Idau Gado Taudia Tahua

1. Dahaka dainai gado idauidau taudia idia noho teritori be gado ta ta hegeregerena idia haria?

¹ Pentekoste 33 C.E. ai, Iesu ena hahediba taudia be lauma helaga idia abia murinai, “gado idauidau ai idia hereva matamaia” bona gabu idauidau amo idia mai taudia idia haroro henia. (Kara 2:4) Unai dainai, taunimanima 3,000 bamona be bapatiso idia abia. Toana be unai vadivadi taudia momo be Heberu o Greek gado ai idia hereva. To, Iehova ia ura unai taudia be edia gado korikori ai Basileia sivaraina idia kamonai. Taunimanima be edia gado korikori ai sivarai namona idia kamonai neganai, idia moale. Unai dainai, hari inai negai, gado idauidau taudia idia noho teritori be gado ta ta hegeregerena idia haria neganai, unai gado ia diba kongrigeisen idia henia. (Orea bukana, rau 107, par. 2-3) To bema idau gado grup ta be teritori ta idia henia lasi, vadaeni namona be idia ia naria kongrigeisen o ma haida edia teritori ai idia haroro bona edia gado taudia idia tahua.

2. (a) Gado idauidau taudia be edeseniai do ita davaria? (b) Edena dala ai gado idauidau taudia idia noho teritori ai kongrigeisen haida idia gaukara hebou? (c) Bema gado ma ta ai ia hereva kamonai tauna ita davaria, dahaka ita karaia be namo?

² Bema emu teritori ai taunimanima ibounai be oi diba gadona ai idia hereva, idia oi haroro henia be auka lasi. To, bema siti o taoni badadia ai taunimanima be gado idauidau ai idia hereva, idia oi haroro henia be ia idau. Reana idau gado kongrigeisen haida be emu kongrigeisen ena teritori ai idia haroro danu. Vaia, idia ese emu gado ai ia hereva tauna ta idia davaria neganai, emu kongrigeisen do idia hadibaia. To, emu gado ai idia hereva taudia tahua gaukarana be emu kongrigeisen o grup ena maduna. (Maua ladana “Ita Gaukara Hebou” itaia.) Edena dala ai emu kongrigeisen o grup ese gado idauidau taudia tahua gaukarana ia karaia diba?

3. Kongrigeisen o grup be idau gado taudia idia tahua neganai, namona be dahaka idia laloa guna bona hora hida idia gaukaralaia diba?

³ Idau Gado Taudia Tahua: Teritori haida ai gado idauidau taudia momo idia noho to ma haida dekenai reana ta, rua o haida sibona idia noho. Unai dainai, reana gado idauidau taudia momo idia noho gabunai hora momo do ita haroro, to ma haida dekenai reana hora haida sibona do ita haroro. To, nega ita halusia kava lasi totona gau haida ita tahua guna be namo, hegeregere: Eda gabu ai taunimanima hida be unai gado ai idia hereva? Pablisa hida idia noho? Kongrigeisen o grup be unai gado taudia edia noho gabuna o adres hida idia diba vadaeni? Kongrigeisen be teritori idauidau ai idia haroro diba, to nega idia gaukaralaia namonamo totona, namona be momo idia noho teritori o kahirakahira teritori ai idia haroro. To, kongrigeisen ese idau gado taudia ia tahua totona, palani namona ia karaia be gau badana, unai amo momo be Iehova ena ladana dekenai idia boiboi diba.​—Roma 10:13, 14.

4. (a) Idau gado taudia tahua gaukarana be edena bamona ita karaia be namo? (b) Emu gado ai idia hereva taudia be edena dala haida ai oi davaria diba?

⁴ Gau badana be haroro naria tauna (o elda oreadia) ese tahua gaukarana ena teritori ia hegaegaelaia bona haria namonamo, unai amo kongrigeisen be ena teritori maorona ai ia haroro diba. (1 Kor. 9:26) Namona be elda oreana ese elda o hesiai tauna ta ia abia hidi edia kongrigeisen henunai ia noho idau gado grup ia gunalaia totona. Kongrigeisen bona grup momo be telefon bukana o Intanet dekenai taunimanima edia ladana idia sekea guna, unai amo do idia diba unai be edia hanua taudia edia ladana bamona o lasi. Adres o ladana idia haboua murinai, telefon amo unai taudia idia rini henidia o vadivadi henidia. Bema hegeregere, idau gado grup ia naria elda oreana ese pablisa ibounai ia hadibaia, unai grup ida nega ta ta idia gaukara hebou, idau gado taudia tahua totona.​—Maua ladana, “Emu Gado Taudia Tahua Dalana” itaia.

5. (a) Idau gado taudia tahua gaukarana ia karaia pablisa be edena dala namodia haida ia badinaia diba? (b) Taunimanima ita davaria neganai, dahaka ita gwau diba?

⁵ Idau gado taudia tahua gaukarana ita karaia negadiai, lalohadai maorona ita abia be namo. Unai be haroro gaukara ena kahana ta dainai, dabua namodia ita hahedokilaia be namo. Pablisa momo idia gwau gado ma ta ai hamatamaia herevadia idia tohoa loulou karana ese idia ia durua mai ura bada ida unai gado idia herevalaia namonamo totona. Idau gado taudia tahua gaukarana ena hora ita ripotilaia diba, to teritori ena mapu bona lista ita hegaegaelaia ena hora ita ripotilaia lasi. Bema ita diba gadona ai ia hereva tauna ita davaria, namona be ia dekenai sivarai namona ita harorolaia, bena haroro naria tauna o ia ese ia abia hidi tadikaka ita hadibaia, unai amo teritori ena rekodi ai ia torea diba. Unai bamona ita karaia diba herevana ita haroro henia tauna ia kamonai o lasi. Namona be idau gado taudia tahua gaukarana sibona ita karaia lasi, to haroro gaukara ena kahana idauidau ita karaia danu.​—Maua ladana “Ita Gwauraia Herevana,” itaia.

6. Dahaka dainai taia kudima taudia ita tahua be mai ena hekwarahi?

⁶ Taia Kudima Taudia Tahua: Namona be ita hesiku lasi to ita gaukara goada taia kudima taudia ita tahua totona, herevana unai be mai ena hekwarahi. Taia kudima taudia ita dibaia be auka, badina edia ladana, kara bona edia dabua toana be iseda hegeregerena. Danu, taia kudima tauna ena famili o turadia be ia idia gimaia totona, reana do idia ura lasi pablisa dekenai ena ladana idia henia. Taia kudima taudia tahua totona heduru daladia haida do ita herevalaia, bona idau gado taudia ita tahua neganai unai dala haida ita badinaia diba.

7. (a) Taia kudima o mu taudia be edena bamona ita tahua diba? (b) Ruma tauna ia laloa kerere lasi totona dahaka ita karaia be namo?

⁷ Kongrigeisen bona grup haida be taunimanima edia noho gabudiai taia kudima o mu taudia haida idia davaria. Reana ruma taudia haida idia diba edia dekena tauna ta, gaukara o sikuli turana ta, eiava varavara ta be mu o taia kudima tauna. To oi laloatao, haida be emu vadivadi ena badina do idia laloa kerere. Unai dainai, ruma tauna ia gari lasi totona, mai hemataurai ida emu vadivadi ena badina oi herevalaia guna. Hegeregere, pablisa haida be ruma tauna dekenai Baibel o saini gado DVD idia hahedinaraia. Bena ruma tauna idia hadibaia idia ura Baibel ena gwauhamata namodia be mu o taia kudima taudia dekenai idia harorolaia. Bema ruma tauna ia ura lasi mu o taia kudima tauna ena ladana ia henia, reana emu adres, telefon namba, o hebou ena invateisen pepana oi henia, bena ia ese mu o taia kudima varavara o turana dekenai ia henia diba.

8. Kongrigeisen ma ta be edena dala ai saini gado kongrigeisen o grup ia durua diba?

⁸ Saini gado kongrigeisen o grup haida edia teritori be bada dainai, lagani ta ta ai dina ta o rua idia makaia, bena idia kahirakahira ia noho idau gado kongrigeisen idia noia taia kudima taudia tahua gaukarana idia karaia hebou totona. Bena haroro grup hebouna ai, unai gaukara karaia dalana idia herevalaia bona haheitalai ta idia hahedinaraia. Saini gado kongrigeisen o grup ena pablisa ta ta be unai haroro grup ta ta ia bamoa, bona teritori mapu ta idia henia, gabu maorona ai taia kudima taudia idia tahua totona.

9. Edeseniai taia kudima o mu taudia ita tahua diba?

⁹ Danu, taia kudima o mu taudia ita tahua gabudia haida be inai: Idia moale hebou gabudia bona komiuniti ai heduru idia abia gabudia. Pablisa be unai gabu ia lao neganai, namona be dabua namodia ia hahedokilaia. Saini gado amo ia haroro neganai, namo lasi grup ia haroro henidia, to tamona o rua ia haroro henia be aonega karana. Bema taia kudima o mu tauna be pablisa ena haroro herevana ia moalelaia, vadaeni iena adres ia abia o pablisa ese taia kudima o mu tauna dekenai ena adres ia henia.

10. Edena dala ai bisinesi gabudiai taia kudima o mu taudia ita tahua diba?

¹⁰ Taia kudima o mu taudia tahua dalana ma ta be bisinesi teritori ena mapu ita hegaegaelaia, bona nega maorona ai unai gabu ai ita haroro. Reana mapu ta ai sevis steiseni gabudia haida oi makaia. Mapu ma ta ai stoa badadia bona maragidia, hotel, bona bisinesi gabudia ma haida oi makaia. Bema mapu ta ta be unai bamona ita makaia, unai ese pablisa ia durua diba taia kudima o mu taudia haroro henia dalana tamona ia gaukaralaia bona ia manadalaia. Hegeregere, bema nega momo hotel ta dekenai taia kudima taudia idia noho, hotel ena risepsen ai ia gaukara tauna dekenai iseda gaukara ena badina ita herevalaia sisina, bona pasolo ta​—ia lalonai be saini gado DVD (eiava Dirava Oi Kamonai Henia buklet ta) bona kongrigeisen hebou ena invateisen pepana​—ita henia, bena ia ese taia kudima taudia dekenai ia henia diba. Eiava bisinesi gabudia haida dekenai, ita henanadai diba bema gaukara taudia o kastoma haida be taia kudima o mu taudia. Bema teritori ta ai taia kudima taudia edia sikuli ta ia noho, vadaeni saini gado DVD haida ita henia diba, edia laiberi ai idia atoa totona.

11. Dahaka dainai taunimanima tahua gaukarana be haroro gaukara ena kahana badana ta?

¹¹ Gaukara Badana: Emu gado ai idia hereva taudia tahua karana be mai ena hekwarahi. Danu, taunimanima be gabu ta amo idia lao gabu ma ta ai idia noho dainai, teritori ena rekodi ita haidaua loulou. Unai dainai, gado idauidau taudia tahua gaukarana be haroro gaukara ena kahana badana ta. Ita dekenai unai maduna ia henia Diravana, Iehova, be taunimanima edia toana ia laloa lasi. (Kara 10:34) Iena “ura be taunimanima idauidau do ia hamauria bona hereva momokani ena diba maoromaoro do idia abia.” (1 Tim. 2:3, 4) Unai dainai, namona be Iehova bona pablisa ibounai ida ita gaukara hebou gado idauidau idia herevalaia “kudou namo” taudia ita tahua totona.​—Luka 8:15.

[Box on page 5]

Ita Gaukara Hebou

Bema emui kongrigeisen o grup ia ura kongrigeisen ma ta ese umui ia durua, emui gado taudia idia haroro henia totona, emui haroro naria tauna ese unai kongrigeisen ena elda ia noia diba. Dala namona be umui kahirakahira ia noho kongrigeisen ena heduru umui noia, o emui gado ai idia hereva taudia momo idia noho gabudiai umui haroro. Bena unai kongrigeisen ena elda ese ena pablisa do ia hadibadia bema emui gado idia herevalaia taudia idia davaria, namona be edia adres idia torea bona edia haroro naria tauna idia henia, unai amo ia ese emui kongrigeisen o grup do ia henia. Namona be unai haroro naria taudia ruaosi ese teritori idia palania namonamo, unai amo gado idauidau taudia idia haroro henia bona kamonai taudia be kongrigeisen o grup maorona dekenai idia siaia diba.

Bema pablisa be kamonai tauna ta (idau gado, taia kudima o mu tauna) ia davaria, namona be Mani Lou Henia (S-43) fom ia hahonua bona ena kongrigeisen seketere ia henia. Unai amo kamonai tauna be heduru do ia abia haraga.​—km 11/11 rau 5 itaia.

[Box on page 6]

Emu Gado Taudia Tahua Dalana

• Baibel stiuden taudia, ruma bese, gaukara turadia bona ma haida oi nanadaia.

• Telefon bukana o Intanet dekenai taunimanima edia ladana oi sekea guna, unai amo do oi diba daika ena ladana be emu hanua taudia edia ladana bamona.

• Laiberi, gavamani ofesi, bona sikuli dekenai emu gado ai idia hereva taudia oi tahua.

• Niuspepa oi sekea badina nega haida hadibaia herevadia ese pablik idia hadibaia idau gado komiuniti be edeseniai hebou ta do idia karaia.

• Idau gado taudia idia lao momo stoa bona bisinesi gabudia oi vadivadi henia.

• Bisinesi gabudia, iunivesiti o peleini abia gabudia idia naria taudia amo gwaumaoro oi abia guna, bena unuseniai buka bona magasin oi hariharilaia diba.

• Telefon bukana ena yellow pages o Intanet amo kampani edia adres oi sekea.

[Box on page 7]

Ita Gwauraia Herevana

Bema kiri toana ita hahedinaraia bona mai gado namo ida ita hereva, ruma tauna do ia gari lasi ita ia hereva henia totona. Kamonai tauna dekenai iena gado ai idia hahanaia buka bona magasin oi hahedinaraia.

Ia oi hanamoa murinai, oi gwau: “Ai be ______ gado taudia ai tahua, badina ai ura idia ida Baibel ena gwauhamata namodia ai herevalaia. Idia haida oi diba, a?”

Taia kudima o mu taudia oi tahua neganai, reana oi gwau: “Namo. Ia namo oi dekenai gau ta lau hahedinaraia, a? [Vidio player ta amo saini gado DVD oi hahedinaraia.] Ai dekenai DVD ma haida idia noho, unai ese taia kudima o mu tauna do ia durua Dirava ia diba totona. Unai bamona tauna ta oi diba, a?” Bema vidio player be lasi, oi gwau diba: “Namo. Taia kudima o mu tauna ta oi diba, a?” Bema ruma tauna ia gwau ia diba lasi, vadaeni oi nanadaia bema ia diba ena gaukara gabunai, sikuli o dekena taudia haida be taia kudima o mu taudia.