Mauri mai Ena Anina Korikorina Tahua Noho
“Umui mauri noho gaudia ibounai e, Lohiabada ena ladana do umui hanamoa!”—SALAMO 150:6.
1. Seung Jin ese mauri korikorina ena badina ia tahua karana mani oi gwauraia.
KOREA tauna ta ladana, Seung Jin ia gwau: “Doketa ena kosi lau karaia badina lau ura egu mauri do lau gaukaralaia taunimanima lau durua totona. Lau laloa doketa tauna ai lau lao neganai, dagi bada bona davana namona do lau abia dainai, do lau moale. To, gabeai lau itaia doketa taudia be taunimanima idia durua momokani diba lasi neganai, lau lalohisihisi. Unai murinai, laulau penia karana lau stadilaia, to lau penia laulau be lau sibona lau moalelaia bona haida dekenai namo ia havaraia lasi dainai, lau lalohisihisi. Unai murinai, tisa gaukara lau karaia, to gabeai lau itaia lau be stiuden dekenai sikuli gaudia sibona lau hadibaia diba, to mauri lalonai do idia davaria moale korikorina abia dalana lau hadibaia diba lasi.”a Taunimanima momo hegeregeredia, Seung Jin be mauri korikorina ena badina ia tahua noho.
2. (a) Mauri ena badina korikorina be dahaka? (b) Edena bamona ita diba Havaraia Tauna ese badina namona dainai ita ia havaraia?
2 Iseda mauri be mai ena badina korikori, anina be ita be mai iseda tahua gaudia bona ita hekwarahi unai gaudia ita hagugurua totona. Taunimanima be mauri ena badina korikorina idia davaria diba, a? Oibe! Havaraia Tauna ese ita dekenai diba, lalomamina, bona laloa maoromaoro karana ia henia dainai, unai ese ia hamomokania badina namona dainai ita ia havaraia. Unai dainai, iseda Havaraia tauna sibona ena ura hegeregerena ita noho neganai, mauri ena anina korikorina do ita davaria bona ita moale diba.
3. Dirava ena ura taunimanima dekenai be dahaka?
3 Baibel ia hahedinaraia Dirava ese ita ia havaraia ena badina be idauidau. Hegeregere, iseda tauanina ia karaia dalana ese ia hamomokania, Dirava be ita ia lalokau henia bada bona sibona ena ura ia dadaraia. (Salamo 40:5; 139:14) Unai dainai, Dirava ena ura hegeregerena ita noho anina be, Dirava ese ita ia lalokau henia hegeregerena, ma haida dekenai sibona iseda ura dadaraia lalokauna do ita hahedinaraia. (1 Ioane 4:7-11) Bona danu, ena anina ma ta be Dirava ena hadibaia herevadia do ita badinaia. Unai hadibaia herevadia ese ita do ia durua Iena ura hegeregerena ita noho totona.—Hadibaia Tauna 12:13; 1 Ioane 5:3.
4. (a) Dahaka ita karaia be namo mauri ena badina korikorina ita davaria totona? (b) Taunimanima edia mauri lalonai dahaka gau be gau ibounai ia hereaia?
4 Dirava ia ura taunimanima ibounai bona Ia ese ia havaraia gaudia idauidau be mai moale bona maino dekenai do idia noho hebou. (Genese 1:26; 2:15) Vadaeni, dahaka do ita karaia bena maino ai do ita noho namo diba? Natu maragina ta be iena tama sina ida ia noho neganai, ia gari lasi bona ia moale. Unai hegeregerena, iseda guba Tamana ita tura henia namonamo neganai, mauri ena badina korikorina do ita davaria. (Heberu 12:9) Dirava be dala ia kehoa ia kahirakahira ita lao totona bona iseda guriguri ia kamonai dainai, Ia ita tura henia namonamo diba. (Iamesi 4:8; 1 Ioane 5:14, 15) Bema Dirava ida ita raka bona iena turana ai ita lao, iseda guba Tamana ena ladana do ita hanamoa bona do ia moale. (Genese 6:10; Aonega Herevadia 23:15, 16; Iamesi 2:23) Taunimanima edia mauri lalonai Dirava tura henia karana ese gau ibounai ia hereaia. Salamo torea tauna ia gwau: “Umui mauri noho gaudia ibounai e, Lohiabada ena ladana do umui hanamoa!”—Salamo 150:6.
Oiemu Tahua Gauna be Dahaka?
5. Dahaka dainai kohu atoa guna karana be aonega karana lasi?
5 Dirava ena ura ta ita dekenai be ita sibona bona iseda ruma bese taudia do ita naria namonamo. Anina be tauanina ena durua gaudia bona Dirava tura henia karana do ita laloa bada. To, unai ita karaia totona laloa maoromaoro karana be mai anina bada. Unai amo tauanina gaudia ese Dirava tomadiho henia karana do idia koua lasi. (Mataio 4:4; 6:33) To madi, taunimanima momo edia mauri lalonai kohu idia atoa guna. To, kohu ita tahua momo be aonega karana lasi, badina moale do ita davaria lasi. Vanegai, Asia tanona ta ai taga taudia dekenai tahua gaukara ta idia karaia bona niuspepa torea tauna ia gwau, “unai taudia be ladana bada taudia bona edia kohu dainai idia mamia idia kwalimu vadaeni, to idia moale lasi bona idia lalohekwarahi momo.”—Hadibaia Tauna 5:11.
6. Iesu ese dahaka sisiba ia henia moni bona kohu tahua karana dekenai?
6 Kohu ura henia karana be mai ena dika, a? Iesu ese “kohu ura henia bada” ena dika ia herevalaia. (Mareko 4:19) Toana be kohu ese taunimanima dekenai moale ia mailaia, to unai be momokani lasi. “Moni ia ura henia noho tauna ese moni do ia abia, to unai moni ena bada be hegeregere lasi ia dekenai, vadaeni ma haida ia tahua noho.” (Hadibaia Tauna 5:10) Kohu ita tahua bona nega tamona mai iseda lalona ibounai ida Dirava ita tomadiho henia namonamo diba, a? Lasi, unai bamona ita karaia diba lasi. Iesu ia gwau: “Tau ta ese biaguna rua edia hesiai gaukara ia karaia diba lasi. Badina be ta do ia badu henia, to ta be do ia lalokau henia, o ta be do ia abia dae, ma ta be do ia abia dae lasi. Dirava bona kohu momo danu nega tamona edia hesiai gaukara do oi karaia diba lasi.” Iesu ese ia murinai idia raka taudia ia hamaoroa tanobada dekenai edia kohu do idia haboua lasi, to ‘guba dekenai do idia haboua.’ Unai ena anina be Dirava vairanai ladana namona do oi abia, badina ‘be oi ura gaudia ia diba vadaeni, oi do noinoi henia lasi neganai.’—Mataio 6:8, 19-25.
7. Edena dala ai “mauri korikorina” ita abia diba?
7 Aposetolo Paulo be iena gaukara turana Timoteo dekenai unai gaudia ia herevalaia neganai, sisiba aukana ia henia, ia gwau: “Inai tanobada mauri ena kohu momo taudia do oi hamaoroa, do idia hekokoroku lasi. Bona idia do oi hamaoroa danu inai tanobada ena kohu do idia abidadama henia lasi, to Dirava sibona do idia abidadama henia. Badina inai tanobada ena kohu do ia dika haraga, to Dirava ese ita hamoalea totona, gau momo ita dekenai ia henia davana lasi. Inai kohu momo taudia do oi oda henidia danu kara namodia do idia karaia, edia kohu do idia haria karaia, haida durua totona, bona harihari gaudia do idia henia, mai moale danu. Inai dala dekenai, idia ese edia kohu korikori do idia haboua hegaegae, edia mauri gabeai [“mauri korikorina,” NW ] do ia durua totona.”—1 Timoteo 6:17-19.
“Mauri Korikorina” be Dahaka?
8. (a) Dahaka dainai taunimanima momo be kohu bona ladana bada idia tahua? (b) Unai bamona taudia be dahaka idia diba lasi?
8 Taunimanima idia laloa inai hereva, “mauri korikorina” be kohu momo bona moale karadia ia herevalaia. Asia ena niusi magasin ta ia gwau: “Muvini piksa bona TV idia raraia taudia ese idia itaia gaudia idia ura henia dikadika bona unai gaudia abia totona idia laloa momo.” Taunimanima momo be kohu momo bona dagi bada tahua karana idia atoa guna. Momo be edia matamata negana bona goada ibounai idia henia unai gaudia tahua totona bona edia ruma bese ena noho namo bona Dirava tura henia karana idia hadikaia. Idia laloa lasi unai gaudia be TV dekenai idia hedinarai lalona veria gaudia sibona bona “inai tanobada ena lauma” idia hahedinaraia. Unai “lauma” ese inai tanobada taudia bilioni momo edia lalona ia biagua bona ia veridia Dirava ena ura idia dadaraia totona. (1 Korinto 2:12; Efeso 2:2) Unai dainai, ita itaia hari inai negai taunimanima momo be idia moale lasi!—Aonega Herevadia 18:11; 23:4, 5.
9. Taunimanima ese dahaka idia karaia diba lasi, bona dahaka dainai?
9 Taunimanima haida be sibona edia ura idia dadaraia, bona idia hekwarahi bada, hitolo bona gorere taudia idia durua bona kara gageva idia koua toho. Unai taudia be edena bamona? Idia be sibona edia ura idia dadaraia bona edia kara namodia amo taunimanima idia durua bada. To, ena be idia hekwarahi bada, idia ese inai tanobada ena oromana idia hanamoa diba lasi. Dahaka dainai? Badina “Satani ese tanobada taudia ibounai ia gunalaia noho,” bona ia ura lasi gau ta ia hanamoa.—1 Ioane 5:19.
10. Edena negai abidadama taudia ese “mauri korikorina” do idia moalelaia?
10 Madi, haida idia laloa mauri be inai sibona bona helaro ta be lasi! Paulo ia gwau: “Bema inai tanobada mauri sibona lalonai Keriso ena namo ita naria noho neganai, madi ita be taunimanima ibounai edia huanai ogogami herea.” Unai bamona idia laloa taudia be idia gwau: “Laloa lasi, ita aniani bona ita inuinu, badina be kerukeru do ita mase.” (1 Korinto 15:19, 32) To, nega vaira totona helaro ia noho badina “Dirava ese ia gwauhamata vadaeni, guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.” (2 Petero 3:13) Unai nega ai, Dirava ena Basileia ena siahu henunai, Keristani taudia be guba ai eiava tanobada ai “mauri hanaihanai” goevadaena—“mauri korikorina” unai—do idia moalelaia!—1 Timoteo 6:12.
11. Dahaka dainai Dirava ena Basileia durua gaukarana be iseda mauri lalonai ita atoa guna be mai anina bada?
11 Dirava ena Basileia sibona ese taunimanima edia hekwakwanai ia haorea momokani diba. Ita hekwarahi Dirava ena Basileia durua gaukarana be iseda mauri lalonai ita atoa guna be mai anina bada. (Ioane 4:34) Unai gaukara ita karaia neganai, iseda guba Tamana ena hetura namona do ita moalelaia diba. Danu, edia mauri lalonai Dirava ena hesiai gaukara idia atoa guna tadikaka bona taihu milioni momo ida ita gaukara hebou bona ita moale.
Anina Lasi Gaudia Ita Dadaraia
12. Hari inai nega ena mauri bona “mauri korikorina” edia idau mani oi gwauraia.
12 Baibel ia gwau, inai “tanobada, mai ena gau dikadia, taunimanima idia ura dikadika gaudia, be kahirakahira do idia ore.” Satani ena tanobada ena kahana ibounai—ena ladana bada bona moni do idia ore momokani, “to Dirava ena ura ia karaia noho tauna be do ia noho ela bona hanaihanai.” (1 Ioane 2:15-17) Inai tanobada ena kohu, ladana bada, bona moale karadia be idia ore haraga gaudia. To “mauri korikorina”—Dirava ena Basileia henunai, tanobada matamata lalonai do ita abia mauri hanaihanai unai—be gau korikorina ta. Unai dainai, namona be anina lasi gaudia do ita dadaraia.
13. Edena dala ai Henry bona Suzanne be anina lasi gaudia idia dadaraia?
13 Mani Henry bona Suzanne oi laloa. Idia be Dirava ena gwauhamata idia abidadama henia momokani, bona idia diba Basileia idia atoa guna taudia be Dirava ese do ia durudia. (Mataio 6:33) Unai dainai, idia be davana bada lasi rumana dekenai idia noho, unai amo idia ta sibona be moni gaukara ia karaia bona edia nega idia atoa, idia bona edia natudia kekeni rua be haroro gaukara idia karaia totona. (Heberu 13:15, 16) Edia turana namona ta be edia abia hidi ia lalopararalaia lasi. Suzanne ia hamaoroa: “Egu turana e, bema oi ura ruma namona dekenai oi noho, gau haida do oi rakatania be namo.” To, Henry bona Suzanne idia laloparara Iehova idia atoa guna karana ese idia do ia ‘durua inai tanobada ena mauri dekenai, bona gabeai do idia abia mauri dekenai danu.’ (1 Timoteo 4:8; Tito 2:12) Edia natudia kekeni rua idia bada neganai, ful-taim haroro gaukara idia karaia. Idia mamia edia ruma bese ese mai anina bada gauna ta ia reaia lasi, to “mauri korikorina” idia tahua guna dainai, namo bada idia davaria.—Filipi 3:8; 1 Timoteo 6:6-8.
‘Tanobada Ena Anina Lasi Gaudia’ Tahua Lasi
14. Bema mauri ena badina korikorina ita laloaboio, dahaka dika do ita davaria?
14 To, bema mauri ena badina korikorina bona “mauri korikorina” ena helaro ita laloaboio, dika bada do ita davaria. “Tanobada ena laloa, bona ena gau momo, bona ena moale” ese ita do idia veria diba. (Luka 8:14) Bema moni bona kohu ita ura henia bada bona ita “laloa metau momo,” ita be inai tanobada ese do ia guia. (Luka 21:34) Madi, hari inai nega ai, haida idia ura moni momo idia abia dainai, “Iesu abidadama henia kara idia rakatania vadaeni, bona mai lalohisihisi momo danu, edia mauri idia hadikaia ore” bona edia hetura karana Iehova ida idia hadikaia danu. Madi, “mauri hanaihanai” helarona idia dogoatao auka lasi dainai, dika bada idia davaria!—1 Timoteo 6:9, 10, 12; Aonega Herevadia 28:20.
15. Edena dala ai ruma bese ta be ‘tanobada ena anina lasi gaudia’ idia dadaraia dainai, namo idia davaria?
15 Paulo ia gwau: “Tanobada ena gau namodia idia abia noho taudia be do idia noho, inai gaudia be anina lasi bamona.” (1 Korinto 7:31) Keith bona Bonnie be unai hereva idia abia dae. Keith ia gwau: “Lau be isena hanamoa doketa ena sikuli lau karaia noho lalonai, Iehova ena Witnes tauna ai lau lao. Abia hidi ta do lau karaia be namo. Kliniki dekenai gorere taudia momo lau abia dae bona moni momo lau abia diba, to unai ese emai hesiai gaukara bona Iehova tomadiho henia karana do ia hadikaia. Unai dainai, abia hidi lau karaia, gorere taudia haida sibona do lau abia dae, unai amo nega bada lau atoa tomadiho gaudia dekenai bona egu adavana bona natudia kekeni 5 lau durua diba. Ena be emai moni be bada lasi, to ai gaukaralaia namonamo dainai, gau ta dekenai ai dabu lasi. Emai ruma bese lalonai lalokau bona moale ia noho. Gabeai, ai ibounai be ful-taim haroro gaukara ai karaia. Hari, aiemai natudia kekeni be idia headava bona toi be mai edia natudia danu. Edia ruma bese idia moale danu badina Iehova ena ura idia atoa guna.”
Emu Mauri Lalonai Dirava Ena Ura Atoa Guna
16, 17. Baibel ese daidia ia herevalaia bona edena bamona idia ita laloatao?
16 Baibel lalonai Dirava ena ura idia karaia bona idia karaia lasi taudia edia sivarai idia noho. Unai taudia edia kara ese mauri lagani idauidau, tano idauidau bona mauri dalana idauidau taudia ia durua. (Roma 15:4; 1 Korinto 10:6, 11) Nimiroda be siti badadia ia haginia, to Iehova ia dagedage henia. (Genese 10:8, 9) To, momo be haheitalai namodia idia hahedinaraia. Hegeregere, Mose ena mauri ibounai lalonai ia be Aigupito ena lohia tauna ai ia noho lasi. To, Mose ia laloa Dirava ese ia henia maduna be mai anina bada, bona “Aigupito ena kohu momo do ia abia be dika.” (Heberu 11:26) Reana, doketa tauna Luka be Paulo bona ma haida idia gorere neganai ia durudia. To, Luka ese taunimanima momo ia durua bada dalana be Basileia ena sivarai ia harorolaia bona Baibel bukana ta ia torea. Paulo be Taravatu ia diba momo tauna bamona ita laloatao lasi, to ita laloatao ia be misinari tauna bona “Iuda lasi taudia totona aposetolo gaukara” ia karaia.—Roma 11:13.
17 Davida be tuari tauna, miusiki gadaralaia tauna bona ane torea tauna bamona ita laloatao lasi, to ita laloatao ia be “[Dirava] ese ia ura henia tauna.” (1 Samuela 13:14) Daniela be Babulonia ena gavamani tauna ta bamona ita laloatao lasi, to ita laloatao ia be Iehova ena peroveta tauna namona; Eseta be Parasa edia kwini bamona ita laloatao lasi, to ita laloatao ia be gari lasi bona abidadama hahinena; Petero, Andrea, Iamesi bona Ioane be haoda taudia bamona ita laloatao lasi, to ita laloatao idia be Iesu ena aposetolo taudia. Bona haheitalai namo hereana be Iesu, ia be “kamuta tauna” bamona ita laloatao lasi, to ita laloatao ia be “Keriso.” (Mareko 6:3; Mataio 16:16) Idia ibounai idia laloparara, herevana idia be mai edia diba, kohu momo eiava dagi bada, to unai gaudia be anina bada lasi. Idia laloa bada gauna be edia mauri lalonai Dirava ena hesiai gaukara idia atoa guna be namo. Idia diba edia mauri lalonai Dirava gari henia tauna eiava hahinena bamona idia noho be mai anina bada.
18. Seung Jin be dahaka abia hidi ia karaia, bona dahaka dainai?
18 Seung Jin ese unai ia lalopararalaia danu. Ia gwau: “Lau ese doketa gaukara, laulau penia karana o tisa gaukara dekenai egu nega bona goada bada lau haorea lasi, to egu lalona lau hadaia, Dirava dekenai lau gwauhamata hegeregerena, egu mauri do lau gaukaralaia. Hari, lau ese haroro taudia be momo lasi gabuna dekenai taunimanima lau durua, mauri hanaihanai idia abia totona. Guna, lau laloa ful-taim hesiai gaukara be gaukara badana lasi. To, hari lau moale bona egu kara lau hanamoa bona tano idauidau taudia lau hadibaia karana lau hanamoa danu. Lau laloparara Iehova ena ura be iseda ura ai ita halaoa neganai, iseda mauri be mai ena badina namona.”
19. Edena dala ai mauri ena badina korikorina ita davaria diba?
19 Ita be Keristani taudia dainai, mauri hanaihanai ita abia ena diba bona helaro ita diba. (Ioane 17:3) Namo lasi ‘ita ese Dirava ena hariharibada ita abia vadaeni, to ita negea kava.’ (2 Korinto 6:1) Namona be iseda mauri dinadia ibounai ita gaukaralaia Iehova ita hanamoa totona. Taunimanima dekenai moale do ia mailaia bona mauri hanaihanai dekenai do ia hakaudia lao dibana ita harorolaia be namo. Unai bamona ita karaia neganai, Iesu ena hereva do ia momokani ita dekenai: “Henia kara ena moale be bada, abia kara ena moale be maragi.” (Kara 20:35) Unai moale ita mamia neganai, ia hamomokania mauri ena badina korikorina ita davaria vadaeni.
[Footnote]
a Ladana ai haidaua.
Anina Oi Gwauraia Diba, A?
• Iseda mauri lalonai dahaka ita tahua be mai anina bada gauna?
• Dahaka dainai kohu ita tahua guna be aonega karana lasi?
• Dirava ese ia gwauhamatalaia “mauri korikorina” be dahaka?
• Edena dala ai iseda mauri ita gaukaralaia diba Dirava ena ura karaia totona?
[Pictures on page 16]
Keristani taudia ese anina lasi gaudia do idia dadaraia