Peroveta Taudia Tohotohoa—Ioela
1. Ita haroro neganai, edena dala ai Ioela ena manau karana ita tohotohoa diba?
1 Peroveta tauna Ioela be daika? Ia sibona ia gwau, ia be “Petuela ena natuna.” (Ioe. 1:1) Ia manau badina ena peroveta dagina ia herevalaia lasi, to Iehova ena hereva sibona ia gwauraia. Unai hegeregerena, eda haroro gaukara ai Iehova bona Baibel ita herevalaia be maoro, namo lasi ita sibona ita abia isi o hanamoa. (1 Kor. 9:16; 2 Kor. 3:5) Danu, ita harorolaia herevana ese ita ia hagoadaia. Edena dala ai Ioela ese ita dekenai goada bona helaro ia henia diba?
2. Iehova ena dina ia kahirakahira dainai, dahaka ita karaia be namo?
2 “Lohiabada Ena Dina be Kahirakahira.” (Ioe. 1:15): Ena be unai hereva be lagani tausen momo gunanai ia torea, to ita be ena guguru negana ginigabedia lalonai ita noho. Tanobada ia dika ia lao, bona eda teritori ai momo idia kamonai lasi bona ita idia kirikirilaia karana ese idia hamomokania, ita be nega dokonai ita noho. (2 Tim. 3:1-5; 2 Pet. 3:3, 4) Ita diba dokona be kahirakahira dainai, eda mauri lalonai haroro gaukara ita atoa guna be namo.—2 Pet. 3:11, 12.
3. Hisihisi badana ia kahirakahira lalonai, dahaka dainai haroro gaukara be mai anina bada?
3 “Lohiabada ese Iena Bese Taudia Do Ia Naria Namonamo.” (Ioe. 3:16): Unai siri ai inai hereva, “mareremarere,” be hisihisi badana lalonai Iehova ena hahemaoro karana sibona ia herevalaia. Ita moale badina ita diba unai negai Iehova ese ena hesiai taudia do ia hamauria. (Apok. 7:9, 14) Haroro gaukara ita karaia bona Iehova ese ita ia durua dalana ita itaia neganai, unai ese eda abidadama ia hagoadaia bena ita haheauka—hisihisi badana ai unai kara rua be mai anina bada.
4. Dahaka dainai ita moale bona vaira negana ita naria noho diba?
4 Haida idia gwau Ioela be taunimanima ia hagaria. To, Ioela ese Dirava ena taunimanima ia hagoadaia, hahemauri negana idia naria noho totona. (Ioe. 2:32) Unai dainai, vaira negana ita naria noho, Dirava ena Basileia sivarai namona ita harorolaia goadagoada, bona Ioela 2:23 ita badinaia, ia gwau: “Do umui moale. Lau Lohiabada, emui Dirava ese, umui totona lau karaia gaudia dainai do umui moale.”