Iehova ese Oi Ia Nanadaia Dalana Oi Abia Dae, A?
BAIBEL lalonai idia noho henanadai momo ese ita ia durua diba iseda lalona ena ura ita tahua totona. Oibe, Iehova Dirava be henanadai ia gaukaralaia mai anina bada gaudia ia hadibaia totona. Hegeregere, Kaino be ena tadina ia do hamasea lasi neganai, Iehova be henanadai amo Kaino ia durua dala kererena ia dadaraia totona. (Gen. 4:6, 7) Nega haida, Iehova be henanadai ia gaukaralaia tau ta ena lalona ia veria dala maorona ia badinaia totona. Iehova ia henanadai: “Daika do lau siaia? Daika be ai totona do ia lao?” Peroveta tauna Isaia ia haere ia gwau: “Lau be inai, do lau lao! Lau do oi siaia!”—Isa. 6:8.
Hadibaia Tauna Badana, Iesu, danu be henanadai ia gaukaralaia namonamo. Evanelia bukadia lalonai Iesu ena henanadai 280 mai kahana idia noho. Ena be nega haida henanadai ia gaukaralaia ia idia hereva dika henia taudia edia hereva ia koua totona, to nega momo iena ura be iena henanadai ese kamonai taudia edia kudouna do ia hamarerea, bona edia hetura karana Dirava ida idia laloa namonamo totona. (Mat. 22:41-46; Ioa. 14:9, 10) Unai hegeregerena, Keristani Greek Revarevadia ena buka 14 ia torea tauna, aposetolo Paulo be lalona veria henanadai haida ia gaukaralaia danu. (Roma 10:13-15) Hegeregere, Roma tadikaka dekenai ia torea revarevana lalonai henanadai momo idia noho. Paulo ena henanadai ese duahia taudia edia lalona ia veria, “Dirava ena taga bona ena aonega bona ena diba” edia “dobu momokani” gaudia idia laloa bada totona.—Roma 11:33, NW.
Henanadai haida be kamonai taudia ese hereva amo idia haerelaia, to ma henanadai haida be idia laloa dobu totona. Unai hegeregerena, Evanelia bukadia ese idia hahedinaraia Iesu be taunimanima ese do idia laloa dobu henanadai momo ia gaukaralaia. Nega ta, Iesu be ena hahediba taudia ia sisiba henidia: “Umui naria namonamo, Farisea taudia bona Heroda edia paraoa hatubua gauna umui abia garina.” Iesu be Farisea taudia edia koikoi bona hahediba hereva koikoidia ia herevalaia. (Mar. 8:15; Mat. 16:12) To, Iesu ena hahediba taudia be Iesu ena hereva idia lalopararalaia lasi bona idia ta be paraoa ia abia mai lasi dainai idia hepapahuahu. Edia herevahereva lalonai Iesu ese henanadai ia gaukaralaia dalana mani oi itaia. “Ia gwau: ‘Badina dahaka umui herevahereva aniani lasi dainai? Umui diba lasi bona laloa namonamo lasi, a? Umui emui lalona be ia koua noho, a? Mai matana rua umui noho, to umui itaia lasi, a? Mai taiana rua umui noho, to umui kamonai lasi, a? . . . Umui laloatao lasi, a?’ ” Hahediba taudia do idia laloa namonamo totona, Iesu be henanadai ia gaukaralaia bona ia ura idia ese ena hereva anina do idia lalopararalaia.—Mar. 8:16-21.
“Oi Dekenai Lau Nanadaia”
Iehova Dirava be henanadai ia gaukaralaia iena hesiai tauna Iobu ena lalohadai ia hamaoromaoroa totona. Iehova be henanadai momo amo Iobu dekenai ia hahedinaraia, Ia be Havaraia Tauna bona atai herea Diravana bona Iobu be taunimanima sibona. (Iobu, karoa 38-41) Iehova be unai henanadai ia henia neganai, ia ura Iobu ese do ia haerelaia, a? Reana lasi. Hegeregere, inai henanadai: “Lau ese tanobada lau karaia neganai oi be edeseni?” Unai henanadai amo Iehova be Iobu ena lalohadai bona hemami ia tahua. Unai bamona henanadai haida ia henia murinai, Iobu be ia hereva diba lasi, to ia gwau: “Lau be namo lasi momokani, edena bamona oi dekenai do lau haere? Lau ese hereva ma ta do lau gwauraia lasi be namo.” (Iobu 38:4; 40:4) Iobu be Iehova ena hereva ia lalopararalaia bona ia manau. To, Iehova be Iobu ia hadibaia do ia manau sibona lasi, to ena lalohadai do ia hamaoromaoroa. Edena dala ai?
Ena be Iobu be “kerere ta lasi, bona kara maoromaoro tauna,” to nega haida iena hereva haida amo lalohadai kererena ia hahedinaraia. Elihu be Iobu ena hereva ia hamaoromaoroa badina Iobu be “ia sibona maoromaoro ia gwauraia, to ia ese Dirava be maoromaoro ia gwauraia lasi.” (Iobu 1:8; 32:2; 33:8-12) Unai dainai, Iehova ena henanadai karana ese Iobu ena lalohadai ia hamaoromaoroa. Dirava be lai badana amo Iobu ia hereva henia, ia gwau: “Oi be daika, oi ese anina lasi hereva dekena amo, egu aonega dekenai dibura oi atoa, a? Oi ese harihari tau korikori bamona, do oi gini maoromaoro, bona oi dekenai lau nanadaia gaudia do oi haere henia.” (Iobu 38:1-3) Iehova be ena henanadai amo ia havaraia gaudia ia herevalaia, bona unai amo ia hahedinaraia ena diba bona siahu be bada herea. Iobu be unai gaudia ia diba neganai, unai ese ia durua Iehova ena gaukara bona hahemaoro maoromaoro karana ia abidadama henia totona. Siahu Ibounai Diravana ese Iobu be unai dala ai ia henanadai henia karana be hoa gauna ta!
Iehova Ena Henanadai Ita Abia Dae Dalana
To ita be edena bamona? Baibel ai idia noho henanadai ese ita idia durua diba, a? Oibe! Iehova ena henanadai ita laloa dobu karana ese ita ia durua iseda abidadama ita hagoadaia totona. Baibel lalonai idia noho henanadai be mai edia siahu bona ita idia durua diba. Oibe, “Dirava ena hereva be ia mauri noho, bona ia be mai ena siahu. Ia ese . . . iseda lalona bona iseda kudouna ena ura ibounai ia tahua diba.” (Heb. 4:12) Namo ita abia totona, namona be unai henanadai be be ita ta ta sibona dekenai ita henia. (Roma 15:4) Mani haheitalai haida ita laloa.
“Tanobada ibounai ena kota biaguna be kara maoromaoro do ia karaia lasi, a?” (Gen. 18:25) Dirava ia ura Sodoma bona Gomora ia hadikaia neganai, Aberahamo ese unai henanadai be Iehova dekenai ia henia. Aberahamo ia abia dae Iehova ese kara maoromaoro taudia be kara dika taudia ida do ia hamasedia lasi. Aberahamo ena henanadai amo ia hahedinaraia ia be Iehova ena hahemaoro maoromaoro karana ia abidadama henia momokani.
Hari inai negai, taunimanima edia lalohadai Iehova ena hahemaoro karadia dekenai be idauidau. Hegeregere, daidia be Aramagedono amo do idia roho mauri eiava daidia be do idia toreisi lou. Namo lasi unai bamona gaudia dainai ita laloa daradara momo, to namona be Aberahamo ena henanadai ita laloa. Aberahamo hegeregerena, ita diba Iehova be iseda hebogahisi bada guba Tamana bona ita abia dae ia be hahemaoro maoromaorona do ia karaia. Unai lalohadai maorona ita abia neganai, unai gaudia dekenai iseda nega bona goada bada do ita haorea kava lasi.
“Umui daika be ena laloa hekwarahi dekena amo iena mauri ena nega sisina do ia halataia diba, a?” (Mat. 6:27) Iesu be hutuma bada bona iena hahediba taudia dekenai unai henanadai ia henia neganai, ia ura idia ia hadibaia edia lalohekwarahi gaudia ibounai be Iehova ena imana dekenai idia atoa be namo. Inai tanobada dokona ena dina gabedia ai lalohekwarahi gaudia momo idia vara, to unai ita laloa momo karana ese eda mauri do ia halataia lasi bona iseda mauri do ia hanamoa lasi.
Ita o iseda lalokau taudia dainai ita laloa momo neganai, Iesu ese ena hahediba taudia dekenai ia henia henanadai ese ita do ia durua lalohadai maorona ita abia totona. Ita do ia durua lalohadai kereredia o ita idia hametaua hekwakwanai do ita laloa momo lasi totona. Iesu ese ita ia hadibaia iseda guba Tamana, manu dekenai aniani ia henia bona tubutubu gaudia dekenai hairai ia henia Tauna, be iseda dabu gaudia ia diba.—Mat. 6:26-34.
“Tau ta ese lahi ena gida, be iena kemena dekenai do ia abia loaloa, a? Iena dabua do idia gabua lasi, a?” (Aon. 6:27) Aonega Herevadia karoa 1 ia lao karoa 9 lalonai, tamana ta ese ena natuna mero dekenai ia henia aonega sisiba herevadia idia torea. Ataiai idia noho henanadai be heudahanai karana ese ia havaraia dika ia herevalaia. (Aon. 6:29) Bema ita itaia, ita be ta ita ha-uraia kava eiava matabodaga lalohadai ita abia, ataiai ia noho henanadai ese ita ia hadibaia unai kara be dika bona ita hadokoa be namo. Unai sibona lasi, to bema ta be dala kererena ia badinaia matamaia, unai henanadai ia laloa dobu be namo. Baibel ena hakaua herevadia ia hahedinaraia goevagoeva: ‘Bema tau ta aniani uhena ia hadoa, vadaeni unai bamona aniani sibona be do ia abia.’—Gal. 6:7.
“Oi be daika, tau ta ena hesiai tauna do oi gwauraia kerere?” (Roma 14:4) Paulo be Roma tadikaka dekenai revareva ia siaia neganai, aposetolo edia nega ai kongrigeisen lalonai idia vara hekwakwanai ia herevalaia. Keristani taudia be mauri daladia idauidau amo idia mai bona haida be edia tadikaka edia kara bona abia hidi gaudia dainai idia hahemaoro henidia. Paulo ena henanadai ese idia ia durua tadikaka taihu do idia kara namo henia bona hahemaoro karana be Iehova dekenai do idia rakatania.
Unai hegeregerena hari inai negai, Iehova ena taunimanima be mauri daladia idauidau amo idia mai. To, Iehova ese dala namo hereana ai ita ia hatamonaia. Oi be unai lalotamona karana oi habadaia noho, a? Bema ita be tadikaka ta ena kara o abia hidi ta dainai ia ita hahemaoro henia haraga, ataiai ia noho henanadai ese ita ia durua iseda lalohadai ita hamaoromaoroa totona!
Henanadai ese Ita Idia Durua Iehova Kahirakahira Ita Lao Totona
Ataiai idia noho henanadai ese Baibel ai idia noho henanadai haida ia hahedinaraia. Unai henanadai badinai idia noho siridia ita laloa namonamo neganai, ita do idia durua edia sisiba ita badinaia totona. Bona Baibel ita duahia neganai, henanadai ma haida do ita davaria.—Rau 14 ai ia noho maua itaia.
Baibel ai idia noho henanadai oi lalodia dobu neganai, unai ese oi do idia durua emu lalona bona kudouna ai Iehova ena dala maorodia oi badinaia totona. Iehova ese Iobu ia nanadaia murinai, Iobu ia gwau: “Guna egu taiana sibona dekenai, oiemu sivarai lau kamonai, to harihari egu matana ese, oi idia itaia momokani vadaeni.” (Iobu 42:5) Momokani, Iobu ese Iehova be taunimanima korikorina ta bamona ia itaia. Iamesi ese unai herevalaia, ia gwau: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.” (Iam. 4:8) Namona be Dirava ena Hereva ibounai, ena henanadai danu, ese ita idia durua iseda hetura karana Iehova ida ita hagoadaia bona Ia do ita “itaia momokani”!
[Box on page 14]
Edena dala ai henunai idia noho henanadai laloa dobu karana ese oi do ia durua, Iehova ena lalohadai gau haida dekenai oi abia dae totona?
▪ “Edena kara be Lohiabada ia ura henia bada, a? Idia gabua boubou, bona boubou idauidau ia ura henia, a?”—1 Sam. 15:22.
▪ “Dirava ese iseda matana ia karaia, be . . . ia itaia diba lasi, a?”—Sal. 94:9.
▪ “Tau ta oi itaia, ia sibona aonega ia gwauraia noho?” —Aon. 26:12.
▪ “Oiemu badu be ia maoro, a?”—Iona 4:4.
▪ “Bema tau ta ese tanobada ibounai ia abia, to iena mauri ia halusia, be edena bamona namo do ia abia?”—Mat. 16:26.
▪ “Daika ese Keriso ena lalokau ita dekena amo do ia kokia diba?”—Roma 8:35.
▪ “Oi davaria gaudia ibounai be Dirava ese oi dekenai ia henia vadaeni, ani?”—1 Kor. 4:7.
▪ “Edena bamona diari bona dibura idia noho hebou diba?”—2 Kor. 6:14.
[Picture on page 15]
Iehova ena henanadai karana amo Iobu be dahaka ia dibaia?