Leiti Lasi Karana Ena Namo

NEGA korikori badinaia karana be mai ena hekwarahi. Nega haida ita leiti badina reana gabu be daudau, motuka be momo, o iseda gaukara be momo. To, leiti lasi karana be mai anina bada. Hegeregere, moni gaukara dekenai ia leiti momo lasi tauna idia gwauraia, gaukara ia laloa bada tauna. To, gaukara dekenai ia leiti momo tauna ese ma haida edia gaukara namona ia hadikaia diba bona gaukara do ia heau namonamo lasi. Bema stiuden ta ia leiti momo, ia ese ena sikuli gaudia haida do ia reaia bona maka namodia do ia abia lasi. Bema doketa o dentis dekenai apoinmen oi karaia to oi leiti, reana heduru namona do oi reaia.

To, gabu haida ai, taunimanima be nega korikori badinaia karana idia laloa bada lasi. Unai dainai, idia leiti momo. Bema ita be unai bamona, vadaeni ita ura nega korikori ai ita ginidae karana ita manadalaia be namo. Unai ita lalopararalaia neganai, unai ese ita do ia durua ita leiti lasi totona. Vadaeni, dahaka dainai nega korikori ai ita ginidae be namo? Ita leiti lasi totona dahaka ita karaia be namo? Bona nega korikori ai ita ginidae ena namo haida be dahaka?

Iehova​​—⁠Nega Korikorina Ia Badinaia Diravana

Ita ura lasi ita leiti ena badina badana be inai: Ita ura ita tomadiho henia Diravana ita tohotohoa. (Efe. 5:⁠1) Iehova be nega korikori ia badinaia Diravana dainai, iena kara ita tohotohoa be maoro. Ia be nega ta ia leiti lasi. Ia ura gauna be ena nega korikori ai ia hagugurua. Haheitalai be inai: Nega ta ai, Iehova ia ura ia idia negea taudia be abata amo ia hamasedia neganai, Noa ia hamaoroa: “Lagatoi namona ta, au namodia dekenai do oi haginia.” Nega dokona ia kahirakahira neganai, Iehova ese ia hamaoroa lagatoi lalonai do ia vareai bona ia gwau: “Badina be dina 7 do idia ore murinai lau be medu do lau siaia tanobada dekenai.” (Gen. 6:​14; 7:​4, 10) Mani oi laloa: Bema Noa bona ena ruma bese taudia be nega korikori ai lagatoi lalonai idia vareai lasi, reana dika do idia davaria. To, idia tomadiho henia Diravana hegeregerena, nega korikori ai lagatoi lalonai idia vareai be namo.

Abata ia ore bena lagani 450 murinai, Iehova ese Aberahamo ia hamaoroa iena natuna amo gwauhamata Garana do ia vara. (Gen. 17:​15-​17) Dirava ia gwau, Isako be “vaira lagani inai bamona nega dekenai” do ia vara. Unai hereva ia momokani, a? Baibel ia gwau: “Vadaeni [Sara ia] rogorogo, bona mero ta ia abia Aberahamo dekenai, ia be buruka neganai. Mero ena vara nega be Dirava ia gwauraia guna hegeregerena.”​​—⁠Gen. 17:21; 21:⁠2.

Dirava be nega korikori ia badinaia bona ena sivarai momo be Baibel dekenai idia noho. (Ier. 25:​11-​13; Dan. 4:​20-​25; 9:​25) Baibel ese ita ia hamaoroa, Iehova ena kota dinana ita naria noho. Ena be taunimanima idia laloa unai dina ia mai metairametaira, to ita diba unai dina be do ia leiti lasi.​​—⁠Hab. 2:⁠3, NW.

Tomadiho Karadia Dekenai Leiti Lasi

Israela tatau ese “Iehova ena aria” negadia idia reaia lasi bona nega korikori ai idia ginidae be mai anina bada. (Lev. 23:​2, 4, BHğ) Dirava ese boubou gaudia henia ena nega korikori ia gwauraia danu. (Eso. 29:​38, 39; Lev. 23:​37, 38) Unai ese ia hahedinaraia, Dirava ia ura iena hesiai taudia be edia tomadiho karadia dekenai idia leiti lasi be namo.

Aposetolo edia negai, Paulo ese Korinto taudia dekenai kongrigeisen heboudia karaia dalana ia herevalaia neganai, ia gwau: “Namona be gau ibounai do umui karaia namonamo bona dala maorona ai do umui karaia.” (1 Kor. 14:​40, NW ) Unai ese ia hahedinaraia, nega korikori ai kongrigeisen heboudia ita hamatamaia be namo. Iehova ena lalohadai​​—⁠leiti lasi karana dekenai​​—⁠be ia idau lasi. (Mal. 3:⁠6) To, dahaka ita karaia diba kongrigeisen heboudia dekenai ita leiti lasi totona?

Koua Gaudia Hanaia

Haida idia itaia nega bada lalonai palani idia karaia neganai, unai ese idia ia durua idia leiti lasi totona. (Aon. 21:⁠5) Haheitalai be inai: Bema oi ura gabu ta dekenai oi lao bona nega korikori ai unuseniai oi ginidae, oi laloa nega kwadogi lalonai ruma oi rakatania be aonega karana, a? Reana, lasi ani? Ita diba ‘dika idia vara kava’ dainai, aonega karana be nega bada ia do noho lalonai ruma ita rakatania, unai amo nega korikori ai iseda ura gabuna dekenai ita ginidae diba. (Had. 9:​11) Nega ia laloa bada merona ta, Joséa ia gwau: “Bema ta ia ura nega korikori ai gabu ta ai ia ginidae, namona be ia diba ia be hora hida dala dekenai do ia halusia.”

Haida be edia gaukara idia haria, unai amo edia gaukara gabuna idia rakatania haraga, bona nega bada lalonai kongrigeisen heboudia dekenai idia ginidae. Ethiopia tadikaka ta be unai bamona ia karaia. Ena gaukara negana idia haidaua neganai, tadikaka ia diba kongrigeisen heboudia dekenai do ia leiti, anina be miniti 45 murinai do ia ginidae. Unai dainai, ena turana ta ia noia ena gabu ai ia gaukara. Unai ese dala ia kehoa tadikaka be hanuaboi ai kongrigeisen heboudia dekenai ia lao totona. Tadikaka ia gwauhamata, gabeai ena turana ena hora seven gaukarana do ia durua.

Bema ita be mai eda natudia, nega korikori ai hebou dekenai ita ginidae be auka. Ena be natuna hegaegaelaia karana be sinana ena maduna, to namona be ma haida ese edia sinana idia durua. Mexico taihu ta ladana, Esperanza, be sibona ese ena natuna eit ia naria. Ena natuna edia mauri lagani be 5 ia lao 23 huanai. Esperanza ese ia hahedinaraia dahaka dainai ena ruma bese be ia leiti lasi. Ia gwau: “Natuna kekeni badadia ese maragidia idia durua idia hegaegae totona. Unai ese dala ia kehoa ruma gaukaradia lau haorea, lau sibona lau hegaegae bena ai makaia nega korikorina ai ruma ai rakatania, kongrigeisen hebou dekenai ai lao.” Unai ruma bese be ruma do idia rakatania nega korikorina ta idia makaia, bona iboudiai idia gaukara hebou unai nega idia badinaia totona.

Ena Namo

Hebou dekenai ita ginidae haraga ena namo idauidau ita laloa neganai, unai ese iseda ura bona lalona do ia hagoadaia nega bada lalonai gau ibounai ita karaia totona. Kekeni ta ladana, Sandra, be nega bada lalonai hebou lao henia karana ia manadalaia, ia gwau: “Nega bada lalonai lau ginidae ena namo be, tadikaka taihu ida lau hedavari, herevahereva, bona dibadia.” Kingdom Hall ai ita ginidae haraga ena namo be, unuseniai idia ginidae haraga taudia edia ekspiriens namodia bona haheauka karadia edia sivarai ita kamonai diba. Iseda ginidae haraga karana bona lalona hagoadaia herevadia ese iseda tadikaka taihu ia durua diba, ‘lalokau dekena amo kara namodia do idia karaia’ totona.​​—⁠Heb. 10:​24, 25.

Kongrigeisen hebou ta ta ena hamatamaia anena bona guriguri be iseda tomadiho ena kahana badana ta. (Sal. 149:⁠1) Iseda ane amo Iehova ita hanamoa, ita ia hadibaia kara namodia ita karaia be namo, bona ita ia hagoadaia mai moale ida haroro gaukara ita karaia totona. Guriguri be edena bamona? Idaunegai, Iehova ese dubu helaga ia gwauraia “guriguri rumana.” (Isa. 56:⁠7) Hari inai negai, hebou gabudia dekenai ita lao Dirava ita guriguri henia totona. Unai guriguri amo Iehova ena heduru bona lauma helaga sibona lasi, to ita noinoi ita do ia durua hebou dekenai do idia herevalaia gaudia be iseda lalona bona kudouna dekenai ita atodia totona. Unai dainai, namona be iseda lalona ita hadaia ita ginidae haraga hebou ena hamatamaia anena bona gurigurina lalonai ita vareai totona.

Ena mauri lagani 23 kekenina, Helen, ese hebou dekenai ia ginidae haraga ena badina ia herevalaia neganai, ia gwau: “Lau laloa unai dala amo Iehova lau lalokau henia karana lau hahedinaraia, badina ia ese hebou dekenai hadibaia herevadia, ane bona guriguri ia henia.” Momokani, namona be Helen ena lalohadai bamona ita laloa. Ita hekwarahi leiti lasi karana ita manadalaia totona. Oibe, Dirava momokanina tomadiho henia karana lalonai unai bamona ita karaia be gau badana.

[Footnote]

[Picture on page 26]

Nega bada ia noho lalonai ita hegaegae

[Picture on page 26]

Hekwakwanai gaudia ita hamaoromaoroa diba

[Pictures on page 26]

Hebou dekenai ita ginidae haraga dainai ita moale