Matamata Taudia E—⁠Laloani Karadia Dadaraia

“Mai laloa namona bona mai gado namo do umui hereva. . . . Taunimanima ta ta dekenai do umui haere henia mai maoromaoro danu.”​—⁠KOL. 4:⁠6.

1, 2. Turadia edia laloani herevadia dainai, matamata taudia momo edia hemami be edena bamona, bona dahaka dainai?

REANA oi be emu turadia edia laloani karadia oi diba. Reana nega ta oi idia doria kara kererena ta oi karaia totona. Unai ia vara neganai, emu hemami be edena bamona? Christopher, ena mauri lagani 14 merona, ia gwau: “Nega haida lau ura egu sikuli turadia amo lau komu, to nega haida lau ura idia gwauraia gauna lau karaia sibona, unai amo idia ese lau do idia abia dae.”

² Oi mamia nega haida emu turadia edia laloani herevadia be mai edia siahu, a? Bema oibe, dahaka dainai unai bamona oi haere? Reana, oi ura emu turadia ese oi idia abia dae, ani? Ita ura ma haida ese ita idia abia dae be kerere lasi. Taunimanima badadia danu idia ura ma haida ese do idia lalonamo henidia. Ita ibounai​—⁠matamata o taunimanima badadia danu​—⁠be ita ura lasi iseda turadia ese ita idia dadaraia. To, kara maoromaoro ita badinaia neganai, haida be ita dekenai do idia moale lasi. Iesu be unai ia mamia, to nega ibounai ia be kara maoromaoro ia badinaia. Haida be Iesu idia bamoa bona ena hahediba taudia ai idia lao, to haida be Dirava ena Natuna ‘idia matauraia lasi.’​—⁠Isa. 53:⁠3.

Laloani Herevadia be mai Edia Siahu

3. Dahaka dainai emu turadia edia laloani herevadia oi abia dae be aonega karana lasi?

³ Nega haida oi ura lasi emu turadia ese oi idia dadaraia dainai, edia hereva oi badinaia sibona. To, unai be lalohadai kererena. Namo lasi Keristani taudia be ma haida ese idia “doria lao, doria mai, vadaeni idia hure kava davara dekenai bamona.” (Efe. 4:14) Natu maragidia be ma haida ese idia koia haraga diba. To, oi mero o kekeni matamata be natu maragina bamona lasi, oi be kahirakahira tau o hahine badadia ai do oi lao. Unai dainai, bema oi abia dae Iehova ena taravatu badinaia karana be mai ena namo, vadaeni namona be emu lalona oi hadaia Iena taravatu oi badinaia totona. (Deu. 10:​12, 13) To, bema Iehova ena taravatu oi dadaraia emu mauri lalonai lalohisihisi idauidau do oi davaria. Bema ma haida edia laloani herevadia oi abia dae haraga, oi be edia hesiai tauna ai oi lao bamona.​—⁠2 Petero 2:19 duahia.

4, 5. (a) Arona dekenai dahaka ia vara, bona iena sivarai amo dahaka ita dibaia? (b) Emu turadia be edena dala ai oi idia doria kara dika oi karaia totona?

⁴ Nega ta, Mose ena kakana Arona be ma haida edia laloani herevadia ia abia dae. Israela taudia ese Arona idia noia idia totona dirava ta do ia karaia neganai, edia hereva ia kamonai. To, Arona be lalogoada tauna. Badina guna ia bona Mose be Aigupito ena pavapava, Farao vairanai idia gini. Arona be mai gari lasi ida Farao dekenai Dirava ena hereva ia gwauraia. To, Israela taudia ese Arona dekenai laloani herevadia idia gwauraia neganai, edia hereva ia badinaia sibona. Oibe, laloani herevadia be mai edia siahu! Arona ese Farao ia hereva henia neganai ia gari lasi, to Israela taudia edia laloani herevadia ia abia dae haraga.​—⁠Eso. 7:​1, 2; 32:​1-4.

⁵ Arona dekenai ia vara bamona, laloani karadia be mauri lagani idauidau taudia dekenai ia vara diba. Idia ura kara maorona idia karaia taudia​—⁠oi danu​—⁠be ma haida edia laloani herevadia ese idia tohoa diba. Emu turadia idia ura kara dika ta oi karaia, unai dainai oi do idia doria, hauraia o lalona hahisia herevadia do idia gwauraia. Bona nega haida edia laloani karadia idauidau oi dadaraia be auka. To gau badana be emu lalona oi hadaia dala maorona oi badinaia noho totona.

“Umui be Abidadama Korikori Taudia O Lasi”

6, 7. (a) Dahaka dainai Baibel ena hereva oi abidadama henia be namo, bona edena dala ai unai oi karaia diba? (b) Emu abidadama ia goada totona, edena henanadai oi laloa dobu be namo?

⁶ Turadia edia laloani herevadia oi dadaraia totona, Baibel ena hereva bona kara maoromaoro taravatudia oi badinaia be namo. (2 Korinto 13:5 duahia.) Herevana oi be hemarai mero o kekeni, to unai ese oi dekenai lalogoada do ia henia. (2 Tim. 1:​7, 8) Danu, herevana ta be lalogoada tauna, to bema Baibel ena hereva be mai ena kudouna ibounai ida ia abia dae lasi, kara maorona do ia badinaia be auka. Unai dainai, namona be Baibel amo oi dibaia gaudia oi tahua namonamo, idia be momokani eiava koikoi. Baibel ena hereva badadia haida oi stadilaia guna. Hegeregere, oi diba Dirava be ia noho, bona ma haida ese unai lalohadai idia abia dae danu. Vadaeni, oi sibona oi nanadaia: ‘Dahaka dainai lau abia dae Dirava be ia noho?’ Unai henanadai ese Dirava dekenai emu abidadama karana do ia hagoadaia. Henanadai ma haida be: ‘Edena dala ai lau diba Baibel be Dirava ena lauma ese ia havaraia?’ (2 Tim. 3:16) ‘Dahaka dainai lau abia dae inai be “nega ena dokona”?’ (2 Tim. 3:​1-5) ‘Dahaka dainai lau abia dae Iehova ena taravatu badinaia karana be mai ena namo?’​—⁠Isa. 48:​17, 18.

⁷ Reana oi ura lasi unai bamona henanadai oi laloa, badina edia haere oi diba lasi. Unai be hegeregere, oi ura lasi motuka ena fuel gauge oi itaia, badina oi gari emu petrol be ia ore gwauraia! To, namona be oi diba bema emu petrol be do ia ore gwauraia eiava lasi, unai amo petrol ma haida oi abia diba. Unai hegeregerena, bema Baibel ena hereva haida oi do diba namonamo lasi, namona be oi hekwarahi emu diba oi habadaia totona.​—⁠Kara 17:11.

8. Edena dala ai Dirava ena hahegani 1 Korinto 6:18 dekenai oi badinaia diba?

⁸ Mani inai oi laloa. Baibel ena hahegani be: ‘Heudahanai karadia oi rakatania.’ Sibona oi nanadaia: ‘Dahaka dainai unai sisiba lau badinaia be aonega karana?’ Emu turadia ese matabodaga karadia idauidau idia karaia ena badina oi laloa. Bena sibona oi nanadaia: ‘Dahaka dainai Baibel ia gwau, ia heudahanai tauna be “sibona ena tauanina ia hadikaia noho”?’ (1 Kor. 6:18) Unai henanadai edia haere oi laloa dobu bona sibona oi nanadaia: ‘Edena be dala maorona?’ Bona inai henanadai ma haida oi laloa danu: ‘Matabodaga karadia lau karaia be maoro, a?’ ‘Bema egu turadia edia laloani herevadia lau abia dae bona matabodaga karadia lau karaia, egu lalomamina be edena bamona?’ Reana emu turadia do idia moale, to emu tama sina ida oi noho, eiava Keristani tadikaka taihu ida oi hebou neganai, emu lalomamina be edena bamona? Dirava oi guriguri henia gwauraia neganai, emu hemami be edena bamona? Bema emu sikuli turadia edia laloani herevadia oi abia dae, Iehova ese oi do ia lalonamo henia lasi.

9, 10. Dahaka ese oi do ia durua emu turadia edia laloani herevadia be mai gari lasi ida oi koua totona?

⁹ Bema hari emu mauri lagani be 13 ia lao 19 huanai, inai be nega namona emu lalona oi hadibaia loulou ela bona maoro bona kerere edia toana oi diba namonamo. (Heberu 5:14 duahia.) Danu, unai be nega namona Iehova ena witnes tauna ai oi lao ena badina oi laloa namonamo totona. Unai bamona laloa dobu karana ese emu abidadama do ia hagoadaia. Bena, emu turadia edia laloani herevadia be mai gari lasi ida do oi haerelaidia. Keristani taihu ta, ena mauri lagani be 21, ia gwau: “Egu turadia edia laloani herevadia lau dadaraia amo lau hahedinaraia Dirava tomadiho henia karana lau laloa bada. Baibel amo lau dibaia gaudia ese lau idia durua egu lalohadai, tahua gaudia bona kara lau naria namonamo totona.”

¹⁰ Oibe, kara maoromaoro badinaia totona oi hekwarahi be gau badana. (Luka 13:24) To nega haida reana do oi laloa kara maoromaoro badinaia karana be anina lasi. Inai oi laloatao be namo: Bema emu turadia idia itaia kara maorona oi badinaia totona oi gari o hemarai, edia laloani karadia do idia hadokoa lasi. To bema mai gari lasi ida oi haere, oi do idia rakatania.​—⁠Luka 4:​12, 13 hahegeregerea.

‘Haere Oi Henia Neganai Oi Laloa Namonamo Guna’

11. Laloani karadia oi dadaraia totona, dahaka dainai oi hegaegae guna be namo?

¹¹ Emu turadia edia laloani karadia oi dadaraia diba dalana ma ta be oi hegaegae guna. (Aonega Herevadia 15:28 duahia.) Oi hegaegae ena anina be gabeai do idia vara gaudia oi lalohadailaia guna. Unai ese oi do ia durua hahetoho badana ta oi hanaia totona. Hegeregere, oi itaia emu sikuli turadia haida be kuku idia ania noho, bona oi diba oi dekenai kuku ta do idia henia. Dahaka do oi karaia? Aonega Herevadia 22:3 ia gwau: “Aonega tauna ese dika ia itaia noho, bona unai dika dekena amo ia raka siri.” Unai dainai, dala ma ta dekenai oi lao be aonega karana.

12. Emu turadia edia laloani herevadia oi haerelaia dalana ta be dahaka?

¹² To bema emu turadia huanai oi noho bona idia ese oi dekenai henanadai ta idia henia, edena bamona do oi haere? Hegeregere do idia henanadai, “Oi be ta ida oi mahuta hebou vadaeni, a?” Namona be Kolose 4:6 ena sisiba oi badinaia: “Nega ibounai mai laloa namona bona mai gado namo do umui hereva. Bona taunimanima ta ta dekenai do umui haere henia mai maoromaoro danu.” Unai siri ese ia hahedinaraia iseda turadia edia laloani karadia be idauidau bona idia ta ta haere henia daladia danu be idauidau. Reana, maoromaoro Baibel do oi gaukaralaia lasi. To haere kwadogina ta oi henia. Bema oi idia nanadaia, ‘Oi be ta ida oi mahuta hebou vadaeni, a?’ Reana oi gwau diba, “unai henanadai do lau haerelaia lasi.”

13. Emu turadia be hauraia dalanai oi idia nanadaia neganai, dahaka oi karaia be namo?

¹³ Iesu be ma haida ese idia nanadaia neganai, nega momo haere kwadogidia ia henia. To, Heroda ese ia nanadaia neganai, ia haere henia lasi. (Luka 23:​8, 9) Ma haida be hauraia dalanai ita idia nanadaia neganai, aonega karana be hereva ta ita gwauraia lasi. (Aon. 26:4; Had. 3:​1, 7) To, reana gabeai do oi itaia, guna oi ia hauraia mero o kekeni ta ia ura matabodaga karadia oi dadaraia ena badina ia diba. (1 Pet. 4:⁠4) Unai neganai, namona be oi gari lasi, to oi abia dae gaudia be Baibel amo oi hahedinaraia. Nega ibounai “do umui naria hegaegae noho, idia do umui haere henia totona.”​—⁠1 Pet. 3:⁠15.

14. Edena dala ai emu turadia oi haere henia diba?

¹⁴ Nega haida, emu turadia edia henanadai oi haerelaidia be namo. To, mai aonega ida unai oi karaia be namo. Hegeregere, bema emu turana ta ese oi ia doria kuku oi ania totona, reana ia oi hamaoroa, “Lau ura lasi, tanikiu” bena oi gwau, “Lau laloa oi be mero namona, to dahaka dainai kuku oi ania?” Unai henanadai amo ena hereva oi koua. Oi be kuku oi ania lasi ena badina oi gwauraia lasi, to oi ia doria turana be do ia laloa dahaka dainai ia be kuku ia ania.a

15. Emu turadia ese oi idia hauraia neganai, dahaka oi karaia be namo, bona dahaka dainai?

¹⁵ To, bema emu turadia ese oi idia do hauraia noho, dahaka do oi karaia? Aonega karana be idia amo oi raka siri. Bema idia amo oi raka siri lasi, edia laloani karadia ese oi idia veria diba kara kererena oi karaia totona. Idia amo oi raka siri neganai, abia hidi maorona oi karaia unai. Emu turadia edia laloani herevadia oi dadaraia dainai, oi be edia hesiai tauna ai oi lao lasi, to Iehova oi hamoalea.​—⁠Aon. 27:⁠11.

‘Palani Oi Karaia Guna’

16. Edena dala ai kongrigeisen lalonai matamata taudia haida ese oi idia tohoa diba?

¹⁶ Nega haida, kongrigeisen lalonai matamata taudia haida ese oi idia doria diba kara mirodia oi karaia totona. Hegeregere, bema kongrigeisen pati ta dekenai oi lao bona oi itaia matamata taudia sibona idia noho, to taunimanima badana ta ia noho lasi, dahaka do oi karaia? Eiava, bema kekero muramura momo idia noho bona haida be idia kekero vadaeni, dahaka do oi karaia? Unai bamona negadiai, namona be emu lalomamina oi badinaia. Keristani kekeni matamata ta ia gwau: “Lau bona egu tadina kekenina be muvi itaia gabuna dekenai ai lao, to unai gabu ai rakatania badina idia halasia muvi lalonai hereva mirodia idia gwauraia. To ai ida idia lao hebou taudia haida be idia noho. Emai tama sina be emai kara dainai ai idia hanamoa. To, emai turadia be ai dekenai idia badu badina idia laloa ai ese edia ladana ai hadikaia.”

17. Kongrigeisen pati ta dekenai oi do lao lasi neganai, dahaka oi karaia be namo?

¹⁷ Ataiai ita herevalaia ekspiriens ese ia hahedinaraia, emu lalomamina oi badinaia bona abia hidi maorona oi karaia dainai, emu turadia ese oi idia badu henia diba. To dala maorona oi badinaia noho be namo. Kongrigeisen pati ta dekenai oi do lao lasi neganai, do oi karaia gauna oi palanilaia guna. Bema oi itaia haida ese idia karaia karadia be maoro lasi, unai gabu oi rakatania haraga be namo. Matamata taudia haida be edia tama sina ida palani idia karaia guna, unai amo bema kongrigeisen pati gabuna ai gau ta ia vara, do idia rini henidia bona tama sina ese do idia abidia. (Sal. 26:​4, 5) Unai dainai ‘palani oi karaia guna’ be aonega karana.​—⁠Had. 10:⁠10.

‘Oiemu Eregabe Dinadia Lalonai Oi Moale’

18, 19. (a) Iehova ena ura oi totona be dahaka? (b) Laloani karadia idia dadaraia matamata taudia dekenai Iehova ena lalohadai be dahaka?

¹⁸ Iehova ia ura emu mauri do oi moalelaia. (Hadibaia Tauna 11:9 duahia.) Namona be oi laloatao, emu turadia ese idia moalelaia karadia be do idia noho daudau lasi. (Heb. 11:25) To, Dirava ena ura oi totona be idau, ia ura do oi moale ela bona hanaihanai. Unai dainai, bema emu turadia ese oi idia doria kara dikana ta oi karaia totona, namona be oi laloatao, Dirava ena taravatu oi badinaia neganai namo do oi davaria.

¹⁹ Ena be hari emu turadia edia laloani karadia oi abia dae dainai idia oi hamoalea, to namona be oi laloatao, nega vaira ai oi do idia laloaboio. To, edia laloani herevadia oi dadaraia neganai, Iehova be unai ia itaia, bona emu gini goada karana do ia laloatao. Iehova ese ‘guba ena uindo do ia kehoa, bona gau namodia momo herea oi dekenai do ia bubua diho.’ (Mal. 3:10) Ma danu bema oi mamia emu turadia edia laloani karadia oi dadaraia be auka, Dirava ese ena lauma helaga amo oi do ia hagoadaia. Oibe, Iehova ese oi ia durua diba emu turadia edia laloani karadia oi dadaraia totona!

[Footnote]

Oi Laloatao, A?

• Edena dala ai turadia edia laloani herevadia be mai edia siahu?

• Emu turadia ese oi idia tohoa neganai, edena dala ai emu abidadama ese oi ia durua diba?

• Emu turadia edia laloani herevadia oi dadaraia totona, dahaka dainai hegaegae guna karana be mai anina bada?

• Edena bamona oi diba Iehova be emu gini goada karana do ia laloatao?

[Picture on page 8]

Dahaka dainai Arona be Israela taudia edia laloani herevadia ia badinaia?

[Picture on page 10]

Turadia edia laloani karadia oi dadaraia totona, oi hegaegae guna