Brens amo Ia mai Revarevana

Basileia Pablisa Taudia e:

“Dirava ese unai hadoa gauna ia hatubua.” (1 Kor. 3:6) Inai lagani ena Memorial dekenai idia mai kamonai taudia momo ita itaia neganai, unai be moale gauna momokani. April 16 ai unai mai anina bada hebouna totona taunimanima ibounai 17,843 idia mai. Unai namba be Papua New Guinea ena namba gunana ia hanaia.

May 31, 2003 ena spesel Magasin Dinana ai Iehova ese iseda hekwarahi ia hanamoa dalana ita itaia danu. Kongregesen momo ese ripoti namona idia abia, bona unai gaukara badana idia karaia pablisa taudia be idia moale bada danu. Kongregesen ta ia gwau kahirakahira pablisa ibounai be unai gaukara idia karaia, bona unai spesel dinana ai magasin 1,000 mai kahana idia hariharilaia. Tadikaka ta be daba maragi ai ena magasin gaukara ia matamaia, ena hanua dekenai idia noho kamonai taudia ia vadivadi henia, bena dina lalonai magasin gaukara grup idauidau ida ia gaukara. Unai spesel Magasin Dinana ai, magasin 140 ia hariharilaia.

Mai moale danu umui ai hadibaia Kingdom Hall matamata ta be Kokopo dekenai idia haginia vadaeni, bona unuseniai misinari rumana be kahirakahira do idia haorea. Kingdom Hall be Kokopo taoni ia lao henia dala badana badinai ia gini. Kingdom Hall haginia grup matamatana ta idia abia vadaeni bona tadikaka idia hegaegae Kimbe, Misima, Tabubil, bona Badili ai Kingdom Hall idia haginia totona.

Lagani momo lalonai brens opesi habadaia gaukarana ai herevalaia, badina Betele ena dipatmen haida idia noho gabuna be ia maragi, hegeregere Gado Hahanaia Dipatmen. Unai dala dekenai, gau ibounai idia heau namonamo. Palani be kahirakahira idia haorea bona gavamani amo gwaumaoro idia abia vadaeni. Ensinia tauna ta ai abia vadaeni bona ai laloa hua haida murinai haginia gaukara do ia matamaia.

Lagani 2004 ena hesiai lagani ita matamaia neganai, umui ida ai guriguri hebou Iehova ese ‘unai hadoa gauna do ia hatubua noho.’

Emui tadikaka,

P.N.G. Brens Opesi