Iesu amo Ita Dibaia Gaudia

Mase Taudia Totona Helaro Ia Noho

Iesu be taunimanima toi ia hatoredia isi lou, bona unai ese ia hahedinaraia mase taudia totona helaro ia noho. (Luka 7:​11-17; 8:​49-56; Ioane 11:​1-45) Mase taudia edia helaro ita lalopararalaia totona, mase be edeseni amo ia mai bona ena badina ita dibaia guna be namo.

Dahaka Dainai Ita Gorere Bona Mase?

Iesu ese taunimanima edia kara dika ia gwauatao neganai, edia gorere ia ore. Hegeregere, paralais tauna ta be Iesu dekenai idia abia lao neganai, Iesu ia gwau: “Edena be ia haraga, lau gwau, ‘Emu dika lau gwauatao vadaeni,’ o bema lau gwau, ‘Oi toreisi, emu geda oi lokua, oi raka’? To do umui diba Taunimanima ena Natuna be mai siahu danu tanobada dekenai, dika do ia gwauatao. Vadaeni ia ese gorere tauna ia hamaoroa, ia gwau, ‘Oi toreisi, oiemu geda oi lokua, oiemu ruma dekenai oi lao.’ ” (Mataio 9:​2-6) Unai amo ita itaia, kara dika ese gorere bona mase ia havaraia. Tau ginigunana, Adamu, amo kara dika be ita dekenai ia hanaia.​​—⁠Luka 3:38; Roma 5:⁠12.

Dahaka Dainai Iesu Ia Mase?

Iesu be kara dika ta ia karaia lasi. Unai dainai, ia mase be maoro lasi. To, Iesu be ita dainai ia mase neganai, iseda kara dika ena davana ia karaia. Ia gwau iena rara be “taunimanima momo totona do ia bubua, dika gwauatao totona.”​​—⁠Mataio 26:⁠28.

Danu, Iesu be sibona ia gwauraia: “Taunimanima ena Natuna bamona, ia mai lasi taunimanima ese iena hesiai gaukara do idia karaia totona, to ia be taunimanima edia hesiai gaukara karaia totona ia mai, bona iena mauri do ia atoa diho, taunimanima momo edia dika davana karaia totona.” (Mataio 20:28) Iesu ia gwau ena mauri ia bouboulaia karana be “dika davana” karaia totona, badina unai ese taunimanima be mase amo ia ruhaia. Iesu ia gwau danu: “Lau mai vadaeni, mauri do idia abia, mauri mai anina momokani danu, do idia abia totona.” (Ioane 10:10) Danu, mase taudia edia helaro ita lalopararalaia namonamo totona, mase taudia dekenai dahaka ia vara ita dibaia guna be namo.

Ta Ia Mase Neganai Dahaka Ia Vara?

Iesu ena turana Lasaro ia mase neganai, Iesu ese ta ia mase neganai, dahaka ia vara ia gwauraia hedinarai. Iena hahediba taudia dekenai ia gwau: “Iseda turana Lasaro be ia mahuta noho, to lau lao, do lau hanogaia.” . . . Idia laloa ia ese mahuta lalonai laga-ani karana ia herevalaia. Vadaeni unai negai Iesu be idia dekenai ia hereva hedinarai, ia gwau: “Lasaro be ia mase vadaeni.” Unai amo, Iesu ia hahedinaraia mase taudia be idia mahuta mase bamona, gau ta idia diba lasi.​—⁠Ioane 11:​1-14.

Iesu ese ena turana Lasaro ia hatorea isi lou neganai, ia be dina foa ia mase vadaeni. To, Baibel ese Lasaro be unai dina foa lalonai ia dekenai idia vara gaudia ia sivarailaia lasi. Lasaro ia mase lalonai, gabu ta ia lao lasi, gau ta ia mamia lasi bona gau ta ia diba lasi.​—⁠Hadibaia Tauna 9:​5, 10; Ioane 11:​17-44.

Mase Taudia Totona Dahaka Helaro Ia Noho?

Mase taudia be do idia toreisi lou bona do idia noho ela bona hanaihanai. Iesu ia gwau: “Nega ta do ia mai, mase guria gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi.”​—⁠Ioane 5:​28, 29.

Unai helaro ese Dirava ena lalokau ia hahedinaraia. Iesu ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.”​—⁠Ioane 3:16; Apokalupo 21:​4, 5.

Hereva ma haida oi diba totona, Baibel be Dahaka Ia Hadibaia? bukana ena karoa 6 itaia.a

[Footnote]