Duahia Taudia Idia Henanadai
Aonega Taudia Toi be Momokani Iesu Idia Vadivadi Henia, A?
Tanobada ibounai ai Krismas sivarai momo ese idia hahedinaraia king taudia o aonega tatau toi be beibi maragina Iesu dekenai harihari gaudia idia henia. Unai sivarai be momokani, a? Hamomokania gaudia haida idia noho, a? Mani ita itaia.
Evanelia bukadia, Mataio bona Luka, ese Iesu ia vara neganai idia vara gaudia idia herevalaia. Idia hahedinaraia Iesu ia vara neganai, hanua murimurina ai idia noho mamoe naria taudia sibona ese ia idia vadivadi henia. Momo idia laloa Iesu ia vara neganai, ia idia vadivadi henia taudia be king o aonega bada tatau, to lasi, idia be hisiu stadilaia taudia bona Baibel ia gwau lasi idia be hida. Unai hisiu stadilaia taudia ese Iesu idia vadivadi henia neganai, ia be boromakau edia ruma dekenai ia noho lasi to ruma dekenai ia noho, bona ia be beibi lasi to mero maragina ta. Bona edia vadivadi dainai Iesu be ena mauri ia haboioa diba!
Baibel torea tauna Luka ese Iesu ena vara sivaraina ia herevalaia dalana mani ita laloa, ia gwau: “Mamoe naria taudia haida be uda dekenai idia noho, hanuaboi neganai edia mamoe orea idia naria noho. Vadaeni Lohiabada ena aneru ta ia lao, edia badibadinai ia gini, bona . . . ia gwau: ‘. . . Mero maragina [“beibi,” NW] do umui davaria, boromakau edia aniani maua dekenai ia hekure, dabua dekenai idia kumia.’ . . . Vadaeni idia raka haraga, idia lao, Maria bona Iosepa idia davaria, bona mero maragi, boromakau edia aniani maua dekenai ia hekure.”—Luka 2:8-16.
Iosepa, Maria bona mamoe naria taudia sibona be beibi maragina Iesu ida idia noho. Luka ena revareva be ma haida ia gwauraia lasi.
Mataio 2:1-11 ai ia noho sivaraina mani oi laloa: “Iesu be Betelehema, Iudea dekenai ia vara, unai be king Heroda ena lohia negana lalonai. Aonega taudia be dina daekau kahana dekena amo Ierusalema dekenai idia ginidae. . . . Vadaeni ruma dekenai idia raka vareai, mero maragina ena sinana Maria danu idia itaia.”
Mataio karoa 2 bona siri 1 ia gwau “aonega taudia,” to ia gwau lasi “aonega taudia toi,” bona unai aonega taudia be ist kahana amo idia mai neganai, Ierusalema dekenai idia lao guna, to Iesu ia vara gabuna, Betelehema dekenai lasi. Gabeai unai aonega taudia be Betelehema dekenai idia ginidae neganai, Iesu be “mero maragina”—beibi lasi—bona ia be animal edia ruma ai ia noho lasi, to ruma ta dekenai ia noho.
Danu, Hiri Motu Baibel be inai hereva “aonega taudia” ia gaukaralaia, to Baibel ma haida ai be inai hereva “Magi” o “hisiu stadilaia taudia” idia gaukaralaia. Buka ta (A Handbook on the Gospel of Matthew) ia gwau, inai hereva “aonega taudia” be idia gaukaralaia “Greek herevana ta idia hahanaia totona, bona unai hereva be idia gaukaralaia Parasa ena pris taudia idia herevalaia totona badina idia be hisiu stadilaia taudia.” Bona buka ta (The Expanded Vine’s Expository Dictionary of New Testament Words) ia gwau unai hereva ena anina be “babalau o meamea taudia.”
Ena be hari hisiu stadilaia bona babalau o meamea karadia be bada, to Baibel ia gwau unai gaudia dekenai ita naria namonamo be namo. (Isaia 47:13-15) Unai be lauma dikadia ida herevahereva karana bona Iehova ese ia inai henia momokani. (Deuteronomi 18:10-12) Unai dainai hisiu stadilaia taudia dekenai Iesu ia vara sivaraina be Dirava ena aneru ta ese ia gwauraia lasi. To, Iehova ese nihi ta amo unai aonega taudia ia hadibaia King Heroda dekenai do idia giroa lou lasi totona, badina ia ura Iesu do ia hamasea. Unai dainai idia be “dala idauna dekenai edia hanua dekenai idia giroa lou.”—Mataio 2:11-16.
Keristani taudia momokanidia be Iesu ena vara dalana idia hakoikoia herevadia do idia abia dae, a? Lasi momokani.