hahedinaraia bona ia helalo-kerehai kara dika tauna ia hamaoroa diba: “Oi be lau danu Paradaiso dekenai do ita noho.”—Luka 23:43, NW.
Dahaka Dainai Hisihisi Ia Vara?
Bema Dirava ia ura taunimanima be unai bamona vaira negana namona idia abia, vadaeni dahaka dainai matamana negana amo Dirava ese hisihisi ia koua lasi? Dahaka dainai nega daudau lalonai hisihisi ia do koua lasi?
Dirava be Adamu bona Heva Ia havaraia neganai, idia edia tauanina bona lalona be idia goevadae. Dirava ese idia be paradaiso umana ai ia atodia bona idia dekenai moale ia havaraia gaukarana ia henia. Baibel gwau: “Dirava ese ia karaia vadaeni gaudia ibounai ia itaia, bona momokani idia be namo herea.” (Genese 1:31) Bema unai neganai Dirava idia kamonai henia, goevadae natudia do idia havaraia, bona tanobada be paradaiso ai do ia lao; unuseniai taunimanima be mauri hanaihanai, maino, bona moale ai do idia noho.
Dirava ese Adamu bona Heva edia lalona ai harihari gauna namona—ura kwalimu—ia atoa. Idia be robot bamona lasi. To, dala maorona—Dirava ena taravatu badinaia karana—amo edia ura kwalimu idia gaukaralaia neganai, moale do idia davaria hanaihanai. Dirava ia gwau: “Lau inai Lohiabada, emui Dirava. Emui namo habadaia dalana, be umui dekenai lau hadibaia noho. Emui raka dalana namona dekenai umui lau hakaua noho.” (Isaia 48:17) Bema ura kwalimu ita gaukaralaia kerere, dika do ita davaria; badina Dirava be taunimanima dekenai sibona idia biagua namonamo diba siahuna ia henia lasi. Baibel ia gwau: “Taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.”—Ieremia 10:23.
Madi, eda tama sina ginigunadia idia laloa Dirava idia dadaraia bona idia sibona idia biagua namonamo diba. To, idia ese Dirava ena lohia siahuna idia dadaraia neganai, Dirava ena heduru bona edia goevadae maurina idia haboioa. Unai dainai, edia goevadae karana ia ore matamaia ela bona idia buruka bona idia mase. Ita be idia edia natudia dainai, ita danu be unai dika ita abia bona ita mase.—Roma 5:12.
Lohia Siahuna—Hepapahuahu Badana
Dahaka dainai Dirava be Adamu bona Heva ia hamasea lasi, bena tau bona hahine idaudia rua ia havaraia lasi? Badina Dirava ese guba bona tanobada ia lohiaia ena maoro idia hepapahuahulaia. Henanadai be inai: Daika ia lohia be maoro, bona daika ena lohia dalana be maoro? Ma danu, bema Dirava ia lohia lasi, taunimanima be do idia noho namonamo diba, a? Dirava be taunimanima dekenai nega ia henia, idia sibona edia ura kwalimu idia gaukaralaia toho totona; unai amo Dirava ese do ia hahedinaraia goevagoeva, taunimanima be Dirava ena lohia siahuna eiava idia sibona edia lohia siahuna henunai idia noho namonamo diba. Unai nega ena daudau be hegeregere, taunimanima ese Dirava ena heduru idia dadaraia bona politikol, noho daladia, moni gaukaralaia daladia, bona tomadiho daladia idauidau idia tohoa totona.
Unai amo dahaka ia vara? Lagani tausen momo lalodiai, taunimanima edia sivarai ese ia hamomokania, hisihisi be ia bada ia lao. Lagani handred gunanai, taunimanima be hisihisi badadia idia mamia. Hitler ena nega lalonai, taunimanima milioni momo idia hamasedia. Tuari lalodiai, taunimanima milioni 100 mai kahana idia mase. Taravatu utua karadia bona dagedage be idia bada. Drag gaukaralaia kerere karana ia bada ia lao. Mahuta hebou karana amo ia vara daihanai goreredia be idia bada noho. Lagani ta ta ai, taunimanima milioni momo be hitolo bona gorere dainai idia mase. Gabu ibounai dekenai, ruma bese maurina ia dika ia lao, bona taunimanima be kara maoromaoro taravatudia idia laloa maragi. Taunimanima edia gavamani be ia hegeregere lasi, unai hekwakwanai idia kokia totona. Gavamani ta lasi ese buruka, gorere, bona mase ia haorea diba.
Baibel ese ia perovetalaia gaudia be hari taunimanima dekenai idia vara noho. Dirava ena Hereva ia gwau, ita be inai tanobada oromana dikana ena ‘nega dokona’ ai ita noho, bona “metau dikadia momo idia vara” danu. Bona Baibel ia gwau bamona, “kara dika taudia bona koikoi taudia ese edia kara dika bona edia koikoi do idia habadaia.”—2 Timoteo 3:1-5, 13.
Hisihisi be Kahirakahira Do Ia Ore
Idia vara gaudia ibounai ese idia hahedinaraia, taunimanima ese Dirava idia dadaraia bona sibodia idia lohiaia toho negana be kahirakahira do ia ore. Ia hahedinaraia goevagoeva, Dirava idia dadaraia taudia edia lohia dalana ia kwalimu diba lasi. Dirava ena lohia dalana sibona be maino, moale, gorere lasi maurina, bona mauri hanaihanai ia havaraia diba. Oibe, Iehova ese kara dika bona hisihisi ia haheaukalaia negana be kahirakahira do ia doko. Daudau lasi murinai, Dirava ese inai nega oromana dikana ibounai ia haorea neganai, taunimanima edia kara idauidau do ia koua.
Baibel ia gwau: “Unai basileia namba 4 [hari idia lohia gavamanidia] ena nega lalonai, guba ena Dirava ese basileia ta [guba dekenai] do ia haginia, inai basileia be do idia hadikaia diba lasi ela bona hanaihanai. . . . Bona unai basileia ese basileia [hari idia lohia gavamanidia] ibounai do ia hamakohia, bona haorea momokani, bona ia sibona do ia noho ela bona hanaihanai.” (Daniela 2:44) Iehova Dirava ese guba Basileiana amo ena lohia siahuna ena maoro do ia hamomokania karana be Baibel ena hahediba hereva badana. Iesu be “nega ena dokona” ena toa badana ia perovetalaia neganai, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.”—Mataio 24:14.
Dokona ia ginidae neganai, daika do ia roho mauri? Baibel ia gwau: “Kara maoromaoro taudia, be inai tano dekenai do idia mauri noho, bona laloa maoromaoro taudia be, inai tano lalonai do idia noho momokani. To kara dika taudia be tano dekena amo, Dirava ese do ia abidia siri, bona kara koikoi taudia be, tano dekena amo do ia kokidia momokani.” (Aonega Herevadia 2:21, 22) Kara maoromaoro taudia be Iehova ena ura idia dibaia bona idia karaia taudia. Iesu Keriso ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:3) Oibe, “tanobada . . . be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”—1 Ioane 2:17.
Baibel siridia be Hiri Motu Buka Helaga, Bible Society of Papua New Guinea ese ia karaia gauna amo, to bema New World Translation of the Holy Scriptures—With Reference amo ai hahanaia, edia murinai NW ai torea.