Hari Inai Negai Dirava Ena Ura Ita Karaia
“[Keriso] dekena amo mauri ita davaria taudia, be ita sibona iseda mauri bona iseda ura do ita laloa lasi.”—2 KORINTO 5:15.
1. Misinari tauna ta ena ekspiriens mani oi gwauraia.
MISINARI tauna ta ladana Aaron ia gwau: “Tuari ia ore murinai, aiemai motuka be tuari lasi motuka ginigunana Africa ena gunika hanua ta dekenai ia ginidae.a Unai hanua ena kongrigeisen maragina ida herevahereva dalana be lasi dainai, idia ai itaia totona ai lao. Aniani, dabua bona Baibel bukadia ai abia lao bona vidio ladana, Jehovah’s Witnesses—The Organization Behind the Name ai abia lao danu.b Kurukuru amo idia karaia ruma maragina dekenai unai vidio ai hahedinaraia bona taunimanima momo herea idia mai itaia totona—unai dainai nega rua ai hahedinaraia. Unai vidio ai hahedinaraia negadia ai, momo be idia ura Baibel stadi idia hamatamaia. Ia hedinarai goevagoeva, emai hekwarahi be anina namona ia havaraia.”
2. (a) Dahaka dainai Keristani taudia edia lalona idia hadaia Dirava ena hesiai gaukara idia karaia totona? (b) Edena henanadai edia haere do ita tahua?
2 Ena be Aaron bona iena turadia be dika idia davaria diba, to dahaka dainai unai hanua dekenai idia lao? Badina, Iesu Keriso ena boubou gauna idia abia dae, bona edia mauri be Dirava dekenai idia gwauhamatalaia iena ura do idia karaia totona. Edia mauri idia gwauhamatalaia Keristani taudia ibounai be edia lalona idia hadaia ‘sibona edia mauri bona edia ura do idia laloa lasi,’ to “Sivarai Namona dainai” do idia hekwarahi. (2 Korinto 5:15; 1 Korinto 9:23) Idia diba inai tanobada ena dokona ia ginidae neganai, tanobada ena moni bona dagi bada be anina lasi. Unai dainai, edia tauanina ia goada bona idia do mauri noho lalonai, idia ura edia kohu do idia gaukaralaia Dirava ena ura karaia totona. (Hadibaia Tauna 12:1) Edena bamona unai ita karaia diba? Edeseni amo goada bona heduru do ita abia unai ita karaia totona? Bona edena hesiai gaukara ita karaia diba?
Ita Goada Ita Lao Karadia
3. Dirava ena ura ita karaia totona, dahaka gaudia ita karaia guna be namo?
3 Keristani taudia korikoridia idia diba, edia mauri ibounai lalonai Dirava ena ura do idia karaia. Idia hamatamaia dalana be dina ta ta ai Baibel do idia duahia, Tiokratik Haroro Sikuli dekenai do idia vareai, do idia haroro bona idia goada ela bona bapatiso idia abia. Ita goada ita lao neganai, aposetolo Paulo ena hereva ita laloatao, ia gwau: “Oiemu diba bona goada do oi gaukaralaia, mai oiemu lalona ibounai. Vadaeni taunimanima ibounai ese oiemu goada do idia itaia, ia bada lao noho.” (1 Timoteo 4:15) Ita goada ita lao be iseda ladana ita abia isi totona lasi, to ia hahedinaraia ita be mai iseda lalona ibounai ida ita ura Dirava ena ura ita karaia bona iseda ura ita tahua lasi. Unai dala ita abia hidi neganai, ita hahedinaraia ita ura iseda mauri ibounai lalonai, Dirava ese ita do ia hakaua bona Ia sibona ese ita ia hakaua namonamo diba.—Salamo 32:8.
4. Edena dala ai koua gaudia ita hanaia diba?
4 To, bema ita daradara eiava iseda noho dalana ita laloa momo, unai ese Dirava hesiai henia dalana ia koua diba. (Hadibaia Tauna 11:4) Unai dainai, Dirava bona ma haida ita hesiai henia bona ita moale momokani totona, namona be unai koua gaudia ita hanaia be namo. Hegeregere, Erik ia ura gado idauna kongrigeisen ta dekenai do ia lao. To ia laloa daradara: ‘Lau do idia abia dae, eiava? Unai tadikaka taihu do lau ura henidia, eiava? Lau do idia ura henia, eiava?’ Ia gwau: “Dokonai, lau laloparara namona be egu tadikaka lau lalodia bada bona lau sibona egu namo do lau tahua guna lasi. Egu lalona lau hadaia do lau laloa daradara lasi, to do lau hekwarahi dala idauidau ai idia lau durua totona. Dirava ena heduru lau noia bona unai kongrigeisen dekenai lau lao. Hari, egu hesiai gaukara lau moalelaia bada.” (Roma 4:20) Oibe, sibona iseda namo ita tahua lasi dalanai Dirava bona ma haida ita hesiai henidia neganai, moale korikorina bona noho namo do ita davaria.
5. Dahaka dainai Dirava ena ura ita karaia totona, palani namona ita karaia be namo? Ekspiriens ta mani oi gwauraia.
5 Dirava ena ura ita karaia namonamo totona, palani namona do ita karaia. Mai aonega ida abiatorehai karana do ita dadaraia, badina ita ura lasi unai ese ita ia guia bena Dirava ena gaukara do ita karaia lasi. Baibel ia gwau: “Moni ia abiatorehai tauna ese, heniatorehai tauna ena hesiai gaukara ia karaia noho.” (Aonega Herevadia 22:7) Iehova ita abidadama henia bona iena hesiai gaukara ita atoa guna neganai, iseda tahua gaudia do ita laloaboio lasi. Hegeregere, Guoming bona iena taihuna rua bona edia sinana idia noho gabuna dekenai ruma edia renta be bada bona nega daudau lalonai idia karaia diba moni gaukarana idia davaria be auka. To, ibounai edia moni idia naria namonamo bona idia heduru heheni dainai, ena be ibounai be moni gaukara idia karaia lasi, to idia hegeregere. Guoming ia gwau: “Nega haida, ai haida be moni gaukara ai davaria lasi. To, painia gaukara ai karaia noho diba bona emai sinana ai naria namonamo danu. Ai moale danu badina emai sinana ia ura lasi emai painia gaukara ai rakatania bona moni gaukara ai karaia ia dekenai gau namodia ai henia totona.”—2 Korinto 12:14; Heberu 13:5.
6. Daika ena ekspiriens ese ia hahedinaraia Dirava ena ura ita karaia totona iseda mauri ita haidaua diba?
6 Bema oi be nega bada oi henia tanobada gaudia dekenai—hegeregere moni gaukara eiava ma kara ta—bona hari oi ura emu mauri lalonai Dirava ena ura oi atoa guna, do oi hekwarahi bada gau momo oi haidaua totona. Emu mauri oi haidaua haraga totona be do ia auka, bona bema nega ginigunana ai oi kwalimu lasi, namo lasi oi laloa oi be hegeregere lasi. Mani Koichi oi laloa, ia be moale karadia dekenai nega bada ia haorea. Koichi be matamata neganai Baibel ia stadilaia, to lagani momo lalodiai vidio gadara ese iena mauri ia biagua bamona. Nega ta Koichi be sibona dekenai ia gwau: ‘Lau be dahaka lau karaia noho? Lauegu mauri lagani be 30, bona egu mauri lalonai mai anina bada karana ta lau do karaia lasi!’ Koichi ese iena Baibel stadi ia karaia lou bona kongrigeisen amo heduru ia abia. Ena be metairametaira ena kara ia namo ia lao, to ia hesiku lasi. Ena guriguri loulou karana bona ma haida edia heduru amo unai vidio gadara ia rakatania. (Luka 11:9) Hari, Koichi be kongrigeisen lalonai mai moale ida hesiai tauna ena gaukara ia karaia noho.
Laloa Maoromaoro Karana Dibaia
7. Dahaka dainai Dirava ena gaukara ita karaia totona, laloa maoromaoro karana ita hahedinaraia be namo?
7 Namona be mai iseda lalona ibounai ida ita hekwarahi Dirava ena ura ita karaia totona. Mai lahedo ida do ita gaukara lasi. (Heberu 6:11, 12) To, Iehova ia ura lasi ita gaukara goada momokani ela bona ita gorere bona ita laloa maoromaoro lasi. Lasi, to do ita manau badina sibona eda goada lasi to Dirava ena goada amo iena gaukara ita karaia diba. Unai bamona kara ese Dirava do ia hanamoa bona ia hahedinaraia ita be mai laloa maoromaoro ida ita kara. (1 Petero 4:11) Iehova ia gwauhamata goada do ia henia iena ura ita karaia totona, to namo lasi ita sibona ita doria ita karaia diba lasi gauna ita karaia totona. (2 Korinto 4:7) Dirava ita hesiai henia noho bona ita hesiku lasi totona, namona be iseda tauanina ena goada do ita naria namonamo.
8. Keristani matamata kekeni ta ese moni gaukara bona painia gaukara be nega tamona ia karaia dainai, dahaka ia vara? Bona dahaka gaudia ia haidaua?
8 Hegeregere, East Asia dekenai ia noho kekenina ladana Ji Hye, be lagani rua lalonai moni gaukara namona ia karaia bona painia gaukara ia karaia danu. Ia gwau: “Lau hekwarahi bada Iehova lau hesiai henia namonamo bona egu moni gaukara lau karaia namonamo totona, to hanuaboi ai hora 5 sibona lau mahuta. Daudau lasi murinai, lau hesiku bada bona Iehova hesiai henia gaukarana lau moalelaia lasi.” Ji Hye ia ura ‘mai ena kudouna ibounai, mai ena lauma ibounai, mai ena lalona ibounai, bona mai ena goada ibounai’ ida Iehova do ia hesiai henia, unai dainai ena nega bada ia abia lasi gaukara ta ia tahua. (Mareko 12:30) Ma ia gwau: “Ena be egu ruma bese taudia idia ura moni momo do lau haboua, to lau hekwarahi Dirava ena ura be egu mauri lalonai lau atoa guna totona. Egu gaukara amo moni sisina lau abia bona ia hegeregere egu dabua namodia lau hoia totona. Bona hari egu mamina ia namo badina hanuaboi ai lau mahuta namonamo! Egu haroro gaukara lau moalelaia bona egu hetura karana Iehova ida be ia goada, badina tanobada ena lalona veria gaudia dekenai nega bada lau haorea lasi.”—Hadibaia Tauna 4:6; Mataio 6:24, 28-30.
9. Edena dala ai iseda ruma-ta-ruma-ta haroro gaukara ese haida ia durua diba?
9 Ita ibounai be Dirava hesiai henia totona regula painia gaukara ita karaia diba lasi. Bema oi be buruka tauna, mai emu gorere eiava emu tauanina ena kahana ta ia dika, namona be inai oi laloatao: Iehova ese emu abidadama bona mai emu kudouna ibounai ida oi karaia hesiai gaukara ia laloa bada. (Luka 21:2, 3) Unai dainai, namo lasi ita laloa iseda hekwarahi Dirava ena hesiai gaukara dekenai be ma haida do ia durua lasi. Hegeregere, reana haroro gaukara lalonai ruma haida dekenai ita pidipidi, to ruma taudia be idia ura lasi idia kamonai. Ena be iduara idia kehoa lasi, to ruma ita rakatania murinai, ruma taudia be hora momo eiava dina haida lalonai ita do idia herevalaia noho! Ita diba sivarai namona idia kamonai taudia ibounai ese hereva momokani do idia abia lasi, to haida ese idia abia dae diba. (Mataio 13:19-23) Reana, haida be gabeai tanobada oromana ia idau eiava edia mauri lalonai hekwakwanai haida idia vara neganai, hereva momokani do idia abia dae. Herevana idia kamonai eiava lasi, to ruma-ta-ruma-ta gaukara ita karaia neganai, ita be Dirava ena ura ita karaia unai. Ita be ‘Dirava ida ita gaukara hebou’ taudia.—1 Korinto 3:9.
10. Ita ibounai be dahaka ita karaia diba?
10 Unai sibona lasi, to ita ibounai ese iseda ruma bese taudia ta ta bona iseda tadikaka bona taihu ita durudia be namo. (Galatia 6:10) Iseda haheitalai namona ese ma haida ia hagoadaia diba. (Hadibaia Tauna 11:1, 6) Elda taudia bona hesiai taudia be edia maduna idia huaia namonamo neganai, kongrigeisen taudia idia durua Iehova idia tura henia namonamo totona bona edia hesiai gaukara do idia habadaia. Baibel ese ita ia hagoadaia, ‘Lohiabada ena gaukara ita karaia neganai, iseda hekwarahi be hekwarahi kava lasi momokani.’—1 Korinto 15:58.
Iseda Mauri Ibounai Lalonai Dirava Ena Ura Ita Karaia
11. Iseda kongrigeisen sibona dekenai lasi, to edena dala ma haida ai Dirava ita hesiai henia diba?
11 Ita be Keristani taudia dainai, iseda mauri ita moalelaia, bona ita ura ita karaia gaudia ibounai ese Dirava do ia hanamoa. (1 Korinto 10:31) Bema, ita be mai abidadama ida Basileia ena sivarai namona ita harorolaia bona ma haida ita hadibaia Iesu ena hereva idia badinaia, dala idauidau ai Dirava do ita hesiai henia bona do ita moale. (Mataio 24:14; 28:19, 20) Iseda kongrigeisen lalonai ita gaukara diba, to ma danu haroro taudia be momo lasi teritori eiava tano ma ta dekenai ita lao diba eiava gado matamata ita dibaia diba. Headava lasi elda bona hesiai taudia be Hesiai Gaukara Hadibaia Sikulina dekenai idia lao diba. Unai sikuli murinai edia tano dekenai, lo Keristani taudia be lasi kongrigeisen eiava ma tano ta dekenai idia siaidia lao. Regula painia gaukara idia karaia headava tau bona hahine be Gilead misinari sikuli dekenai idia lao diba, bena murinai tano ma ta dekenai idia siaia lao. Bona Betele ena gaukara idauidau bona Kingdom Hall hanamoa gaukara dekenai danu, volantia taudia momo idia ura henia.
12, 13. (a) Edena hesiai gaukara do oi abia hidi? (b) Dennis bona Jenny ese hesiai gaukara ta amo idia abia dibana be edena bamona idia gaukaralaia ma haida idia durua totona?
12 Edena hesiai gaukara do oi abia hidi? Oi be Iehova oi gwauhamata henia vadaeni hesiai tauna dainai, hanaihanai Ia bona Iena orea edia hakaua dalana oi tahua be namo. Iena “Lauma namona” ese oi do ia durua abia hidi maorona oi karaia totona. (Nehemia 9:20) Hesiai gaukara ta oi karaia neganai, unai ese dala ia kehoa gaukara ma ta oi karaia totona. Bona oi dibaia gaudia ese oi do idia durua hesiai gaukara ma ta oi karaia namonamo totona.
13 Haheitalai ta be Dennis bona iena adavana Jenny. Idia be hanaihanai Kingdom Hall haginia gaukara idauidau dekenai idia heduru. Lai badana Katrina be United States ena saut kahana ia hadikaia neganai, idia volantia haida idia durua totona. Dennis ia gwau: “Kingdom Hall haginia gaukara amo ai dibaia gaudia ese ai idia durua, tadikaka bona taihu edia ruma ai haginia bona unai ai moalelaia bada. Ai durua taudia edia moale bona tanikiu karana ese ai ia hagoadaia bada. Heduru idia henia orea ma haida be ruma haginia gaukarana idia karaia namonamo lasi. To, Iehova ena Witnes taudia ese Kingdom Hall momo bona ruma 5,300 mai kahana idia hanamoa eiava ruma matamata idia haginia. Unai gaukara idia itaia taudia be hari idia ura sivarai namona idia kamonai henia.”
14. Regula painia gaukara oi karaia totona, dahaka oi karaia be namo?
14 Dirava ena ura karaia totona, oi ese regula painia gaukara oi abia hidi bona emu mauri ibounai lalonai oi karaia diba, a? Bema unai bamona oi karaia, hahenamo momo do oi davaria. Bema, emu noho dalana hari be hegeregere lasi dainai oi karaia diba lasi, reana gau ta oi haidaua diba. Nehemia be mai anina bada gaukara ta dainai ia guriguri hegeregerena, oi guriguri be namo. Ena guriguri lalonai, ia gwau: “Lohiabada e, mani emu kara . . . hari dina dekenai lau dekenai kwalimu do oi henia.” (Nehemia 1:11) Guriguri ia kamonai henia Diravana oi abidadama henia bona oiemu guriguri hegeregerena kara ta oi karaia. (Salamo 65:2) Iehova ese emu hesiai gaukara ia hanamoa totona, namona be oi ese kara haida oi karaia guna. Emu lalona oi hadaia regula painia gaukara do oi karaia neganai, namona be unai oi badinaia. Lagani idia hanaia lalonai, emu diba haroro gaukara dekenai do ia bada bona do oi moalelaia.
Mauri Namona
15. (a) Nega daudau lalonai Iehova idia hesiai henia taudia ita hereva henia bona mauri sivaraidia ita duahia neganai, edena dala ai ita idia hagoadaia? (b) Oi ia hagoadaia bada mauri sivaraina ta mani oi gwauraia.
15 Dirava ena ura oi atoa guna dainai, dahaka namo do oi abia? Nega daudau lalonai Iehova idia hesiai henia taudia, hegeregere lagani momo lalonai painia gaukara idia karaia taudia oi hereva henidia. Edia mauri be mai ena badina korikorina bona idia moalelaia! (Aonega Herevadia 10:22, BHğ) Idia ese oi do idia hamaoroa Iehova ese edia nega aukadia lalonai hanaihanai idia ia durua, edia dabu gaudia ia henia bona dala idauidau ai ia naridia. (Filipi 4:11-13) Lagani momo lalodiai Gima Kohorona ese mauri sivaraidia handred momo ia halasia. Unai mauri sivaraidia ta ta ese tadikaka taihu edia goada bona moale ia hahedinaraia bona unai amo ita ese Kara bukana lalonai idia noho sivarai ita laloatao. Unai bamona sivarai oi duahia neganai, oi ia hagoadaia bona do oi gwau, ‘Lau ura unai bamona mauri do lau moalelaia!’
16. Edena dala ai Keristani taudia edia mauri be mai ena badina bona idia moale?
16 Aaron ia gwau: “Africa dekenai lau itaia, matamata taudia momo be mauri ena badina idia tahua totona, taoni ta amo idia lao taoni ma ta dekenai. Bona, momo be idia tahua gauna idia davaria lasi. To, ai be Dirava ena ura ai karaia noho, Basileia ena sivarai namona ai harorolaia bona emai mauri be mai ena badina bona ai moale. Ai mamia vadaeni, henia karana ena moale be bada bona abia karana ena moale be maragi.”—Kara 20:35.
17. Dahaka dainai hari inai negai Dirava ena ura ita karaia be namo?
17 Oi be edena bamona? Emu mauri lalonai dahaka oi tahua? Bema Dirava ena hesiai gaukarana ta oi tahua lasi, ma gau haida ese emu lalona do idia veria diba. Namo lasi emu mauri namona be kahirakahira do ia ore tanobadana, eiava Satani ena ura gaudia dekenai oi haorea kava. Kahirakahira, “hisihisi bada herea” do ia vara bona unai nega ai tanobada ena dagi bada bona kohu ese ita do ia hamauria lasi. To, iseda hetura karana Iehova ida ese ita do ia hamauria. Unai nega ai do ita moale bada, badina ita ese Dirava bona ma haida ita hesiai henidia bona iseda mauri lalonai Dirava ena ura ibounai ita karaia!—Mataio 24:21; Apokalupo 7:14, 15.
[Footnotes]
a Ladana ai haidaua.
b Iehova ena Witnes taudia ese idia karaia.
Anina Oi Gwauraia Diba, A?
• Iehova ese iseda hesiai gaukara be edena bamona ia laloa?
• Ita laloa maoromaoro bona edena kara ita karaia ese ita do idia durua Dirava bona ma haida ita hesiai henidia totona?
• Dahaka hesiai gaukara idauidau ita karaia diba?
• Edena dala ai hari inai negai mauri mai ena badina korikorina ita moalelaia diba?
[Pictures on page 18]
Mai iseda lalona ibounai ida Iehova ita hesiai henia totona, laloa maoromaoro karana be mai anina bada
[Pictures on page 21]
Dirava ena hesiai gaukara be idauidau