Bamodia Edia Lalo-Ani Karana Bona Oiemu Haroro Ena Hahenamo
1 Bamodia edia lalo-ani karana be mai ena siahu—kara namo eiava dika dekenai ita ia veria diba. Iehova ena hesiai taudia ese ita idia hasiahua kara namodia ita karaia totona. (Heb. 10:24) To, Witnes lasi ruma bese taudia, gaukara turadia, sikuli turadia, dekena taudia, eiava ita diba taudia ma haida ese ita do idia doria diba, Keristani hakaua herevadia amo idia idau daladia do ita badinaia totona. Reana ita “idia hereva dika henia, Keriso [ita] badinaia dainai.” (1 Pet. 3:16) Herevana edena dala ai bamodia edia lalo-ani karadia ita davaria to ita haroro noho diba?
2 Ruma Bese Taudia: Nega haida, Iehova ena Witnes lasi adavana bona tamana ta be reana ia ura lasi iena adavana bona natudia idia haroro. Unai bamona be Mexico ai, ruma bese ta dekenai ia vara. Tau ta ena adavana bona natudia 7 be hereva momokani dekenai idia vareai. Matamanai, iena ruma bese ia dagedage henia badina ia ura lasi idia haroro bona ruma ta ruma ta dekenai Baibel buka bona magasin idia hariharilaia. Ia laloa unai be hemarai gauna. To, iena adavana bona natudia be idia gini auka, edia lalona idia hadaia vadaeni Iehova do idia hesiai henia bona haroro gaukara do idia karaia. Gabeai, unai tau ia lalo-parara Dirava ena dala haroro henia totona ia abia dae karana be namo, bona ia sibona ena mauri be Iehova dekenai ia gwauhamatalaia. Lagani 15 idia lao ore murinai hereva momokani ia abia dae, to unai do ia karaia diba, bema iena ruma bese be haroro gaukarana dekenai idia haheauka lasi, a?—Luka 1:74; 1 Kor. 7:16.
3 Gaukara Turadia: Reana oiemu hekwarahi gaukara turadia haroro henidia totona, be haida do idia ura henia lasi. Taihu ta ia gwau edia opesi dekenai tanobada ena dokona idia herevalaia neganai, ia idia kirikirilaia badina ia gwau Mataio karoa 24 do idia duahia be namo. To, dina haida murinai, iena gaukara turana ta ese ia hamaoroa ia ese unai karoa ia duahia bona ia hoa momokani. Buka ta ia rakatania, bona unai hahine bona ena adavana ida stadi idia karaia dalana idia hegaegaelaia. Stadi ginigunana idia karaia ela bona 2 a.m. dabai. Stadi ihatoina murinai, hebou idia lao henia matamaia, bona unai murinai idia ese kuku ania karana idia hadokoa bona haroro gaukara idia hamatamaia. Unai do ia vara, bema iseda taihu ia hekwarahi lasi ma haida dekenai iena helaro ia herevalaia totona, a?
4 Sikuli Turadia: Nega momo matamata Witnes taudia ese sikuli dekenai bamodia edia lalo-ani karana idia mamia bona idia gari, matamata taudia ma haida ese edia haroro gaukara dainai idia do idia hahemaraia. United States dekenai, Keristani kekeni ta ia gwau: “Matamata taudia haroro henidia totona lau gari, lau do idia hevasehalaia garina.” Unai dainai ia ese sikuli dekenai bona teritori dekenai danu, iena bamodia haroro henia daladia ia dadaraia. Bamodia edia lalo-ani karadia lalonai dahaka ese oi ia hagoadaia diba do oi gini goada totona? Iehova oi abidadama henia, iena lalo-namo do oi tahua. (Aon. 29:25) Oiemu diba Dirava ena Hereva harorolaia gaukarana dekenai do oi moalelaia. (2 Tim. 2:15) Iena hereva ai hahedinaraia vadaeni kekeni be Iehova ia guriguri henia matamaia, ia noia iena sikuli turadia hereva henia urana do ia hagoadaia. Sikuli gabuna dekenai ia haroro matamaia, anina ia havaraia, bona nega sisina murinai ia diba taudia ibounai ia hereva henidia. Iena hereva dokonai ia gwau: “Unai matamata taudia idia ura vaira negana ena helaro idia abia bona idia abia be mai anina bada, bona Iehova be ita ia gaukaralaia idia ita durua totona.”
5 Dekena Taudia: Reana eda dekena taudia eiava ita diba taudia ma haida ese ita bona ita abia dae hadibaia herevadia idia badu henia. Bema idia laloa gaudia dekenai oi gari, sibona oi nanadaia: ‘Mauri hanaihanai ena dala dekenai ita ia hakaua lao hereva momokanina idia diba, a? Edena kara amo edia kudouna do lau hamarerea?’ Sekit naria tauna ta ia gwau, anina namona idia havaraia totona, nega ta ta nega kwadogi lalonai dekenai taudia idia haroro henidia. Iehova dekena amo goada bona aonega oi noia, kudou-maoro taudia oi tahua noho totona.—Fil. 4:13.
6 Bema bamodia edia lalo-ani karadia dainai iseda kara ita haidaua, reana unai ese ita idia inai henia taudia do ia hamoalea, to unai ese edia namo—eiava eda namo—ia havaraia, a? Iesu ena gabu taudia ese ia idia inai henia. Iena tadidia edia hereva aukadia danu ia haheaukalaia. To ia diba Dirava ese ia dekenai ia henia gaukarana ia hagugurua karana amo sibona idia do ia durua diba. Unai dainai, ena be “kara dika taudia ese mai badu danu ia idia dagedage henia” to Iesu “ia goada noho.” (Heb. 12:2, 3) Ita danu be unai hegeregerena ita karaia be namo. Namona be oiemu lalona oi hadaia oiemu hahenamo, Basileia ena sivarai harorolaia gaukarana, do oi goadalaia. Unai dekena amo, “oi sibona ese mauri do oi davaria, bona oi dekenai idia kamonai taudia danu ese mauri do idia davaria.”—1 Tim. 4: 16.