Duahia Taudia Idia Henanadai
Dahaka Dainai Iehova Ena Witnes Taudia be Edia Tomadiho Lalonai Korosi Idia Gaukaralaia Lasi?
Iehova ena Witnes taudia idia abia dae momokani Iesu ia mase bona ena rara ia bubua dainai, ia idia abidadama henia taudia be mauri hanaihanai do idia abia. (Mataio 20:28; Ioane 3:16) To, idia abia dae lasi Iesu be korosi dekenai ia mase, laulau momo ese idia hahedinaraia bamona. Idia abia dae Iesu be au maoromaorona ta dekenai ia mase.
Iesu ia do mai lasi neganai, lagani 2,000 gunanai korosi be Mesopotamia dekenai idia gaukaralaia. Iesu ia do mai lasi neganai, lagani 3,000 gunanai Scandinavia tanodia ai nadi toretore lalonai korosi ia hedinarai. Sven Tito Achen, Danish ena histori bona toretore ia stadilaia tauna ena buka (Symbols Around Us) lalonai ia gwau, unai bamona Dirava diba lasi taudia ese korosi be “toni bamona . . . idia ia gimaia bona edia mauri lalonai namo ia havaraia totona idia gaukaralaia.” Unai dainai, New Catholic Encyclopedia ia gwau: “Keristani negana be do lasi neganai idia noho taudia momo bona Keristani lasi besedia danu ese korosi idia tomadiho henia.” Dahaka dainai dubu momo be korosi idia tomadiho henia o idia matauraia?
W. E. Vine, British ena diba bada tauna ia gwau: “Lagani 250 A.D. be do lasi neganai, . . . etene taudia be edia orea ai idia abidia dae, . . . gwaumaoro idia henidia edia tomadiho koikoi gaudia edia toadia momo do idia dogoatao noho. Unai dainai leta T ena kwarana idia hadihoa bona idia gwau unai be Keriso ena korosi toana.”—Vine’s Expository Dictionary of Old and New Testament Words.
Vine ma ia gwau, unai hereva korosi bona hasatauroa edia anina ese “gini maoromaoro au ta . . . idia hahedinaraia bona unai ese ia hamomokania ia be dubu momo ese edia tomadiho lalonai idia gaukaralaia korosi mai ena au rua ia herevalaia lasi.” Oxford Iunivesiti ena Companion Bible ese unai hereva ia hamomokania ia gwau: “Hamomokania gaudia momo . . . ese idia hahedinaraia Lohiabada be ia gini maoromaoro au ta dekenai idia hasatauroa, to korosi mai ena au rua dekenai ia mase lasi.” Unai ese ia hahedinaraia goevagoeva, tomadiho oreadia momo be Baibel ese ia herevalaia lasi gauna ta idia badinaia.
Ataiai ita herevalaia vadaeni, histori torea tauna Achen ia gwau: “Iesu ia mase bona lagani 200 murinai, toana be Keristani taudia ese korosi idia gaukaralaia lasi.” Ma ia gwau, Keristani taudia ginigunadia idia laloa “korosi be mase bona dika ia laulaulaia, hegeregere hari inai negai taunimanima ese guillotine o elektrik sea idia laloa bamona.”
Herevana dahaka idia gaukaralaia Iesu idia hamasea o hasatauroa totona, gau badana be inai: Namona be Keristani taudia ese korosi o laulau ta idia tomadiho henia lasi. Baibel ia gwau: “Kaivakuku dekenai umui tomadiho henia lasi.” (1 Korinto 10:14) Iesu be iena hahediba taudia momokanidia edia toana ia herevalaia, ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”—Ioane 13:35.
Tomadiho karadia lalonai, Keristani taudia ginigunadia bamona, Iehova ena Witnes taudia be korosi o ena laulau idia tomadiho henia lasi to Baibel ena hereva idia badinaia. (Roma 3:4; Kolose 2:8) Unai dainai, edia tomadiho lalonai korosi idia gaukaralaia lasi.
[Picture on page 30]
Laulau ese ia hahedinaraia dirava koikoidia ia tomadiho henia Asuria ena king ta be korosi ta ia atoa, circa 800 B.C.E.
[Credit Line]
Photograph taken by courtesy of the British Museum