Inai Oi Diba, A?

Paulo ia gwau ena tauanina dekenai ‘maka idia noho, unai ese idia hahedinaraia ia be Iesu ena igui hesiai tauna ta,’ unai hereva ena anina be dahaka?​—⁠Galatia 6:⁠17.

▪ Reana Paulo ena hereva idia kamonai taudia dekenai, unai hereva ena anina be idauidau. Hegeregere, idaunegai, auri siahuna idia gaukaralaia, tuari amo idia guia taudia, dubu ena kohu idia henaoa taudia, bona idia heau boio igui hesiai taudia edia kopina dekenai maka idia atoa totona. Taunimanima dekenai unai bamona maka idia atoa neganai, unai be hemarai gauna.

To, unai bamona maka haida be hemarai gauna lasi. Idaunegai, taunimanima momo ese unai bamona maka idia atoa, edia iduhu eiava tomadiho idia hahedinaraia totona. Hegeregere, buka ta ladana Theological Dictionary of the New Testament, ia gwau: “Suria taudia be edia imana eiava aiona dekenai maka idia atoa, unai amo edia dirava ladana, Hadad, bona, Atargatis, dekenai sibodia idia henia . . . Bona Dionysus idia tomadiho henia taudia dekenai tubutubu gauna ta ladana Ivy ena rau ena laulau idia atoa.”

Hari inai negai, Baibel ena hereva idia tahua taudia momo idia laloa, Paulo be nega idauidau ai ena misinari gaukara lalonai ia davaria dagedage karadia amo ia abia bero ia herevalaia. (2 Korinto 11:​23-27) To, reana Paulo be maka korikorina ia herevalaia lasi, ena hereva ena anina be ena mauri dalana amo ia hahedinaraia ia be Keristani tauna ta.

Idaunegai Israela ai, heau mauri hanuadia be ala-ala taudia edia komu gabuna, a?

▪ Idaunegai, Dirava diba lasi taudia edia dubu momo dekenai, edia hanua idia heautania taudia eiava ala-ala taudia idia komu. Kerisendom tomadihona ai, pris idia noho rumadia bona dubu momo danu be unai bamona idia karaia. To, idaunegai Israela ai, heau mauri hanuadia be mai edia taravatu, unai taravatu ese idia hahedinaraia, unai hanuadia be ala-ala taudia edia komu gabuna lasi.

Mose ena Taravatu ia gwau, heau mauri hanuadia be aksiden amo ta ia alaia tauna gimaia gabudia. (Deuteronomi 19:​4, 5) Unai tauna be kahirakahira ia noho heau mauri hanuana dekenai ia heau lao diba, mase tauna ena varavara amo ia daudau, unai amo ena kerere davana do ia henia lasi. Ia ese ena kerere be hanua ena tau badadia dekenai ia gwauraia hedinarai murinai, idia ese ia do idia abia lao kerere ia vara hanuana dekenai idia kota henia totona. Unuseniai, ala-ala tauna be kota taudia vairanai do ia hahedinaraia ia be kerere lasi. Hanua ena tau badadia ese do idia tahua bema ia bona ia mase tauna huanai badu ia noho eiava lasi.​—⁠Numera 35:​20-24; Deuteronomi 19:​6, 7; Iosua 20:​4, 5.

Bema hanua ia heautania tauna dekenai kerere ta idia davaria lasi, vadaeni ia be do ia giroa bona heau mauri hanuana eiava ena badina hanuadia dekenai do ia noho. Unai hanuadia be dibura rumadia lasi. Unai dainai ena hanua ia heautania tauna be do ia gaukara bona unai hanua taudia do ia durua. Hahelaga tauna badana ia mase murinai, edia hanua idia heautania taudia ibounai be edia hanua dekenai idia giroa lou diba bona ta ese idia do ia hadikaia lasi.​—⁠Numera 35:​6, 25-28.

[Map on page 10]

HEAU MAURI HANUADIA

1 KEDESI

2 GOLANA

3 RAMOTO GILEADA

4 SEKEMA

5 BESERE

6 HEBERONA

Ioridane Sinavaina