Buka Bona Magasin Idia Printaia Rumana Ta Vadivadi Henia
REANA hari oi duahia magasin bona ma haida be guna oi itaia vadaeni. Reana Iehova ena Witnes taudia be emu ruma ai oi idia vadivadi henia bona oi dekenai Gima Kohorona bona Awake! idia henia, unai ese oi idia durua Baibel oi lalopararalaia namonamo totona. Eiava reana oi itaia dala dekenai o maketi gabudiai Witnes taudia be unai bamona magasin idia hariharilaia. Hua ta ta lalonai Witnes taudia ese inai bamona magasin 35 milioni mai kahana idia hariharilaia, unai namba ese tomadiho oreadia ma haida ese idia halasia magasin ena namba ia hanaia.
Reana nega ta oi henanadai, inai magasin be edeseniai idia karaia bona edena bamona idia karaia? Haere ita diba totona, namona be Wallkill, New York, U.S.A. ai, Iehova ena Witnes taudia edia buka bona magasin idia printaia rumana ta ita herevalaia—unai bamona printa rumadia ma haida be tano momo ai idia noho danu. Tanobada hegegemadai inai magasin idia duahia taudia momo be reana idia hegeregere lasi United States dekenai idia lao unai printa rumana itaia totona, unai dainai inai magasin ai idia noho herevadia bona laulaudia ese oi do idia durua unai printa rumana oi diba namonamo totona.
Printa gaukara ia do hamatamaia lasi neganai, Brooklyn, New York ai ia noho Toretore Dipatmen ese do idia printaia herevadia be kompiuta ai ia torea vareai guna. Bena idia torea gaudia (electronic files) be Magasin Bona Buka Edia Toana Ia Hegaegaelaia Dipatmen (Graphics Department) dekenai ia siaia lao. Bena ia ese palaka gaudia (printing plates) ia hegaegaelaia. Hua ta ta ai, Wallkill dekenai, lokua pepa badadia 1,400 bamona be printa rumana dekenai idia ginidae, bona pepa ibounai 70 ia lao 80 metriki ton bamona be dina ta ta ai idia gaukaralaia. Unai pepa badadia—haida edia metau be 1,300 kilogram bamona—be printa masini badadia (web-offset presses) faiv mai edia palaka gaudia (printing plates) dekenai idia atoa. Unai printa masini ese pepa idia printaia, utua bona rau 32 magasin ia karaia. Hari oi duahia magasin be unai bamona idia karaia. Buka be edena bamona? Buka idia karaia gabuna (bindery) ai pepa o rau ibounai be idia hakapua tamona, bena buka idia karaia. Unai bamona printa gabudia be rua: Ginigunana be, dina tamona lalonai buka mai ena kopina aukana 50,000 o buka mai ena kopina manoka 75,000 ia karaia diba. Iharuana be, dina ta ta ai buka mai ena kopina manokana 100,000 ia karaia diba.
Lagani 2008 ai, unai printa rumana ese buka 28 milioni mai kahana ia printaia—idia 2 milioni mai kahana be Baibel. Unai lagani tamona lalonai, magasin 243,317,564 ia printaia. Unai printa gabuna dekenai be gado 380 ai idia hahanaia Baibel idia herevalaia bukadia idia noho. Unai buka o magasin idia karaia murinai, dahaka ia vara?
Iehova ena Witnes taudia—United States ai idia noho kongrigeisen 12,754 bona Caribbean bona Hawaii ai idia noho kongrigeisen 1,369—ese edia magasin bona buka oda be unai printa gabuna dekenai idia siaia lao. Buka Siaia Dipatmen (Shipping Department) ese kongrigeisen edia oda ia abia neganai, unai oda hegeregerena buka bona magasin be boksi ai idia udaia, bona kongrigeisen ena adres maorona dekenai idia siaia lao. Lagani ta ta ai, unai dipatmen ese United States ena kongrigeisen dekenai idia siaia lao buka bona magasin edia metau be 14 milioni kilogram bamona.
Unai printa rumana dekenai mai anina bada gauna be masini lasi, to taunimanima. Gaukara taudia 300 mai kahana be printa rumana ai idia noho dipatmen idauidau—Graphics, Scheduling, Pressroom, Bindery, bona Shipping Department—dekenai idia gaukara. Idia ibounai be volantia gaukara idia karaia bona edia gaukara ena pei o davana idia abia lasi, bona edia mauri lagani be 19 ia lao 92.
Idia be taunimanima edia namo idia laloa bada—idia diba inai magasin o buka idia abia taudia be unai gaudia amo diba bona goada do idia abia sibona lasi, to Baibel ena hereva ese do ia hakaudia. Ai diba oi be unai bamona duahia tauna ta bona emai printa rumadia dekenai idia printaia buka bona magasin oi duahia ese oi ia durua Iehova Dirava bona Iesu Keriso oi diba noho totona, unai amo mauri hanaihanai oi davaria diba.—Ioane 17:3.
[Pictures on page 16]
[Full-page picture on page 17]