Leiti Lasi Karana Manadalaia
1. Leiti lasi karana dekenai Iehova be dahaka haheitalai namona ia hahedinaraia?
1 Hanaihanai Iehova be ia leiti lasi. Hegeregere, Ia be “nega maorona ai” ena hesiai taudia ia durua. (Heb. 4:16) Danu, Ia be “nega korikori ai” ena hereva ia halasia. (Mat. 24:45) Unai dainai, ita diba Iehova ena badu dinana be do ia leiti lasi. (Hab. 2:3, NW) Iehova ena leiti lasi karana amo diba ita abia. (Sal. 70:5) Ita be goevadae lasi bona bisi taudia dainai, taim korikori ita badinaia be auka. Dahaka dainai leiti lasi karana ita manadalaia be namo?
2. Edena dala ai eda leiti lasi karana amo Iehova ita hanamoa?
2 Inai nega dokonai, momo be sibodia idia laloa bada bona sibodia edia ura idia biagua lasi dainai, idia leiti momo. (2 Tim. 3:1-3) Unai dainai, Keristani taudia be edia gaukara, apoinmen, bona Keristani heboudia totona idia leiti lasi neganai, ma haida be unai idia itaia, bena Iehova idia hanamoa. (1 Pet. 2:12) Eda moni gaukara be taim korikori ai ita hamatamaia, to tiokratik gaudia dekenai ita leiti momo, a? Bema Keristani heboudia totona ita leiti lasi—kehoa ane bona guriguri ita reaia lasi—anina be ita ura gau ibounai ia karaia namonamo Diravana ita tohotohoa.—1 Kor. 14:33, 40.
3. Edena dala ai eda leiti lasi karana be ma haida laloa bada karana?
3 Danu, idia leiti lasi taudia be ma haida matauraia karana idia hahedinaraia. (Fili. 2:3, 4) Hegeregere, bema Keristani heboudia bona haroro grup heboudia totona ita leiti lasi, eda tadikaka taihu edia kamonai karana do ita hadikaia lasi. To bema ita leiti momo, anina be ma haida dekenai ita hahedinaraia eda nega be gau badana to edia nega be anina lasi. Idia leiti lasi taudia be edia gaukara idia karaia namonamo, bona ma haida ese idia abidadama henia bona ura henia.
4. Bema ita leiti momo, dahaka ita karaia diba?
4 Oi leiti momo ena badina oi lalohadailaia be namo. Emu sediual oi hamaoromaoroa, unai amo emu maduna o gau haida be edia nega korikori ai oi haorea. (Had. 3:1; Fili. 1:10) Iehova oi noia oi ia durua. (1 Ioa. 5:14) Idia leiti lasi taudia be Taravatu hereadaedia rua idia badinaia—Dirava bona edia dekena taudia idia lalokau henia.—Mat. 22:37-39.