Iehova be Daradoko Taudia Edia Taitai Ia Kamonai
AONEGA tauna, King Solomona ia gwau, “ibounai ese nega dika idia davaria noho, bona inai dika ia vara kava noho.” (Had. 9:11) Eda mauri lalonai hekwakwanai eiava hahetoho badana ta ia vara neganai, unai ese iseda mauri ia hadikaia diba. Hegeregere, ruma bese lalonai ta ia mase neganai, ita lalohisihisi bada. Wiki bona hua haida lalodiai, ita daradoko dainai ita laloa ita be hegeregere lasi Iehova ita guriguri henia totona.
Ta be unai bamona ia daradoko neganai, namona be ia ita hagoadaia bona durua. Salamo torea tauna, Davida be ita ia hagoadaia, ia gwau: “Hisihisi idia abia noho taudia, be Lohiabada ese ia durua noho, bona dagedage taudia ese tau haida idia hahisia neganai, Lohiabada ese unai hisihisi taudia ia abia isi noho.” (Sal. 145:14) Baibel ia gwau: “[Iehova] ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.” (2 Siv. 16:9) Salamo torea tauna ia gwau: “Lau be durua tauna ta lasi neganai, Lohiabada dekenai lau taitai, vadaeni ia ese lau dekenai ia haere, bona egu hekwarahi ibounai dekena amo lau ia hamauria.” (Sal. 34:6) Lalohisihisi tauna be ta ese ia durua lasi neganai, edena bamona Iehova ese iena taitai ia kamonai bona ia durua?
‘Hereva Namona Gwauraia’
Iehova be iseda Keristani tadikaka taihu ia gaukaralaia daradoko tauna idia hagoadaia totona. Baibel ese Keristani taudia ia hagania ‘manoka taudia do idia durua.’ (1 Tes. 5:14) Iseda Keristani tadikaka taihu edia hagoadaia herevadia ese daradoko tauna ia hagoadaia diba. Ena be nega kwadogina lalonai ia daradoko tauna ida ita herevahereva, to ita gwauraia hagoadaia herevadia ese ia durua diba. Reana guna tadikaka o taihu ta be unai bamona ia daradoko, bona ena hagoadaia herevadia amo daradoko tauna ia durua diba. Eiava unai bamona hekwakwanai ia davaria Keristani tadikaka o taihu ta ese ena turana ia durua diba. Unai dala idauidau amo Iehova ese Keristani tadikaka taihu ia gaukaralaia daradoko tauna idia durua totona.
Headava matamata elda tauna ta, ladana Alex ena sivarai mani ita laloa. Alex ena adavana be gorere badana ta ia davaria, bena ia mase. Sekit naria tauna ta be guna ena adavana ia mase, to gabeai ia headava lou. Ia dekenai ia vara gauna be Alex dekenai ia gwauraia. Ia gwau, ena adavana ia mase neganai ia lalohisihisi bada to kongrigeisen heboudia bona haroro gaukara ia lao neganai, goada ia abia. To ruma dekenai ia giroa lou neganai, sibona ia noho dainai ia lalohisihisi bada. Alex ia gwau: “Lau itaia ma haida be egu hekwakwanai idia lalopararalaia neganai, unai ese lau ia durua.” Oibe, ‘nega korikori ai hereva namona gwauraia’ karana ese lalohisihisi tauna ia durua diba.—Aon. 15:23.
Keristani elda ma ta be vabu bona dogae haida ia diba, bona ia ese Alex ia hagoadaia. Alex ia hamaoroa Iehova be iseda lalohisihisi bona dabu gaudia ia diba. Unai elda tauna ia gwau: “Bema hua eiava lagani haida lalonai oi ura oi headava lou, Iehova matanai unai be kerere lasi.” To, badina haida dainai vabu o dogae haida be idia headava lou lasi. Alex be unai tadikaka ena hereva ia laloa murinai ia gwau: “Tadikaka ena hereva ese lau ia durua lalohadai kereredia lau dadaraia totona. Badina nega haida lau laloa bema lau headava lou, egu mase vadaeni adavana lau lalokau henia lasi o Iehova ena taravatu adavana tamona adavaia karana lau utua.”—1 Kor. 7:8, 9, 39.
Salamo torea tauna Davida be hekwakwanai bona hahetoho momo ia davaria. Ia gwau: “Lohiabada ese kara maoromaoro taudia ia naria noho. Edia taitai be ia ese ia kamonai henia noho.” (Sal. 34:15) Iehova be nega korikori ai lo Keristani taudia ia gaukaralaia edia hagoadaia hereva namodia amo daradoko tauna idia durua totona. Daradoko tauna dekenai unai tadikaka taihu edia heduru be mai anina bada.
Keristani Heboudia amo Heduru Abia
Daradoko tauna be lalohadai kereredia ia abia haraga diba bona ia ura lasi ma haida do ia bamoa. To, Aonega Herevadia 18:1 ena sisiba ia gwau: “Ia sibona ia noho, turana lasi tauna, ese sibona ena ura mo ia tahua noho. Ia ese taunimanima haida edia laloa namodia ia ura lasi.” Alex ia gwau: “Emu adavana ia mase neganai, lalohadai kereredia momo oi abia diba.” Alex be ena adavana ia mase neganai, sibona ia nanadaia: “ ‘Egu adavana lau naria namonamo, eiava? Lau ese ena hemami lau lalopararalaia bona ena gorere lau laloa bada, eiava?’ Lau ura lasi sibona lau noho. Lau ura lau headava lou. Dina ta ta ibounai headava tatau mai edia adavadia lau itaia dainai, headava lou lalohadaina lau dadaraia be auka.”
Unai bamona ia lalohisihisi tauna be tura namodia ia bamoa be namo. Kongrigeisen heboudia ai tura namodia ia davaria diba. Kingdom Hall dekenai ita noho neganai, Dirava ena hereva amo lalohadai namodia ita abia diba.
Kongrigeisen heboudia ese ita idia durua lalohadai maorona ita abia totona, badina Baibel ena hereva ita kamonai bona ita laloa dobu. Hegeregere Iehova ena lohia siahuna bona ena ladana hahelagaia karana ita laloa neganai, iseda lalohisihisi gaudia ita laloa momo lasi. Danu, hebou ai Iehova ita dibaia namonamo neganai, ita laloparara ena be haida be iseda lalohisihisi eiava hemami idia diba lasi, to Iehova ia diba. Baibel ese ia hahedinaraia, Iehova be lalohisihisi taudia edia hemami ia diba. (Aon. 15:13) Dirava ia ura ita ia durua, bona unai ese ita ia hagoadaia bona durua ita haheauka totona.—Sal. 27:14.
King Davida be ena inai taudia ese idia hahisia neganai, mai taitai ida Iehova ia noia: “Egu lalona ia metau dainai, lau ese laloa dika lau davaria vadaeni. Egu lalona ia hisihisi, dika momokani.” (Sal. 143:4) Ta be hekwakwanai badana ta ia davaria neganai, ia lalomanoka bona ia gorere diba. Reana ta be gorere badana ta ia davaria o nega daudau lalonai ia gorere dainai ia lalohisihisi bada. Ita diba Iehova ese ita do ia durua ita haheauka totona. (Sal. 41:1-3) Hari inai negai, Dirava be hoa dalanai gorere ia hanamoa lasi, to gorere tauna dekenai aonega bona lalogoada ia henia ia haheauka totona. Namona be ita laloatao, hekwakwanai ita davaria neganai, Davida ia karaia bamona Iehova do ita guriguri henia. Davida ia gwau: “Dina gunadia lau laloa noho. Oiemu kara gunadia ibounai lau laloa noho. Oiemu imana edia kara badadia ibounai lau laloatao noho.”—Sal. 143:5.
Unai Baibel siridia ese idia hahedinaraia Iehova be iseda hemami ia diba bona idia hamomokania Ia ese iseda noinoi do ia kamonai. Bema Iehova ena heduru ita abia dae, ‘ia ese ita do ia durua.’—Sal. 55:22.
“Nega Ibounai Do Umui Guriguri”
Iamesi 4:8 ia gwau: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.” Dirava kahirakahira ita lao dalana ta be ia ita guriguri henia. Aposetolo Paulo ese ita ia hagoadaia ‘nega ibounai do ita guriguri’ totona. (1 Tes. 5:17) Ena be nega haida ia auka eda hemami ita gwauraia hedinarai totona, to “Lauma Helaga ese ita totona ia noinoi Dirava dekenai, mai taitai bada danu.” (Roma 8:26, 27) Momokani, Iehova be iseda hemami ia diba.
Taihu ta ladana Monika be ena hetura karana Iehova ida ia moalelaia. Ia gwau: “Guriguri, Baibel duahiduahi bona sibona egu stadi karana amo lau mamia Iehova be egu turana namona. Lau mamia egu mauri lalonai ia ese lau ia naria bona durua. Bona lau moale badina ena be nega haida ia auka egu hemami lau gwauraia hedinarai totona, to Iehova be unai ia diba. Lau dekenai iena kara namodia bona hahenamo be momo herea.”
Namona be Keristani tadikaka taihu edia heduru herevadia ita abia dae, kongrigeisen heboudia amo ita abia hagoadaia herevadia ita badinaia, bona guriguri amo iseda hemami be Iehova dekenai ita gwauraia hedinarai. Unai dala idauidau amo Iehova ia hahedinaraia ita ia laloa bada. Alex ia gwau: “Bema Iehova ese ia henia heduru daladia ibounai ita badinaia, iseda hetura karana Iehova ida be do ia goada noho, bona Dirava ena siahu amo hekwakwanai idauidau ita hanaia diba.”—2 Kor. 4:7.
[Box/Picture on page 18]
Daradoko Tauna Hagoadaia Herevadia
Salamo anedia be taunimanima edia hemami idauidau ia hahedinaraia. Danu, idia hahedinaraia Iehova ese daradoko tauna ena taitai ia kamonai. Mani unai ane haida ita itaia:
“Egu hisihisi bona gari neganai, lau ese Lohiabada lau boiboi henia. Durua totona Lohiabada dekenai lau tai henia. Ia ese iena Dubu lalonai, egu gadona ia kamonai. Durua totona lau boiboi neganai, be Lohiabada ese ia kamonai.”—Sal. 18:6.
“Lohiabada be lalohisihisi taudia kahirakahira ia noho, bona ia ese edia lalona ia ore taudia ia hamauria noho.”—Sal. 34:18.
“Edia kudoudia idia makohia taudia, be [Iehova] ese ia hagoadaia lou noho, bona edia bero ia kumia noho.”—Sal. 147:3.
[Picture on page 17]
“Hereva namona” ese daradoko tauna ia hagoadaia diba