Siahu Ita Abia Hekwakwanai Idauidau Hanaia Totona

“Lau dekenai siahu ia henia tauna amo goada lau abia gau ibounai lau karaia totona.”​—⁠FILI. 4:​13, NW.

1. Dahaka dainai Iehova ena taunimanima be hekwakwanai momo idia davaria?

IEHOVA ena taunimanima be hekwakwanai idauidau idia davaria. Ita be goevadae lasi taudia bona inai tanobada dikana ai ita noho dainai, hekwakwanai idauidau ita davaria. Hekwakwanai haida idia vara badina Dirava ena hesiai taudia bona ena inai taudia huanai badu ia noho. (Gen. 3:15) Abela ena nega amo ema bona hari, Dirava ese ena hesiai taudia ia durua tomadiho dainai idia davaria dagedage idia haheaukalaia, laloani karadia idia dadaraia, bona hekwakwanai ma haida idia hanaia totona. Dirava ena lauma helaga ena siahu dainai, hekwakwanai idauidau ita hanaia diba.

Tomadiho Dainai Ita Davaria Dagedage

2. Dahaka dainai taunimanima ese tomadiho ma haida idia dagedage henia, bona edena dala ai unai idia karaia?

² Taunimanima haida ese tomadiho ma haida idia ura henia lasi dainai, unai tomadiho taudia idia dagedage henidia. Unai bamona idia karaia badina idia ura unai tomadiho taudia idia hagaria edia tomadiho idia rakatania, bona idia ura lasi ma haida ese unai tomadiho do idia badinaia. Dagedage karadia be idauidau, haida be hehuni dalanai idia karaia, eiava nega haida taunimanima vairanai idia karaia. Baibel ia gwau Satani ena dagedage karadia be laiona bona kobra gaigaina bamona.​—⁠Salamo 91:13 duahia.

3. Edena dala ai Satani ena dagedage karadia be laiona bona gaigai bamona?

³ Laiona hegeregerena, Satani ese gavamani ia gaukaralaia iseda haroro gaukara idia taravatua, dibura ruma ai ita idia atoa, eiava iseda inai taudia ese ita idia dagedage henia. (Sal. 94:20) Yearbook ena ripoti momo ese idia hahedinaraia hari inai negai, Iehova ena Witnes taudia momo be unai bamona hekwakwanai idia davaria. Gabu momo ai, dubu gunalaia taudia o politikol oreadia ese Dirava ena taunimanima idia dagedage henidia. Unai laiona bamona dagedage karadia dainai, haida ese Iehova idia rakatania. Gaigai bamona, Diabolo be hehuni dalanai taunimanima ia koia bona taunimanima edia lalona ia veria iena ura idia karaia totona. Unai dala amo iseda abidadama ia hadikaia toho. To, Dirava ena lauma helaga ese ita ia durua dagedage idauidau ita haheaukalaia totona.

4, 5. Edena dala ai ita hegaegae diba dagedage ita haheaukalaia totona, bona dahaka dainai? Haheitalai ta gwauraia.

⁴ To, nega vaira ai do idia vara dagedage ita diba lasi. Unai dainai ita lalohekwarahilaia momo be anina lasi. To, ita hegaegae totona dagedage idia hanaia taudia edia haheitalai ita tohotohoa be namo. Laloa dobu karana ese idia ia durua dagedage idia haheaukalaia totona. Hegeregere, Baibel lalonai abidadama taudia edia sivarai, Iesu ena haheitalai bona hahediba herevadia idia laloa dobu. Unai ese edia lalokau Iehova dekenai ia hagoadaia. Iehova idia lalokau henia dainai hekwakwanai idauidau idia hanaia diba.

⁵ Malawi ai taihu rua edia ekspiriens mani ita laloa. Dagedage oreana ta ese ia doridia politikol pati ena kadi idia hoia totona, to idia hoia lasi dainai idia botadia, edia dabua idia kokidia, bona idia gwau do idia reipia. Unai orea idia koikoi idia gwau, Betele taudia be politikol pati kadi idia hoia. Iseda taihu idia gwau: “Ai be Iehova Dirava sibona ai tomadiho henia. Unai dainai, ena be brens opesi taudia ese unai kadi idia hoia, to emai lalona do ai haidaua lasi. Ena be ai do umui hamasea, to unai kadi do ai hoia lasi!” Unai taihu rua be edia gini goada karana dainai idia ruhadia.

6, 7. Iehova be edena dala ai ena hesiai taudia ia durua dagedage idia haheaukalaia totona?

⁶ Aposetolo Paulo ia itaia Tesalonika Keristani taudia be ‘dagedage lalonai Dirava ena hereva idia abia dae mai moale ida, unai moale be lauma helaga amo ia mai.’ (1 Tes. 1:​6, NW ) Idaunegai bona iseda negai Keristani taudia momo idia gwau, dagedage idia davaria neganai, edia lalona ai maino ia noho​—⁠unai be Dirava ena lauma helaga ena huahua ta. (Gal. 5:22) Unai maino ese edia kudouna bona lalona ia gimaia. Oibe, Iehova ese ena lauma helaga amo ena hesiai taudia ia durua idia aonega bona hahetoho idia haheaukalaia totona.a

⁷ Dagedage negadiai ita gini goada dainai, ita idia itaia taudia idia hoa. Idia gwau, toana be Iehova ena Witnes taudia be taunimanima edia goada ia hereaia goadana ese ia durudia dainai dagedage idia haheaukalaia. Bona unai be momokani badina lauma helaga ese ita ia durua noho. Aposetolo Petero ia gwau: “Bema Keriso ena ladana dainai umui idia gwauraia dika, umui moale, badina hairai laumana, Dirava ena lauma unai, be umui latanai ia noho.” (1 Pet. 4:14) Iehova ena kara maoromaoro taravatudia ita badinaia dainai, dagedage ita davaria, to ita diba Iehova be ita ia lalonamo henia. (Mat. 5:​10-12; Ioa. 15:20) Unai dainai ita moale!

Laloani Herevadia

8. (a) Dahaka ese Iosua bona Kaleba ia durua laloani karadia idia dadaraia totona? (b) Iosua bona Kaleba edia haheitalai amo dahaka ita dibaia?

⁸ Satani ese turadia edia laloani herevadia amo Keristani taudia ia dibagania toho. Taunimanima ese ita idia kirikirilaia, koikoi herevadia idia gwauraia, bona ita idia doria kara dika ita karaia totona. To, lauma helaga ena heduru amo unai kara idauidau ita hanaia diba. Hegeregere, dahaka ese Kaleba bona Iosua ia durua spai taudia 10 edia lalohadai kererena idia dadaraia totona? Lauma helaga ena hakaua dalana idia badinaia dainai, edia lalohadai be unai spai taudia 10 amo ia idau.​—⁠Numera 13:30; 14:​6-10, 24 duahia.

9. Dahaka dainai Keristani taudia be ma haida amo idia idau?

⁹ Lauma helaga ena heduru dainai, Iesu ena aposetolo taudia be Dirava idia kamonai henia bona tomadiho koikoi ena hahediba taudia idia dadaraia. (Kara 4:​21, 31; 5:​29, 32) Vaia, taunimanima momo be hutuma edia lalohadai idia abia dae sibona, badina idia ura lasi lalohadai ma ta idia gwauraia bona hepapahuahu idia havaraia. To, Keristani taudia momokanidia idia diba dala maorona do idia badinaia. Dirava ena lauma helaga ena heduru dainai idia gari lasi tanobada amo idia idau totona. (2 Tim. 1:⁠7) To, kongrigeisen lalonai ia vara diba laloani karana ta mani ita herevalaia.

10. Kongrigeisen lalonai dahaka hekwakwanai ia vara diba?

¹⁰ Nega haida matamata taudia haida ese idia davaria hekwakwanai badana ta be edia turana ta ese kara dika ta ia karaia neganai, iena kerere idia gwauraia hedinarai lasi. Reana idia laloa bema elda taudia idia hadibaia, unai ese edia hetura karana do ia hadikaia dainai, edia turana ena kerere idia hunia. Eiava kerere ia karaia tauna ese ena turana ia doria ena kerere ia hunia totona. Matamata taudia sibona ese unai bamona hekwakwanai idia davaria lasi. Taunimanima badadia danu be edia turadia o ruma bese tauna ta ena kerere be elda taudia amo idia hunia. To, Keristani tauna ese dahaka ia karaia be namo?

11, 12. Bema kongrigeisen lalonai ta ia kerere bona oi ia hamaoroa ena kerere oi hunia, dahaka do oi karaia, bona dahaka dainai?

¹¹ Mani inai sivarai oi laloa. Tadikaka matamata ta ladana Alex ia diba ena turana Steve be nega momo ponografi laulaudia ia itaia. Alex ese Steve ia hamaoroa ia karaia karana be kerere bona ia hadokoa haraga be namo. To, Steve ia kamonai lasi. Alex ese ia hamaoroa namona be elda taudia ia itaia. To, Steve ia gwau, bema idia ruaosi be tura namodia, Alex be elda taudia do ia hadibaia lasi. Alex ia ura lasi edia hetura karana ia dika dainai, elda taudia do ia hadibaia lasi, a? Reana Alex be inai bamona do ia laloa: ‘Bema Steve ia gwau lau herevalaia gaudia ibounai be koikoi, elda taudia be daika ena hereva do idia abia dae? Lau eiava Steve?’ Bema Alex ese elda taudia ia hadibaia lasi, ia be Steve ia durua lasi bona Steve ese Iehova ia rakatania diba. Aonega Herevadia 29:25 ese Alex ia durua diba, ia gwau: “Taunimanima do oi gari henia neganai, dika do oi davaria, tarapu lalonai oi moru bamona. To bema Lohiabada oi abidadama henia neganai, mauri do oi davaria.” Alex be ma dahaka ia karaia diba? Reana Steve do ia hereva henia lou, bona ia durua ena kara dika ia gwauraia hedinarai totona. Alex be unai ia karaia totona, ia gari lasi be namo. Alex ese Steve do ia hamaoroa elda taudia dekenai ia lao be namo, to bema ia lao lasi, Alex ese elda taudia do ia hadibaia. Reana, unai neganai Steve do ia kamonai bona elda tauna ta dekenai do ia lao.​—⁠Lev. 5:⁠1.

¹² Bema oi danu be unai bamona hekwakwanai ta oi davaria, reana matamanai emu turana ese emu heduru do ia abia dae lasi. To, gabeai do ia laloparara oi be iena namo oi laloa bada dainai, unai bamona oi karaia. Bema emu turana be elda taudia edia heduru ia abia dae bona edia sisiba ia badinaia, emu gari lasi karana bona lalokau karana do ia laloaboio lasi. To, bema oi dekenai ia badu badina oi be elda taudia oi hamaorodia, vadaeni oi ura unai bamona tauna oi bamoa, a? Iseda Turana hereadaena, Iehova, ita hamoalea be gau badana. Bema Iehova ena ura ita atoa guna, Ia idia lalokau henia taudia ma haida ese ita do idia matauraia bona iseda turana korikori ai do idia lao. ‘Namo lasi Diabolo ena dala ita kehoa.’ Bema ita naria namonamo lasi, Iehova ena lauma helaga ita hahisia diba. Namona be lauma helaga ida ita gaukara hebou, Keristani kongrigeisen ia goeva noho totona.​—⁠Efe. 4:​27, 30, NW.

Hekwakwanai Idauidau

13. Iehova ena hesiai taudia be edena bamona hekwakwanai idia davaria noho, bona dahaka dainai idia bada idia lao?

¹³ Hekwakwanai be idauidau, hegeregere moni ena hekwakwanai, haida be edia moni gaukara idia haboioa, ia vara kava dika badadia, lalokau tauna ta ia mase, haida be gorere badana ta idia abia bona gau ma haida. “Nega aukadia” ai ita noho dainai, reana hari o kerukeru ita dekenai dika ta ia vara diba. (2 Tim. 3:​1, NW ) To, herevana dahaka ia vara, namona be ita gari o lalohekwarahi lasi. Lauma helaga ese ita ia durua diba hekwakwanai idauidau ita haheaukalaia totona.

14. Dahaka ese Iobu ia durua ena hekwakwanai ia haheaukalaidia totona?

¹⁴ Iobu danu be hekwakwanai momo ia davaria. Ena animal bona kohu ia haboioa, ena natuna idia mase, gorere badana ta ia abia, bona ena adavana be Iehova ia abidadama henia lasi. (Iobu 1:​13-19; 2:​7-9) To, Elihu ese Iobu ena lalona ia hagoadaia. Elihu bona Iehova edia hereva badana be inai: “Oi gini, bona Dirava ena hoa karadia do oi laloa.” (Iobu 37:14) Dahaka ese Iobu ia durua ia davaria hekwakwanai ia haheaukalaia totona? Bona dahaka ese ita ia durua diba eda hekwakwanai ita haheaukalaia totona? Iehova ena lauma helaga bona siahu amo ia havaraia gaudia idauidau ita laloa dobu bona laloatao karana ese ita do ia durua. (Iobu 38:​1-41; 42:​1, 2) Reana, iseda mauri lalonai ia vara gauna ta ese ia hamomokania Iehova be ita ia laloa bada. Oibe, Iehova be ita do ia laloaboio lasi.

15. Dahaka ese Paulo ia durua ena hekwakwanai ia haheaukalaidia totona?

¹⁵ Aposetolo Paulo be ena abidadama dainai, hekwakwanai momo ia davaria. (2 Kor. 11:​23-28) Unai nega aukadia lalonai, dahaka ese Paulo ia durua ia laloa maoromaoro bona ia daradoko lasi totona? Iehova guriguri henia loulou karana ese ia durua. Paulo be dibura ruma ai idia koua bona kahirakahira do idia hamasea neganai, inai hereva ia torea: “Lohiabada ese lau ia durua bona lau ia hagoadaia, vadaeni sivarai namona lau harorolaia guguru, bona idau taudia ibounai ese idia kamonaia diba. Bona Lohiabada ese laiona ena uduna amo lau ia hamauria.” (2 Tim. 4:​17, NW ) Paulo be Dirava ena lauma helaga ena heduru ia abia dainai, ia ese Keristani taudia ma haida ia hagoadaia ia gwau: “Namo lasi gau ta umui lalohekwarahilaia.”​—⁠Filipi 4:​6, 7, 13 duahia.

16, 17. Hari inai negai, Iehova ese ena taunimanima ia durua sivaraina ta mani oi gwauraia.

¹⁶ Painia taihu ta ladana, Roxana, be Iehova ese ena taunimanima ia naria dalana ia itaia. Ena bosi ia noia bema namo, hebouhebou ia lao totona dina haida do ia gaukara lasi. To, ena bosi be mai badu ida ia gwau: “Bema unai hebouhebou dekenai oi lao, oi do lau hadokoa.” To, Roxana be hebouhebou dekenai ia lao, bona ia guriguri goadagoada ena moni gaukara ia haboioa lasi totona. Unai murinai ia lalohekwarahi lasi. To madi, Monday ai ena gaukara dekenai ia giroa lou neganai, ena bosi ese ia hadokoa. Roxana be ia lalohisihisi bada. Ena be ena pei be bada lasi, to ia ura lasi unai moni gaukara ia haboioa badina unai amo iena ruma bese ia naria diba. Ia guriguri lou, bona ia laloa: “Iehova ese hebouhebou dekenai Baibel ena hereva namodia amo lau ia hagoadaia dainai, lau diba ia ese tauanina dalanai lau do ia naria danu.” Ena ruma dekenai ia giroa lou lalonai, notisbod ta dekenai ia itaia kampani ta be dabua turia masini idia gaukaralaia diba taudia ia tahua. Unai kampani dekenai revareva ta ia siaia. Ena be Roxana be unai gaukara dekenai ia manada lasi, to bosi ese ia dekenai gaukara ia henia bona ia abia pei be gaukara gunana ena pei ia hanaia. Roxana ia diba Iehova ese ena guriguri ia haerelaia. To, ia abia hahenamo badana be ena gaukara turadia dekenai sivarai namona ia harorolaia diba. Idia faiv, ena bosi danu, be hereva momokani idia abia dae bona idia bapatiso.

¹⁷ Nega haida toana be Dirava ese iseda guriguri ia haerelaia haraga lasi o ena haere be iseda ura hegeregerena lasi. Bema unai bamona oi mamia, badina namona ta ia noho bona Iehova sibona be unai ia diba. Vaira negana ai unai do ita lalopararalaia. To inai ita diba: Dirava be ena abidadama hesiai taudia do ia rakatania lasi.​—⁠Heb. 6:10.

Hahetoho Bona Hedibagani Ita Hanaia

18, 19. (a) Dahaka dainai hedibagani ita davaria neganai, ita hoa lasi? (b) Edena dala ai hekwakwanai idauidau oi hanaia diba?

¹⁸ Iehova ena taunimanima be hedibagani, lalomanoka, dagedage, bona laloani karadia idia davaria neganai, idia hoa lasi. Idia diba tanobada taudia ese idia ura henia lasi. (Ioa. 15:​17-19) To, Dirava ita hesiai henia lalonai, lauma helaga ese ita do ia durua hekwakwanai idauidau ita hanaia totona. Iehova ese dala do ia kehoa, hedibagani ita dadaraia totona. (1 Kor. 10:13) Ia ese ita do ia rakatania lasi. (Heb. 13:⁠5) Baibel ena hereva ita badinaia neganai, unai ese ita ia gimaia bona hagoadaia. Danu, Dirava ena lauma helaga ese tadikaka taihu ia hagoadaia ita idia durua totona.

¹⁹ Lauma helaga ena heduru ita abia totona, namona be hanaihanai ita guriguri bona Baibel ita stadilaia. Aposetolo Paulo ia gwau: “Ena siahu hereadaena dainai goada do umui abia, unai amo gau ibounai do umui haheaukalaia, do umui hesiku lasi bona do umui moale.”​—⁠Kol. 1:​11, NW.

[Footnote]

Edena Bamona Do Oi Haere?

• Edena dala ai vaira neganai do idia vara dagedage karadia totona oi hegaegae diba?

• Bema ta ese oi ia hamaoroa ena kerere oi hunia totona, dahaka do oi karaia?

• Herevana dahaka hekwakwanai ita davaria, to dahaka ese ita ia durua diba?

[Picture on page 28]

Iosua bona Kaleba amo dahaka ita dibaia?

[Picture on page 29]

Emu turana be kerere ta ia karaia neganai, dahaka do oi karaia?