Bamodia Edia Lalo-Ani Karana—Oi Ia Durua Diba, A?

Ita vara negana amo iseda ura badana be eda bamodia ese ita idia abia dae. Ta ia ura lasi taunimanima ese ia idia ura henia lasi, o idia dadaraia. Unai dainai, dala idauidau ai, iseda turadia ese ita idia veria.

BAMONA ta ena anina be “ma ta ida ia hegeregere tauna; . . . ia be ma ta ida orea tamona tauna, unai be ena mauri lagani, ena sikuli ena greid, o ena dagi hegeregerena.” Vadaeni, bamodia edia lalo-ani karana ena anina be, bamodia edia lalona veria siahuna, unai dainai, herevana ita diba eiava ita diba lasi, to ita be edia lalohadai bona kara hegeregerena ita badinaia. Nega momo, taunimanima idia laloa bamodia edia lalo-ani karana be dika. To, do ita itaia, unai ese ita ia durua diba.

Mauri Lagani Idauidau Taudia Ibounai Ia Veria

Bamodia edia lalo-ani karana be matamata taudia sibona ia veria lasi; to mauri lagani idauidau taudia ibounai ia veria. Unai kara ena veria siahuna ia hedinarai bema ita be sibona dekenai inai bamona henanadai ita henia: “Haida idia karaia noho, dahaka dainai lau karaia diba lasi?” “Dahaka dainai lau be hanaihanai lau idau?” “Haida be dahaka do idia laloa o gwauraia?” “Egu turana iboudiai be idia hetura noho bona idia headava, to lau be lasi. Lau dekenai kerere ta ia noho, a?”

Ena be mauri lagani idauidau taudia ibounai be idia ura haida hegeregerena do idia noho, to ia hedinarai, memero kekeni idia tubu daekau lalonai unai ura be ia bada herea. The World Book Encyclopedia ia gwau “memero kekeni badadia momo dekenai edia bamodia​—⁠unai be edia turadia bona idia diba taudia​—⁠be mai anina bada. Unai memero kekeni be edia tama sina edia lalo-namo idia tahua lasi, to edia bamodia edia lalo-namo idia tahua, bona edia kara idia haidaua unai idia abia totona.” Ma ia gwau, memero kekeni “idia laloa idia tubu daekau namonamo, bema edia bamodia ese idia abidia dae bona ura henidia.” Unai ia vara totona idia be “taunimanima ese idia ura henia taudia ai do idia lao daladia idia laloa momo, hegeregere edia dabua ena sitaelo, edia gunalaia karana, bona hetura karana lalonai idia kwalimu karana.”

Headava taudia be reana idia davaria edia lalohadai idauidau, hegeregere edena bamona ruma do idia hoia o rentaia, edena bamona motuka do idia abia, natuna do idia havaraia o lasi, bona ma gau momo dekenai edia bamodia edia lalo-ani karana​—⁠taunimanima be dahaka idia abia dae edia gabu dekenai, edia bamodia o edia bese taudia huanai​—⁠ese ia veridia. Ruma bese haida be abitorehai bada herea idia abia bona edia kohu idia habadaia, edia dekena taudia bona bamodia ida do idia hegeregere totona. Oibe, nega momo iseda tahua gaudia, iseda lalohadai, bona ita abia hidi gaudia ese bamodia edia lalo-ani karana ena siahu hehunina idia hahedinaraia. Ena siahu ita laloa dainai, ita ese bamodia edia lalo-ani karana ita gaukaralaia diba, ita ura henia dalana dekenai ita do ia durua totona, a? Oibe, ita karaia diba!

Hebamo Namona Oi Gaukaralaia Namonamo

Doketa taudia bona medikol gaudia idia diba momo taudia ma haida idia diba gorere taudia dekenai taunimanima bona heduru gaudia namodia be mai anina bada. Unai bamona heduru ese gorere taudia idia hagoadaia idia namo idia lao totona. Hegeregere, edia aena ta o imana ta idia haboioa taudia be idia namo idia lao negana lalonai, idia hegeregerena idia hisihisi taudia edia haheitalai namona bona hagoadaia herevadia ese nega momo edia lalona ena mamina idia hanamoa. Ia hedinarai goevagoeva, ta be laloa namonamo taudia bona haheitalai namona idia hahedinaraia taudia edia hebamo lalonai ia vareai be dala ta, bamodia edia lalo-ani karana maorona ena namo ia abia totona.

Unai hakaua herevana be ia momokani Keristani kongregesen lalonai danu, badina hebamo namona be Iehova ese ena orea taudia ia hagania do idia hebou hanaihanai ena badina ta. Dirava ese ita ia hagoadaia ‘ta ta dekenai durua do ita henia, lalokau dekena amo kara namodia do ita karaia totona bona ta ta ita hagoadaia heheni.’ (Heberu 10:​24, 25) Hari inai negai, tanobada ena lalo-ani gaudia dikadia mai edia hisihisi dainai, unai bamona hagoadaia karana be mai anina bada. Unai lalo-ani gaudia dainai, Keristani taudia idia “raka goada” be namo lauma dalanai idia goada noho totona. (Luka 13:24) Unai dainai, ita ese eda abidadama tamona taudia edia lalokau heduruna ita abia be namo bona ita laloa bada. Ma danu, haida ese tauanina dekenai “ginigini” gaudia idia abia, reana gorere o tauanina ena dika ta. (2 Korinto 12:⁠7) Reana haida be idia hekwarahi noho idia manadalaia kara dikadia o edia daradoko idia hanaia totona, o reana idia hekwarahi do idia karaia be namo gaudia ibounai idia karaia totona. Unai dainai, ita aonega, bema ita be Iehova Dirava kahirakahira ai idia noho bona ena hesiai gaukara idia moalelaia taudia huanai ita noho. Unai bamona turadia ese ita do idia hagoadaia bona durua bena mai abidadama ida iseda ‘lalona be do ia goada ela bona dokona.’​—⁠Mataio 24:⁠13.

Unai dainai, bamodia maorodia ita abia hidi neganai, ita idia veria karana ita biagua diba. Danu, Keristani hebou idauidau ai idia halasia lauma aniani namona bona hakaua hereva namodia ese ita ta ta eda bamodia amo ita abia hagoadaia karana ia ha-aukaia.

Momokani, Keristani heboudia dekenai ita lao hanaihanai be mai ena hekwarahi. Reana haida be edia adavana ese idia durudia sisina o durudia lasi, ma haida be reana mai edia natudia idia durudia idia hegaegae totona, bona reana ma haida dekenai hebou dekenai idia lao dalana be mai ena hekwakwanai. To mani oi laloa: Bema unai hekwakwanai ese oi idia koua lasi, reana oiemu haheitalai ese oiemu noho dalana hegeregerena idia hekwarahi noho taudia do ia hagoadaia. Eiava ita gwau diba, oi bona oi hegeregerena taudia ese haheitalai namona umui hahedinaraia sibona lasi, to danu lalona veria karana namona umui hahedinaraia bona unai kara lalonai doria karana ena toana ta be lasi.

Aposetolo Paulo, hekwakwanai bona metau momo ia haheaukalaia tauna, ese Keristani taudia ia hagoadaia ia bona ma lo Keristani taudia haida edia haheitalai namona idia tohotohoa totona. Ia gwau: “Lauegu varavara e, lauegu kara bamona do umui karaia. Bona aiemai kara bona hereva idia badinaia taudia do umui kamonai henidia.” (Filipi 3:17; 4:⁠9) Tesalonika dekenai idia noho Keristani taudia ginigunadia be Paulo ena haheitalai namona idia tohotohoa. Paulo be idia ia herevalaia, ia gwau: “Umui ese aiemai . . . mauri dala bamona umui noho, Lohiabada danu bamona umui noho. Umui ese Dirava ena hereva umui abia dae, vadaeni unai murinai taunimanima ese nega momo umui idia hisihisi henia. To Lauma Helaga ese iena moale ia henia umui dekenai. Unai dekena amo, kara namo ena dala umui hedinaraia, Makedonia bona Akaia dekenai idia noho Keristani taudia ibounai dekenai.” (1 Tesalonika 1:​6, 7) Iseda lalohadai bona haheitalai namodia ese ita bamoa taudia dekenai unai bamona anina namona ia havaraia diba.

Hebamo Dikana Oi Dadaraia

Bema ita ura bamodia edia lalo-ani karadia kereredia amo ita siri, namona be ita ese “tauanina ena kara idia karaia noho taudia” edia lalona veria karadia ita koua. (Roma 8:​4, 5; 1 Ioane 2:​15-17) Bema ita koua lasi, bamodia edia lalo-ani karadia dikadia ese Iehova bona ena aonega sisibana amo ita do ia hakaua siri. Aonega Herevadia 13:20 ia gwau: “Aonega tauna danu ia raka hebou noho tauna, be do ia aonega, to kavakava taudia danu oi turana karaia neganai, dika do oi davaria.” Bamodia edia lalo-ani karadia kereredia dainai dika bada ia davaria tauna ta oi laloa diba, a? Hegeregere, Keristani taudia haida be kohu idia tahua momo, matabodaga karadia idia karaia, o drag bona kekero muramuradia idia gaukaralaia kava badina edia bamodia ese edia lalona idia veria.

Keristani kongregesen lalonai danu, bamodia edia lalo-ani karadia kereredia ese ita idia veria diba, bema ita ese lauma dalanai idia manoka taudia ita abia hidi eda turadia ai idia lao totona. (1 Korinto 15:33; 2 Tesalonika 3:14) Nega momo unai bamona taudia idia ura lasi lauma gaudia idia herevalaia; danu, unai idia herevalaia taudia idia hevasehalaia. Bema unai taudia ita abia hidi iseda turadia ai idia lao totona, edia lalo-ani karadia ese ita do idia doria, idia hegeregerena ai ita lao totona, bona daudau lasi murinai do ita davaria iseda lalohadai bona kara be edia lalohadai bona kara idia hahedinaraia. Reana ita be idia abidadama momokani bona lauma dalanai idia goada totona idia hekwarahi taudia do ita laloa kerere.​—⁠1 Timoteo 4:⁠15.

Lauma gaudia idia moalelaia taudia bona Iehova idia hamoalea totona idia hekwarahi taudia ita tura henidia be aonega karana momokani! Unai bamona hebamo ese ita do ia durua ‘Dirava dekena amo ia mai aonegana’ ita hahedinaraia totona. Unai aonega amo idia vara karadia be, ‘laloa goevagoeva, maino, laloa manada bona gado namo, bogahisihisi, kara namodia momo ia havaraia, . . . bona ia koikoi lasi.’ (Iamesi 3:17) Ita gwau lasi unai ena anina be lauma gaudia idia laloa bada taudia be ma gau idaudia do idia herevalaia lasi to lauma gaudia sibona do idia herevalaia. Lasi momokani! Mani Watch Tower Society ena magasin bona buka lalonai idia atoa hereva idauidau, hegeregere Awake! magasin lalonai idia herevalaia gaudia oi laloa. Hereva namodia momo idia noho ita herevalaia totona, bona hereva idauidau momo ita ura henia neganai, ita hahedinaraia ita ese mauri ita laloa bada bona Iehova ese ia karaia gaudia ita ura henidia.

Tenis gadara namonamo tauna ta be ma tenis gadara namonamo taudia ida ia gadara hebou, ena gadara ia hanamoa totona. Unai hegeregerena, turadia maorodia ese iseda lalona bona hemami idia hanamoa bona lauma dalanai ita idia hagoadaia. To, turadia kereredia ese ita idia hagoadaia koikoi dalana ita badinaia bona mauri daladia rua ai nega tamona ita raka. Unai be dika, to lalona goevana ena mamina bona sibona matauraia karana do ita moalelaia be namo!

Namo Idia Davaria Taudia Haida

Taunimanima momo idia davaria Baibel ena hahediba herevadia, bona ena kara goeva bona lauma taravatudia idia dibaia be auka momokani lasi. To, ia auka gauna be unai gaudia badinaia karana. Do ita itaia haheitalai ese idia hahedinaraia, bamodia edia lalo-ani karadia namodia ese ita do idia durua diba, mai lalona ibounai ida Iehova ita hesiai henia totona.

Ena adavana ida ful-taim hesiai gaukara idia karaia Witness tauna ta ia gwau, ena bamodia edia haheitalai ese ena mauri lalonai ia tahua gaudia ia haidaua. Ia tubu daekau noho lalonai, ia ese dala kererena dekenai ia idia veria karadia ia haheaukalaia. To, ia ese do ia haroro bona hebou dekenai do ia lao hanaihanai totona ia idia hagoadaia taudia be ia abia hidi iena turadia ai idia lao. Unai taudia ia bamoa noho karana ese ia durua, lauma dalanai ia goada ia lao totona.

Ma Witness ta ia gwau: “Lau bona egu hahine ai headava murinai, ai lao kongregesen ta, unuseniai aiemai mauri lagani hegeregerena headava taudia rua be regula painia gaukara idia karaia taudia. Edia haheitalai ese ai ia durua ful-taim hesiai gaukara lalonai ai vareai totona. Bena ai danu be kongregesen lalonai painia gaukara lalohadaina habadaia totona ai gaukara. Unai dainai, momo be ai danu idia painia.”

Tiokratik gaukaradia idia karaia taudia ita bamoa dainai Iehova ita badinaia be haraga. Unai be bamodia edia lalona veria dalana namona amo ia vara hahenamo ma ta. Witness tauna ta, ia tauhau neganai ful-taim hesiai gaukara ia hamatamaia bona gabeai loaloa naria tauna ai ia lao be hari Watch Tower Society ena brens ta dekenai ia gaukara noho. Ia gwau: “Lau maragi neganai, ful-taim hesiai gaukara idia karaia taudia ese aiemai ruma idia vadivadi henia negadia be lau laloatao bona lau ura henia bada negadia. Aiemai aniani gabuna dekenai hanaihanai ma ta ia mai diba. Egu mauri lagani be 10 neganai, sekit naria tauna ta ese haroro baege ta lau ia henia. Unai baege lau naria namonamo ema bona hari.”

Ena matamata negana ia laloa neganai, unai Witness tauna be ma ia gwau: “Kongregesen lalonai idia noho tauhau momo be idia ura dikadika kongregesen gaukara idauidau idia karaia, bona edia haheitalai ese ai haida ia hagoadaia unai bamona ura ai abia totona.” Turana namodia ese unai tauhau idia durua, au maragina ia tubu daekau bena au badana ai ia lao bamona Keristani tauna goadana ai ia lao. Tamadia bona sinadia e, emui ruma dekenai emui natudia idia hagoadaia diba taudia umui boiria, a?​—⁠Malaki 3:​16.

Momokani, ita ibounai be hari ita gwauraia taudia hegeregerena ful-taim hesiai gaukara ita karaia diba lasi. To, ita ibounai be ‘mai iseda lalona ibounai, lauma ibounai, bona kudouna ibounai’ ida Iehova lalokau henia karana ita dibaia diba. (Mataio 22:37) Iseda turadia be mai anina bada unai lalokau habadaia karana dekenai bona, unai dainai, ia be mai anina bada mauri hanaihanai do ita abia helarona dekenai.

Salamo torea tauna ese mauri lalonai kwalimu dalana haragana bona korikorina ia gwauraia, ia gwau: “Inai bamona taudia be idia moale momokani: Idia ese kara dika taudia edia sisiba, bona edia laloa idia abia dae lasi. Idia ese kerere taudia edia kara bamona idia karaia lasi, Bona Dirava idia ura lasi taudia danu, idia noho hebou lasi. Ma inai taudia ese, Lohiabada ena Taravatu dekenai idia moale, bona Lohiabada ena Taravatu idia laloa, dina bona hanuaboi ibounai lalonai. Ma inai taudia be, sinavai badinai idia hadoa audia bamona, edia huahua atoa neganai, idia ese anina idia atoa bada herea. Edia raurau danu do idia kakoro lasi. Edia gaukara ibounai be ena anina ia vara, bona mai edia kwalimu danu.”​—⁠Salamo 1:​1-3.

Unai be gwauhamata namo hereana! Ena be ita goevadae lasi bona kerere ita karaia, iseda mauri lalonai do ita kwalimu bema ita ese dala ita kehoa, Iehova ese ita ia hakaua totona, bona bema ita ese Dirava ia henia bamodia edia lalona veria karana namona​—⁠iseda “Keristani varavara taudia tanobada kahana ibounai dekenai” edia hebamo karana​—⁠ita abia dae.​—⁠1 Petero 5:⁠9.

[Picture on page 24]

Kongregesen ai bamodia edia lalona veria karana namona ia noho

[Picture on page 25]

Tamadia bona sinadia e, emui natudia umui hagoadaia turana namodia do idia bamoa totona